TSHIKISU TSHIA KUMBELU NE TSHIA DIANGATANGANA: Luapolo lua Matunga Masanga ludi luamba ne: “Bakadi benzele mukaji umue pa basatu malu ne tshikisu ku mubidi anyi bamuangate ne tshikisu kudi bayende.” Bia dibungama, “luapolo ludi lutshinka ne: pa buloba bujima mukaji umue pa batanu nebatete kumuangata ku bukole ne tshikisu.”

TSHIKISU TSHIA MU NJILA: Badi baleja ne: mu États-Unis, mudi bisumbu bia bena tshikisu bipite pa 30 000 bidi bienzelangana malu a tshikisu bikole. Mu Amerike Latine muntu 1 pa 3 mmuleje muvuabu bamuenzele malu ne tshikisu.

DISHIPANGANA: Badi batshinka ne: mbashipe bantu batue ku 500 000 tshidimu tshishale etshi kupita bavuabu bashipe mu mvita. Mu Afrike wa kuinshi ne Amerike wa pankatshi mudi bena tshikisu bapite bungi butshinka bua pa buloba bujima misangu inayi. Bakashipa bantu bapite pa 100 000 mu Amerike Latine mu tshidimu tshimue ne bantu batue ku 50 000 mu Brésil nkayamu. Kudiku tshia kuenza bua kujikija tshikisu bua kashidi anyi?

Bua tshinyi tshikisu ntshitangalake mushindu eu? Mbajingulule malu a bungi adi akebesha tshikisu, bu mudi: bimvundu bidi bijuka bua malu a mu nsombelu ne a mpetu, ditangalaka dia dipanga kanemu bua bakuabu, dinua dipitshisha dia maluvu ne bintu bia lulengu, dileja bana malu a tshikisu adi bantu bakole benza, ne dibenga kunyoka bantu badi benza malu a tshikisu.

Bushuwa, mu amue matunga mbenze malu a bungi bua kukepesha tshikisu. Luapolo kampanda ludi luleja ne: mu tshimenga tshidi ne bantu ba bungi tshia São Paulo mu Brésil, mbakepeshe dishipangana bia pa lukama 80 mu bidimu dikumi bishale ebi. Kadi nansha nanku, malu a tshikisu a mishindu yonso adi anu mu tshimenga atshi ne bashipianganyi mbashale batue ku 10 pa bantu 100 000. Kadi tshia kuenza ntshinyi bua kujikija tshikisu tshionso bua kashidi?

Tshintu tshia ndekelu tshidi mua kujikija tshikisu mbantu, mbuena kuamba ne: ngelelu wabu wa meji ne bienzedi biabu. Bua bena tshikisu kushintulukabu, badi ne bua kumbusha lutambishi, lukuka ne budinangi ne kupingaja dinanga, kanemu ne kuditatshisha bua bakuabu.

Ntshinyi tshidi mua kuambuluisha muntu bua kushintuluka mushindu eu? Ela meji bua tshidi Bible ulongesha:

• “Dinanga dia Nzambi didi diumvuija ne: tutumikile mikenji yende.”​—1 Yone 5:3.

• “Kutshina Yehowa nkuikala ne malu mabi lukuna.” *​—Nsumuinu 8:13.

 Kunanga Nzambi ne kutshina bua kumubungamija ke malu manene adi mua kuambuluisha too ne bena tshikisu bua kushintulula nsombelu wabu, mmumue ne: ki nganu pa mutu pa mutu to kadi bafika too ne kudishintulula bumuntu buabu buonso. Bualu bua nunku budi mua kuenzeka anyi?

Tuangate tshilejilu tshia Alex, * uvua muenze bidimu 19 bishale mu buloko mu Brésil bua malu a bungi a tshikisu. Panyima pa yeye mumane kulonga Bible, wakalua Ntemu wa Yehowa mu 2000. Mmulekelaku bikadilu biende bia tshikisu anyi? Eyowa, Alex udi unyingalala bikole bua malu mabi avuaye muenze. Udi wamba ne: “Ndi mufike ku dinanga Nzambi bualu mmumfikishe ku diumvua ne: mmumfuile luse bulelela. Dianyisha ne dinanga kudi Yehowa mbingambuluishe bua kushintulula njila yanyi.”

César, wa mu Brésil pende uvua ubuelelangana mu nzubu ne wiba ne bingoma ku bianza. Uvua ne nsombelu eu munkatshi mua bidimu bitue ku 15. Tshiakamushintulula ntshinyi? Pavuaye mu buloko, wakapetangana ne Bantemu ba Yehowa, ne wakalonga Bible. César udi umvuija ne: “Ke musangu wanyi wa kumpala wa kupeta muoyo udi ne tshipatshila. Ngakalonga mua kunanga Nzambi. Ngakalonga kabidi mua kumutshina, mmumue ne: kutshina bua kubenga kupingana mu malu mabi ne kubungamija Yehowa. Tshivua musue kupanga dianyisha kudi Yehowa bua bulenga buende to. Dinanga ne buôwa abu biakansaka bua kushintuluka.”

Malu au adi atuleja tshinyi? Adi atuleja ne: Bible udi ne bukole bua kushintulula nsombelu wa bantu bikole menemene padiye ushintulula ngelelu wabu wa meji. (Efeso 4:23) Alex utukadi batele udi wamba kabidi ne: “malu amvua mulonge mu Bible avua anu bu mâyi matoke avuabu bangele pambidi, avua enda ankezula ku kakese ku kakese pavuawu asukula meji anyi mabi. Aa mmalu amvua tshiyi muele meji ne: avua mua kuenzeka.” Eyowa, patudi tuuja meji etu ne mukenji mukezuke wa mu Bible, udi mua kumbusha anyi kusukula malu mabi. Dîyi dia Nzambi didi ne bukole bua kusukula. (Efeso 5:26) Tshipeta tshia bualu ebu ntshia ne: bantu badi ne tshikisu ne badinangi badi mua kushintulula njila yabu ne kulua bena malu malenga ne bena ditalala. (Lomo 12:18) Badi bapeta ditalala mu nsombelu wabu padibu batumikila mêyi manene a mu Bible.​—Yeshaya 48:18.

Bantemu ba Yehowa bapite pa miliyo 8 badi mu matunga 240 mbapete tshidi mua kuambuluisha bua kujikija tshikisu. Bantu ba makoba onso, ba nsombelu yonso ne ba bilele bishilashilangane mbalonge mua kunanga ne kutshina Nzambi ne kabidi mbalonge mua kunangangana, kuikala ne nsombelu wa ditalala bu dîku dia pa buloba bujima. (1 Petelo 4:8) Badi ne nsombelu udi ujadika ne: tshikisu tshidi mua kujika dimue dituku.

Bible udi ulaya ne: mu katupa kîpi emu Nzambi neumbushe tshikisu pa buloba. Buloba budi ne tshikisu lelu ebu mbuindile “dituku dia dilumbuluisha ne dia dibutuka dia bantu babi.” (2 Petelo 3:5-7) Muena tshikisu nansha umue kakukengesha kabidi bantu to. Mmunyi mutudi mua kujadika ne: Nzambi mmusue kumbusha tshikisu?

Bible udi wamba ne: Nzambi ‘udi ukina muntu yonso udi munange tshikisu.’ (Musambu 11:5, NWT) Mufuki mmunange ditalala ne buakane. (Musambu 33:5; 37:28) Ke bua tshinyi kakuanyisha bantu badi ne tshikisu nansha kakese.

Eyowa, bulongolodi budi ne ditalala budi buenda bulua. (Musambu 37:11; 72:14) Bua tshinyi kuenaku mua kulonga tshiudi mua kuenza bua kuikala ne muoyo pa buloba buikala kabuyi ne tshikisu?