Bible Ushintanga Būmi

“Pano natana bwanapabo bwa bine”

I Brian Hewitt unena

MUBUTULWE MU: 1981

NTANDA YABO: ÉTATS-UNIS

PA KALA: MWANA MUJIMINE

BYONADI: Nābutwidilwe mu Moundsville, kibundi kya talala nyā kidi ku mukunkujo wa Munonga wa Ohio udi Kungala ne Kutunduka kwa Virginia mu États-Unis. Nādi mwana wa bubidi mu bana baná, basatu bana-balume, mu kyetu kisaka mwadi nsangaji. Bambutwile bami badi bankanka, bantu bambulwa budimbidimbi basenswe bakwabo. Ketwadipo na lupeto luvule, ino twadi nyeke na bintu byotwadi tusakilwa. Bambutwile bami byobadi Batumoni ba Yehova, badi balonga bukomo bwa kwitufundija misoñanya ya mu Bible kitatyi kyotwadi bankansampe.

Ino ami pa kutama, mutyima wami washilula kala kwikaka ku byobya byonafundijibwe. Nadi ntatana shi būmi buludikwa na misoñanya ya mu Bible bukokeja kwikala bwa kamweno nansha bwa nsangaji. Nadi nanga amba bwanapabo bwa binebine ye muswelo umo kete wa kwikala na nsangaji ya binebine. Ne kwija mpika, naleka’byo kutanwa ku kupwila kwa bwine Kidishitu. Banabetu babidi belunga nami mu butomboki. Bambutwile bami bālongele bukomo bwabo bonso mwanda wa kwitukwasha, ino twapela.

Bityebitye najingulula amba bwanapabo bonadi nkimba bwa untwele ku bilongwa bibi. Difuku dimo ponadi tamba ku masomo ñenda kwinjibo, mulunda nami waumpa kilole kya mfwanka. Nami natambula’kyo. Tamba dino difuku ne kwenda kumeso, nadi kengitabija bilongwa bikwabo bibi. Kyaba kimo, nadi ke ntome bitomibwa bikolwañana, malwa ne kulonga busekese. Mu myaka mivule yalondele’po, naikala na kibidiji kya kutoma bininge bitomibwa bikolwañana ne kwikala umpika wabyo. Ami pa kutweja mutwe mu bino bilongwa, nashilula kupotoloja bitomibwa bikolwañana mwanda wa kwikwatakanya mu būmi.

Kitatyi kyonso kyonadi nonga bukomo bwa kupumpunya mutyima wami wa mundamunda, ino ao wadi umvuluja kyaba ne kyaba amba mwiendelejo wami i mubi. Inoko, nadi nanga amba kendi kala mwele kyaba kya kushinta. Nansha byonadi njokolokelwe na bantu ba mu kisumpi kya makayo a minjiki, nadi nemona nyeke bu ngidi bunka kadi mutyumukwe mutyima. Inoko, kyaba kimo nadi nangulukila pa ngikadilo miyampe ya bambutwile bami ne kwiipangula kine kyonāsasukile.

 MUSWELO WASHINTYILE BIBLE BŪMI BWAMI: Nkyadipo nanga amba mbwanya kushinta. Ino mu mwaka wa 2000, bambutwile bami mbangita kukatanwa ku kitango kya distrike kya Batumoni ba Yehova. Nadi nekaka kwenda nabo. Na mu kitulumukila, nanshi ne banabetu babidi basasukile nabo bekakile.

Batwe pa kufika ku kitango, najingulula amba kyadi pa kifuko kyonka kyalongelwe’po makayo a minjiki kubwipi kwa mwaka umo kunyuma. Kwishila konāmwene kwauntēngele bininge. Mu kifuko mwādi mukailwa minjiki mwādi muyule bitundu ne bipindibipindi bya mfwanka. Bantu bavule baendele ku makayo a minjiki kebadipo bya bulunda, musapu wādi mu minjiki wādi utyumuna mutyima. Ino ku kitango, nādi njokolokelwe na bantu ba nsangaji ya binebine—bantu bāndubwile na kyanga nansha byoketwadipo twimona nabo mu bula bwa myaka. Kifuko kya kitango kyadi kitōka tō, kadi musapu wāletelwe’ko nao uleta lukulupilo. Kumona lupusa luyampe lwa bubinebine bwa mu Bible kwānengeje neipangule kine kyonāpelele’o!—Isaya 48:17, 18.

Pa kupwa’tu kwa kitango, nakwata butyibi bwa kujokela mu kipwilo kya bwine Kidishitu. Banabetu nabo, bakankamikilwe na byobya byobemwenine ku kitango, nabo bakwata butyibi bwa kujoka. Batwe bonso busatu twaitabija kwifunda Bible.

Kisonekwa kya mu Bible kyankankamikile nakampata i kya Yakoba 4:8, kinena amba: “Kadi fwenai kudi Leza, nandi ukemufwena.” Najingulwile amba shi nsaka kufwena kudi Leza, mfwaninwe kutōkeja būmi bwami. Mu bintu byonadi mfwaninwe kushinta, mubadilwa kuleka kutoma mfwanka, bitomibwa bikolwañana ne malwa.—2 Kodinda 7:1.

Naketa kipwano na balunda nami ba kala ne kwibapingakanya na balunda bapya—batōtyi ba Yehova. Mukulumpe Mwine Kidishitu onādi nefunda nandi Bible wānkweshe bininge. Wadi ungita kyaba ne kyaba ku telefone ne kukimba kuyuka mongikadile. Kufika ne dyalelo, ubadilwa mu balunda nami ba pa mutyima.

Ku muketeko wa mwaka wa 2001, nepāna kudi Leza na kubatyijibwa mu mema, enka na mwālongele banabetu babidi. Ubwanya kufwatakanya nsangaji yāivwene bambutwile ne bankasami ba kikōkeji kitatyi kyafudile kisaka kyetu ku kwilunga mu butōtyi bwa kutōta Yehova.

MUSWELO ONAMWENINE’MO: Divule nadi nanga amba misoñanya ya mu Bible i mikomo kulonda, ino pano neimone bu idi na bulami bwa binebine. Bible wampele bukomo bwa kuleka kutoma ne kupotoloja bitomibwa bikolwañana ne kwikala muntu muyampe.

Ndi na dyese dya kubadilwa mu bubana na bana bwa ntanda yonso bwa Batōtyi ba Yehova. Bano bantu besenswe bine abo bene na bene, kadi bengidilanga Leza mu bumo. (Yoano 13:34, 35) kutentekela pa bubana na bana, nemwenine dyese dya pa bula—ko kunena amba, Adrianne wami mukaji onsenswe ne kukena bininge. Buno bubana na bana i bwituletele nsangaji ya kwingidila Umpangi wetu batwe bonso pamo.

Pa kyaba kya kulondalonda būmi bwa kwisakila, pano ne mwingidi wa kitatyi kyonso wa kwituma, mfundijanga bantu muswelo obakokeja nabo kumwena mu Kinenwa kya Leza. Uno mwingilo imundetele nsangaji mikatampe mpata. Mbwanya kunena na kikulupiji kyonso’mba Bible i mushinte būmi bwami. Pano natana bwanapabo bwa bine.

[Kifwatulo pa paje 10]

[Kifwatulo pa paje 10]

[Bushintuludi pa paje 11]

“Bible wampele bukomo bwa kuleka kutoma ne kupotoloja bitomibwa bikolwañana ne kwikala muntu muyampe”

[Kifwatulo pa paje 11]