Too ne muaba eu, tudi bamone malu adi mua kutuambuluisha bua kuandamuna lukonko lua ne: Nzambi nnganyi? Tuvua batuadije kumona mudi Bible wamba ne: dîna diende n’Yehowa ne ngikadilu wende munene ndinanga. Tuvua bamone kabidi malu akadiye muenzele bantu ne ikalaye mua kubenzela. Nansha mutshidiku malu a bungi a kulonga pa bidi bitangila Nzambi, udi mua kudiebeja ne: kuamanya nekukuambuluishe ku tshinyi.

Yehowa mmulaye ne: “Wewe mumukebe, neenze bua umupete.” (1 Kulondolola 28:9) Elabi meji ku dipa dia mushinga mukole didi dikuindile wewe mukebe Nzambi ne mufike ku dimumanya: neudie “bulunda bukole ne Yehowa.” (Misambu 25:14) Bulunda bua nunku nebukupeteshe tshinyi?

Disanka dilelela. Bible udi uleja ne: Yehowa udi “Nzambi wa disanka.” (1 Timote 1:11) Kudia nende bulunda ne kulonda njila yende nekukupeteshe disanka dilelela dikala mua kukuambuluisha mu lungenyi ne ku mubidi. (Misambu 33:12) Nebikuambuluishe kabidi bua kuikala ne nsombelu muimpe padiye ukulongesha bua kuepuka malu mabi, kupeta bibidilu bimpe, ne kushala mu malanda mimpe ne bakuabu. Neutue ku tshivua mufundi wa misambu muambe ne: “Kusemena pabuipi ne Nzambi nkuimpe buanyi meme.”—Misambu 73:28.

Neakutabalele. Yehowa udi ulaya batendeledi bende ne: “Nenkupeshe mibelu ne dîsu dianyi kuudi.” (Misambu 32:8) Bidi biumvuija ne: Yehowa udi utabalela mutendeledi wende yonso ne udi umupesha tshidiye natshi dijinga menemene. (Misambu 139:1, 2) Dîba diudi udia malanda mimpe ne Yehowa, neumone ne: udi nebe misangu yonso.

Matuku atshilualua mimpe. Yehowa Nzambi kena anu ukupetesha nsombelu muimpe wa disanka lelu to, kadi udi ukuambuluisha kabidi bua wikale ne matuku atshilualua mimpe. (Yeshaya 48:17, 18) Bible udi wamba ne: “Bualu ebu budi bumvuija muoyo wa tshiendelele: bende bakumanya wewe, Nzambi umuepele mulelela, ne yeye uuvua mutume, Yezu Kristo.” (Yone 17:3) Mu bikondo bia ntatu bitudi ebi, ditekemena didi Nzambi utupesha edi didi anu bu luongo ludi lutuambuluisha bua kuikala ‘bakole, bashindame.’—Ebelu 6:19.

Aa mmalu makese tshianana a ku malu a mushinga adi ne bua kutusaka bua kumanya Nzambi bimpe ne kudia nende bulunda bua nsungansunga. Tudi tukulomba bua kuyukila ne Ntemu wa Yehowa yonso anyi kubuela mu site wa jw.org bua kumanya malu makuabu a mushinga.