“Mwisanswe Bānwe Bene na Bene”

“Nemupe musoñanya mupya’mba: ‘Mwisanswei banwe bene na bene.’ Monka mo nemusanshilwe, nenu mwisanswei banwe bene na bene. Shi mwisanswe banwe bene na bene, nankyo bantu bonso bakayuka’mba mwi bami bana ba bwanga.” —YOANO 13:34, 35, Dibuku Dijila.

Mobishintulwila: Kidishitu wānene balondi bandi besanswe abo bene na bene enka na mwaādi wibasanshilwe. Le Yesu wādi wibasenswe muswelo’ka? Wādi usenswe bantu pambulwa kubanga tubila, enka ne bana-bakaji bādi bamonwa bu kebādipo na mvubu mu andi mafuku. (Yoano 4:7-10) Buswe bwātonwene Yesu apāne kitatyi kyandi, bukomo ne kusenga bantu mwanda wa kwibakwasha. (Mako 6:30-34) Ku mfulo, Kidishitu wālombwele buswe bukatampe mu muswelo utulumukwa. Wānene amba “Amiwa ne mukumbi muyampe. Ino mukumbi muyampe wiyelelanga mikōko muya wandi.”—Yoano 10:11.

Muswelo Wāfikīle’po Bene Kidishitu Babajinji: Bene Kidishitu ba mu myaka katwa kabajinji bādi beita bu ba, “tutu” nansha “kaka.” (Filemone 1, 2) Bantu ba mizo yonso bātutyikīle mu kipwilo kya bwine Kidishitu, mwanda bādi bakulupile amba i “patupu ne po basansanine, aba pala, aba pala, nansha pamo, Bayudea ne Bangidiki, mwanda Mfumwabo i umo enka.” (Loma 10:11, 12) Kupwa kwa Pentekosa 33 K.K., bana ba bwanga bādi mu Yelusalema “badi ke bapote ne bya bupeta bwabo, ne bikwabopo bintu, ke benda bābila bantu bonso badi babudilwe’byo.” Na kitungo’ka? Na kitungo kya amba bapya bābatyijibwe babwanye kushala nyeke mu Yelusalema ne kwendelela kwipānina “monka mu lufundijo lwa batumibwa.” (Bilongwa 2:41-45) Le i bika byēbatonwene balonge namino? Myaka 200 keyabwene pa kupwa’tu kwa batumibwa kufwa, Tertulien wāpitulukile mu byobya byānene bakwabo pa Bene Kidishitu amba: “Tala muswelo obesenswe abo bene na bene . . . ne kwitabija kobetabija’nka ne kufwila bakwabo.”

I Bāni Bafikīle’po Dyalelo? Dibuku dimo (The History of the Decline and Fall of the Roman Empire) dya mu 1837 dyānene amba mu bula bwa tutwa twa myaka, boba betela bu Bene Kidishitu “bēsuswile bininge abo bene na bene kupita ne pa kususulwa kobāsuswilwe na bajentaila [bantu bakubulwa kwitabija].” Bwifundi bwa panopano bwa mu États-Unis bwatene kukwatañana kukatampe kudi pa bukata bwa bantu ba bipwilo—bantu bavule beyukanya bu Bene Kidishitu—na kwisañuna kwa tubila. Divule dine bantu bendanga ku bipwilo mu ntanda imo i bakomenwe kwilunga na boba ba mu kipwilo kimo kyonka ba mu ntanda mikwabo, ne mu uno muswelo bakomenwanga kukwasha banababo betabije kitatyi kyobasakilwa bukwashi.

Mu 2004, pa kupwa kwa bimpumpu biná bilondakane byapukumine mu myeji ibidi mu Florida, mwimaniji wa Komite ya bukwashi wa mu Florida waendele kukatala mwanda wa kuyuka shi bukwashi bwatuminwe bwaabanibwe biyampe. Wānene amba kekudipo kipwilo nansha kimo kyādi kilongolole biyampe na Batumoni ba Yehova, ebiya wanena komite wa bukwashi ape Batumoni byonso byobadi basakilwa. Ku ngalwilo kwa mwaka wa 1997, kisumpi kya bukwashi kya Batumoni ba Yehova kyaile na lawa, bidibwa ne bivwalwa mu République démocratique du Congo mwanda wa kukwasha banabetu Bene Kidishitu ne bakwabo badi basakilwa bukwashi. Banabetu Batumoni ba mu Bulaya bātumine byabuntu bya mudiyo umo wa madolala.