“Ndekelu wa bionso bana betu, malu onso adi malelela, malu onso adibu ne bua kuditatshishila bikole, malu onso adi makane, malu onso adi makezuke, malu onso adibu ne bua kunanga, malu onso adibu bakula bimpe bua bualu buawu, malu onso adi mimpe, ne malu onso adibu ne bua kutumbisha, tungunukayi ne kuelela malu aa meji.”​—Filipoyi 4:8, Nkundimuinu wa bulongolodi bupiabupia.

 “Kundekelu, bana betu, nutambe kutuma meji enu ku malu adi mimpe ne makanyine kutumbishibua: malu onso adi a bulelela, a kunemekibua, makane, a butoke bua mu mutshima, adi asankisha ne a butumbi.”​—Filipoyi 4:8, Muanda Mulenga Lelu.

 Nzambi utu uditatshisha bua malu atudi tuelela meji. Udi wenza nanku nangananga bualu bitutu tuelela meji bitu bitusaka bua kuenza malu kampanda. (Misambu 19:14; Mâko 7:20-23) Nunku bantu badi basue kusankisha Nzambi badi ne bua kuepuka ngenyi idi mibi ku mêsu kuende ne kutuma meji ku malu adiye munange.

 Mvese eu udi uleja malu 8 adi bena Kristo ne bua ‘kutungunuka ne kuelela meji,’ mmumue ne: malu adibu ne bua kuikala belela meji.

•    “Malelela.” Muaku eu udi umvuija malu adi malulame ne a kueyemenyibua bu mudi adi mu Bible Dîyi dia Nzambi.​—1 Timote 6:20.

•    “Kuditatshishila bikole.” Tshiambilu etshi tshidi tshileja malu adi ne mushinga wa bungi, kadi ki ngadi kaayi ne mushinga peshi a patupu to. Padi bena Kristo batuma meji ku malu a nanku, badi badisuika kabidi bikole bua kuenza tshidi tshimpe.​—Tito 2:6-8.

•    “Makane.” Muaku eu udi umvuija meji ne bienzedi bidi biakane bilondeshile mikenji ya Nzambi, kadi ki mbilondeshile meji a bantu adi ne mikalu to.​—Nsumuinu 3:5, 6; 14:12.

•    “Makezuke.” Muaku eu udi utangila ngenyi ne bipatshila bia tshijila anyi binsantu, ki nganu mu malu a disangila dia mulume ne mukaji to, kadi mmu malu makuabu onso.​—2 Kolinto 11:3.

•    “Bua kunanga.” Tshiambilu etshi tshidi tshileja malu adi asankisha, adi asaka ku dinanga, kadi ki ngadi ajula lukinu, tshiji, anyi matandu to.​—1 Petelo 4:8.

•    “Bakula bimpe bua bualu buawu.” Tshiambilu etshi tshidi tshileja malu adi alama kabidi lumu luimpe lua muntu anyi adi bantu badi banemeka Nzambi banyisha.​—Nsumuinu 22:1.

•    “Mimpe.” Muaku eu udi uleja malu adi atangila bikadilu bilenga bilondeshile mikenji ya Nzambi. Malu au mmalenga tshishiki.​—2 Petelo 1:5, 9.

•    “Kutumbisha.” Muaku eu udi uleja malu a kuelela kalumbandi, nangananga ku mêsu kua Nzambi. Mu malu au mudi kabidi bienzedi bia Nzambi bia kutumbisha bidi bantu ne bua kuelelangana meji.​—Misambu 78:4.

 Mupostolo Paulo uvua mu buloko ku Lomo dîba diakafundilaye bena Kristo ba ku Filipoyi mukanda. Kadi bamanyi ba malu a mu Bible badi bakula bua mukanda wende au bu “mukanda wa disanka” bualu mmuwufunde ne mêyi a disanka ne biambilu bia bungi bidi bileja musangelu ne dinanga.​—Filipoyi 1:3, 4, 7, 8, 18; 3:1; 4:1, 4, 10.

 Paulo uvua munange bena Kristo nende ba ku Filipoyi, uvua ujinga bua bikale ne disanka ne ditalala divuaye pende nadi. (Filipoyi 2:17, 18) Ke bualu kayi, mu tshitupa tshia ndekelu tshia mu mukanda wende au, wakabakankamija bua bikale ne disanka, kabayi bena malu makole, beyemene Nzambi misangu yonso pa kumusambila, ne badifile bikole ku malu adi akebesha ditalala mu muoyo pamue ne ditalala ne Nzambi.​—Filipoyi 4:4-9.

 Tangila filme muîpi eu bua kumona kadiosha ka mukanda wa Filipoyi.