Fwenai Kudi Leza

Lelo Yehova Ubwanya Kusangala Nansha Kufītwa?

SHI malondololo ku kino kipangujo i eyo, nankyo kukalupuka kipangujo kikwabo: Le mwiendelejo wetu ukokeja kusangaja Leza nansha kumufityija? Ko kunena’mba, le tubwanya kusangaja nansha kufityija mutyima wa Leza na bilongwa byetu? Bafilozofe ba pa kala bādi banena’mba, mhm, kebibwanikapo. Bādi banena’mba i kutupu muntu ukokeja kwikala na lupusa padi Leza, kumusangaja nansha kumufityija. Ino Bible uleta mulangwe mwishile na uno, amba Yehova wimvwanga lusa kadi utele mutyima ku byotulonga. Tala binenwa bitanwa mu Mitōto 78:40, 41.

Mitōto 78 usekununa mwādi mwikadile Leza na Isalela wa kala. Pa kupwa kunyongolola muzo mu bupika mu Edipito, Yehova wēbapele mukenga wa kusamba nabo kipwano kya pa bula. Wālaile amba shi bekale nyeke na kikōkeji ku bijila byandi, bakekala “kileme” kyandi ne kwingidijibwa mu muswelo wa pa bula mwanda wa kufikidija mpango yandi. Bantu bāitabije, penepo batwela mu kipwano kya Mukanda wa Bijila. Lelo beēndeje mungya mutyipo wabo?—Divilu 19:3-8.

Mulembi wa mitōto unena’mba: “I dingi dingi dīne dyo bamukosokele muntanda mutuputupu.” (Vese 40) Vese ulonda’ko ubweja’ko amba: “Bālamukile dikwabo ke bamutompa Leza.” (Vese 41) Yuka’mba mulembi i mutele kimfwa kya butomboki. Uno mushipiditu wa butomboki wāshilwile pa ntanda—mu ntanda mutuputupu kitatyi kityetye’tu pa kupwa kunyongololwa mu Edipito. Bantu bāshilwile kwiuningila Leza, kebeipangula shi wādi ubwanya kwibalela. (Umbadilo 14:1-4) Dibuku dimo dya misoñanya ya bwalamuni bwa Bible dinena’mba binenwa “bālamukile dikwabo ke bamutompa,” bikokeja “kwalamunwa mu muneneno mukwabo amba, ‘bāumije mityima yabo kudi Leza’ nansha amba, ‘bānene Leza amba “Tubakupele.”’” Nansha nankyo, Yehova pa lusa lwandi wādi ulekela bantu bandi kitatyi kyobādi besāsa. Ino kitatyi kikwabo bādi bajokela ku mashinda abo a kala, batomboka monka, penepa byāendelela kwikala enka namino.—Mitōto 78:10-19, 38.

Lelo Yehova wādi wiivwana namani kitatyi kyonso kyādi kitomboka bantu bandi bashintashinta? Vese 40 unena’mba: “Kumufītyija ku mutyima.” Bwalamuni bukwabo bunena’mba, “Bamupele njia ku mutyima.” Dibuku dimo dishintulula’mba: “Buluji budi pano i bwa amba mwiendelejo wa Bahebelu wādi na ao usanshija—pamo bwa mwiendelejo wa mwana ntomboki wampikwa kikōkeji mousanshilanga shandi.” Enka mwikadilanga mwana kadingidika usanshijanga mutyima wa bambutwile bandi, ne Bene Isalela bantomboki nabo ‘basombele Mwine Mupandulwe’mo wa Isalela.’—Vese 41.

I ñeni’ka yotukaboila ku uno mutōto? I kintu kikankamika pa kumona amba Yehova ulamete bininge batōtyi bandi ne kadipo na kampeja bukidi ka kwibela. Kitatyi kimo kyonka, i kintu kilanguluja pa kwifunda amba Yehova ukokeja kusangala nansha kufītwa ne amba mwiendelejo wetu ukokeja kumutenga. Le kuyuka uno mwanda kukutala namani? Le kino kibakukunka ku mutyima ulondelonde byobya biyampe?

Pa kyaba kya kulondalonda mwiendelejo mubi ne kufītyija mutyima wa Yehova, i biyampe tutonge kulonda mwiendelejo moloke ne kusangaja mutyima wandi. Ne kino kyo kyalomba ku batōtyi bandi amba: “Wami mwana, wikale wañeni ne kusangaja mutyima wami.” (Nkindi 27:11) Kekudipo kintu kilēme nansha kimo kyotukokeja kupa Yehova kitabukile kwikala na būmi busangaja mutyima wandi.

[Bushintuludi pa paje 32]

Kekudipo kintu kilēme nansha kimo kyotukokeja kupa Yehova kitabukile kwikala na būmi busangaja mutyima wandi