Wifunde mu Kinenwa kya Leza

I Muswelo’ka Otufwaninwe Kuvuluka Lufu lwa Yesu?

Kino kishinte kisambila pa bipangujo byokodi padi mwiipangule ne kukulombola kwine kokokeja kutanga malondololo mu obe Bible. Batumoni ba Yehova bakasangela kwisambila nobe pa ano malondololo.

1. I muswelo’ka ufwaninwe kuvulukwa lufu lwa Yesu?

Yesu wāsapwidile balondi bandi bavuluke lufu lwandi kupityila ku bidibwa bya kyelekejo na kwingidija mukate ne mvinyu. Mukate welekeja umbidi wa Yesu, ne mvinyu nayo mashi andi.—Tanga Luka 22:19, 20.

Mukate wāingidije Yesu wādi wampikwa kiyujo. Divule dine, kiyujo i kingidijibwe mu Bible mwanda wa kufunkila pa bubi. Nanshi mukate kyādi kyelekejo kikwatañane na umbidi wa Yesu mubwaninine. Wāelele umbidi wandi bu kitapwa, kine kyāfundwile bitapwa bya banyema bya munshi mwa Mukanda wa Bijila wa Mosesa. (Bahebelu 10:5, 9, 10) Mvinyu kyādi kyelekejo kya mashi a Yesu malēme āmwangilwe bu kitapwa pangala pa bubi bwetu.—Tanga 1 Petelo 1:19; 2:24; 3:18.

2. Le tufwaninwe kuvuluka lufu lwa Yesu kitatyi’ka?

Yesu wāfwile dya Pashika, mafuku 14 Kweji wa Nisane. Difuku dya Bayuda dishilulanga pa kupona kwa dyuba. Kyolwa bukya ke lufu lwandi, Yesu wādile bidibwa bya Pashika na batumibwa bandi. Kupwa wāshilwile bidibwa bipya bya kivulukilo kya kuvuluka lufu lwandi.—Tanga Luka 22:14, 15.

Dyalelo nadyo, bantu ba Leza bavulukanga byobya byāletele Leza kupityila kudi Yesu pa kunyongolola ntanda yonso ku bubi ne lufu. (Divilu 12:5-7, 13, 17) Pashika byoyādi ilongwa musunsa umo pa mwaka, ne Kivulukilo kya lufu lwa Yesu nakyo kiloñwanga musunsa umo pa mwaka pa kupwa kupona kwa dyuba mu mafuku 14, Kweji wa Nisane mungya kalandadiye ka myeji ya mu Bible.—Tanga Yoano 1:29.

  3. Lelo I bāni bafwaninwe kudya ku mukate ne kutoma ku mvinyu?

Yesu paāpele balondi bandi mvinyu, wānenene amba: “Kino kitomeno kino nakyo, i kipwanino kipya.” (1 Kodinda 11:25) Kipwanino kipya kyāpingakenine pa kipwanino kya Mukanda wa Bijila wa Mosesa, mwine wālaile’mo Leza amba shi Bene Isalela bāmukōkelelele, bādi ba kwikala bantu bandi. (Divilu 19:5, 6) Ino yō, Isalela kākōkelepo diwi dya Leza. Ebiya Yehova wāleta kipwanino kipya.—Tanga Yelemia 31:31.

Kupityila ku kipwanino kipya, Yehova i mupe bantu bavule madyese kupityila ku bantu batyetye. Boba badi mu kipwanino i batyetye, enka’tu bantu 144 000. Kupityila kobadi, midiyo ne midiyo ya bantu batambile mu mizo yonso bakeselwa dyese dya kwikala nyeke mu paladisa pano pa ntanda. Bantu bamo badi mu kipwanino kipya bengidilanga Yehova pano pa ntanda dyalelo. I abo kete bafwaninwe kudya ku mukate ne kutoma ku mvinyu mwanda kitomeno “i kipwanino kipya.”—Tanga Luka 12:32; Kusokwelwa 14:1, 3.

4. Le I muswelo’ka otumwenanga mu Kivulukilo?

Kivulukilo kya lufu lwa Yesu kya pa mwaka kivudijanga kufwija’ko kotufwija’ko Yehova pangala pa buswe bwandi bwa kutendelwa. Wātumine wandi Mwana afwe pangala pa bubi bwetu. O mwanda kitatyi kyotutanwa ku Kivulukilo tufwaninwe kulangulukila pa mushintulwila lufu lwa Yesu kotudi. Tufwaninwe kubandaula muswelo otubwanya kufwija’ko pa byobya bitulongele Yehova ne Yesu.—Tanga Yoano 3:16; 2 Kodinda 5:14, 15.

Shi usaka kuyukila’ko bivule, tala paje 206-208 wa dino dibuku, Lelo I Bika Bine Bifundija Bible?, dilupwilwe na Batumoni ba Yehova.