Bipangujo bya Batangi

Yehova byapeleje kutōta bankishi, mwanda waka kāpelepo Alone mfuto pa kupunga kyana kya ñombe kya nsahabu?

Alone pa kupunga kyana kya ñombe kya nsahabu na mokisonekelwe mu Divilu shapita 32, wātyumwine kijila kya Leza kipeleja kutōta bankishi. (Div. 20:3-5) Ku mfulo, “Yehova wamufunine Alone bulobo byamwiko bwa kumonakanya; kadi [Mosesa wamusengela] Alone mwine kyonka kyokya kitatyi’kya.” (Kup. 9:19, 20) Lelo Lulombelo lwa kininga lwa Mosesa muntu moloke lwādi lutabukile bulēme mu mwanda wa Alone? (Yak. 5:16) Eyo, bimweka’mba Yehova wālondolwele milombelo ya Mosesa ne kuleka kupa Alone mfuto, pa mwanda wa luno lulombelo lwa kininga ne pa mwanda wa bubinga bukwabo bubidi.

Mobimwekela bubinga bubajinji i mwanda wa kikōkeji kya Alone. Kitatyi kyāpelwe Mosesa mwingilo wa kwenda ku meso a Felo ne kulupula Bene Isalela mu Edipito, Yehova wātongele Alone kwenda na Mosesa ne kumwikadila bu kyakanwa kyandi. (Div. 4:10-16) Bano bana-balume babidi bākōkele kwenda ku meso a mulopwe wa Edipito misunsa mivule ne kusanshijibwa na Felo wa mutyima mūmu. Pobādi bakidi mu Edipito, Alone wēlombwele bu muntu wa kikōkeji, mupyasakane mu mwingilo wa Yehova.—Div. 4:21.

Tala kadi byātonwene Alone alonge kyana kya ñombe kya nsahabu. Mosesa wādi ku lūlu lwa Shinai mafuku 40. “Bantu pa kumona’mba Mosesa waije kutūka ku lūlu,” bānena Alone ebalongele nkishi. Alone wēbevwana ne kulonga nkishi wa kyana kya ñombe kya nsahabu. (Div. 32:1-6) Inoko byālongele Alone pa kupwa, bilombola amba kādipo na mutyima wa kutōta nkishi. I bimweke patōka amba wālongele kino mwanda wa kutyinibwa mbavu. Kimfwa Mosesa pa kufikija mwanda wa kutōta bankishi pa kanketenkete, bana bonso ba Levi—kubadila’mo ne Alone—bāimene nshinkidingi ku mutamba wa Yehova. Batōtyi ba bankishi tununu tusatu bene bēkupile ku buno butōtyi bātapilwe.—Div. 32:25-29.

Kupwa Mosesa wāsapwila bantu amba: “Umbapu kupya mambo makatampe.” (Div. 32:30) O mwanda Alone kādipo umo kete wāpile mambo a kino kilongwa kibi. Aye ne bantu kumo bāmwenine mu lusa lukatampe lwa Yehova.

Uno mwanda wa kyana kya ñombe kya nsahabu pa kupwa, Yehova wāleta musoñanya wa kutūla Alone ke mupidishitu mukatampe. Leza wānena Mosesa amba: “Kadi ukavwika Alone ne bivwalwa bijila, ne kukamushinga māni, ne kumupandulamo aye, amba añingidile mu mingilo ya bupidishitu.” (Div. 40:12, 13) I kimweke patōka amba Yehova wāfwidile Alone lusa pa bukōkekōke bwandi. Mutyima wa Alone wādi utēle ku kuzunzula mutōtelo wa bine, ke ku butombokipo bwa kutōta bankishi.