Langa’po bidi ubaenda ku ntanda-bene, ne o musunsa mubajinji. Ubatana bantu bokwibidile, bibidiji, bidibwa ne lupeto lweni kodi. Na bubine, usa kwibimona bingi.

Ubwanya kwiivwana muswelo umo potanga Bible musunsa umbajinji. Wendanga mu ntanda ya kala yo kuyukilepo. Kwine’kwa, ubatana’ko bantu bobeta bu bene Fidishitia, abe amba utale badi na bibidiji bimo, kimfwa bya ‘kusana bivwalwa,’ abakusapwila ne bidibwa byobeta bu mana ne makuta obeta bu ndakuma. (Divilu 16:31; Yoshua 13:2; 2 Samwele 3:31; Luka 15:9) Bino byonso’bi bibwanya kukukutakena. Poenda mu ntanda ya bweni, mwene ukasaka muntu akukwashe ne kukushintulwila bimobimo?

Tamba kala bilembwa bijila byāsonekelwe dibajinji mu myaka katwa 16 Yesu kaile, bantu bādi bakwashibwa pa kwivwanija bilembwa. Kimfwa, Mosesa, mwendeji umbajinji wa Isalela, ‘wāshotolwele’ bilembwa’bya.​—Kupituluka 1:5.

Kintu kya myaka tutwa dikumi pa kupita’po bafundiji ba bwino bwa Bisonekwa bādi’ko. Mu 455 Yesu kaile, kibumbo kikatampe kya Bayuda kubadila’mo ne bana, bebungila pamo mu kifuko kya bantu bonso mu kibundi kya Yelusalema. Kwādi kutanwa ne bafundiji ba Bible “batanga biyampe mu mukanda, mu mukanda-wabijila.” Ino bādi balonga bivule. “Balombola mungya mwanda’wa; enka namino’u baivwanija kutangwa kwao.”​—Nehemia 8:1-8.

Myaka tutwa tutano pa kupita’po, Yesu Kidishitu nandi wāingile uno mwingilo wa bu mufundiji. O mwanda bantu bādi bamuyukile bu mufundiji. (Yoano 13:13) Wādi ufundija bibumbo bya bantu ne muntu ne muntu. Difuku dimo, wēsambile na kibumbo kikatampe mu Busapudi bwandi bwa kasekuseku bwa ku Lūlu, ne “bibumbo kebitendela mufundijijo wandi.” (Mateo 5:1, 2; 7:28) Ku muketeko wa mwaka wa 33 Yesu ke mwiye, Yesu wēsambile na bana bandi ba bwanga babidi pobādi benda ku kibundi kidi kubwipi na Yelusalema, wibashintulwila “ne pa mfulo Bisonekwa.”​—Luka 24:13-15, 27, 32.

Bana ba bwanga ba Yesu nabo bādi bafundiji ba Kinenwa kya Leza. Difuku dimo, ntyikala mwine Efiopya wādi utanga mavese a mu Bisonekwa. Mwanā bwanga Fidipa wāmufwena kamwipangula amba: “Le bine uyukile byotanga’byo?” Mwine Efiopya kishima-tentu amba: “Lelo binebine ndyuka’byo namani shi kekudipo muntu wa kunombola?” Kupwa Fidipa wāmushintulwila buluji bwa mavese’a.—Bilongwa 8:27-35.

Pamo bwa bafundiji ne balombodi ba mu kitatyi kyāsonekelwe Bible, dyalelo Batumoni ba Yehova nabo i bepāne mu mwingilo wa kufundija bantu Bible mu matanda 239 pano pa ntanda ponso. (Mateo 28:19, 20) Bakwashanga yenga ne yenga bantu midiyo kitema ne kupita bemvwanije Bible. Bavule mu bano befundi kebataminepo mu kisaka kya bwine Kidishitu. Kifundwa i kya ku bitupu kadi kilongelwanga ku mobo a bantu nansha pa kifuko kikwabo kifwaninwe. Ino bantu bamo basangelanga kwifunda kupityila ku telefone,video, olodinatele, nansha bya busendwe bya bwino bwa peulu.

Tukulomba wisambe na Kamoni wa Yehova yense pa kuyuka muswelo wa kumwena mu ino mpangiko. Ukamona’mba Bible ke dibukupo dikomo kwivwana ino, i dya “kamweno pa kufundija, pa kudingila, pa kolola, ne pa kulemununa mu boloke,” mwanda wa wikale “mubwanye byonsololo, muteakanibwe senene mwa kwingidila mwingilo onso muyampe.”​—2 Temote 3:16, 17.