1-2. a) Ntshinyi tshikala bamfumu ba matunga ne bua kumanyisha dimue dituku? b) Nnkonko kayi idi ikengela kuandamuna?

FUANYIKIJABI ne: bamfumu ba matunga badi bafuma ku difila dimanyisha ditudi bindile bidimu ne bidimu dia ne: kudi “ditalala, ne kakuena bualu bua kutshina.” Badi mua kudikuma tshianza mu tshiadi bamba mudibu bateke ditalala dia dikema pa buloba. Bamfumu abu nebenze bua tumone ne: badi ne bukole bua kujikija ntatu yonso ya pa buloba. Kadi kabena ne bukole nansha bukese bua kuimanyika tshienzeka pashishe to. Bua tshinyi? Bualu bilondeshile dîyi dia buprofete dia mu Bible, “kabutu ka tshimpitshimpi nekalue kudibu diakamue, . . . ne kabakupanduka nansha kakese.”​—1 Tes. 5:3.

² Kudi nkonko ya mushinga idi ikengela kuandamuna: Ntshinyi tshienzeka mu “dikenga dinene”? Ntshinyi tshikala Yehowa musue bua tuenze tshikondo atshi? Mmushindu kayi utudi mua kudilongolola ku mpindieu bua kushala ne lulamatu mu dikenga dinene?​—Mat. 24:21.

3. Bilondeshile Buakabuluibua 17:5, 15-18, mmunyi muabutula Nzambi “Babilona Munene”?

³ Bala Buakabuluibua 17:5, 15-18. Bua “Babilona Munene,” badi bamubutula! Anu mutukadi bamone, bamfumu ba matunga kabakuikala ne bukole bua kuimanyika tshienzeka tshikondo atshi to. Bua tshinyi? Bualu ‘Nzambi neateke bualu ebu mu mioyo yabu bua kukumbajabu lungenyi luende.’ Ndungenyi kayi alu?  Lua kubutula nsangilu wa bitendelelu bionso bia dishima, kusangisha ne bia bukua buena Kristo. * Nzambi neateke lungenyi luende mu mioyo ya “nsengu dikumi” ya “nyama wa luonji mukunze.” Nsengu dikumi idi ileja mbulamatadi yonso idi yambuluisha “nyama wa luonji.” Nyama wa luonji yeye udi uleja Bulongolodi bua matunga masanga. (Buak. 17:3, 11-13; 18:8) Padi mbulamatadi yonso eyi ikudimukila bitendelelu bia dishima, ke dîba diatuadija dikenga dinene. Netshikale bualu bua tshimpitshimpi budi bukuatshisha buôwa bualenga muntu yonso pa buloba.

4. a) Ntshinyi tshiamba pamuapa bamfumu ba matunga bua kuleja tshikalabu benda babutuila bitendelelu bia dishima? b) Ntshinyi tshikala pamuapa bantu bavuamu ne bua kuenza?

⁴ Katuena bamanye tshikala bamfumu ba matunga mua kuamba bua kuleja tshikalabu benda babutuila Babilona Munene to. Pamuapa badi mua kuamba ne: bitendelelu ke bidi bienza bua kakuikadi ditalala pa buloba ne bidi bijinga anu kuikala ne dîyi dia kuamba mu malu adi mbulamatadi yenza. Anyi badi mua kuamba ne: bitendelelu bionso abi mbipete bubanji ne bintu bipite bungi. (Buak. 18:3, 7) Pikala bamfumu ba matunga benda babutula bitendelelu bia dishima, kabiena anu bileja ne: nebabutule benamu bonso to. Kadi bidi bimueneka ne: bamfumu ba matunga nebajikije bualu bua bitendelelu bia dishima. Padibu babutula bitendelelu ebi, bantu bavuamu nebamone ne: bamfumu babu ba bitendelelu mbapangile mua kukumbaja malu avuabu babambile. Nunku dîba adi, pamuapa bantu bavuamu abu nebavile bamba muvuabu kabayi mu bitendelelu abi.

5. Ntshinyi tshidi Yehowa mulaye bua dikenga dinene? Bua tshinyi?

⁵ Bible kena utuambila bule bua tshikondo tshianenga dibutuka dia Babilona Munene to, kadi tshitudi bamanye ntshia ne: tshikondo atshi katshiakuikala tshile menemene to. (Buak. 18:10, 21) Yehowa mmulaye ne: ‘neakepeshe matuku’ a dikenga dinene bua kababutudi “basungula” bende ne ntendelelu mulelela to. (Mâko 13:19, 20) Kadi tshinyi tshiatulomba Yehowa bua tuetu kuenza pankatshi pa dituadija dia dikenga dinene ne mvita ya Armagedone?

6. Bua tshinyi kukosa malanda ne bitendelelu bia dishima nkayaku kakuena kukumbana?

⁶ Anu mutukadi bamone mu tshiena-bualu tshishale, Yehowa udi ulomba batendeledi bende bua kupatuka mu Babilona Munene. Kadi bualu ebu kabuena bulomba anu kukosa malanda ne bitendelelu bia dishima tshianana to. Tudi ne bua kudisuika bua kulamata ntendelelu mulelela wa Yehowa. Mona mishindu ibidi itudi mua kuenza nanku.

7. a) Mmunyi mutudi mua kushala balamate mikenji ya Yehowa ya bikadilu bilenga? b) Mmunyi mudi Ebelu 10:24, 25 uleja mushinga wa kudisangisha, nangananga mpindieu?

⁷ Tshia kumpala, tudi ne bua kushala balamate mikenji miakane ya Yehowa ya bikadilu bilenga. Katuena ne bua kuitaba bikadilu bibi bia mu ndongoluelu eu to. Tshilejilu, katutu tuanyisha masandi nansha owu a mushindu kayi, nansha diselangana dia bantu ba mubidi umue ne bilele ne bikadilu bikuabu bia bantu batu balala ne bantu ba mubidi umue nabu. (Mat. 19:4, 5; Lomo 1:26, 27) Tshibidi, tudi ne bua kutungunuka ne kutendelela pamue ne bena Kristo netu. Tudi tuenza nunku miaba yonso itudi mua kuenza bualu ebu, ni mmu Nzubu yetu ya Bukalenge, anyi padibi bikengela, mu nzubu ya bana betu, peshi mu musokoko. Nansha bualu kayi buenzeke, katuena mua kulekela tshibidilu tshietu tshia kudisangisha bua kutendelela to. Mu bulelela, mbimpe tuikale tudisangisha, ‘tuenza nunku nangananga bu mutudi tumona dituku dienda disemena pabuipi.’​—Bala Ebelu 10:24, 25.

8. Mukenji wetu newikale pamuapa mua kushintuluka mushindu kayi?

⁸ Mu dikenga dinene, mukenji utudi tumanyisha newikale pamuapa mua kushintuluka. Lelu, tudi tuyisha lumu luimpe lua Bukalenge ne tuditatshisha bua kuvuija bantu bayidi. Kadi tshikondo atshi, netuikale pamuapa mua kumanyisha mukenji wa tuamba katuyi tutshina muntu nansha kakese. Bible udi uwufuanyikija ne diloka dibi dia mabue a mvula. (Buak. 16:21) Netumanyishe pamuapa ne: mu katupa kîpi emu, bulongolodi bua Satana bukadi pa kubutuka buonso butubutu. Papita matuku ke patuamanya menemene muikala mukenji au ne mutuawumanyisha. Netuwumanyishe ne mishindu ya buena itudi bayishe nayi kukadi bidimu bipite pa lukama anyi? Peshi netuwumanyishe ne mishindu mikuabu? Katuena banji kumanya to. Nansha tuetu bawumanyishe ne mishindu kayi, bidi bimueneka ne: netuikale ne diakalenga dia kumanyisha mukenji wa Yehowa wa dilumbuluisha bantu, tuwumanyisha ne muoyo mukole!​—Yeh. 2:3-5.

9. Bisamba nebienze tshinyi pamuapa bua mukenji wetu? Kadi ndituishibua kayi ditudi nadi?

⁹ Bidi bitamba kumueneka ne: mukenji wetu newusake bisamba bua kutupuwisha bua kashidi. Anu mutudi tueyemena Yehowa lelu bua atuambuluishe mu mudimu wetu wa kuyisha, netuikale kabidi nende dijinga tshikondo atshi. Tuikale batuishibue ne: Nzambi wetu neatuwuje ne bukole bua kukumbaja disua diende.​—Mika 3:8.

10. Anu mukavua Luka 21:25-28 muambe, ntshinyi tshienza bantu ba bungi bua malu enzeka mu dikenga dinene?

¹⁰ Bala Luka 21:25-28. Mu dikenga dinene, bantu nebakeme bikole bua malu enzeka. Nebamone bintu bionso bivuabu beyemene, mmumue ne: malongolodi a tshididi, a bungenda mushinga, ne makuabu a pa buloba bituadija kubutuka. Nebikale ne “kanyinganyinga,” bumvua buôwa bamona pamuapa ne: bu mukadibu mu tshikondo tshibi tshitambe tshitu katshiyi tshianji kuikalaku, kuabu kukadi pa kujika. (Sef. 1:14, 15) Bidi bimueneka ne: tshikondo atshi, nsombelu neatambe kukolela kabidi ne bantu ba Yehowa. Bu mutudi katuyi ba pa buloba, netupete  pamuapa ntatu. Netuikale pamuapa mua kupangila too ne nshima ya kudia.

11. a) Bua tshinyi Bantemu ba Yehowa ke bashalabu buoshe dîsu? b) Bua tshinyi katuena ne bua kutshina dikenga dinene?

¹¹ Patuafika tshikondo kampanda, bena mu bitendelelu bikalabu babutule nebumvue pamuapa bukuku bua muikala Bantemu ba Yehowa batungunuka bobu ne kutendelela. Nebajinge bua bantu bakuabu bamanye mudibu ne tshiji, bakuila bu mudi ku tudiomba anyi ku Enternete. Bisamba ne Satana mukokeshi wabi nebitudiile dînu bua muikala ntendelelu wetu mushale nkayende. Nebadimone kabayi bakumbaje tshipatshila tshiabu tshia kubutula ntendelelu yonso pa buloba. Nunku tuetu ke bashalabu buoshe dîsu. Dîba adi ke diadisanga bisamba bua kulua Goga wa ku Magoga. * Nebidisuike bionso tshimuku bua kuela bantu ba Yehowa mvita ya katshi ku dînu. (Yeh. 38:2, 14-16) Tudi mua kubanga kusamisha mutu bua malu enzeka mu dikenga dinene, nangananga bu mutudi katuyi bamanye kalu ne kalu konso kenzeka. Kadi tshia kumanya ntshia ne: katuena ne bua kutshina dikenga dinene to. Yehowa neatuambile tshia kuenza bua kupanduka. (Mis. 34:19) Netuikale bakumbane bua ‘kuimana tendee, kujula mitu muulu’ bualu netuikale bamanye ne: ‘dipikudibua dietu didi dienda disemena pabuipi.’ *

12. Mmushindu kayi udi “mupika wa lulamatu udi mudimuke” utulongolola bua malu enzeka kumpala eku?

¹² “Mupika wa lulamatu udi mudimuke” ukadi mubange kutulongolola bua tushale ne lulamatu mu dikenga dinene. (Mat. 24:45) Mmuenze nanku mu mishindu ya bungi. Tuangate anu tshilejilu tshimue tshia mpungilu ivua milue pa dîba diayi ituvua benze mu 2016-2018. Bavua batukankamijamu bua kukolesha ngikadilu itudi nayi dijinga bu mutudi tuenda tusemena pabuipi ne dituku dia Yehowa. Tuakulayibi kabidi mu tshikoso bua ngikadilu ayi.

13. Ntshinyi tshitudi mua kuenza bua kukolesha lulamatu luetu kudi Yehowa? Bua tshinyi bidi bikengela kulukolesha ku mpindieu?

¹³ Lulamatu: Mpungilu wa 2016 uvua ne tshiena-bualu tshia ne: “Tushalayi balamate Yehowa!” Tuvua balongamu ne: tuetu mu malanda mashême ne Yehowa, netumulamate. Bavua batuvuluije ne: kusambila Yehowa ne muoyo mujima ne kusuminyina mu dilonga Dîyi diende nebitusemeje kudiye. Kuenza nunku kudi kutupesha bukole bua kutantamena ntatu nansha idi mua kuamba kuya netu. Bu mukadi bulongolodi bua Satana butangile ku tshibungubungu, tudi bamanye ne: netutuilangane ne ntatu mikole menemene yateka lulamatu luetu kudi Yehowa ne kudi Bukalenge buende mu diteta. Bidi bimueneka ne: bantu nebatungunuke ne kutuseka. (2 Pet. 3:3, 4) Bualu ebu budi mua kuenzeka nangananga bualu pikalabu batusaka bua kubuelakana mu malu a mu bulongolodi bua Satana netuikale anu tubenga. Bidi bikengela tukoleshe lulamatu luetu ku mpindieu bua tuetu kushala nalu mu dikenga dinene.

14. a) Ndishintuluka kayi dienzeka bua bana betu badi balombola midimu yetu? b) Bua tshinyi nebitulombe lulamatu tshikondo atshi?

¹⁴ Mu dikenga dinene, nekuikale dishintuluka dia malu didi ditangila bana betu badi balombola midimu yetu ya pa buloba bujima. Nekufike tshikondo tshiaya bela manyi bonso batshidi pa buloba mu diulu bua kubuelabu pabu mu mvita ya Armagedone. (Mat. 24:31; Buak. 2:26, 27) Bualu ebu budi buleja ne: Kasumbu kaludiki  kakakuikala kabidi netu pa buloba to. Kadi bena mu musumba munene nebashale balongolola. Bana betu ba balume ba mu mikoko mikuabu badi bakumbane nebangate mudimu wa buntunga mulongo. Bua tuetu kuleja ne: tudi balamate Yehowa, nebitulombe bua kutua bana betu abu nyama ku mikolo ne kutumikila buludiki bua kudi Nzambi buatupeshabu. Bua tuetu kupandishibua, anu tuetu balonde tshiatuambilabu!

15. Ntshinyi tshitudi mua kuenza bua kukolesha dinanukila dietu? Bua tshinyi mbimpe kuenza nanku ku mpindieu?

¹⁵ Dinanukila: Mpungilu wa 2017 uvua ne tshiena-bualu tshia ne: “Kulekedi nansha!” Mpungilu au uvua mutuambuluishe bua kuvudija bukole buetu bua kunanukila mu ntatu. Tuvua balonge ne: ki nkuikala mu bikondo bimpe kudi kuenza bua tuikale tunanukila to. Tudi tukolesha dinanukila dietu patudi tueyemena Yehowa. (Lomo 12:12) Katupu tshivua Yezu mulaye etshi muoyo: “Muntu udi unanukila too ne ku nshikidilu neapandishibue.” (Mat. 24:13, dim.) Mulayi eu udi umvuija ne: tudi ne bua kushala ne lulamatu nansha ntatu ya bishi mitukuate. Patudi tunanukila mu lutatu luonso ludi lutukuata ku mpindieu, tudi tupeta bukole bua bungi kumpala kua dikenga dinene kudikuma mu tshialu.

16. Ntshinyi tshidi tshitupetesha dikima? Ntshinyi tshitudi mua kuenza bua kukolesha dikima dietu ku mpindieu?

¹⁶ Dikima: Mpungilu wa 2018 uvua ne tshiena-bualu tshia ne: “Ikala ne dikima!” Mpungilu au uvua mutuvuluije ne: ki mbipedi bitudi nabi bidi mua kuleja ne: tudi ne dikima to. Anu mudibi bua dinanukila, bua tuetu kupeta dikima dilelela anu tuetu tueyemena Yehowa. Ntshinyi tshitudi mua kuenza bua kumueyemena bikole? Tuikale tubala Dîyi diende dituku dionso ne tuelangana meji a muvua Yehowa musungile bantu bende kale. (Mis. 68:20; 2 Pet. 2:9) Patubunda bisamba mu dikenga dinene, nebikengele tuikale ne dikima ne tueyemene Yehowa bikole kupita kuonso eku. (Mis. 112:7, 8; Eb. 13:6) Tuetu tueyemena Yehowa ku mpindieu, netupete dikima dituikala nadi dijinga patubunda Goga. *

17. Bua tshinyi katuena ne bua kutshina Armagedone? (Tangila tshimfuanyi tshia pa tshizubu.)

¹⁷ Anu mutukadi bamone mu tshiena-bualu tshishale, ba bungi ba kutudi mbakole mu matuku a ku nshikidilu. Kadi tudi kabidi ne ditekemena  dia kupita mu dikenga dinene. Mvita ya Armagedone ke yikale nkomenu munene wa nshikidilu wa ndongoluelu wa malu eu. Kadi katutshinyi tshintu nansha tshimue to. Bua tshinyi? Bualu mvita eyi neikale mvita ya Nzambi. (Nsu. 1:33; Yeh. 38:18-20; Zek. 14:3) Padi anu Yehowa utua tshikemu, Yezu Kristo neaditue mu mvita ne tshiluilu tshia Nzambi tshimutue mu nyima. Neikale ne bela manyi ne banjelu mbombo ne mbombo. Buonso buabu nebele Satana ne bademon bende ne biluilu biabu bia pa buloba mvita ya dikema.​—Dan. 12:1; Buak. 6:2; 17:14.

18. a) Yehowa mmutujadikile tshinyi? b) Ntshinyi tshidi Buakabuluibua 7:9, 13-17 utujadikila bua matuku atshilualua?

¹⁸ Yehowa mmutujadikile ne: “Tshia mvita tshionso tshienza bua kukuluisha natshi katshiakutshimuna to.” (Yesh. 54:17) “Musumba munene” wa batendeledi ba Yehowa ba lulamatu ‘newufumine mu dikenga dinene’ ne muoyo! Pashishe nebatungunuke ne kumuenzela mudimu wa tshijila. (Bala Buakabuluibua 7:9, 13-17.) Bulelela, Bible udi utujadikila ne: netusungidibue kumpala eku! Tudi bamanye ne: “Yehowa udi ukuba bena lulamatu.” (Mis. 31:23) Bantu bonso badi banange Yehowa ne bamutumbisha nebikale ne disanka dia kumumona ubingisha dîna diende dia tshijila.​—Yeh. 38:23.

19. Nditekemena kayi dimpe dia katshia didi dituindile mu matuku makese emu?

¹⁹ Anji elabi meji mudi mêyi a mu 2 Timote 3:2-5 mua kuikala bu owu akula bua bantu ba mu bulongolodi bupiabupia badi Satana katshiyi unyanga. (Tangila kazubu ka “ Muikala bantu tshikondo atshi.”) Muanetu George Gangas * uvua wa mu Kasumbu kaludiki wakakula bua bulongolodi bupiabupia mushindu eu: “Pikala bantu bonso batendelela Yehowa, pa buloba nepikale pimpe be! Mu matuku makese emu newikale ne diakalenga dia kuikala mu ndongoluelu wa malu mupiamupia. Bua wewe kufua, anu padi Yehowa ufua. Netuikale ne muoyo kashidi ne tshiendelele.” Edi si nditekemena dimpe dia katshia’s!