1. 1. SATANA DIABOLO. Satana ke udi ukebesha lukuna luonso lutudi tumone mu bantu lelu eu. Nzambi neabutule Satana ne bonso badi bakina bakuabu anu bu yeye.​—Misambu 37:38; Lomo 16:20.

2. 2. BULONGOLODI BUBI BUDI BUWULE NE LUKINU EBU. Nzambi neabutule malu mabi onso a mu ndongoluelu eu, kusangisha ne bena tshididi babi ne bamfumu ba bitendelelu badi basaka bantu ku dikinangana. Nzambi neabutule kabidi bangenda mushinga ba lukuka, badi ba mishiku badi badila pambidi pa bakuabu.​—2 Petelo 3:13.

3. 3. DIPANGA BUPUANGANE. Bible udi wamba ne: bantu bonso mbapiane dipanga bupuangane, mmumue ne: dijinga dia kuela meji mabi anyi dia kuenza malu adi kaayi mimpe to. (Lomo 5:12) Kumvuila bakuabu lukinu anyi kubenzela malu ne lukinu ngamue a ku majinga mabi au. Nzambi neambuluishe bantu bua kutshimuna majinga mabi onso adi abasaka ku dienza malu mabi au ne pashishe malu onso avua akebesha lukinu kaakuikalaku kabidi to.​—Yeshaya 54:13.

1. 1. KABAKUENZELA MUNTU NANSHA UMUE MALU MABI TO. Bukalenge bua Nzambi nebulombole buloba bujima. Nebulombole kutuadijila mu diulu ne nebuteke buakane pa buloba bujima bua kashidi. (Danyele 2:44) Kansungansunga ne lukinu kabiakuilaku kabidi to. Nzambi neajikije malu mabi onso adi atatshisha bantu lelu eu.​—Luka 18:7.

2. 2. MUNTU YONSO NEASOMBE MU DITALALA. Muntu nansha umue kakukenga bua malu a tshikisu anyi bua ntatu mikebesha kudi mvita to. (Misambu 46:9) Buloba nebuikale muaba wa bukubi wasomba bantu ba ditalala.​—Misambu 72:7.

3. 3. MUNTU YONSO NEIKALE NE NSOMBELU MUIMPE MUTAMBE BUA KASHIDI. Bantu bonso ba pa buloba nebanangangane bikole. (Matayi 22:39) Muntu nansha umue kakupeta meji mabi anyi kuvuluka malu mabi ikala mua kumukengesha to. (Yeshaya 65:17) Pajika lukinu lonso tshikondo atshi, bantu “nebikale ne disanka dipite bungi mu ditalala divule.”​—Misambu 37:11.

Udi musue pebe kuikala mu bulongolodi bua mushindu au anyi? Lelu eu, bantu ba bungi badi balonga mua kulekela lukinu badi batumikila mêyi manene a mu Bible. (Misambu 37:8) Ke tshidi Bantemu ba Yehowa ba pa buloba bujima benza. Nansha mudibu bafumine miaba ya bungi mishilangane ne bikale ne bilele bishilangane, mbansombe mu buobumue mu dîku dia bantu badi banangangane.​—Yeshaya 2:2-4.

Bantemu ba Yehowa nebikale ne disanka dia kukuambila malu adibu balonge a mua kupita ne kansungansunga ne malu mabi. Malu audi ulonga adi mua kukuambuluisha ku kakese ku kakese bua ulekele lukinu, neutuadije kunanga bakuabu. Udi mua kumanya mua kunanga bakuabu nansha bobu bamueka kabayi ne dianyisha anyi bamueka bikale ne lukinu. Nebienze bua upete disanka dia bungi mpindieu, ne malanda ebe ne bakuabu neikale mashême. Kupita bionso, neulonge malu audi mua kuenza bua kubuela mu bulongolodi buikala ku bulombodi bua Bukalenge bua Nzambi tshikondo tshiajika lukinu bua kashidi.​—Misambu 37:29.