1, 2. Lelo i kitungo’ka kidi nakyo mwine Kidishitu ye-yense? Leta kimfwa.

LELO i bika bikimbanga mwana-mukaji patyakula bipa bibishibibishi mu nsoko? Bimweka bu kakatyakulapo bya lupoto lukande bininge nansha bya lupoto lutūke bininge. Inoko, ukatyakula bipa bya luvumba luyampe, bibishibibishi bikokeja kudibwa. Ukatonga kipa kyele kadi kikomo.

² Shi muntu wafunde kuyuka Yehova ne kukwata butyibi bwa kubatyijibwa, kipwano kyandi na Leza kikatamina’ko. Kitungo kyandi i kya kwikala mwine Kidishitu mutame. Kuno kutama kekufunkilapo pa bukulu bwa myaka. Ino kufunkila pa kutama kwa ku mushipiditu, ko kunena’mba kwikala na kipwano kya pabwipi na Yehova. Mutumibwa Polo wādi usaka bene Kidishitu ba mu Efisesa bekale batame. Wēbakankamikile bekale umbumo mu lwitabijo ne kuyuka Yesu mwa kwikadila bu ‘muntu mukulwa-kala, ufikile pa kimano kituntulu kifikīle’po Kidishitu.’​—Efisesa 4:13.

3. Lelo kipwilo kya mu Efisesa kidingakene namani na bantu ba Yehova dyalelo?

³ Kipwilo kya mu Efisesa kyādi’ko kala mu bula bwa myaka na pebatumine Polo mukanda. Bavule mu kino kipwilo bādi kala ke  bene Kidishitu batame. Inoko, mwādi bakwabo bādi bakisakilwa kukomeja bininge kipwano kyabo na Yehova. Mo monka ne dyalelo, ba tutu ne ba kaka bavule ke bengidile Yehova mu bula bwa kitatyi kilampe kadi ke batame ku mushipiditu. Inoko, bamo nabo mu bipwilo ke bapetelwe’po. Kimfwa, kudi tununu ne tununu twa bantu babatyijibwanga mwaka ne mwaka, nabo bakisakilwa kutama. Le abe nobe?​—Kolose 2:6, 7.

4, 5. Le i muswelo’ka wishidile bene Kidishitu batame, ino le i beifwane bonso ku bika? (Tala kifwatulo ku ngalwilo.)

⁴ Kitatyi kyokimba kipa kyele mu nsoko, ukamona’mba bipa byonso kebidipo muswelo umo. Inoko, kwikalanga tubintu tumo twi biyukanyanga’mba i byele. Mo monka ne bene Kidishitu batame. Kebekalangapo bonso muswelo umo. Mwanda i batambe mu matanda ne mu bibidiji bishile. Badi na myaka mishile ne masakila meshile. Inoko, kudi ngikadilo kampanda i bayukanyanga bene Kidishitu bonso batame. Lelo i ngikadilo’ka?

⁵ Bene Kidishitu batame beulanga Yesu ne kulonda “senene mu mayo andi.” (1 Petelo 2:21) Yesu wānene amba i kya mvubu mpata muntu kusanswa Yehova na mutyima wandi onso ne muya wandi onso ne ñeni yandi yonso ne kusanswa mukwabo na mwaesanshilwe aye mwine. (Mateo 22:37-39) Mwine Kidishitu mutame uloñanga bukomo bwa kulonda ano madingi. Muswelo weendeje mu būmi, ulombolanga’mba kipwano kyandi na Yehova ne buswe bwaswele bakwabo bidi na mvubu bininge kwadi.

6, 7. (a) Le i ngikadilo’ka imo iyukanyanga mwine Kidishitu mutame? (b) Le i bika byotufwaninwe kwiipangula?

⁶ Mwine Kidishitu mutame ukokeja kulombola ngikadilo pamo bwa buswe. (Ngalatea 5:22, 23) Kadi ukokeja kwikala utalala, na kwīfula, ne kitūkijetyima. Ino ngikadilo ikokeja kumukwasha ominine makambakano pampikwa kunyoñama pa mutyima ne kutyumukwa mutyima pa kubulwa kujimija lukulupilo. Mwine Kidishitu mutame ukakimba nyeke misoñanya ya mu Bible mu kifundwa kyandi kya pa kasuku ya kumukwasha kuyuka biyampe ne bibi. Kadi, shi ulonda mutyima wandi wa mundamunda mufundijibwe na Bible, nabya ukakwata butyibi buyampe. Mwine Kidishitu mutame i mwityepeje, kadi ukulupile’mba bwendeji ne misoñanya ya Yehova i miyampe kutabuka yandi. * (Tala kunshi kwa dyani.) Usapulanga myanda miyampe na bupyasakane ne kulonga bintu byonso byabwanya mwanda wa kukwasha kipwilo kikale nyeke mu bumo.

⁷ Nansha shi ketudi bengidile Yehova namani, batwe bonso tubwanya kwiipangula amba: ‘Le kudi bintu byombwanya kushinta pa kusaka’mba ngiule Yesu senene? Lelo kudi bintu byonkokeja kulumbulula?’

8. Lelo i muswelo’ka Yesu waāyukile ne kwivwanija Bible biyampe?

⁸ Yesu Kidishitu wādi uyukile Bisonekwa ne kwibivwanija senene. Nansha paābwenye myaka 12, wādi utela Bisonekwa paādi wisamba na bafundiji mu tempelo. “Bonso badi bamuteja badi bāna’nka kwana lūku lwandi ne bilondololwa byandi.” (Luka 2:46, 47) Mwenda mafuku, paādi ufundija wādi wingidija na bunwa Kinenwa kya Leza mwanda wakubija balwana nandi.​—Mateo 22:41-46.

9. (a) Lelo i mpangiko’ka ikalanga na mwine Kidishitu mutame? (b) Mwanda waka twifunde Bible?

 ⁹ Muntu ukimba kwikala mwine Kidishitu mutame wiulanga kimfwa kya Yesu kadi usakanga kwivwanija Bible bininge. Ukimbanga kyaba ne kyaba bubinebine bwa mushike bwa mu Bible, mwanda uyukile’mba “byakudya bikomo i bya bantu batame.” (Bahebelu 5:14) Mwine Kidishitu mutame usakanga kwikala na “buyuki bwa binebine” bwa mu Bible. (Efisesa 4:13) Wiipangule amba: ‘Lelo ntañanga Bible difuku ne difuku? Lelo ngidi na mpangiko ya kifundwa kya pa kasuku? Lelo noñanga butōtyi bwa kisaka yenga ne yenga? Powifunda Bible, kimba misoñanya ikokeja kukukwasha uyuke milangwe ne mwiivwanino wa Yehova. Kadi ingidija ino misoñanya pokwata butyibi. Kino kikakukwasha ufwene pa bwīpi na Yehova.

10. Lelo mwine Kidishitu mutame wiivwananga namani pa madingi ne misoñanya ya Leza?

¹⁰ Mwine Kidishitu mutame ufwaninwe kulonga bivule kupita’ko’tu kuyuka byobya binena Bible. Ufwaninwe kusanswa madingi ne misoñanya ya Leza. Mu uno muswelo ukalombola buswe kudi Yehova na kwabila kulonga kiswa-mutyima kya Leza kupita’ko kyandi. Kadi ukashinta būmi, milangwe ne bilongwa byandi. Kimfwa, ukeula Yesu ne kulumbulula bumuntu bupya, bwine “bwapangilwe mwendele kiswa-mutyima kya Leza mu boloke ne kwipāna kwa binebine.” (Tanga Efisesa 4:22-24.) I kya kamweno kuvuluka’mba Leza wāpungulwidile mushipiditu wandi ujila pa balembi ba Bible. O mwanda nanshi kitatyi kifunda mwine Kidishitu Bible, mushipiditu ujila wa Leza umukwashanga ekale na buyuki buvule ne kutamija buswe ne kipwano kyandi na Yehova.

11. Lelo i myanda’ka yēmwenine Yesu paādi pano pa ntanda?

¹¹ Yesu wādi muntu mubwaninine. Inoko,Yesu kitatyi kyaādi pano pa ntanda, wādi ujokolokelwe na bantu ba kubulwa kubwaninina. Bambutwile ne banababo bonso bādi bantu bakubulwa kubwaninina. Nansha ke balondi ba pabwipi ba Yesu bālombwele nabo mitatulo ne mushipiditu wa kwisakila. Kimfwa, mu bufuku bukya ke lufu lwandi, bana bandi bwanga bēpatenye mu bukata mwabo “mwanda wa kuyuka i ani umweka bu mukatampe kutabuka.” (Luka 22:24) Nansha byobādi na milangwe yampikwa kubwaninina, Yesu wājingulwile amba balondi bandi basa kwikala bene Kidishitu batame ne kubunda kipwilo kidi mu bumo. Mu buno bufuku bumo bonka, Yesu wālombele pangala pabo mwanda wa bekale mu bumo. Wālombele kudi Shandi wa mūlu amba abo bonso bekale umo na kunena amba: “Enka moikadile abe, Tata, udi nami umbumo kadi ami nami ngidi nobe umbumo.” Wābweja’ko amba: “Bekale umo monka motwikadile umo.”​—Yoano 17:21, 22.

12, 13. (a) Byotudi bene Kidishitu, le tudi na kitungo’ka? (b) Le i muswelo’ka wefundile tutu umo kushinsakanya bumo?

¹² Mwine Kidishitu mutame usonshilanga bumo mu kipwilo. (Tanga Efisesa 4:1-6, 15, 16.) Byotudi bene Kidishitu, kitungo kyetu i kya kwikala ‘babambakanibwe pamo senene,’ ko kunena’mba kwingidila pamo mu bumo. Pa kwikala na buno bumo, mwine Kidishitu ufwaninwe kwikala mwityepeje. Mwine Kidishitu mutame ukalonga bukomo bwa kulama bumo bwa kipwilo, nansha shi wafityijibwa mutyima na bilongwa bya bakwabo. Nanshi, wiipangule amba: ‘Le noñanga namani shi tutu nansha kaka walonga kilubo? Lelo neivwananga namani shi muntu kampanda waunsanshija? Le ngikalanga na kibidiji kya kumufikila? Nansha ntompanga kwaluja kipwano?’ Mwine Kidishitu mutame usakanga kupwija myanda kupita’ko kwikala na myanda na bakwabo.

¹³ Tubandaulei’ko bidi kimfwa kya Uwe. Pa kala, wadi ukambakanibwa na kubulwa kubwaninina kwa batutu ne bakaka. Ebiya wakwata butyibi bwa kwingidija Bible ne dibuku Étude perspicace des Écritures mwanda wa kwifunda būmi bwa Davida. Mwanda waka efunde būmi bwa Davida? Mwanda Davida wātenwe na makambakano na bengidi bamo ba Leza. Kimfwa, Mulopwe Solo wādi usaka kwipaya Davida kadi bantu bamo bādi basaka kumwasa mabwe ne wandi mukaji mwine kamusepa. (1 Samwele 19:9-11; 30:1-6; 2 Samwele 6:14-22) Ino nansha bantu byobādi balonga namino, Davida wādi uswele Yehova ne kumukulupila. Kadi Davida wādi na lusa. Uwe wamwene amba usakilwa kulonga uno muswelo. Kupityila ku kifundwa kyandi kya Bible, wajingulwile’mba ufwaninwe kushinta muswelo waeivwana pa kubulwa kubwaninina kwa banababo. Wadi usakilwa kuvulaminwa bilubo byabo ne kushinsakanya bumo mu kipwilo. Lelo nobe wikalanga ulonga namino?

14. Le Yesu wāsambile bulunda bantu ba muswelo’ka?

¹⁴ Yesu Kidishitu wādi upwene na bantu. Bana-balume ne bana-bakaji ne bankasampe ne banunu nansha ke bana batyetye, bāsengelwe na Yesu. Inoko, wāsambile bulunda na tunangu. Wāsapwidile batumibwa bandi amba: “Mwi balunda nami shi mulonga byonemusoñanya.” (Yoano 15:14) Yesu wāsambile bulunda na bantu bādi bamulonda na kikōkeji kadi basenswe ne kwingidila Yehova. Lelo usambanga bulunda na bantu baswele Yehova na mutyima wabo onso? Mwanda waka kino i kya kamweno?

15. Le bankasampe bakamwena namani mu kupwana na bene Kidishitu batame?

 ¹⁵ Bipa bivule byelanga na kyanga kya dyuba. Mu muswelo umo onka, ne buswe bwa kyanga bwa batutu ne bakaka bubwanya kukukwasha wikale mwine Kidishitu mutame. Lelo wi nkasampe usaka kukwata butyibi bwa mokengidijija būmi bobe? Shi i amo, i kya tunangu kusamba bulunda na bantu bengidila Yehova ne basonshila bumo mu kipwilo. Mwanda batenwe na makambakano mu būmi bwabo ne kadi bauminine’o mu kwingidila Yehova. Bakokeja kukukwasha wikale mu būmi buyampe. Popityija kitatyi nabo pamo, bakokeja kukukwasha ukwate butyibi bwa tunangu ne kwikala mwine Kidishitu mutame.​—Tanga Bahebelu 5:14.

16. Lelo i muswelo’ka bantu batame mu kipwilo obakweshe kaka umo paakidi nkasampe?

¹⁶ Helga uvuluka’mba paadi kasa kupwa masomo, balunda nandi bavule ba ku masomo badi besambila pa bitungo byabo bya kumeso. Bavule mobadi badi basaka kwenda ku inivelesite mwanda wa kukekala na kaji kayampe. Inoko, Helga wesambile na balunda nandi batame ba mu kyabo kipwilo. Unena amba: “Bavule badi bankudile’ko ne kadi bankweshe bininge. Baunkankamikile kwingila mwingilo wa kitatyi kyonso. Kupwa, nalonga myaka itano mu mwingilo wa bu pania. Myaka pa kupita’po naikala na nsangaji ya kwingila bininge mu bu nkasampe mwingilo wa Yehova. Nkialakanyangapo pa buno butongi bwami.”

17, 18. Le i muswelo’ka otukokeja kwingidila Yehova senene?

¹⁷ Tukatama ne kwikala bene Kidishitu batame potwiula Yesu. Tukafwena Yehova ne kadi mutyima wetu wa kwingidila Yehova nao ukatamina’ko. Muntu wingidilanga Yehova biyampe shi watama ku mushipiditu. Yesu wākankamikile balondi bandi amba: “Lekai kitōkeji kyenu kimunikile bantu, amba bamone mingilo yenu milumbuluke ne kutumbija Shenu udi mūlu.”​—Mateo 5:16.

¹⁸ Tubamone muswelo ukokeja mwine Kidishitu mutame kukwatakanya kipwilo na bukomo. Kadi mwine Kidishitu ubwanya kulombola kutama kwandi mu muswelo waingidija mutyima wandi wa mundamunda. Le i muswelo’ka ukokeja mutyima wetu wa mundamunda kwitukwasha tukwate butyibi bwa tunangu? Le i muswelo’ka otukokeja kulēmeka mutyima wa mundamunda wa bakwetu? Tusa kukalondolola bino bipangujo mu kishinte kilonda’ko.