Kakuena muntu udi mua kuepuka lufu
FUANYIKIJABI ne: udi umona filme wa muntu kampanda muende lumu, pamuapa nkangimba munene uutu munange. Filme udi utuadija ne bindidimbi biende bia ku buana, pavuaye ulonga mua kuimba misambu, ne muvuaye udibidija njila ne njila. Pashishe udi umona muvuaye wenza konsere, wenza ngendu miaba mishilashilangane, ne mulue kumanyika pa buloba bujima bu muntu muende lumu. Mu katupa kakese, filme udi ufika ku bindidimbi bia mu tshikondo tshiende tshia bukulakaja, ndekelu wa bionso udi ufua ne filme au ujika.
Filme eu mbualu bulelela buvua bufikile muntu ukadi mufue. Bualu ebu budi mua kufikila muntu kayi yonso, nansha yeye kangimba, muena malu a sianse, muena manaya, anyi muntu mukuabu udi mumanyike bikole. Muntu eu uvua mua kuikala muenze malu a bungi, kadi kuenaku umona ne: uvua mua kuikala muenze makuabu a bungi kupita apu bu yeye kayi mufike ku dikulakaja ne ku lufu anyi?
Tudi mua kubungama patudi tuela meji bua lufu, kadi ke tshidi tshituindile tuetu bonso. (Muambi 9:5) Nansha tuetu badienzeje muetu muonso, katuena mua kuepuka tshidi tshifikisha ku dikulakaja ne ku lufu to. Pa kumbusha bualu ebu, njiwu ya mu tshimpitshimpi anyi disama dibi bidi mua kukosoloja muoyo wa muntu. Anu mudi Bible uleja, tudi bu dibungi didi ‘dimueneka mu dinda bua tshitupa tshîpi, pashishe dijimina.’—Yakobo 4:14.
Bamue bu mudibu kabayi bamanye tshidi mua kubafikila ne bamona ne: nsombelu kena ne bua nsongo, badi ne mmuenenu wa ne: “tudiayi, tunuayi, bualu malaba netufue.” (1 Kolinto 15:32) Kadi kuenaku umona ne: kuenza malu mushindu eu, nkuitaba bulelela bua ne: kakuena muntu udi mua kuepuka lufu anyi? Ku tototo nansha ku ndandanda, nangananga patudi tupeta ntatu, tudi mua kudiebeja ne: ‘Muoyo utudi nawu eu, ke tshionso tshidiku anyi?’ Nkuepi kutudi mua kupetela diandamuna?
Lelu eu bantu ba bungi badi bela meji ne: bena malu a sianse ke badi ne diandamuna. Malu a sianse ne a luondapu mmaye bikole kumpala ne mmambuluishe bua kulepesha matuku etu a muoyo. Bena malu a sianse bakuabu badi benza makebulula bua kulepesha bikole matuku a muoyo wa muntu. Nansha bobu bapete bipeta kayi bionso mu makebulula abu, nkonko eyi idi anu ijuka: Bua tshinyi tudi tukulakaja ne tufua? Kudiku ditekemena dia ne: nebatshimune muena lukuna wetu lufu anyi? Mu biena-bualu bidi bilonda, netuandamune nkonko eyi ne lua ne: Muoyo utudi nawu eu, ke tshionso tshidiku anyi?
Mona bikuabu:
TSHIBUMBA TSHIA NSENTEDI
Diditatshisha bua kulepesha matuku a muoyo
Bena sianse badi balonga bintu bidi ne muoyo ne mudi bikadilu anyi ngikadilu ya baledi yambulukila bana, badi badienzeja bua kumanya tshidi tshifikisha bantu ku dikulakaja. Makebulula onso aa mmapatule bipeta kayi?
