Eyowa. Mêyi manene a mu Bible anayi aa adi mua kukuambuluisha bua kupita ne ntatu ya makuta ne bua kuepuka mabanza:

1.   Enza plan wa mua kutula makuta. “Malu adi bantu badi benza mudimu ne muoyo mujima balongolola adi bushuwa afika ku dikumbana, kadi bantu bonso badi balubakana mbatangile bushuwa ku bupele.” (Nsumuinu 21:5) Kuikadi lukasa bua kusumba tshintu anu bualu badi batshipana to. Enza plan wa mua kutula makuta ne wikale anu umulonda.

2.   Epuka mabanza a tshianana. “Musombi wa bintu mmupika wa musombeshanganyi.” (Nsumuinu 22:7) Biwikala musombe muntu makuta, mpindieu kutshiyi ne mushindu wa kumupingajila munuvua bumvuangane, mulombe ne disuminyina dionso bua kumupingajilawu mushindu mukuabu. Tumikila mubelu wa mu Bible udibu bapesha muntu uvua mubuele dibanza anu bualu uvua mujadikile muntu uvuaye musombe makuta ne: neamupingajilawu. Mubelu au nguowu eu: “Udipuekeshe ne usengelele muinebe ne disuminyina. Kuitabi bua mêsu ebe alale, anyi bua bilafinyi biebe bibungile to.” (Nsumuinu 6:1-5) Nansha yeye kayi mukuitabile bua musangu wa kumpala, tungunuke anu ne kumulomba.

3.   Teka makuta pa muaba wawu. ‘Muena lukuka udi wenda lukasa bua kupeta biuma, kena mumanye ne: bupele nebunkuate.’ (Nsumuinu 28:22, Mukanda wa Nzambi) Dialakana ne lukuka bidi mua kubutula muntu mu malu a makuta ne mu malu a mu nyuma.

4.   Sanka ne biudi nabi. “Bu mutudi ne biakudia ne bilamba, tusanke ne bintu ebi.” (1 Timote 6:8) Makuta kaena mua kusumba disanka anyi diakalenga to. Bamue bantu batu ne disanka dia bungi kabatu ne makuta a bungi to. Tshidibu natshi menemene ndinanga didibu banange bena mu mêku abu ne balunda babu, ne bulunda budibu nabu ne Nzambi.​—Nsumuinu 15:17; 1 Petelo 5:6, 7.