Tshidi bantu bamba bua disambila
“Pantu nsambila, ntu ngumvua anu bu ne: Nzambi udi ku luseke luanyi, munkuate ku tshianza undombola pandi ngumvua mujimine.”—MARÍA.
“Mukajanyi wakafua yeye mumane kukenga bidimu 13 bijima ne disama dia kansere. Mvua nsambila Nzambi dituku dionso, ngumvua ne: uvua unteleja mu lutatu luanyi. Meme kumvua ditalala.”—RAÚL.
“Disambila ndipa dinene didi Nzambi mupeshe bantu.”—ARNE.
Bua María, Raúl, Arne, ne bantu bakuabu ba bungi, disambila ndipa dia pa buadi. Didi dibapetesha mpunga wa kuyukila ne Nzambi, kumuela tuasakidila, ne kumulomba diambuluisha. Badi bitaba ne muoyo umue tshidi Bible wamba bua disambila Nzambi etshi: “Dishindika ditudi nadi kudiye didi nunku: tshintu tshionso tshitudi tulomba bilondeshile disua diende, udi utumvua.”—1 Yone 5:14.
Kadi bantu bakuabu bobu kabatu bitaba tshidi Bible wamba bua disambila to. Steve udi ulonda bua muvuaye umvua bua disambila wamba ne: “Pangakakumbaja bidimu 17, balunda banyi basatu bakafua mu njiwu mishilangane. Umue wakafua mu njiwu ya mashinyi, bakuabu babidi kufuila mu mâyi.” Steve udi wamba ne: “Ngakasambila Nzambi mmuebeja bua tshinyi bionso abi bivua bienzeke, kadi tshiakapeta diandamuna nansha dimue to. Ke meme kudiebeja ne: ‘Bua tshinyi mbimpe kusambila?’” Bidi bimueneka ne: dibenga kupeta diandamuna ku masambila ndifikishe bantu ba bungi ku didiebeja bikala disambila ne mushinga.
Kudi malu makuabu adi asaka bantu bua kudiebeja bikala disambila ne mushinga. Kudi badi bamba ne: bu mudi Nzambi mumanye malu onso, ukadi mumanye bitudi tukengela ne malu adi atutatshisha, nanku kabiena anu ne mushinga bua kumuambila malu au to.
Bakuabu bobu badi bamba ne: Nzambi udi ubenga ku bukole bua kuteleja masambila abu bua bilema bivuabu benze kale. Jenny udi wamba ne: “Tshidi tshitamba kuntonda ntshia ne: ntu ngumvua tshiyi ne mushinga to. Malu amvua muenze atshidi annyingalaja, ndiambila ne: masambila anyi ki mmakumbane bua Nzambi kuateleja nansha.”
Wewe utu umona disambila mushindu kayi? Biobi ne: udi pebe ne lutatu anyi ne dielakana bu dia bantu batudi bakuile aba, kumanya ne: Bible udi wandamuna bimpe nkonko idi itangila disambila kudi mua kukukolesha. Tudi mua kuitaba malu adi Bible wamba bua disambila; * udi mua kukuambuluisha bua kupeta mandamuna a nkonko bu mudi:
-
Nzambi utu uteleja masambila etu anyi?
-
Bua tshinyi Nzambi katu wandamuna masambila onso?
-
Mmunyi muudi mua kusambila bua Nzambi kukutelejaye?
-
Disambila didi mua kukuambuluisha mushindu kayi?
^ tshik. 9 Mu Bible mudi masambila a batendeledi ba Nzambi ba bungi, mudi too ne masambila a Yezu Kristo. Mu Mifundu ya tshiena Ebelu idibu babikila kabidi ne: Dipungila dikulukulu mudi masambila mapite pa 150.
Mona bikuabu:
NKONKO IDI BANSONGA BADIELA
Bua tshinyi mbimpe kusambila?
Disambila didi anu tshintu kampanda tshidi tshiambuluisha muntu bua kumvua bimpe anyi? Peshi didi diambuluisha ku bualu bukuabu?
TSHIBUMBA TSHIA NSENTEDI
Mbimpe kusambila anyi?
Nzambi udi mua kuandamuna masambila kabiyi mu tshishima.
