Bantu ba bungi pa buloba badi bakenga bua biakudia ne bua muaba wa kulala. Bamue batu basue anu babapetesha ditekemena dia ne: malu neende bimpe kumpala eku. Mmunyi mudi didienzeja dietu bua kuambuluisha bantu ba nunku mua kuenza bua Nzambi atuanyishe ne atupeteshe masanka?

“Muntu udi uleja mupuekele luse udi usombesha Yehowa bintu, ne Yeye neamufute bua malu adiye wenza.”​—NSUMUINU 19:17.

Yezu wakafila tshilejilu tshia muntu uvuabu bakume kudi banyengi ne bamushiye mufue tshipuka. (Luka 10:29-37) Muntu wa muoyo muimpe wakapitshila muaba au, kuambuluishaye muntu uvuabu bakume batape bibi au. Wakamuambuluisha nansha muvuaye wa mu tshisamba tshikuabu.

Muntu wa muoyo muimpe eu wakanji kukeba tshia kuela mu mputa yende ayi, kumuambuluishaye ne bintu bia ku mubidi, yeye kumukankamija, ne kumupeteshaye disulakana ku dikenga diende.

Tshilejilu etshi tshidi tshitulongesha tshinyi? Yezu uvua usua kuamba ne: tudi ne bua kuenza tshionso tshitudi mua kukokesha bua kuambuluisha badi mu lutatu. (Nsumuinu 14:31) Mifundu ya tshijila idi ilongesha ne: mu katupa kîpi emu, Nzambi neajikije bupele ne makenga. Kadi tudi mua kudiebeja ne: Nzambi neabijikije dîba kayi ne mushindu kayi? Mu tshiena-bualu tshidi tshilonda nenumone masanka adi Mufuki wenu wa dinanga munulamine.