Wifunde Kinenwa Kya Leza

Yesu Kidishitu I Ani?

Kino kishinte kipangula bipangujo byokodi padi mwiipangule ne kukulombola kwine kokokeja kutanga malondololo mu obe Bible. Batumoni ba Yehova bakasangela kwisamba nobe ano malondololo.

1. Yesu Kidishitu i ani?

Yesu i mwishile na bantu bakwabo, wādi mūlu bu muntu wa ku mushipiditu kumeso kwa kubutulwa’ye pano panshi. (Yoano 8:23) Ye mubajinji kupangwa na Leza, kadi wākweshe mu kupanga bintu bikwabo. I muntu umo kete wāpangilwe na Yehova kasuku kandi, o mwanda witwanga bu “Mwana wa kasuku” wa Leza. Yesu wāingile bu Musedi wa myanda wa Leza, po pa mwanda witwanga ne bu “Mwanda.”—Yoano 1:1-3, 14; tanga Nkindi 8:22, 23, 30; Kolose 1:15, 16.

2. I kika kyāidile Yesu pano pa ntanda?

Leza wātumine wandi Mwana pa ntanda na kutundulwila būmi bwa wandi Mwana mu difu dya mwana-mukaji mujike Muyuda witwa bu Madia. Nanshi Yesu kādipo na shandi wa ku mashi. (Luka 1:30-35) Yesu wāile pano pa ntanda mwanda wa (1) kwitufundija bubinebine butala padi Leza, (2) kwitulombola mwa kulongela kiswa-mutyima kya Leza, ne (3) kupāna būmi bwandi bubwaninine bu “kikūlwa.”—Tanga Mateo 20:28; Yoano 18:37.

3. Mwanda waka tusakilwa kikūlwa?

Kikūlwa i mfutwa ifutwanga pa kukūla muntu ku mambo. Lufu ne bununu kebyādipo mu mpango imbajinji ya Leza pa muzo wa muntu. Le tubayuka kino namani? Leza wānene Adama, muntu umbajinji amba shi alonge kyokya kitelwa na Bible bu bubi ukafwanga. Shi Adama kālongelepo bubi, longa kāfwilepo. Nansha būmi bwa Adama byo bwāendelele mu myaka tutwa, wāshilwile kufwa’nka difuku dyaālekele kukōkela Leza. (Ngalwilo 2:16, 17; 5:5) Adama wāsambwidile bandi bana bonsololo bubi ne mfuto yabo, lufu. E mo “mwatwelele” lufu mu bantu pano pa ntanda kupityila kudi Adama. O mwanda tusakilwa kikūlwa.—Tanga Loma 5:12; 6:23.

 4. Mwanda waka Yesu wāfwile?

Lelo i ani wādi ubwanya kufuta kikūlwa mwanda wa kwitunyongolola ku lufu? Potufwanga, i mfuto ya bubi bwetu batwe bene. I kutupu muntu wakubulwa kubwaninina ubwanya kufutyila bubi bwa bakwabo.—Tanga Mitōto 49:7-9.

Yesu kāpyenepo kubulwa kubwaninina ku mbutwile wa pano pa ntanda, wāfwile, ke pa mwandapo wa bubi bwandi, ino i pa bubi bwa bakwabo. Leza wātumine wandi Mwana etufwile mwanda wa kulombola buswe Bwandi bukatampe bwasenswe bantu. Kadi Yesu wālombwele buswe bwaetuswele na kukōkela Shandi ne kupāna būmi bwandi pa mwanda wa bubi bwetu.—Tanga Yoano 3:16; Loma 5:18, 19.

5. Le pano Yesu uloñanga bika?

Pa kundapa babela, kusangula bafwe, ne kupandija bantu bādi mu kyaka, Yesu wālombwele byobya byakalongela bantu bonso ba kikōkeji. (Luka 18:35-42; Yoano 5:28, 29) Yesu wāfwile, kupwa Leza wāmusangwile bu muntu wa ku mushipiditu. (1 Petelo 3:18) Penepo Yesu wāilaije ku lundyo lwa Leza kufika ne byāmupele Yehova lupusa lwa kubikala bu Mulopwe pa ntanda yonso. (Bahebelu 10:12, 13) Pano Yesu i mubikale bu Mulopwe momwa mūlu, kadi balondi bandi pano panshi basapulanga myanda miyampe pa ntanda yonso.—Tanga Danyele 7:13, 14; Mateo 24:14.

Panopano ponka, Yesu usa kwingidija lupusa lwandi lwa bu Mulopwe mwanda wa kufudija masusu onso ne bene bealengeja. Midiyo ne midiyo ya bantu betabija mudi Yesu ne bamukōkela basa kumona būmi mu paladisa pano pa ntanda.—Tanga Mitōto 37:9-11.

Shi usaka kuyukila’ko bintu bivule, tala dino dibuku: Lelo I Bika Bine Bifundija Bible? shapita 4, dilupwilwe na Batumoni ba Yehova.

[Kifwatulo pa paje 11]

Midiyo ne midiyo ya bantu betabija mudi Yesu ne bamukōkela basa kumona būmi mu paladisa pano pa ntanda