BANTU

Tshidi Bible wamba: Nzambi ‘kavua mufuke buloba anu bua tshianana to, kadi uvua mubuenze bua bantu basombelapu.’​—YESHAYA 45:18.

DIBULUNGE DIA BULOBA

Tshidi Bible wamba: “Tshipungu tshia bantu tshidi tshipita, tshipungu tshia bantu tshidi tshilua, kadi buloba budi bushalaku kashidi.”​—MUAMBI 1:4.

TSHIDIBI BIUMVUIJA: Bilondeshile Bible, kabakubutula buloba to, bantu nebatungunuke anu ne kusombelapu. Bikalabi nanku, nshikidilu wa buloba udi umvuija tshinyi?

TSHIA KUMANYA: Bible udi ufuanyikija nshikidilu wa buloba ebu ne tshivua tshienzeke mu matuku a Noa. Tshikondo atshi, buloba ‘buvua buwule ne tshikisu.’ (Genese 6:13) Kadi Noa yeye uvua muntu muimpe. Nunku Nzambi wakapandisha Noa ne dîku diende, kadi kubutulaye bantu babi ku Mvula wa kabutu. Bible udi wakula bua tshivua tshienzeke tshikondo atshi wamba ne: “Buloba bua tshikondo atshi buakabutudibua pavuabu buwujibue ne mâyi.” (2 Petelo 3:6) Tshivua nshikidilu wa buloba bua tshikondo atshi. Kadi ntshinyi tshivuabu babutule? Ki mbuloba buetu ebu to, kadi mbantu babi bavua pa buloba. Nunku padi Bible wakula bua nshikidilu wa buloba ebu, kena wakula bua kabutu ka dibulunge dia buloba to. Kadi udi wakula bua nshikidilu wa bantu babi ne ndongoluelu wa malu udibu benze.

NTATU NE MALU MABI

Tshidi Bible wamba: “Mu katupa kîpi patupu, bantu babi kabakuikalaku kabidi to; neutangile muaba uvuabu, kabakuikalaku to. Kadi bena bupuekele nebapiane buloba, nebikale ne disanka dipite bungi mu ditalala divule.”​—MISAMBU 37:10, 11.

TSHIDIBI BIUMVUIJA: Mvula wa kabutu wa mu matuku a Noa kavua mumbushe malu mabi pa buloba bua kashidi to. Panyima pa mvula au, bantu babi bakatuadija kukengeshangana kabidi. Kadi mu katupa kakese emu, Nzambi neumbushe malu mabi. Anu muvua mufundi wa Misambu muambe: “Bantu babi kabakuikalaku kabidi to.” Nzambi neumbushe malu mabi onso ku diambuluisha dia Bukalenge buende, mbuena kuamba ne: mbulamatadi udi ulombola bantu ba pa buloba bujima badi batumikila Nzambi, ukokeshila mu diulu.

TSHIA KUMANYA: Bakalenge ba pa buloba nebitabe Bukalenge bua Nzambi abu anyi? Bible udi uleja ne: kabakubuitaba to. Nebabuluishe kabayi bela meji to. (Misambu 2:2) Ntshinyi tshienzeka pashishe? Bukalenge bua Nzambi nebupingane pa muaba wa makalenge a bana ba bantu, ne “buobu nkayabu nebushalaku kashidi.” (Danyele 2:44) Kadi bua tshinyi bidi bikengela kumbusha makalenge a bana ba bantu?

Tshidi Bible wamba: “Muntu udi wenda eu kena ne bukokeshi bua kuludika nansha dikasa diende to.”​—YELEMIYA 10:23.

TSHIDIBI BIUMVUIJA: Nzambi kavua mufuke bantu bua bikale badilombola to. Mbapangile bua kulombola bantu ne kujikija ntatu yabu.

TSHIA KUMANYA: Mukanda kampanda udi wamba ne: mbulamatadi yonso mmipangile bua “kujikija bupele, nzala, masama, bipupu, ne mvita anyi malu makuabu a tshikisu adi ayiluisha.” Udi utungunuka wamba ne: “Kudi bantu . . . badi bela meji ne: malu onso aa adi mua kujika anu kuoku kuikale mbulamatadi kampanda udi ukokesha buloba bujima.” (Britannica Academic) Kadi nansha mbulamatadi yonso midisangishe, buloba nebuikale anu ku bukokeshi bua bantu bapange bupuangane badi kabayi mua kujikija malu aa to. Anu Bukalenge bua Nzambi ke budi ne bukokeshi bua kujikija ntatu yonso idi pa buloba bua kashidi.

Nunku bilondeshile Bible, bantu bimpe kabena ne bua kutshina nshikidilu wa buloba, mmumue ne: wa ndongoluelu mubi wa malu udiku lelu eu to. Kadi mbualu butudi ne bua kuindila ne muoyo mujima bualu buloba bubi ebu nebushile bulongolodi bupiabupia butambe buimpe bua Nzambi muaba!

Bualu ebu nebuenzeke dîba kayi? Tshiena-bualu tshidi tshilonda netshitupeshe diandamuna didi Bible ufila.