MUSANGU mukuabu Yezu wakamba ne: “Disanka dia kufila ndipite dia kuangata.” (Bien. 20:35) Bulelela bua nshindamenu ebu budi butangila malanda etu ne Yehowa. Bua tshinyi tudi tuamba nanku? Yehowa mmutupeshe bintu bia bungi bidi bitupetesha disanka, kadi tudi mua kupeta kabidi disanka dia bungi menemene tuetu tupesha Yehowa tshintu kampanda. Ntshintu kayi tshitudi petu mua kupesha Yehowa? Nsumuinu 3:9 udi wamba ne: “Tumbisha Yehowa ne bintu biebe bia mushinga.” ‘Bintu bietu bia mushinga’ bidi bikongoloja dîba dietu, mamanya etu, makanda etu, ne bintu bietu bia ku mubidi. Patudi tufila bintu bietu bua kutungunuja ntendelelu mulelela, tudi tupesha Yehowa tshintu kampanda, ne bualu ebu budi butupetesha disanka dia bungi.

Bua bintu bietu bia ku mubidi, ntshinyi tshidi mua kutuambuluisha bua katupu muoyo bua kupesha Yehowa tshietu tshitudi natshi? Mupostolo Paulo wakambila bena Kolinto bua ‘bateke tshintu ku luseke’ bu dipa. (1 Kol. 16:2) Newenze tshinyi wewe musue kumanya malu a bungi adi atangila mishindu ya kufila bintu ne makuta idi mimanyike muaba uudi musombele? Suaku utangile kazubu kadi kuinshi eku.

Mua amue matunga kakuena mushindu wa kufidila makuta anyi bintu ku Enternete to. Kadi kudi mishindu mikuabu idibu bumvuija muudi mua kufila makuta anyi bintu ku Enternete aku. Mu amue matunga, muaba umue umue uudi ubuela au udi ne mandamuna a nkonko itu bantu batamba kudiela bua difila makuta anyi bintu.