Tshidi bamanyi ba bia panu kabayi bamanye

TELEJA MU

Bidi bimueneka ne: bena mamanya a bia panu mbalonge anu mishindu yonso ya bintu bidi mu tshibuashibuashi tshidi tshimanyike. Kadi kudi nkonko ya bungi ya mushinga idibu kabayi mua kuandamuna to.

Bamanyi ba bia panu mbamanye muvua muoyo, diulu, buloba ne bionso bidimu bituadije anyi? Diandamuna dipepele didi ne: tòo. Bamue badi bamba ne: bamanyi ba bia panu badi balonge bintu bidi mu diulu ne pa buloba badi mua kumvuija muvuabi bituadije. Kadi Marcelo Gleiser mulongeshi wa malu a mitoto ne mabulunge makuabu mu iniversite wa Dartmouth, udi kayi witaba dikalaku dia Nzambi udi wandamuna ne: “Katuena bumvuije muvua diulu, buloba ne bionso bidimu bituadije to.”

Bia muomumue, tshiena-bualu tshia mu tshikandakanda kampanda tshidi tshiamba bua ntuadijilu wa muoyo ne: “Mbikole bua kumanya muvua muoyo mutuadije menemene pa buloba. Miyuki ya bungi ya malu a buloba ivuabu bafunde katshia anu ku ntuadijilu menemene kua buloba mmijimine kukadi bidimu bia bungi.” (Science News) Bidibu bamba abi bidi bileja ne: mamanya a bia panu ki mmanji kuandamuna lukonko lua ne: Mmunyi muvua muoyo, diulu, buloba, ne bionso bidimu bituadije?

Kadi udi mua kudiebeja ne: ‘Biobi ne: muoyo utudi nawu eu bavua bawufuke, nnganyi uvua muwufuke?’ Pamuapa ukadi kabidi mudiele nkonko idi ilonda eyi: ‘Biobi ne: Mufuki wa meji ne wa dinanga udiku, bua tshinyi mmulekele bantu badiye mufuke bakenga? Bua tshinyi mmulekele bitendelelu bia bungi nunku bishilashilangane? Bua tshinyi kudi bilumbu bia bungi mu bitendelelu ne bua tshinyi bantu badi badiamba mudibu batendelela Nzambi badi benza malu mabi a bungi?’

Mamanya a bia panu kaena mua kuandamuna nkonko eyi to. Kadi abi kabiena biumvuija ne: kuakupeta mandamuna adi asankisha to. Bushuwa, bantu ba bungi mbapete mandamuna adi asankisha mu Bible.

Bamanyi ba bia panu bakuabu badi bakebe dîba dia kulonga Bible mbafike ku ditaba ne: kudi Mufuki, wewe musue kumanya tshidi tshibasake bua kuitabuja Mufuki, buela mu jw.org. Keba “Tshitu bamue bamba bua muakatuadija muoyo wetu.”

Bible ne mamanya a bia panu biakabatuisha

Georgiy Koidan, mumanyi wa shimi

“Ntu ntamba kuenza mudimu wa kusambakajangana tutupa tukese tua selile. Bidi anu bu kunaya dinaya kampanda didi bu dia dame (Jeux d’échecs): bidi bilomba kudianjila kulongolola tumalu ndambu. Bia muomumue kabidi, wewe mupue bua kuenza bualu kampanda muoyo, tutupa tukese tua selile atu tudi mua kunyanguka. Nansha mudi mudimu au mukole, mmupepele pandi ngufuanyikija ne tuntu binunu ne binunu tutu tuenzeka munda mua selile ya muoyo bua kuenza molekile ya bungi mishilashilangane. Mbimfikishe ku ditaba ne: kudi ne bua kuikala Mumanyi munene kampanda wa shimi, mmumue ne: Mufuki.

“Pangakalonga Bible, ngakajingulula ne: kena bu mikanda mikuabu to. Bavua bajikije kumufunda kukadi bidimu bitue ku 2 000, nansha nanku ndi mmona ne: mibelu idimu itshidi anu ne mushinga lelu. Tshidiye wamba bua kujikija bilumbu ne bena mutumba netu, mu dîku, ne ku mudimu tshidi tshiambuluisha bikole. Ngakafika ku dimona ne: anu muntu udi ne dimanya didi dipite dia bantu kule ne kule ke udi mua kufila mibelu ya kueyemena ya nunku.”

Yan-Der Hsuuw, mumanyi wa mikuji

“Padi mukuji wenda ukola, selile yonso idi ne bua kuenza mudimu pamue bua kushintulula imue ya kudiyi mu selile mikuabu, mu mifungu, misunyi, mifuba, mashi, ne ndekelu wa bionso kuenza muntu mujima. Katuena anu bamanye menemene mudi selile ayi ilua mukuji to. Mushindu udiyi yenza mudimu udi unjadikila ne: muoyo udi ne bua kufumina kudi mufuki wa meji.

“Mushindu udi Misambu 139:15, 16 uleja mudi mukuji ukola munda mua mamu udi upetangana bikole ne tshidi bamanyi ba bia panu batandule bidimu bia bungi bishale ebi. Mudi mufundi wa Misambu mumvuije bualu ebu ne bujalame buonso kukadi bidimu bia bungi udi uleja ne: bavua bamusokoluelabu kudi Mufuki.”