TUETU BANTU TUDI WETU MUSHINDU MU MISHINDU YA BUNGI: TUDI TUFUNDA, TUZOLA, TUFUMBA BINTU, NE TUELA MEJI BUA NKONKO MINENE YA MU NSOMBELU EYI: Bua tshinyi diulu ne buloba bidiku? Tudi bafike ku dikalaku bishi? Muoyo udi ne tshipatshila kayi? Ntshinyi tshidi tshituindile kumpala eku?

Bamue bantu badi bepuka nkonko eyi, bela meji ne: mandamuna adi abapitshila mutu. Bakuabu badi bamba ne: nkonko eyi kayena ne mushinga to, bualu bintu mbidienzekele. William Provine mulongeshi munene wa malu a kale ne a bioloji wakamba ne: “Nzambi kayituku to, ne kakuena bipatshila to.” Wakamba kabidi ne: “Kakuena tshishimikidi tshilelela tshia mikenji ya bikadilu bilenga, muoyo kawena ne bua nsongo to.”

Kadi kudi bantu badi kabayi bitaba lungenyi lua dishikila elu to. Buabu bobu, tshibuashibuashi ntshilombola kudi mikenji mijalame, mimpe, ne milongolola bimpe. Badi bakema bua bintu bia dikema bidi mu bufuki, ne bantu badi benza bintu bidikija bimue bia kudibi. Malu adibu bamona dituku dionso adi abaleja ne: mushindu udi upitshila mutu udi bintu ebi bienza ne malu a dikema adibi bienza bidi bileja ne: mbifuka kudi muntu wa lungenyi, ki mbidienzekele to.

Diela meji nunku ndisake bamue bantu batu bamba mudi bintu bidienzekele bua kuakaja mmuenenu wabu. Tuangatayi bilejilu bibidi ebi:

ALEXEI MARNOV, MUNGANGA MUNENE WA MALU A BUONGO NE MUONGO. Wakamba ne: “Tulasa tumvua mulonge tuvua tulongesha dibenga kuikalaku dia Nzambi ne mudi bintu bidienzekele. Muntu uvua witabuja Nzambi bavua bamumona anu bu utshidi mushadile.” Kadi mu 1990, wakatuadija kushintulula lungenyi.

Udi wamba ne: “Mvua anu nteta bua kumvua bua tshinyi bintu bu mudi buongo bidiku. Batu bamba ne: mu bintu bionso bidi bienza mu mushindu udi upitshila mutu, buongo mbubipite bionso. Kadi buongo buvua buenza anu bua muntu apete dimanya ne ashidimuke mu dienza malu kampanda pashishe afue anyi? Kabivua biumvuika to, ne mudimu eu uvua mua kuikala wa tshidimudimu. Ke meme kutuadija kudiebeja ne: ‘Bua tshinyi tudi ne muoyo? Muoyo udi ne tshipatshila kayi?’ Meme mumane kuela meji bikole, ngakamona ne: Mufuki udi ne bua kuikalaku.”

Dikeba kumanya tshipatshila tshia muoyo diakafikisha Alexei ku dikonkonona Bible. Mukajende uvua munganga ne kayi witaba dikalaku dia Nzambi wakatuadija kulonga pende Bible anu bua kuleja bayende ne: bivuaye ulonga mu Bible mbia dishima! Kadi lelu bonso babidi mbitabujilamu Nzambi ne mbumvue tshidiye mufukile bantu anu mudi Bible uleja.

HUABI YIN, MULONGESHI MUNENE WA MALU A SIANSE. Huabi Yin uvua mulonge makumi a fizike, ne mu bidimu bia bungi wakenza makebulula bua dîba didi muulu edi. Udi wamba ne: “Patutu tuetu bena sianse tulonga mudi malu enzeka mu bufuki, tutu misangu yonso tuamona mikale mu bulongame bua dikema budi bulonda mikenji mijalame. Mvua ndiebeja ne: ‘Mikenji mine eyi mmifumine kuepi? Pikala kapia ketu ka kulamba naku aka kalomba kukatangila bimpe, nnganyi udi muele mikenji idi dîba dilonda?’ Ngakalua kumona ne: tshiambilu tshia kumpala tshia mu Bible etshi tshidi tshiumvuika: ‘Ku tshibangidilu Nzambi wakafuka diulu ne buloba.’”​—Genese 1:1.

Mu bulelela, malu a sianse mmambuluishe bua kumvua nkonko ya bungi ya kumanya mushindu utu malu enzeka, bu mudi: Buongo butu buenza mudimu mushindu kayi? Mmushindu kayi udi dîba dipatula luya ne difila bukenke? Kadi anu bu muvua Alexei ne Huabi balue kumona, Bible udi wandamuna nkonko ya mushinga mukole ya kumanya bua tshinyi malu kampanda atuku, bu mudi: Bua tshinyi diulu ne buloba bidiku? Bua tshinyi mbilombola kudi mikenji? Bua tshinyi tudi ne muoyo?

Bible udi wamba bua buloba ne: “[Nzambi kavua] mubufuke anu bua tshianana, kadi uvua mubuenze bua bantu basombelapu.” (Yeshaya 45:18) Bushuwa, Nzambi udi ne tshidiye mufukile buloba. Tshiena-bualu tshialonda netshileje ne: tshidiye mubufukile atshi tshidi tshitangila ditekemena dietu bua matuku atshilualua bikole.