Lelo Wadi Uyukile Kala?

Mwanda waka bantu bādi beshintyila lupeto ku tempelo ya mu Yelusalema?

▪ Yesu kubwipi na lufu lwandi, wātelele bukondame bukatampe bwādi bulongelwa mu tempelo. Bible amba: “Yesu . . . wapangilemo boba badi bēpotelamo mu njibo, ne mesa a boba badi beshintyila lupeto weafulamwina panshi, ne bipona bīne kumo bya boba badi bēpota bankunda. Kwivwana kwādi amba: Kilembelwe’mba, ino njibo yami īkatelwa bunjibo ya kulombelamo; ino bānwe nanshi umbeyalamuna ke muta wa bakabwalāla.”—Mateo 21:12, 13.

Bayuda ba mu myaka katwa kabajinji ne bāketūtyile’mo bādi batamba ku matanda ne bibundi palapala benda ku tempelo ya Yelusalema, baselele lupeto lwa kwabo. Inoko pa kufuta musonko wa tempelo wa pa mwaka pa mwaka, kupota banyema ba kwela bitapwa, ne kutūla bya kupāna bya kwisakila bādi bafwaninwe kwingidija lupeto lwingila mu ntanda’ya. O mwanda, pa kufuta bino, bantu bavule bādi bashintula lupeto lwa ku mitamba mishileshile mu lupeto lwingidijibwa. Kitatyi kyādi kifwena masobo a Bayuda, bano bashintula lupeto bādi bāla mameza ku tempelo mu Kipango kya Bajentaila.

Mo bimwekela, kutopeka kwātopekele Yesu bantu bādi bashintula lupeto amba abaalamuna tempelo ke “muta wa bakabwalāla,” kulombola amba bādi bashintula’lo na lupoto lukomo.