BIBLE USHINTANGA BŪMI

“Nāshilwile kulangulukila bininge pa būmi bwami bwa kumeso”

I Allan Hancock unena

MUBUTULWE MU: 1941

NTANDA YABO: OSTRALI

PA KALA: UTOMA MFWANKA, NE KUKOLWA MALWA

BYONADI: Nātamine mu Warialda, kibundi kityetye kya mu Nouvelle-Galles wa Kunshi. Warialda i kibundi kya būmi bwa kunja bwa kumuna mikōko, ne bañombe, kukusa miseke, kadi mwangulo mutyetye wilundila’ko. Kibundi kitōka kadi kidi na bupolapola butyetye.

Byonadi mwana mukulu mu bana dikumi, ponadi na myaka 13, nāshilwile kwingila mwanda wa kukwasha kisaka. Byonadi nkifundile masomo malampe, nadi ñingila kumuninwe banyema. Ami pa kubwanya myaka 15, ke ñingila bu mukumbi wa banyema, nkanangija tubalwe.

Kwingila kumuninwe banyema kwadi na madyese mavule. Ku mutamba umo bidi, nadi bine nsangedile mwingilo ne kino kifuko. Nādi nshikata ku nkambi ya mudilo bufuku koku ntala kweji, diulu ditoyole ñenyenye kitatyi kyadi kīya kalupepo ka kaluvumba ka mu ditó dijokolokele kibundi. Navuluka ponadi nanga’mba, kufwaninwe kwikala Muntu wāpangile bino bintu byonso bya kutendelwa. Pakwabo kadi, nadi mu kyaka kya lupusa lubi lwa mu kifuko kumuninwe banyema. Nadi na kibidiji kya kutukana ne kupēlelwa kutoma mfwanka. Kepaijijepo kutoma mfwanka ne kutukana byāikala ke mwikadila wa mu būmi bwami.

Ami pa kubwanya myaka 18, navilukila ku Sydney. Natompa kutwela mu busola, ino napelwa mwanda wa kubulwa kufunda masomo malampe. Nasokola kaji ne kushikata mu Sydney mu bula bwa mwaka umo. Mwādi mu kino kitatyi kyonētene musunsa mubajinji na Batumoni ba Yehova. Naitabija kukatanwa ku kupwila kwabo kumo ne kwija mpika najingulula’mba bufundiji bwabo i bwa bine.

Ino kitatyi kityetye pa kupita’po, nakwata butyibi bwa kujokela ku ditó. Ku mfulo naenda ku Goondiwindi, Queensland. Nasokola kaji, nasonga mukaji, ino kya bulanda nashilula kutoma malwa.

 Nabutula nandi bana babidi. Pa kupwa kwa bami bana kubutulwa, nashilula kulangulukila bininge pa būmi bwami bwa kumeso. Nāvulukile byonāivwene ku kupwila kwa Batumoni mu Sydney, ne kukwata butyibi bwa kulonga’po kintu.

Nātene nimelo imo ya kala ya Kiteba kya Mulami, mwādi adelese ya bilo ya musambo ya Batumoni ba Yehova ya mu Ostrali. Natuma mukanda wa kulomba bukwashi. Pa kulondolola ku uno mukanda, Kamoni umo wa kanye ne buswe waiya nkupempula. Ne kwija mpika, washilula kwifunda nami Bible.

MUSWELO WASHINTYILE BIBLE BŪMI BWAMI: Ponadi nefunda Bible, namwene amba nsa- kilwa kushinta kukatampe mu bwami būmi. Kisonekwa kimo kya mu Bible kyāntengele nakampata i kisonekwa kya 2 Kodinda 7:1. Kino kisonekwa kitukankamika “twioīje bātwe bene ku bubi bonso bwa ku ngitu.”

Natyiba butyibi bwa kuleka kutoma mfwanka ne kukolwa malwa. Kushinta kekwādipo kupela, mwanda bino bibidiji byāikele mu kitatyi kilampe bu mwikadila wa mu būmi bwami. Inoko, nāsumininwe kwiendeja mu muswelo usangaja Leza. Kintu kikatampe kyāunkweshe i kwingidija musoñanya udi mu Loma 12:2 unena amba: “Kemukīkala kudingakanibwa na bapanopantanda; nanshi mwikale kupalukako ponka pa kwisambula mityima yenu.” Nayukile’mba pa kushinta bibidiji byami, mfwaninwe kushinta milangwe yami ne kumona bibidiji byami mwibimwena Leza​—bu bibi. Na bukwashi bwandi, nabwanya kuleka kutoma mfwanka ne kukolwa malwa.

Inoko, kikoleja kikatampe kyādi kya kulwa na kuleka mutonko. Nadi ndyukile madingi a mu Bible asonekelwe mu Efisesa 4:29 anena amba: “Kemukīkala kuleka kinenwa kibole kulupuka mu kyakanwa kyenu.” Nansha nabya, nkyabwenyepo kiponka na ponka kuleka kutukana. Namwene amba i biyampe kulangulukila pa binenwa bidi mu Isaya 40:26. Pa mwanda utala madiulu atoywele ñenyenye, kino kisonekwa kinena amba: “Tululai meso enu kūlu, mumone yewa wapangile bine bino’bi, yewa ulupula kibumbo kyabo pa mbadilo; wibeta bonso pa dijina pa dijina; pa bukatampe bwa bukomokomo bwandi, kabidi ne mwanda wa mu bukomokomo bwandi, nansha umo ubulwapo.” Nalangulukile’mba, shi Leza udi na bukomo bwa kupanga diulu ne ntanda byonsenswe kutala​—nanshi ubwanya kumpa bukomo bwa kushinta mwanda wa kumusangaja. Na kulombela bininge ne kulonga bukomo, bityebitye nashilula kubeja muneneno wami.

MUSWELO ONAMWENINE’MO: Ponādi bu mukumbi wa banyema, nkyādipo na mikenga mivule ya kwisamba na bantu, mwanda ku kifuko kwādi kumuninwe banyema konādi ñingila kwādi bantu batyetye. Inoko, kupityila ku bufundiji bufundijibwanga ku kupwila kwa Batumoni ba Yehova, nefundile muswelo wa kwisamba. Kutentekela pa bintu bikwabo, buno bufundiji bwāunkweshe nesambile na bakwetu pa myanda miyampe ya Bulopwe bwa Leza.​—Mateo 6:9, 10; 24:14.

Mu myaka mivule yapityile, nadi na nsangaji ya kwingila bu mukulumpe mu kipwilo. Nadi nedimwene bu dyese dya kulonga byonso byombwanya mwanda wa kukwasha banabetu mu lwitabijo. Inoko dyese dikatampe dyondi nadyo i dya kwingidila Yehova pamo na wami mukaji wa kikōkeji ne buswe ne betu bana bayampe.

Mfwinjanga’ko Yehova pa nkundeka​—ami muntu ufundile masomo matyetye​—mfundijibwe nandi. (Isaya 54:13) Ngitabije ne pa mfulo binenwa bidi mu Nkindi 10:22, bitangwa amba: “Dyese dya Yehova dipeteja bupeta.” Ami ne kisaka kyami tutengele kwifunda bivule padi Yehova ne kumwingidila nyeke ne nyeke.

[Kifwatulo pa paje 8]

[Kifwatulo pa paje 8]

[Bushintuludi pa paje 9]

“Nayukile’mba pa kushinta bibidiji byami, mfwaninwe kushinta milangwe yami”

[Kifwatulo pa paje 9]