Kudi Batangi
Kudi Batangi
Kino Kiteba kya Mulami kyotanga kyāshilwile kulupulwa mu Kweji 7, 1879. Bitatyi bishitanga kufika ne pano—enka mwashintyila dino dipepala. (Tala mafoto kūlu.) Kushilwila pa ino nimelo, ukamona kushinta kukwabo kwa bukatampe bwa Kiteba kya Mulami. Le i bika bikashinta?
Tala kifunka pa paje 2, ne kamutwe ka mwanda kanena amba, “Tanga Bivule pa Entelenete.” Kweji ne kweji ukamona munshi mwa kano kamutwe kamwanda, mitwe ya myanda ya bishinte ikatūlwa’nka pa diteba dya Entelenete www.dan124.com. Le i kika kine kyatūdilwa bishinte bimo pa Entelenete?
Mu matanda mavule, bantu bavule batananga misapu pa Entelenete kadi basengibwanga nayo. Babwanya kusokola ino myanda pa Entelenete, na kufinya na kaketo pa nsulo ya myanda mine yobakimba. Pa Entelenete pakokeja kutangwa mabuku mavule, mapepala ne majulunale.
Bantu bavule byobasakanga kutanga misapu pa Entelenete, twashintyile panopano mwityilo wa diteba dyetu dya Entelenete www.dan124.com, mwanda wa dikale disangaja bininge kadi dipēla kwingidija. Bantu batwela pa dino diteba babwanya kutanga mabuku alupwilwe mu ndimi 430 ne kupita. Ino tamba uno kweji, bantu batwela pa dyetu diteba bakokeja ne kutanga myanda itongelwe mu myanda yadi ilupulwa mu mapepala etu matampe, ino isa kulupulwa pano enka pa diteba dyetu dya Entelenete. *
Byotusa kulupula bishinte bivule enka pa Entelenete, Kiteba kya Mulami kya bantu bonso kikalupulwa na mapaje 16 pa kyaba kya mapaje 32. Kiteba kya Mulami kilupulwanga kala mu ndimi 204. Byokyatyepejibwa, kibwanya pano kwalamunwa’nka ne mu ndimi mivule.
Tukulupile amba kuno kushinta kuketukwasha tusapwile bantu bavule musapu wa mu Bible upandija būmi. Twi basumininwe kupula nyeke musapu ukankamika kadi usangaja—mu mabuku ne pa Entelenete—mwanda wa batangi betu bavule balēmekele Bible ne basaka kuyuka bine byafundija bamwene’mo.
Balembi
[Kunshi kwa dyani]
^ Mu bishinte bikatūlwa’nka pa Entelenete mubadilwa ne bino bilonda’ko: “Ku Bankasampe,” kine kisambila pa mwa kwifundila Bible na bankasampe, ne “Bwifundi bwami bwa Bible,” bishinte bilupwidilwe bambutwile mwanda wa kufundija bana ba myaka 3 ne kwika.
[Bifwatulo pa paje 3]
[Kifwatulo pa paje 3]
PA ENTELENETE
Tala kavideo kepi ka “Kiteba kya Mulami—Kyālupwilwe Tamba mu 1879”
(Twela mu MYANDA MIPYA/Kiteba kya Mulami—I Kutupu Dipepala Dikwabo Didingakene Nadyo)
