Wifunde mu Kinenwa kya Leza

Lelo Bible Ulayanga bya Kumeso?

Kino kishinte kisambila pa bipangujo byokodi padi mwiipangule ne kukulombola kwine kokokeja kutanga malondololo mu obe Bible. Batumoni ba Yehova bakasangela kwisambila nobe pa ano malondololo.

1. Lelo bupolofeto bwa Bible i bupotoloke?

I enka Leza Mwine Bukomo Bonso ye ukokeja kuyuka senene bya kumeso. (Amose 3:7) Kimfwa, tamba kala wālaile kwiya kwa muntu umo witwa bu Meshiasa, nansha Kidishitu. Meshiasa wādi ufwaninwe kwikala wa ku musuku wa Abalahama muntu wa lwitabijo. Wādi wa kwikala mulopwe wādi wa kulengeja bantu bakikōkeji bamone dyese dya kwikala na būmi bubwaninine bwampikwa misongo. (Ngalwilo 22:18; Isaya 53:4, 5) Uno Muntu Wālailwe wādi wa kutamba ku Betelema.—Tanga Mika 5:2.

Yesu ye wādi Meshiasa. Kumeso kwa myaka tutwa tusamba-tubidi ne musubu, Bible wālaile amba Meshiasa wādi wa kubutulwa na mujike kadi wādi wa kufutululwa. Wādi wa kupāna būmi bwandi pangala pa bubi bwa bavule ne kujikwa na mpeta. (Isaya 7:14; 53:3, 9, 12) Bible wālombwele kadi amba, kumeso kwa myaka tutwa tutano ne musubu, Yesu wādi wa kutwela mu Yelusalema utentamine pa kimbulu ne amba wādi wa kwabwa ku bibese bya ndalama 30. Bino byonso byāfikidile.—Tanga Zekadia 9:9; 11:12.

2. Le Leza Ulayanga Mafuku a Myeji?

Kumeso kwa myaka tutwa tutano ne musubu, Bible wālaile mwaka mwine wādi wa kumweka Meshiasa. Kitatyi kyaādi wa kufika kyādi kibalwe mu mayenga a myaka, kushintulula ko kunena’mba, “yenga” ne yenga wādi na myaka isamba-ibidi. Kwādi kufwaninwe kwikala mayenga 7 kutyanga na mayenga 62, ebiya twatana mayenga 69 a myaka. Ko kunena amba myaka 483. Lelo buno bula bwa myaka bwāshilwile kitatyi’ka? Kukwatañana na Bible, kino kitatyi kyāshilwile pāfikile mwingidi wa Leza Nehemia mu Yelusalema ne kushilula kubakulula kibundi. Mānga ya Bene Peleshia ilombola amba kino kitatyi kyāshilwile mu 455 K.K.K. (Nehemia 2:1-5) Yesu wābatyijibwe ke Meshiasa myaka 483 pa kupita’po, mu mwaka wa 29 K.K., pa kitatyi kifwaninwe.—Tanga Danyele 9:25.

  3. Lelo bupolofeto bwa Bible bufikidilanga dyalelo?

Yesu wālaile binkumenkume bitala ano etu mafuku. Bupolofeto bwandi bwisambila pa myanda miyampe ya Bulopwe bwa Leza, mine ikapandija bantu basenswe Leza ntanda yonso. Bulopwe bukafudija ngikadilo imbi yonso ya bintu yotwikele’mo.—Tanga Mateo 24:14, 21, 22.

Bupolofeto bwa mu Bible bulombola pa bute pa bute mfulo ya ino ngikadilo ya bintu. Bible ulombola patōka amba kwishila na bitengele bantu amba ntanda ikalumbuluka na kwendelela kwa sianse, ino bantu bakonakanya ntanda. Mitabakano ileta mavita, bipupo bya nzala, kutenkana kwa nshi, ne bipupo bya mbá ikelundila’ko. (Luka 21:11; Kusokwelwa 11:18) Misoñanya ya mu mwikadilo wa bantu yādi ya kubipila’ko. Mu bino bitatyi bya byamalwa, balondi ba Yesu bādi ba kusapula myanda miyampe ya Bulopwe bwa Leza ku mizo yonso.—Tanga Mateo 24:3, 7, 8; 2 Temote 3:1-5.

4. Lelo bantu bakekala namani mu mafuku a kumeso?

Leza Mwine Bukomo Bonso i mubikile bantu ba kikōkeji bintu biyampe. Yesu Kidishitu, Meshiasa pamo ne batongwe bandi, bakaludika ntanda abo momwa mūlu. Babundile umbikalo wa Bulopwe, mwine ukaludika mu bula bwa myaka kanunu. Bafwe bakasangulwa ne kukekala na dyese dya kumonwa bu i bafwaninwe būmi bwa nyeke. Pakwabo kadi, Bulopwe bukapwa masusu a bonso bakekala’mo. Misongo ne lufu kebikekala’kopo dikwabo.—Tanga Kusokwelwa 5:10; 20:6, 12; 21:4, 5.

Shi usaka kuyukila’ko bivule, tala paje 23-25 ne 197-201 mu dibuku Lelo i Bika Bine Bifundija Bible?, difwatwilwe pano.