TSHIENA-BUALU TSHINENE | BIKENA KUMONA BIDI BIUMVUIJA MALU A MIABA YA MU NYUMA
Nkonko idi itangila badi mu muaba wa mu nyuma
Ukadiku mudiebeje bua muaba wa mu nyuma ne bantu badi basombamu anyi? Biobi nanku, kuena nkayebe to. Kukadi bidimu bia bungi menemene bidi bantu bambe malu a bungi mu tshilumbu etshi. Bamue badi bela meji ne: muaba wa mu nyuma mmuaba udi bankambua batudi ne bua kunemeka. Bakuabu badi bafuanyikija ne: mmuaba muimpe wa ditalala udibu babikila ne: diulu, udi muule ntente ne banjelu ne bantu bimpe bakadi bafue. Banga pabu badi bamona muaba wa mu nyuma bu muaba udi bansantu miliyo ne miliyo basombele.
Bantu ba bungi badi bamba ne: katuena mua kumanya bualu nansha bumue budi buenzeka mu muaba wa mu nyuma to, bualu kakuena muntu nansha umue uvua muaba eu udi mulue kutudi bua kutumvuija malu adi enzekamu. Nansha nanku ngelelu yonso ya meji eyi mmibi. Kumpala kua Yezu Kristo kuluaye pa buloba, uvua ne muoyo mu diulu, anyi muaba wa mu nyuma. Wakambila bamfumu ba bitendelelu ba mu bidimu lukama bia kumpala patoke ne: “Tshiena mufume mu diulu bua kuenza disua dianyi, kadi mbua kuenza disua dia udi muntume.” Nunku Yezu wakamanyisha bapostolo bende bualu buvuaye mumone ne ende abidi ne: “Mu nzubu wa Tatu wanyi mudi miaba ya bungi ya kusombela.”—Yone 6:38; 14:2.
Bushuwa Tatuende wa Yezu n’Nzambi udi ne dîna ne: Yehowa, ne nzubu wa Yehowa udi mu diulu. (Misambu 83:18) Nunku, anu Yehowa Nzambi ne Yezu Kristo ke badi bakumbane bua kutumvuija bimpe muaba wa mu nyuma. Bavua bamanyishe malu adi atangila muaba wa mu nyuma ku diambuluisha dia bikena kumona bidi bikemesha bivuabu baleje bantu bavua ne lulamatu.
Tshiena-bualu tshidi tshilonda tshidi tshiumvuija bitupa bia mu Bible bidi biakula bua malu avua bantu bamone mu bikena kumona. Paudi wenda ukonkonona bikena kumona ebi, umanye ne: muaba wa mu nyuma ki mmuaba udi umueneka ne mêsu udi ne bintu bitudi mua kulenga to. Nansha nanku, Nzambi mmuenze mudimu ne miaku mipepele bua kutumvuija bimpe tshidi miaba ya mu nyuma. Bikena kumona ebi nebikuambuluishe bua kujingulula bantu badi basombele mu “miaba ya bungi ya kusombela” ya mu nyuma.
