Wewe mu lutatu, neujinge bua mulunda webe munene akuambuluishe. Mu diumvuangana ne bualu ebu, bamue bantu batu bamba ne: Nzambi ki mmulunda muimpe bualu badi bamona ne: Nzambi kena ubenzela bualu nansha bumue to. Mu bulelela, Nzambi ukadi mutuenzele malu a bungi, ne neatuenzele makuabu a bungi bua kujikija ntatu ne makenga bitudi nabi lelu. Nzambi neenze tshinyi?

Nzambi neajikije malu mabi onso pumbushaye udi uakebesha. Bible udi ufunkuna udi uakebesha padiye wamba ne: “Ba pa buloba bonso badi ku bukokeshi bua mubi.” (1 Yone 5:19) “Mubi” au ke uvua Yezu mubikile kabidi ne: “mukokeshi wa buloba ebu,” mmumue ne: Satana Diabolo. (Yone 12:31) Malu adi Satana usaka bantu bua kuenza pa buloba ke adi akebesha ntatu idipu. Nzambi neenze tshinyi?

Mu katupa kîpi emu Yehowa Nzambi neenze bualu kampanda ku butuangaji bua Muanende Yezu Kristo bua “avuije tshianana eu udi ne mushindu wa kukebesha lufu, mbuena kuamba ne: Diabolo.” (Ebelu 2:14; 1 Yone 3:8) Mu bulelela Bible udi uleja ne: Diabolo muine mmumanye ne: nkumushadile “tshikondo tshîpi” kumpala kua kumubutulabu. (Buakabuluibua 12:12) Nzambi neabutule kabidi bantu bonso badi bakebesha malu mabi.—Misambu 37:9; Nsumuinu 2:22.

Panyima pa Mufuki wetu mumane kumbusha malu mabi onso pa buloba, neenze bua akumbaje malu a kashidi avuaye mulongoluele bantu ne buloba. Tudi mua kutekemena malu kayi?

Ditalala ne bukubi bia kashidi. “Bena bupuekele nebapiane buloba, nebikale ne disanka dipite bungi mu ditalala divule.”—Misambu 37:11.

Biakudia bimpe bia bungi. “Nekuikale ntete ya bungi pa buloba; neyivulangane bikole pa nsongo ya mikuna.”—Misambu 72:16.

Nzubu mimpe ne midimu mimpe. “Nebase nzubu ne nebasombelamu, ne nebadime madimi a tumuma tua mvinyo ne nebadie tumuma tuawu. . . . Basungula banyi nebasanke bikole menemene bua mudimu wa bianza biabu.”—Yeshaya 65:21, 22.

Udi musue kumona malu aa anyi? Mu katupa kîpi emu, mmalu ikala enzekela bantu bonso dituku dionso.

Lelu bantu bonso batu basama ne bafua, kadi kabiakuikala kabidi nanku mu katupa kîpi emu to. Mu matuku makese emu, ku diambuluisha dia masanka a ku mulambu wa Yezu udi upikula, Nzambi neenze bua “muntu yonso udi uleja ditabuja kudiye kabutudibu, kadi apete muoyo wa tshiendelele.” (Yone 3:16) Mmalu kayi enzeka?

Masama neajike. “Muntu nansha umue udi musombele mu ditunga kakuamba ne: ‘Ndi nsama.’ Nebafuile bantu badi basombele mu ditunga luse bua tshilema tshiabu.”—Yeshaya 33:24.

Lufu kaluakukengesha kabidi bantu. “Neamine lufu kashidi, ne Mukalenge Mutambe Bunene Yehowa neakupule binsonji ku mêsu kua bantu bonso.”—Yeshaya 25:8.

Bantu nebikale ne muoyo kashidi. “Dipa didi Nzambi ufila mmuoyo wa tshiendelele ku butuangaji bua Kristo Yezu Mukalenge wetu.”—Lomo 6:23.

Nebabishe bantu bakadi bafue. “Nekuikale dibishibua dia bantu ku lufu, dia bakane ne dia badi kabayi bakane.” (Bienzedi 24:15) Dipa dia kudi Nzambi dia tshia kupikulangana natshi ke dienza bua bababishe ku lufu.

Nzambi neakumbaje malu onso aa mushindu kayi?

Nzambi neakumbaje malu avuaye mulongoluele bantu ne buloba ku diambulusha dia mbulamatadi wa mu diulu. Mmuteke Kristo Yezu bua kukokeshaye mbulamatadi au. (Misambu 110:1, 2) Ke mbulamatadi anyi bukalenge buvua Yezu mulongeshe bayidi bende bua kusambidila mu mêyi aa: “Tatu wetu udi mu diulu, . . . bukalenge buebe bulue.”—Matayi 6:9, 10.

Bukalenge bua Nzambi nebukokeshe buloba ne nebumbushe ntatu ne makenga bionso bidipu. Bukalenge ebu ke mbulamatadi muimpe mutambe udi bantu mua kupeta. Ke bualu kayi Yezu wakadienzeja bua kuyisha “lumu luimpe lua Bukalenge” pavuaye pa buloba ne muambile bayidi bende bua kuenza pabu nanku.—Matayi 4:23; 24:14.

Bu mudi Yehowa Nzambi munange bantu badiye mufuke bikole, mmulaye bua kubenzela malu mimpe onso aa. Bualu ebu kabuenaku bukusaka bua kujinga kumumanya bimpe ne kusemena kudiye anyi? Wewe muenze nunku, nebikuambuluishe ku tshinyi? Tshiena-bualu tshidi tshilonda netshiandamune lukonko elu.