Kipangujo 1: Lelo Būmi Bwami Budi na Kitungo?

ROSALIND, watamine mu Angeletele, wadi na kyumwa kekipu kya bubinebine. Kadi wadi usaka kukwasha bantu. Pa kupwa kutambula dipolome dya inivelesite, wasokola kaji ka ntumbo ka kukwasha bantu bambulwa mobo ne boba badi na makambakano a kufunda masomo ne balemane. Nansha byaadi na mwingilo usangaja ne kwikala na muswelo, unena’mba: “Ke myaka mivule neipangulanga amba, ‘Le i kika kyotwikadile’ko?’ ne amba, ‘Le būmi budi na kitungo’ka?’”

Mwanda waka kino kipangujo? Mwanda bantu kebadipo pamo bwa banyema kebalañanga. Tudi na bukomo bwa kuboila ñeni ku bintu bya kala, kuteakanya būmi bwa kumeso ne kulondalonda kitungo kampanda mu būmi bwetu.

Le bamo baletanga malondololo’ka? Bantu bavule balañanga’mba kitungo kibajinji mu būmi i kukimba bupeta nansha ntumbo ne mwanda wa kutana nsangaji.

Le ano malondololo alombola bika? Alombola’mba, twitongelanga batwe bene bintu bya kutangidija kumeso mu būmi. Ne amba, kiswa-mutyima kya Leza kekidipo na mvubu kupita masakila etu.

Le i bika bifundija Bible? Mulopwe  Solomone wēumbikile bupeta buvule ne kulondalonda nsangaji, ino wājingulwile amba bino bintu kebyādipo na kitungo kya endaenda. Wājingulwile bintu bilupuka ku kwitungila kitungo kya binebine mu būmi paāsonekele amba: “Ino pano namino yo mfulo ya uno mwanda uno’u; byonsololo i bivwanibwe: Akamwa Leza ne kulama bijila byandi, mwanda yo mingilo mituntulu ya muntu.” (Musapudi 12:13) Le kulama bijila bya Leza kulomba bika ne bika?

 Mpango ya Leza i ya amba tusangele būmi. Solomone wāsonekele amba: “Kekudipo kitabukile būya kudi muntu ku kudya ne kutoma, ne kusangaja mutyima wandi biyampe mu mwingilo wandi. Kine kino’ki nakyo namona na’mba: Kīyanga ku kuboko kwa Leza.”—Musapudi 2:24.

Kadi Leza witusakilanga tusanswe bisaka byetu ne kwibilela. Tala bulombodi bupēla kadi buyampe bupelwe muntu ne muntu mu kisaka.

‘Balume nabo bafwaninwe kuswa bakaji babo pamo bwa ngitu ya abo bene.’—Efisesa 5:28.

“Mukaji nandi alemeke mulumyandi.”—Efisesa 5:33.

“Ebiyampe bānwe bāna, kōkelai bakwimubutula.”—Efisesa 6:1.

Shi twingidije ino misoñanya ya mu Bible, tukatana nsangaji ne kuloelelwa mu ludingo kampanda. Inoko, kintu kya mvubu mpata kyotukokeja kulonga, i kwifunda byonso byotubwanya padi Umpangi wetu ne kumufwena pamo bwa Mulunda netu. Na bubine, Bible witwita ‘tufwene kudi Leza.’ Kadi witupa uno mulao wa kutendelwa wa amba: ‘Nandi uketufwena.’ (Yakoba 4:8) Shi twitabije luno lwito, nabya būmi bwetu bukekala na kitungo kya binebine.

Rosalind utelelwe kūlu, pano umwene amba wasokola kitungo kya būmi.

Shi usaka kuyukila’ko bivule pa muswelo obwanya kwikala na būmi busangaja Leza, tala shapita 12 wa dibuku Lelo i Bika Bine Bifundija Bible? Ditūdilwe mwanda wa kusela pa www.dan124.com

[Kapango pa paje 5]

Le Yesu Wānene Bika pa Mwanda Utala Kitungo kya Būmi?

Yesu kādipo utatana kitungo kya būmi bwandi. Wānenene amba: “Po pa mwanda o nabutwidilwe pano, ne o naīdile pano panshi na’mba, nkebasapwile bya binebine.” (Yoano 18:37) Yesu wāpityije būmi bwandi mu kufundija bantu bubinebine butala padi Leza ne pa mpango Yandi.

Būmi bwetu bukekala na buluji bwinebwine shi tulonda kimfwa kya Yesu. Bine, Yesu witwita tuboile ñeni kwadi. (Mateo 11:29) Tubandaulei’tu bidi miswelo ibidi yotubwanya kuboila ñeni kwadi.

Yesu wāfundije amba pa kusaka twikale ba nsangaji, tufwaninwe kwikala “bakulandapala pa mutyima.” (Mateo 5:3) Tukokeja kuvuija bisakibwa byetu bya ku mushipiditu shi tuyuke “Leza umo enka wa binebine, ne Yesu Kidishitu [waātumine].”—Yoano 17:3.

Yesu wāsoñenye bandi bana ba bwanga kufundija bakwabo byobya byobāfundile. Wānene amba: “Endai nanshi mukafundijei mizo yonso ya bantu nabo ke bāna-babwanga, kwibabatyija mu dijina dya Tata, ne dya Mwana, ne dya mushipiditu sandu. Kadi ne kwibalombola balaminine byonso byo nemulaīle ami mwine.”—Mateo 28:19, 20.

Boba bavuija bisakibwa byabo bya ku mushipiditu na kwifunda Bible ne kwingidija byobya byobefunda, bamonanga amba būmi bwabo bushintanga ke bulumbuluke. Batamijanga kikulupiji kyabo kya amba būmi bwabo budi na kitungo kya binebine kitatyi kyobashilula kukwasha bakwabo befunde myanda ya Leza.