1. Yehowa utu ulekela yonso wa kutudi bua kuenza tshinyi?

YEHOWA utu utulekela bua kudisunguila tshitudi basue kuenza. Udi utulongesha mua kuangata mapangadika mimpe, ne patudi tuangata mapangadika adi amusankisha, udi utuambuluisha bua kuakumbaja. (Mis. 119:173) Tuetu ne tshibidilu tshia kutumikila mibelu ya meji itudi tupeta mu Dîyi dia Nzambi, netulue bantu badi bangata mapangadika mimpe.​—Eb. 5:14.

2. Ndutatu kayi lutudi mua kupeta patudi bamane kuangata dipangadika?

² Kadi nansha tuetu bangate dipangadika dimpe, bidi mua kututatshisha bua kujikija tshituvua batuadije. Tuangate bilejilu ebi: Muanetu kampanda utshidi nsongalume udi wangata dipangadika dia kubala Bible mujima. Udi ukokesha bua kumubala mu mbingu ya ntuadijilu kadi ulua kulekela bua bualu kampanda. Muanetu wa bakaji udi wangata dipangadika dia kulua mpanda-njila wa pa tshibidilu, kadi udi wenda uladikija dituku dia yeye kutuadija. Kasumbu ka bakulu kadi kangata dipangadika bua kukumbula bantu ba bungi mu makumbula a bulami, kadi badi babuela muabu mua nzubu balala eku ngondo yenda ipita. Nansha mudi malu aa mashilangane, mmafuanangane ku bualu bumue. Bana betu aba ki mbakumbaje mapangadika abu bimpe menemene to. Bena Kristo ba kumpala ba mu Kolinto bavua pabu ne lutatu elu. Ntshinyi tshivuabu benze? Mmunyi muditshi mua kutuambuluisha?

3. Ndipangadika kayi divua bena Kolinto bangate? Kadi ntshinyi tshivua tshienzeke?

³ Bu mu tshidimu tshia 55, bena mu Kolinto bakangata dipangadika dinene. Bakumvua ne: bena Kristo nabu ba mu Yelushalema ne mu Yudaya bavua mu ntatu ne mu bupele, bumvue kabidi ne: bisumbu bikuabu bivua bienda bibasangishila makuta. Bu muvua  bena mu Kolinto abu benzedianganyi ba malu mimpe ne bapeshanganyi ba bintu, bakadisuika bua kubambuluisha ne kuebejabu mupostolo Paulo bua abaleje tshivua tshikengela kuenza. Yeye kufundila bena mu tshisumbu atshi mukanda uvua ne mêyi a kulonda ne kutekaye Tito bua imanyine mudimu wa dibasangishila bintu. (1 Kol. 16:1; 2 Kol. 8:6) Kadi ngondo mikese pashishe, Paulo wakumvua ne: bena mu Kolinto kabavua bakumbaje tshivuabu bambe to. Ke bualu kayi, diambuluisha diabu kadivua pamuapa dianji kuikala pabuipi bua kudituma ku Yelushalema pa dîba pamue ne bintu bia mu bisumbu bikuabu to.​—2 Kol. 9:4, 5.

4. Bilondeshile 2 Kolinto 8:7, 10, 11, ntshinyi tshivua Paulo mukankamije bena Kolinto bua kuenza?

⁴ Bena Kolinto bavua bangate dipangadika dimpe, ne Paulo wakabela kalumbandi bua ditabuja diabu dikole ne bua dijinga diabu dikole dia kupeshangana bintu. Kadi wakabakankamija kabidi bua bajikije tshikavuabu batuadije. (Bala 2 Kolinto 8:7, 10, 11.) Tshivua tshibenzekele etshi tshidi tshitulongesha ne: nansha bena Kristo ba lulamatu badi mua kutata bua kukumbaja dipangadika dimpe.

5. Nnkonko kayi ituandamuna?

⁵ Anu bu bena Kolinto, bidi mua kutukolela bua kukumbaja mapangadika etu. Bua tshinyi? Bualu bu mutudi bapange bupuangane, tudi mua kuladikija malu. Peshi malu adi mua kutuenzekela ku mpukapuka adi mua kutupangisha bua kuenza tshituvua bapangadije bua kuenza. (Muam. 9:11; Lomo 7:18) Patudi tutangilula dipangadika dituvua bangate ne tumona ne: bidi bikengela kudishintulula, tshitudi mua kuenza ntshinyi? Ntshinyi tshitudi kabidi ma kuenza bua kuikala kukumbaja tshitudi tubanga kuenza?

6. Ntshinyi tshidi mua kuenza bua tushintulule dipangadika kampanda?

⁶ Kudi amue mapangadika manene atudi katuyi mua kushintulula to. Tshilejilu, katuena mua kushintulula dipangadika dietu dia kuenzela Yehowa mudimu to, ne tudi badisuike bua kushala balamate muena dibaka netu. (Mat. 16:24; 19:6) Kadi kudi mapangadika makuabu atudi mua kushintulula. Bua tshinyi? Bualu malu atu ashintuluka. Mmalu kayi adi mua kutuambuluisha bua kuangata mapangadika mimpe menemene?

7. Tudi ne bua kulomba Yehowa tshinyi? Bua tshinyi?

⁷ Lomba Yehowa meji. Yakobo wakafunda ku nyuma wa Nzambi ne: “Bikala umue wa kunudi mupangile meji, atungunuke ne kualomba kudi Nzambi, bualu yeye udi upesha bantu bonso ne tshianza tshilekelela.” (Yak. 1:5) Tuetu bonso tutu ‘tupangila meji’ mu amue malu. Ke bualu kayi patudi tuangata dipangadika anyi patudi tuditangilula, tuikalayi tueyemena Yehowa. Dîba adi Yehowa neatuambuluishe bua kuangata mapangadika mimpe.

8. Ntshinyi tshitudi mua kuenza kumpala kua kuangata dipangadika?

⁸ Bala, webeje. Bala Dîyi dia Nzambi ne mikanda yetu, ne uyukile ne bantu bautu weyemena. (Nsu. 20:18) Mbimpe kuenza nunku kumpala kua kuangata dipangadika dia kushintulula mudimu, dia kumuangala, anyi dia kulonga kalasa kadi mua kukupetesha mudimu udi mua kukuambuluisha bua kuenzela Yehowa mudimu.

9. Tuetu tuenza malu ne meji mimpe, bidi mua kutuambuluisha mushindu kayi?

⁹ Konkonona tshiudi wangatshila dipangadika. Yehowa utu umona tshitu tshitusaka bua kuenza malu. (Nsu. 16:2) Mmusue bua tuikale tuenza malu ne meji mimpe. Nanku patudi tuangata mapangadika, tudi basue petu kuangata ne meji mimpe ne kuangata mu mushindu udi bantu bakuabu mua kumona ne: tudi baangate ne meji mimpe. Tuetu tuangata dipangadika katuyi ne meji mimpe menemene, bidi mua kututatshisha bua kushala balamate ku dipangadika adi. Tshilejilu, nsonga kampanda udi wangata dipangadika dia kulua mpanda-njila. Kadi yeye mumane kuenza matuku, udi utata bua kukumbaja mêba malomba ne bumpanda-njila butuadija kumutonda. Uvua mua kuikala muele meji  ne: dijinga dia kusankisha Yehowa ke divua dimusake menemene bua kulua mpanda-njila. Kadi bidiku mua kuikala ne: dijinga dia kusankisha baledi bende anyi muntu mukuabu udiye munange ke divua ditambe kumuangatshisha bumpanda-njila anyi?

10. Bidi bikengela tshinyi bua kushintuluka?

¹⁰ Tuangatabi tshilejilu tshia mulongi wa Bible udi wangata dipangadika dia kulekela makanya. Udi wanji ualekela lumingu lumue anyi ibidi, kadi padi nyota ya makanya imupita, udi ubangishilula kuanua. Kadi ndekelu wa bionso, udi ualekela bua kashidi! Dinanga didiye munange nadi Yehowa ne dijinga dia kumusankisha mbimuambuluishe bua kulekela makanya.​—Kolos. 1:10; 3:23.

11. Bua tshinyi bidi bikengela wikale ne bipatshila bisunguluke?

¹¹ Ikala ne bipatshila bisunguluke. Paudi wangata dipangadika, wewe udifundila bipatshila bisunguluke, nebikale bipepele bua kujikija tshiuvua mutuadije. Tshilejilu, udi mua kuikala muangate dipangadika dia kubala Bible bikole. Kadi wewe kuyi ne programe musunguluke mu mutu, bidi mua kukupangisha bua kukumbaja tshipatshila tshiebe. * Peshi bakulu badi mua kuangata dipangadika dia kukumbula bantu ba bungi mu makumbula abu a bulami, kadi padi matuku apita badi bapanga kukumbaja dipangadika diabu adi. Bua kukumbajabu tshivuabu batuadije, badi mua kudiela nkonko bu mudi: “Tudiku bamone ne: kudi bana betu batudi nangananga mua kutamba kukumbula anyi? Tudiku badikosele tshikondo tshisunguluke tshia kubakumbula anyi?”

12. Bidi mua kukulomba bua kuenza tshinyi imue misangu? Bua tshinyi?

¹² Mona malu mudiwu ne itaba tshidiwu atshi. Kakuena muntu udi ne dîba ne bintu anyi ne makanda a kuenza bualu buonso budiye musue kuenza to. Nanku ikala umona malu mudiwu ne witaba tshidiwu atshi kuyi wamba ne: “Meme anu mundi muambe amu.” Imue misangu, bidi mua kukulomba bua kushintulula dipangadika diudi mulue kumona ne: ndikupite makanda. (Muam. 3:6) Kadi tutekabi ne: udi mutangilule dipangadika diebe, mudishintulule mudibi bikengela, ne mumone ne: udi mua kudikumbaja. Wewe musue kujikija tshiuvua mutuadije, mona malu atanu adi mua kukuambuluisha.

13. Ntshinyi tshiudi mua kuenza bua kupeta bukole bua kukumbaja nabu dipangadika kampanda?

¹³ Lomba Yehowa bukole bua kuenza malu. Nzambi udi mua kukupesha “bukole bua kuenza malu.” (Filip. 2:13) Nanku lomba Yehowa nyuma wende bua akupeshe bukole buudi nabu dijinga. Ikala anu usambila nansha wewe umona bu ne: Nzambi udi uladikija diandamuna ku masambila ebe. Anu muvua Yezu muambe, ‘tungunuka ne kulomba, neakupeshe’ nyuma au.​—Luka 11:9, 13.

14. Leja mudi dîyi dinene didi mu Nsumuinu 21:5 mua kukuambuluisha bua kukumbaja dipangadika diebe.

¹⁴ Funda malu a kuenza. (Bala Nsumuinu 21:5.) Bua kukumbaja mudimu kampanda anyi bualu buudi utuadija, mbimpe ufunde malu a kuenza. Pashishe nebikulombe bua ulondeshe malu audi mufunde au. Ke mudibi kabidi paudi wangata dipangadika. Funda malu masunguluke audi musue kulonda bua kukumbaja dipangadika adi. Paudi ne bualu bunene bua kuenza, wewe musue kubukumbaja bipepele, buenze ku kakese ku kakese. Paulo wakakankamija bena Kolinto bua kuikala kuteka kadikuta ku luseke “dituku dia kumpala dia lumingu luonso” pamutu pa kuindila too ne pavuaye ufika bua bobu kushisha kusangisha makuta avuabu ne bua kufila. (1 Kol. 16:2) Kuenza malu manene ku kakese ku kakese kudi mua kukuambuluisha kabidi bua kufiki ku diela meji ne: kuakuakumbaja to.

15. Paukadi mufunde malu a kuenza, tshiudi mua kuenza ntshinyi?

¹⁵ Malu masunguluke a kuenza audi ufunda adi mua kukuambuluisha bua kuteka mapangadika  ebe mu tshienzedi. (1 Kol. 14:40) Tshilejilu, mbambile tusumbu tua bakulu bua kuikala kusungula mukulu udi mua kuikala ufunda dipangadika dionso didi kasumbu ka bakulu kangata, ufunda kabidi bakulu badibu basungule bua kukumbaja tshidibu basuike bua kuenza ne dîba dia kutshienza. Padi bakulu batumikila bualu ebu, nebikale bipepele bua kukumbajabu mapangadika adibu bangata. (1 Kol. 9:26) Udi mua kuteta pebe bualu bua nunku mu malu autu wenza. Tshilejilu, udi mua kufunda malu audi ne bua kuenza ku dituku ne kualonga mushindu uudi musue kuakumbaja. Bualu ebu budi mua kukuambuluisha bua kujikija tshiudi mutuadije, ne kuenza malu a bungi mu dîba dikese.

16. Bua kukumbaja dipangadika diebe, bidi bikengela tshinyi? Mmunyi mudi Lomo 12:11 ujadika bualu abu?

¹⁶ Dienzeja bikole. Bitu bilomba kuditatshisha bikole bua kukumbaja malu audi mufunde bua kuenza ne kujikija tshiuvua mutuadije. (Bala Lomo 12:11.) Paulo wakambila Timote bua ‘kutungunuka ne kudifila’ ne ‘kusuminyina’ bua kulua mulongeshi muimpe menemene. Mubelu au udi utuambuluisha petu bua bipatshila bikuabu bia mu nyuma.​—1 Tim. 4:13, 16.

17. Mmunyi mutudi mua kutumikila Efeso 5:15, 16 patudi tukumbaja dipangadika dietu?

¹⁷ Enza malu ne dîba diebe bimpe menemene. (Bala Efeso 5:15, 16.) Keba dîba dia kukumbaja dipangadika diebe ne unemeke dîba adi. Epuka tshilele tshia kuamba ne: “Nembuenze anu pangapeta dîba dia menemene,” bualu pamuapa kua kupeta dîba dia menemene to. (Muam. 11:4) Wamanya bua kulekedi malu a mushinga mukese akudia dîba ne akujikija bukole buudi mua kuenza nabu malu a mushinga wa bungi. (Filip. 1:10) Kuoku mushindu, keba dîba diudi mumone ne: bantu kabakuikala batamba kukutatshisha paudi wenza tshiudi mulongolole to. Ambila bantu ne: kuena musue muntu akubueja mu ditanaji dîba adi to. Mbimpe kukanga telefone ne kulua kutangila mesaje adibu bakutumine dîba dikuabu. *

18-19. Wewe muangate dipangadika dimpe kadi upetangana ne ntatu paudi udikumbaja, tshidi mua kukuambuluisha bua kudilekedi ntshinyi?

¹⁸ Tuma meji ku malu mimpe awapeta. Kuangata dipangadika nkuenze bu kubanga luendu, ne malu mimpe awapeta mmenze bu kufika kuudi uya. Wewe ne muoyo wa kufika kuudi uya aku, neutungunuke anu ne luendu nansha njila uudi uyila yeye mukanga, ne neudimone muenzejibue bua kuangata njila mukuabu. Bia muomumue, tuetu tuimanyina pa malu mimpe atupetesha mapangadika etu, katuakulekela mapangadika au lukasa patudi tupeta ntatu idi mienze bu njila mukanga to.​—Gal. 6:9.

¹⁹ Kuangata mapangadika mimpe kakutu kutekete to, ne bidi mua kutatshisha bua kuakumbaja. Kadi Yehowa yeye mukuambuluishe, udi mua kupeta meji ne bukole biudi nabi dijinga bua kujikija tshiudi utuadija.