Dîna dia Nzambi nnganyi?
Wewe ujinga kumanya muntu, bualu bua kumpala buudi pamuapa mua kuenza nkumuebeja ne: “Dîna diebe nnganyi?” Bu wewe mua kuela Nzambi lukonko elu, ntshinyi tshidiye mua kukuambila?
“Meme ndi Yehowa. Adi ndîna dianyi.”—Yeshaya 42:8.
Mmusangu wa kumpala uudi umvua dîna edi anyi? Bidi mua kuikala nanku, bualu bakudimunyi ba bungi ba Bible ki mbatambe kufunda dîna dia Nzambi, peshi ki mbadifunde nansha. Mbapingaje pa muaba wadi muanzu wa ne: “MUKALENGE.” Kadi mu bulelela pavuabu bafunde Bible, dîna dia Nzambi divuamu misangu mitue ku 7000. Bavua bafunda dîna edi ne maleta matshintamane anayi a mu tshiena-Ebelu atudi mua kufunda ne: YHWH anyi JHVH, ne batu badikudimuna mu Tshiluba ne: “Yehowa.”
Bidimu 100 bia kumpala panyima pa Yezu, MU TSHIENA-EBELU
Nkudimuinu wa Bible wa Tyndale 1530, MU ANGLAIS
Nkudimuinu wa Bible wa Reina-Valera 1602, MU TSHIENA ESPANYE
Nkudimuinu wa Bible wa Union 1919, MU TSHIENA CHINE
Dîna dia Nzambi didi mu Mifundu ya tshiena-Ebelu ne mu nkudimuinu ya Bible ya bungi
MUSHINGA UDI NAWU DÎNA DIA NZAMBI
Dîna dia Nzambi didi ne mushinga kudiye yeye muine. Muntu nansha umue katu muinyike Nzambi dîna edi to; yeye nkayende ke uvua mudinyikadi. Yehowa wakamba ne: “Edi ndîna dianyi bua kashidi ne eu ke mushindu udibu ne bua kumvuluka kudi bantu ba bipungu ne bipungu.” (Ekesode 3:15) Dîna dia Nzambi didi mu Bible misangu ya bungi kupita muanzu wende kayi wonso bu mudi: Wa Bukole Buonso, Tatu, Mukalenge, anyi Nzambi, ne kupita mêna makuabu a bantu bu mudi: Abalahama, Mose, Davidi, anyi Yezu. Bualu bukuabu, Yehowa mmusue bua bantu bamanye dîna diende. Bible udi wamba ne: “Bamanye ne: wewe, udi ne dîna dia Yehowa, wewe nkayebe ke Mutambe Bunene pa mutu pa buloba bujima.”—Misambu 83:18.
Dîna dia Nzambi didi ne mushinga kudi Yezu. Mu disambila ditubu babikila ne: Disambila dia Tatu wetu anyi Disambila dia Mukalenge, Yezu wakalongesha bayidi bende bua kulomba Nzambi ne: “Tatu wetu udi mu diulu, dîna diebe dijidibue.” (Matayi 6:9) Yezu muine wakasambila Nzambi ne: “Tatu, utumbishe dîna diebe.” (Yone 12:28) Yezu uvua uteka ditumbisha dîna dia Nzambi pa muaba wa kumpala mu nsombelu wende, ke bualu kayi uvua musambile ne: “Ndi mubamanyishe dîna diebe, ne nendimanyishe.”—Yone 17:26.
Dîna dia Nzambi didi ne mushinga kudi bantu badi bamumanye. Bantu ba Nzambi ba kale bavua bamanye ne: bukubi buabu ne lupandu luabu bivua bisuikakaja ku dîna dia Nzambi dia pa buadi. Bible udi wamba ne: “Dîna dia Yehowa didi tshibumba tshikole. Muntu muakane udi unyemenamu ne udi upeta bukubi.” (Nsumuinu 18:10) Udi uleja kabidi ne: “Muntu yonso udi ubila dîna dia Yehowa neapandishibue.” (Yoele 2:32) Bible udi uleja ne: dîna dia Nzambi divua ne bua kutapulula bantu badi bamuenzela mudimu ne bantu bakuabu. Udi wamba ne: “Bualu bisamba bionso nebiende, tshisamba ne tshisamba mu dîna dia nzambi watshi, kadi tuetu netuende mu dîna dia Yehowa Nzambi wetu kashidi ne tshiendelele.”—Mika 4:5; Bienzedi 15:14.
TSHIDI DÎNA EDI DILEJA
Dîna didi dileja Nzambi mu mushindu wa pa buawu. Bamanyi ba malu a mu Bible ba bungi mbafike ku diamba ne: dîna dia Yehowa didi diumvuija “Yeye udi uvuija.” Yehowa Nzambi wakaleja bimpe diumvuija dia dîna diende edi pavuaye muakule bua bualu buende yeye muine mu mêyi avuaye muambile Mose a ne: “Nendue tshindi nsungula bua kulua.” (Ekesode 3:14) Nunku dîna dia Nzambi kadiena dileja anu mudiye Mufuki udi wenza bua bintu bintu bionso bikalaku to. Dîna diende edi didi dileja bukole buende bua kudivuija yeye muine anyi kuvuija bintu bidiye mufuke tshionso tshidiye musue bua kukumbaja malu adiye mulongolole. Nansha mudi mianzu mua kuleja muaba udi nawu Nzambi, bumfumu, anyi bukole buende, anu dîna diende dia Yehowa ke didi dileja tshionso tshidiye ne tshidiye mua kulua.
Dîna dia Nzambi didi dileja mudiye ututabalela. Diumvuija dia dîna dia Nzambi didi dileja mudiye munange bifukibua biende misangu yonso, too ne tuetu petu. Bualu bukuabu, bu mudi Nzambi mumanyishe dîna diende edi, bidi bileja ne: mmusue bua tumumanye, bualu yeye ke uvua mudianjile kutuambila dîna diende kumpala mene kua tuetu kujinga kudimanya. Bidi bimueneka patoke ne: Nzambi mmusue bua tumumone bu Muntu mulelela utudi mua kudia nende bulunda, kadi ki mbu nzambi kampanda udi kayi mumanyike bimpe udi kayi utabalela bantu to.—Misambu 73:28.
Kubikila Nzambi mu dîna diende kudi kuleja mutudi bamunange. Tshilejilu, udi mua kuambila muntu uudi musue bua ikale mulunda webe bua akubikile mu dîna diebe. Udi mua kudiumvua mushindu kayi muntu au yeye ubenga anu bua kukubikila mu dîna diebe adi? Pamuapa mu bungi bua matuku udi mua kudiebeja bikala muntu au musue kuikala bushuwa mulunda webe. Ke mudibi kabidi bua Nzambi. Yehowa mmuambile bantu dîna diende, ne udi utulomba bua tuikale tumubikila mu dîna adi. Patudi tuenza nunku, tudi tuleja Yehowa ne: tudi basue kuikala balunda bende. Bualu bua mushinga budi ne: udi umona too ne “aba badi belangana meji [anyi, “badi bangata dîna diende ne mushinga,” dimanyisha kuinshi kua dibeji] a dîna diende.”—Malaki 3:16.
Kumanya dîna dia Nzambi ke bualu bua kumpala budi ne mushinga budi butufikisha ku dimumanya. Kadi katuena ne bua kuimanyina apu to. Tudi ne bua kumanya Muena dîna adi bimpe menemene. Tudi ne bua kumanya kabidi mushindu utuye.
DÎNA DIA NZAMBI NNGANYI? Dîna dia Nzambi n’Yehowa. Dîna edi didi dileja ne: anu Nzambi nkayende ke udi mua kukumbaja malu adiye mulongolole
Mona bikuabu:
MALONGESHA A MU BIBLE A NSHINDAMENU
Nzambi utu ne dîna anyi?
Nzambi utu ne mianzu ya bungi bu mudi Wa Bukole Buonso, Mufuki, ne Mukalenge. Kadi dîna dia Nzambi didi disanganyibua mu Bible misangu mipite pa 7 000.
MANDAMUNA A NKONKO YA MALU A MU BIBLE
Yehowa nnganyi?
Udi Nzambi wa tshisamba tshimuepele patupu, bu mudi tshia Isalele anyi?
MANDAMUNA A NKONKO YA MALU A MU BIBLE
Nzambi udi ne mêna bungi kayi?
Bantu badi mua kuela meji ne: mêna aa mmêna a Nzambi: ‘Allah,’ ‘El Shaddai,’ ‘Yehowa-yile,’ ‘Alfa ne Omega.’ Bua tshinyi dîna ditudi tubikila Nzambi didi ne bualu?
