Luombe Lumo, ne Mukumbi Umo

“Bānwe banonda’bo, . . . mukatentama pa bipona dikumi ne bibidi, kuketa mambo a bisaka dikumu ne bibidi bya bene Isalela.”—MAT. 19:28.

1. Lelo Yehova wādi wikele namani na lutundu lwa Abalahama, ne mwanda waka kekishintululapo amba wādi usūdile mizo mikwabo yonso?

 YEHOVA wāsenswe Abalahama, o mwanda wālombwele buswe bwa dikōkeji ku lutundu lwa Abalahama. Mu myaka tutwa 15 ne musubu, wādi umwene muzo wa Isalela, wālupukile ku musuku wa Abalahama, bu bandi bantu batongwe, bandi “aye mwine.” (Tanga Kupituluka 7:6.) Le kino kishintulula’mba Yehova wādi usūdile bantu ba mizo mikwabo? Mhm. Mu kitatyi’kya, boba bakubulwa kwikala Bene Isalela bādi basaka kutōta Yehova kebākankejibwepo kulamata ku muzo wandi wa pa bula. Bano baālamukile, bētūtyile’mo, bāmwenwe bu badi mu uno muzo. Bādi banenwe kumonwa pamo bwa banababo na Isalela. (Levi 19:33, 34) Kadi bādi banenwe kukōkela bijila byonso bya Yehova.—Levi 24:22.

2. Le i mwanda’ka utulumuja wānene Yesu, ne witutwala ku bipangujo’ka?

² Ino, Yesu wānene uno mwanda utulumuja ku Bayudea ba mu andi mafuku amba: “Bulopwe bwa Leza bukemunyongolwa bukapebwa ku muzo bantu bakupana bipa byabo.” (Mat. 21:43) Lelo i bāni badi ba kubunda uno muzo mupya, ne kuno kushinta kwitutala namani dyalelo?

Muzo Mupya

3, 4. (a) Lelo mutumibwa Petelo wātelele namani muzo mupya? (b) Le i bāni babundile uno muzo mupya?

³ Mutumibwa Petelo wātelele patōkelela uno muzo mupya. Wāsonekēle banababo Bene Kidishitu amba: “Bānwe’bo mwi lukongo lutongibwe, bupidishitu bwa bulopwe, muzo wa bu-ujila, bantu bakumunwa na Leza enka, amba musapule byobya byabuya byandi bitabukilemo kunengela aye wemwityile mu fukutu ku mwinya wandi wakutendelwa.” (1 Pet. 2:9) Enka na mokyālailwe, Bayuda ba ku ngitu bāitabije Yesu bu Meshiasa bo babajinji mu uno muzo mupya. (Dan. 9:27a; Mat. 10:6) Kupwa, bavule bakubulwa kwikala Bene Isalela batwejibwe mu uno muzo, mwanda Petelo wābwejeje’ko amba: “Bānwe badi pa kala bampikwa bu-bantu, ino pano ke mwi bantu ba Leza.”—1 Pet. 2:10.

⁴ Lelo Petelo wādi unena bāni? Ku ngalwilo ya mukanda wandi, unena’mba: “[Leza] wetubutwile kupya ku kukulupila kwa būmi pa kusanguka kwa Yesu Kidishitu mu lufu, ku bupyane bwa kubulwa kubola, nansha kujilulwa, nansha kujimina kwine mpika, bwimubīkilwe mūlu.” (1 Pet. 1:3, 4) Nanshi uno muzo mupya i mubundwe na Bene Kidishitu bashingwe māni, badi na lukulupilo lwa kwenda mūlu. I “bene Isalela ba Leza.” (Ngat. 6:16) Mu kimonwa kimo, mutumibwa Yoano wāmwene amba bungi bwa bano Bene Isalela ba ku mushipiditu i 144000. “Bakūdilwe umbukata mwa bantu ke byakulakisha bya Leza, ne bya Kāna-ka-mukōko” bengile bu “bapidishitu” ne ba “kukabikala [na Yesu] myaka kanunu.”—Kus. 5:10; 7:4; 14:1, 4; 20:6; Yak. 1:18.

Le Mubadilwa ne Bakwabo?

5. (a) Lelo muneneno “bene Isalela ba Leza” ufunkila pa bāni? (b) Mwanda waka kishima “Isalela” kekidipo enka na buluji bumo kete?

⁵ Na bubine, musemwa “bene Isalela ba Leza” wa mu Ngalatea 6:16 ufunkila enka pa Bene Kidishitu bashingwe māni. Inoko, le  kudi bitatyi bitela Yehova Isalela bu kyelekejo, kifunkila ne pa Bene Kidishitu bakwabo bakubulwa kushingwa māni? Kilondololwa kitanwa mu binenwa bya Yesu ku batumibwa bandi ba kikōkeji amba: “Nami eyo nkemutongela bulopwe monka mwāntongele Tata. Amba mudye mutome pa mesa ami umbulopwe bwami mutentamine ponka pa bipona kuketa myanda ya ku bisaka dikumi ne bibidi bya bwine Isalela.” (Luka 22:28-30) Bino bikalongeka pa “kupangulula,” kitatyi kya kulonga dipya, mu Umbikalo wa Kidishitu wa Myaka Kanunu.—Tanga Mateo 19:28.

6, 7. Lelo i pa bāni pafunkila “bisaka dikumi ne bibidi bya bene Isalela” bitelelwe mu Mateo 19:28 ne Luka 22:30?

⁶ Ba 144000 bakengilanga mūlu bu balopwe, bapidishitu ne bu batyibi mu Umbikalo wa Myaka Kanunu. (Kus. 20:4) Le bakatyibanga mambo a bāni ne kubikadila bāni? Mu Mateo 19:28 ne mu Luka 22:30, betulombola’mba bakatyibanga mambo a “bisaka dikumi ne bibidi bya bene Isalela.” Le “bisaka dikumi ne bibidi bya bene Isalela” pano byelekeja bāni? Bifunkila pa bonso badi na lukulupilo lwa kwikala pano pa ntanda—boba betabija mu kitapwa kya Yesu ino kubadilwa mpika mu kabumbo ka balopwe bapidishitu. (Kisaka kya Levi kekyādipo kibadilwa mu bisaka 12 bya Isalela wa ku ngitu.) Bantu belekejibwe pano bu bisaka 12 bya Bene Isalela i boba bakamwena ku mushipiditu mu mingilo ya bupidishitu bwa ba 144000. Bano bantu bampikwa kwikala bapidishitu bakamwena’mo’ba nabo i bantu ba Leza, kadi wibasenswe ne kwibetabija. I kyendele’mo badingakanibwe bu bantu bandi ba pa kala.

⁷ Bidi na buluji, mutumibwa Yoano pa kupwa kumona Bene Isalela ba ku mushipiditu 144000 batūlwa biyukeno bya lonso kumeso kwa kyamalwa kibuke, wāmwene ne “kibumbo kikatampe,” kekibadibwapo kitamba “mu mizo yonso.” (Kus. 7:9) Bano’ba bakapandanga ku kyamalwa kibuke mu Umbikalo wa Myaka Kanunu wa Kidishitu. E mobakemona na bavule bene bakasangulwa. (Yoa. 5:28, 29; Kus. 20:13) Abo bonso bakabunda “bisaka dikumi ne bibidi bya bene Isalela” wa kyelekejo, bakatyibilwa mambo na Yesu ne bakabikala nandi 144000.—Bil. 17:31; 24:15; Kus. 20:12.

8. Le bintu byādi bilongwa mwaka ne mwaka mu Difuku dya Kipwanyo byelekeja namani kipwano kya ba 144000 ne bantu bakwabo?

⁸ Kino kipwano kidi pa ba 144000 ne bantu bakwabo kyāelekejibwe na bintu byādi bilongwa mwaka ne mwaka mu Difuku dya Kipwanyo. (Levi 16:6-10) Mupidishitu mukatampe wādi unenwe, dibajinji, kwela kitapwa kya ñombe bu kyakwela kya bubi “kya aye mwine, ne kya ba munjibo mwandi mwine.” Nanshi, kitapwa kya Yesu kingidijibwanga dibajinji ku ba mu kipango kyandi kya bapidishitu, bakengila nandi momwa mūlu. Kadi pa kala mu Difuku dya Kipwanyo, kwādi kuletwa bambuji babidi mwanda wa bubi bwa Bene Isalela bakwabo. Mu uno mwanda, mudi kisaka kya bapidishitu kifunkila pa 144000, Bene Isalela bakwabo belekeja boba bonso badi na lukulupilo lwa kukekala pano panshi. Ino nshintulwilo ilombola amba “bisaka dikumi ne bibidi bya bene Isalela,” bitelelwe mu Mateo 19:28 kebifunkilapo pa bapidishitu batyebatye ba ku mushipiditu ba Yesu, ino bifunkila pa bakwabo bonso badi na lwitabijo mu kitapwa kya Yesu. *

9. Lelo bapidishitu ba mu tempelo ya mu kimonwa kya Ezekyele belekeja bāni, ne Bene Isalela bakubulwa kwikala bapidishitu belekeja bāni?

⁹ Tala kimfwa kikwabo. Mupolofeto Ezekyele wāpelwe kimonwa kilampe kya tempelo ya Yehova. (Ezek., mashapita 40-48) Mu kimonwa’kya, bapidishitu bādi bengila mu tempelo, bapāna bulombodi ne kutambula madingi a Yehova ne bulemununi. (Ezek. 44:23-31) Ponka’po, bantu ba mu bisaka palapala bāiya kutōta ne kwela bitapwa. (Ezek. 45:16, 17) Mungya uno mwanda, bapidishitu belekeja  bashingwe māni, ino Bene Isalela ba mu bisaka byakubulwa kwikala bapidishitu belekeja boba badi na lukulupilo lwa būmi pano panshi. Kimonwa kishintulula’mba bisumpi bibidi bingidilanga pamo mu ndudi, na kabumbo ka bupidishitu kendeja mutōtelo utōka.

10, 11. (a) Le twi bemwene kufikidila’ka kukomeja lwitabijo kwa binenwa bya Yesu? (b) Le i kipangujo’ka kyaipangulwa kitala mikōko mikwabo?

¹⁰ Yesu wēsambile pa “mikōko mikwabo” keyādipo mu “kipombo” kimo na “kaluombe katyetye” ka balondi bandi bashingwe māni. (Yoa. 10:16; Luka 12:32) Wānene’mba: “Poso nayo’nka neīlete nayo ī kēvwane diwi dyami, nabya īkēkalanga luombe lumo, ne mukumbi aye umo.” Bine, kumona kufikidila kwa bino binenwa kukomejanga lwitabijo! Bisumpi bibidi bya bantu i bilamakanibwe pamo—kisumpi kityetye kya bashingwe māni ne kibumbo kikatampe kya mikōko mikwabo. (Tanga Zekadia 8:23.) Nansha mikōko mikwabo byo kebengilangapo mu kipango kya munda kya tempelo ya ku mushipiditu, bengilanga mu kipango kya panja kya ino tempelo.

¹¹ Ino shi Yehova wingidija kyaba kimo bano bantu bakubulwa kwikala bapidishitu ba Isalela wa kala mwanda wa kwelekeja ino mikōko mikwabo, lelo boba bakulupile kwikala na būmi pano panshi nabo bafwaninwe kudya ne kutoma byelekejo bya ku Kivulukilo? Tusa kubandaula malondololo a kino kipangujo.

Kipwanino Kipya

12. Lelo Yehova wālaile mpangiko’ka mipya?

¹² Yehova wālaīle bantu bandi mpangiko paānene’mba: “Kine kino’ki kyo kipwano kyo nkasamba ne njibo ya Isalela, oa mafuku pa kupwa . . . nkatūla mukanda wa bijila wami munda mwabo; kabidi nkalemba’o umutyima wabo; penepo nkekalanga Leza wabo, nabo bakekalanga bami bantu.” (Yel. 31:31-33) Kupityila ku kino kipwano kipya, mulao wa Yehova kudi Abalahama wādi wa kufikidila na ntumbo kadi nyeke.—Tanga Ngalwilo 22:18.

13, 14. (a) Lelo i bāni babadilwa mu kipwanino kipya? (b) Le i bāni bamwena’mo, ne i muswelo’ka ‘obominine’ na kino kipwano?

¹³ Yesu wātelele kino kipwano bufuku bwābadikile lufu lwandi paānene’mba: “Kino kitomeno nakyo i kipwanino kipya kya mu mashi ami a kwimumwangikila.” (Luka 22:20; 1 Kod. 11:25) Lelo Bene Kidishitu bonso babadilwa mu kino kipwanino? Mhm. Bamo, pamo bwa batumibwa bātomene kyokya kitomeno kyolwa’kya, babadilwanga mu kipwanino kipya * Yesu wāsambile nabo kipwānino kikwabo kya kubikala nabo pamo mu Bulopwe bwandi. (Luka 22:28-30) Bakabikalanga na Yesu mu Bulopwe bwandi.—Luka 22:15, 16.

¹⁴ Lelo boba bakekala na būmi mu Bulopwe bwandi pano pa ntanda napo le? Abo bakamwenanga mu kipwanino kipya. (Ngat. 3:8, 9) Nansha byokebabadilwapo mu kino kipwano, ‘bominine’ nakyo na kukōkela ku mbila yakyo, enka na mokyālailwe na mupolofeto Isaya’mba: “Beni betūta kudi Yehova kumwingidila, ne kusanswa dijina dya Yehova, kwikala bengidi bandi, enselele ulama dya sabado ne kusubija’dyopo kwidijilula mpika, ne kūminina pa kipwano kyami. Boba nkaleta’bo ku lūlu lwami lukola, ne kwipaba tusepo mu njibo yami ya lulombelo.” Penepa Yehova amba: “Ino njibo yami ikenikwa bunjibo ya lulombelo ya bantu bonsololo.”—Is. 56:6, 7.

Le ba Kudya ne Kutoma I Bāni?

15, 16. (a) Lelo mutumibwa Polo ukwatañanya kipwano kipya na bika? (b) Mwanda waka boba badi na lukulupilo lwa kukekala pano panshi kebafwaninwepo kudya ne kutoma ku byelekejo bya Kivulukilo?

¹⁵ Boba badi mu kipwano kipya badi na “bukankamane bwa kutwela mu kīne kikola nakampata.” (Tanga Bahebelu 10:15-20.) Abo bo ba “kutambula bulopwe bwampikwa kuyūka kutenkana.” (Bah. 12:28) Nanshi, enka boba bakabikala bu balopwe ne bu bapidishitu na Kidishitu momwa mūlu bo bafwaninwe kutoma “kitomeno” kyelekeja kipwano kipya. Bano  babadilwa mu kipwanino kipya bo abo balailwe butundaile bwa Kana ka Mukōko. (2 Kod. 11:2; Kus. 21:2, 9) Bakwabo bonso batanwa ku Kivulukilo kya pa mwaka babandilanga na bulēme, kebadyangapo ne kutoma ku byelekejo.

¹⁶ Polo nandi witukwasha twivwanije amba boba badi na lukulupilo lwa kukekala pano panshi kebadyangapo ku byelekejo bya Kivulukilo. Wānene Bene Kidishitu bashingwe māni amba: “Mwanda monso monso mo mudila mukate uno, ne kutoma kitomeno kino, musapulanga lufu lwa mfumwetu, poso’nka afike.” (1 Kod. 11:26) Lelo Mfumwetu ‘ufika’ kitatyi’ka? Kitatyi kyaiya kuselela mūlu muntu wa mfulo wa mu kabumbo ka mutundaile mushingwe māni. (Yoa. 14:2, 3) I bimweke patōka’mba, kuvuluka mwaka ne mwaka Bidibwa bya ku Kyolwa bya Mfumwetu kukafulanga. “Basheleshelepo” ba lukunwa lwa mwana-mukaji bakidi pano pa ntanda bakendelela kudya bino bidibwa poso’nka abo bonso bakatambule mpalo yabo ya momwa mūlu. (Kus. 12:17) Ino, shi byadi’mba boba bakekala na būmi bwa nyeke pa ntanda badi banenwe kudya ku byelekejo, longa byakudya bya Kivulukilo byadi bifwaninwe kwendelela nyeke.

Penepa “Bakekalanga Bantu Bami”

17, 18. Lelo bupolofeto busonekelwe mu Ezekyele 37:26, 27 i bufikidile namani?

¹⁷ Yehova wālaile bumo bwa bantu bandi mu bino bishima: “Nkasamba kipwano kya ndoe nabo; kikekalanga kipwano kya kuladilamo nyeke ko badi; ebiya nkebatūla, ne kwibavudija, ne kukabīka kipandulwamo kyami umbukata mwabo, nyeke ne nyeke. Ino kikalo kyami nakyo kikekala nabo, nami nkekalanga Leza wabo, nabo bakekala bantu bami.”—Ezek. 37:26, 27

¹⁸ Bantu ba Leza bonso badi na dyese dya kumwena mu kufikidila kwa uno mulao wa kutendelwa, kino kipwano mwanda wa ndoe ya Bwine Kidishitu. I amo, Yehova i mulaye ndoe ku bengidi bandi bonso ba kikōkeji. Kipa kya mushipiditu wandi i kimweke mobadi. Kipandulwa’mo kyandi, pano kyelekeja mutōtelo utōka wa Bwine Kidishitu, kidi mobadi. Abo bine ke bantu bandi, mwanda i baleke miswelo yonso ya kutōta bankishi kebatōta Yehova Leza umo kete.

19, 20. Lelo i bāni babadilwa mu boba betwa na Yehova bu “bantu bami,” ne i bika bikokejika kulongeka kupityila ku kipwanino kipya?

¹⁹ Bine, i kya nsangaji pa kusapula mu kino kyetu kitatyi kukutwa umbumo kwa bibumbo bibidi! Nansha kibumbo kikatampe byokekidipo na lukulupilo lwa kwenda mūlu, kisangele bininge kwikala pamo na boba badi nalo. I balamate kudi Isalela wa Leza. Na kulonga namino, babadilwa mu betwa na Yehova bu “bantu bami.” Tutana mobadi kufikidila kwa buno bupolofeto: “Mizo mingi ikelundako kudi Yehova mu dyodya difuku’dya, kadi bakekalanga bantu bami; nami nkekalanga umbukata mobe.”—Zek. 2:11; 8:21; tanga Isaya 65:22; Kusokwelwa 21:3, 4.

²⁰ Kupityila ku kipwanino kipya, Yehova ukalengeja bino byonso bilongeke. Midiyo ya beni ba ku mushipiditu abatwela mu muzo wa Yehova waitabije. (Mika 4:1-5) I basumininwe kwendelela kūminina na kino kipwano na kwitabija mpango yakyo ne kukōkela mbila yakyo. (Is. 56:6, 7) Nabya, pamo na Isalela wa Leza, bamwenanga madyese mavule a ndoe ya endaenda. Nanshi ano madyese ekale nenu—dyalelo ne mu kitatyi kiya kumeso!

[Kunshi kwa dyani]

Lelo Ubavuluka?

• Le “bisaka dikumi ne bibidi bya bene Isalela” bikatyibilwa mambo na 144000 i bāni?

• Lelo i kipwano’ka kidi pa bashingwe māni ne mikōko mikwabo mu kipwanino kipya?

• Lelo Bene Kidishitu bonso bafwaninwe kudya ne kutoma ku byelekejo bya Kivulukilo?

• Lelo i bumo’ka bwālailwe mu ano etu mafuku?

[Bipangujo bya Kifundwa]