Bana betu ba ku biro bidi bilombola mudimu wa Bantemu ba Yehowa pa buloba bujima badi benda balondesha bimpe bimpe ngumu ya disama dipiadipia dia korona (didibu kabidi babikila ne: COVID-19) ne bateleja mibelu idi bakokeshi bafila bua kutukuba. Tudi bamanye ne: bilondeshile mêyi a buprofete adi mu Bible, bipupu bia masama bivua ne bua kuikalaku mu matuku a ku nshikidilu. (Luka 21:11) Patu disama dibudika, bitu bikengela kudikuba ne kukuba bakuabu.​—Nsumuinu 22:3.

Bamue badi mua kudiebeja ne: bana betu badi miaba idi disama dia korona edi badi benza malu bishi? Bushuwa disama edi ndishintulule nsombelu wa bana betu ba mu Betele ne ba mu bisumbu bia mu Italie, Japon, Corée du Sud, ne ba mu matunga makuabu bua kuenza malu bu pa tshibidilu. Mu imue miaba, mbakandike bua bantu kuya kumona ku Betele. Mu miaba mikuabu, mbulamatadi mmukandike bua bantu kudisangisha ba bungi, kufikishabi Betele ya matunga ayi ku dishipa mpuilu ya bijengu; ne mu minga miaba, bisumbu mbishintulule mishindu ya kuyisha ne ya kuenza bisangilu. Nansha mudiku bipumbishi ebi, bana betu badi anu batungunuka ne kubala Bible ne kumulonga, ne kukankamijangana.​—Yuda 20, 21.

Mu nsombelu eyi, bana betu mbamone mushinga wa kutumikila mêyi manene adi alonda aa, adi mua kukuambuluisha wewe ne bena mu dîku dienu bikala disama edi muaba unudi.

• Kupampakanyi to. Mbulelela se: tudi ne bua kuikala ne budimu padi disama dia tshiambu dibudika, ne tudi ne bua kuenza tshionso tshidi tshikengela bua kudikuba. Kadi katuena ne bua kupampakana bua buôwa to.​—Nsumuinu 14:15; Yeshaya 30:15.

• Tumikila buludiki bua mbulamatadi. Pa tshibidilu, bakokeshi batu bela mikenji bua kukuba bantu. Nunku, keba bua kumanya bidi mbulamatadi wamba, ubitumikile.​—Lomo 13:1.

• Ikala ne mankenda. Ikala ne tshibidilu tshia kuowa mâyi ku bianza ne nsabanga, anyi kufita buanga ku bianza bua kushipa tuishi. Tudi kabidi ne bua kulama bintu bitutu tutamba kulenga bia mu nzubu yetu, nansha bia mu Nzubu wa Bukalenge, ne mankenda. Bena malu a makanda a mubidi mbakandike dielangana muoyo ku tshianza, bualu didi padi diambulujilangana disama edi. Bua disama dia korona edi, Bulongolodi bua makanda a mubidi (anyi OMS) mbuleje malu makuabu a bungi atudi ne bua kuenza.

• Enza malu adi aleja ne: udi munange bakuabu. Nansha mudibi ne mushinga bua kubuela mu bisangilu ne kuyisha, wewe usama, mbimpe usombe kumbelu bua kubenga kushila bakuabu disama. Kuenza nanku kudi kuleja dinanga dia buena muntu ne kudi kukuba bena Kristo netu ne bantu bakuabu badi kabayi Bantemu.​—Matayi 22:39.

• Londa buludiki bua tshitupa tshîpi budibu bafila bua bisangilu bia tshisumbu. Patu disama dibudika muaba kampanda, Betele wa muaba au utu mua kuanji kuimanyika dienza dia bisangilu, mpuilu, ne bibilu bietu bikuabu. Ke tshidi tshienzeka miaba idi disama dia korona ditua ntanga tshibua, bu mudi mu imue miaba ya mu Italie, mu Japon, ne mu Corée du Sud. Mu imue miaba, bakulu badi mua kuenza bua bena mu bisumbu biabu bapete bisangilu bikadi bimana kukuata ne babilondele ku mabu. Bamanyishi badi mua kuyishila ku telefone, mu mesaje a mu biamu, nansha mu difunda dia mikanda.

Mona imue miaba iudi mua kupetela mêyi makuabu a kulonda bua kudikuba ku masama:

• “Protégez-vous des maladies” Tabulukayi! No. 6 2016-F, dibeji 4-6

• “Des moyens d’améliorer votre santé” Tabulukayi! Ngondo 6/2015-F, dibeji 2-7

• “Une meilleure santé, c’est possible ! Leçon 4 : Protégez votre santé” Tabulukayi! Ngondo 3/2011-F, dibeji dia 7