1, 2. Bilondeshile tshivua tshifikile mulongi kampanda, kudi mushindu wa muntu kushintuluka anyi?

MULONGI kampanda wa mu tulasa tua bikadilu diende Tony ukavua ukeba kulekela kalasa. Uvua mufuishe tatuende ne katshivua kabidi ne bia tulasa ku muoyo to. Ku ndekelu kua lumingu luonso uvua uya kumona filme anyi usomba ne balunda bende. Kavua muena tshikisu ne munu wa bintu bidi binyungulula mutu to. Uvua anu bu muntu uvua kayi mumanye kuvuaye uya. Uvua kabidi ne dielakana bua dikalaku dia Nzambi. Pashishe wakatuilangana ne muanetu kampanda ne mukajende, kuyukilaye nabu bua dielakana diende adi ne bua nkonko ivuaye udiela. Bakamupesha broshire ibidi, wa Cinq questions à se poser sur l’origine de la vie ne wa La vie a-t-elle été créée ?

² Pavua bana betu abu bapinganyine Tony, ukavua mushintulule meji ende. Uvua mubale broshire ayi bikole, kushalayi bu midie kudi mbuji. Wakamba ne: “Nzambi udi ne bua kuikalaku.” Wakitaba bua kulonga Bible, ne mushindu wende wa kumona malu wakashintuluka ku kakese ku kakese. Wakalua kudifila mu kalasa bikole, kuluaye ne meji a bungi. Nansha mulombodi wa tulasa tuabu uvua mumanye malu avuaye mutuadije kuitabuja wakakema bikole. Wakamba ne: “Udi mushintuluke bikole ne mulue ne meji a bungi be! Mbualu ukadi mu Bantemu anyi?” Tony wakitaba,  yeye kumuyisha. Wakajikija tulasa tuende tua bikadilu bimpe, lelu udi mpanda-njila ne musadidi wa mudimu. Udi kabidi ne disanka bua mudiye mpindieu ne Yehowa udi Tatuende muimpe.​—Mis. 68:5.

3. Mbualu kayi budi Yehowa ulomba bansonga?

³ Bualu bua Tony budi butuvuluija mudi Yehowa utamba kunutabalela nuenu bansonga badi munkatshi muetu. Mmusue bua malu enu ende bimpe ne nuikale ne nsombelu wa disanka dilelela. Ke bualu kayi udi unupesha mubelu eu: “Vuluka Mufuki webe Munene mu matuku a bunsonga buebe.” (Muam. 12:1) Lelu udi malu manyanguke eu, kabitu anu bipepele bua kumuvuluka to. Kadi kudi mushindu wa wewe kumuvuluka. Nzambi yeye nebe, udi mua kumuvuluka ku bunsonga buebe nansha too ne pawakulakaja. Bua kumvua bimpe, tuangatayi tshilejilu tshia ditshimuna Buloba Bulaya kudi bena Isalele ne tshia Davidi ne Goleyata.

4, 5. Ditshimuna dia bena Isalele ne bualu bua Davidi ne Goleyata bidi bitulongesha tshinyi? (Tangila bimfuanyi bia ntuadijilu bia tshiena-bualu.)

⁴ Pakavua bena Isalele pabuipi ne Buloba Bulaya, Nzambi kavua mubambile bua kulonga mvita anyi kupiluka mu diyiluangana to. (Dut. 28:1, 2) Kadi wakabambila ne: bavua ne bua kutumikila mikenji yende ne kumueyemena. (Yosh. 1:7-9) Bua mmuenenu wa buntu, mubelu au kawuvua ne mutu to! Kadi uvua mubelu muimpe wa katshia, bualu Yehowa uvua muenze bua bantu bende batshimune bena Kanâna misangu ne misangu. (Yosh. 24:11-13) Bushuwa, bua kutumikila Yehowa bidi bikengela kuikala ne ditabuja, ne ditabuja adi ditu dienza bua malu ende bimpe misangu yonso. Bualu ebu ki mbushintuluke mu kupita kua bidimu to, bitshidi nanku too ne lelu.

⁵ Goleyata uvua tshilobo tshia mvita, uvua bule bua metre matue ku asatu ne uvua muvuale bia mvita too ne ku mênu. (1 Sam. 17:4-7) Kadi Davidi yeye uvua anu ne bintu bibidi: ndundu wa kukupa nende mabue ne ditabuja kudi Yehowa Nzambi wende. Bua bantu bavua kabayi ne ditabuja, Davidi uvua anu bu mupale. Kadi bavua badidinge bibi be! Goleyata yeye ke uvua mupale.​—1 Sam. 17:48-51.

6. Ntshinyi tshitudi tukonkonona kabidi mpindieu?

⁶ Mu tshiena-bualu tshishale, tuvua bakule bua malu anayi adi atupetesha disanka ne enza bua malu etu ende bimpe. Tuvua bamone ne: bidi bikengela kukumbaja majinga etu a malu a mu nyuma, kunanga balunda badi Nzambi mutupeshe, kudifundila bipatshila bia mushinga, ne kunanga budikadidi buetu bu mutudi bantu ba Nzambi. Mpindieu tukonkononayi kabidi malu aa, kadi netutambe kuimanyina pa amue mêyi manene adi mu Misambu 16.

7. (a) Buebe wewe, muntu wa mu nyuma nnganyi? (b) “Tshitupa” tshia Davidi tshivua tshinyi? Tshivua tshimupeteshe tshinyi?

⁷ Muntu wa mu nyuma udi ne ditabuja kudi Nzambi ne udi umona malu mudi Nzambi uamona. Utu ukeba buludiki kudi Nzambi ne mmudisuike bua kumutumikila. (1 Kol. 2:12, 13) Davidi mmutushile tshilejilu tshimpe. Wakimba wamba ne: “Yehowa ke tshianyi tshitupa, tshianyi tshidibu bampeshe, ne dikopo dianyi.” (Mis. 16:5) “Tshitupa” atshi tshivua tshikongoloja kabidi malanda avua Davidi mudie ne Nzambi uvuaye wangata bu tshinyemenu tshiende. (Mis. 16:1) Tshivua tshimupeteshe tshinyi? Wakafunda ne: “Meme mujima ndi ne disanka.” Bulelela, kakuvua tshintu tshivua tshimupeshe disanka dia bungi kupita bulunda buende ne Nzambi to.​—Bala Misambu 16:9, 11.

8. Ngamue malu kayi adi apetesha muntu nsombelu wa disanka dilelela?

⁸ Bantu badi baditue anu mu bisankasanka ne mu dikeba bubanji kabena bapeta disanka dia buena dia Davidi to. (1 Tim. 6:9, 10) Muanetu mukuabu wa mu ditunga dia Canada udi wamba ne: “Disanka dilelela kadiena difumina ku bitudi  tupeta mu nsombelu to, kadi didi difumina ku bitudi tupesha Yehowa Nzambi, Mufidi wa dipa dionso dimpe.” (Yak. 1:17) Bushuwa, kukolesha ditabuja kudi Yehowa ne kumuenzela mudimu nebikupeteshe nsombelu wa nsongo ne disanka. Mmunyi muudi mua kudikolesha? Ikala usomba nende, tuambe ne: ikala ubala Dîyi diende, ubandila bintu bidiye mufuke, ne welangana meji bua ngikadilu yende, ne bua mudiye mukunange.​—Lomo 1:20; 5:8.

9. Leja muudi mua kulekela Dîyi dia Nzambi dikufumba anu muvuadi difumbe Davidi.

⁹ Dinanga didi Nzambi mutunange nadi ditu dimuenekela imue misangu ku mibelu idiye utupesha bu muledi. Davidi uvua witaba mibelu mimpe ya nunku. Wakamba ne: “Nentumbishe Yehowa udi mumpeshe mibelu. Nansha mêba a butuku, meji a munda muanyi menemene adi ambela.” (Mis. 16:7) Bushuwa, uvua welangana meji bua meji a Nzambi, uavuija ende ne ualekela bua amufumbe. Wewe muenze nunku ne ditabuja, neunange pebe Yehowa bikole ne neukoleshe dijinga diebe dia kumutumikila. Neulue kabidi muena Kristo mushindame. Muanetu kampanda wa bakaji diende Christin wakamba ne: “Pantu ngenza makebulula ne ngelangana meji a bindi mbala, ntu ngumvua anu bu ne: meme ke uvua Yehowa mufundishile malu au!”

10. Bilondeshile Yeshaya 26:3, kuikala muntu wa mu nyuma kudi ne masanka kayi?

¹⁰ Wewe muikale muntu wa mu nyuma, udi upeta kabidi dimanya dia pa buadi ne busunguluji bidi bikuambuluisha bua kumona bulongolodi ebu ne tshidi tshibuindile anu mudi Nzambi ubumona. Patudi tuamba nunku, katuena tuela kalele to. Bua tshinyi Nzambi udi ukupesha dimanya ne busunguluji bia nunku? Mmusue bua umanye malu adi ne mushinga wa bungi mu nsombelu webe, wangate mapangadika mimpe, ne windile matuku atshilualua ne dishindika dionso! (Bala Yeshaya 26:3.) Muanetu mukuabu wa mu États-Unis diende Joshua udi wamba ne: “Kushala pabuipi ne Yehowa kudi kutuambuluisha bua kumona malu adi ne mushinga ne adi kaayi nawu.” Mmuambilamu, ne tshidiye muambe etshi tshitu tshipetesha muntu disanka dia katshia!

11. Mmunyi muvua Davidi muleje tshia kuenza bua kupeta balunda bimpe?

¹¹ Bala Misambu 16:3. Davidi uvua mumanye tshivua tshikengela kuenza bua kupeta balunda bimpe. Wakapeta “disanka dia bungi” pavuaye usomba ne bantu bavua banange Yehowa. Bu mudi Bible ubabikila ne: “bansantu,” bavua bakezuke mu bikadilu ne bena bululame. Ke muvua mufundi mukuabu wa misambu mumvue pende bua balunda bavuaye musungule. Wakafunda ne: “Ndi mulunda wa bonso badi bakutshina ne wa badi balama mêyi ebe matuma.” (Mis. 119:63) Anu mutuvua bamone mu tshiena-bualu tshishale, nansha wewe udi mua kupeta balunda bimpe ba bungi munkatshi mua bantu badi batshina Yehowa ne bamutumikila. Bushuwa, mu bantu abu mudi bantu ba bidimu bishilashilangane.

12. Bulunda bua Davidi ne Yonatana buvua bushindamene pa tshinyi?

¹² Muimbi wa misambu Davidi kavua mudie bulunda anu ne bantu ba mulongo wende to. Udi muvuluke dîna dia muntu ‘munene’ uvua mulue mulunda wende wa pa muoyo anyi? Diende divua Yonatana. Mu bulelela, mu Bible mudi bilejilu bia bungi bia bantu bavua badie bulunda bua katapula kateka, mu bantu abu mudi kabidi Davidi ne Yonatana. Kadi udi mumanye ne: Yonatana uvua mukulumpe kudi Davidi ku bidimu bitue ku 30 anyi? Bulunda buabu abu buvua bushindamene pa tshinyi? Bavua ne ditabuja kudi Nzambi, banemekangana, ne yonso wa kudibu uvua umona dikima divua nadi mukuabu pavuabu baluangana ne baluishi ba Nzambi.​—1 Sam. 13:3; 14:13; 17:48-50; 18:1.

13. Mmunyi muudi wa kualabaja bulunda buebe? Fila tshilejilu.

¹³ Anu bu Davidi ne Yonatana, tuetu petu tudi mua kupeta “disanka dia bungi” tuetu tunanga bantu badi banange Yehowa ne badi baleja ditabuja  kudiye. Kiera udi muenzele Yehowa mudimu kukadi bidimu bia bungi udi wamba ne: “Ndi mudie bulunda ne bantu badi bakolele miaba mishilashilangane ne ba bilele ne bibidilu bishilangane.” Wewe walabaja bulunda buebe mushindu eu, neudimuene mudi Dîyi dia Nzambi ne nyuma wende bikale ne bukole bua kusangisha bantu mu buobumue.

14. (a) Ntshinyi tshidi mua kukuambuluisha bua kudifundila bipatshila bia mushinga? (b) Bamue bansonga mbambe bishi bua kudifundila bipatshila bia mu nyuma?

¹⁴ Bala Misambu 16:8. Davidi uvua mudifile mu dienzela Nzambi mudimu. Wewe uteka mudimu wa Yehowa kumpala ne udifundila bipatshila muikale nende mu lungenyi, newikale pebe ne nsombelu wa disanka dilelela. Muanetu kampanda diende Steven wakamba ne: “Pantu nditatshisha bua tshipatshila kampanda, ntshikumbaja, ne pashishe mvuluka malu amvua muakaje bua kutshikumbaja ndi ngumvua disanka dia bungi.” Muanetu mukuabu wa balume wa mu ditunga dia Allemagne utshidi nsonga ne wenzela Nzambi mudimu mpindieu mu ditunga dikuabu mmuambe ne: “Pandi nkulakaja ndi musue bua pangikala mvuluka malu amvua muenze mu nsombelu wanyi, mmone ne: tshivua muenze anu buanyi meme nkayanyi to.” Tudi tuela meji ne: ke muudi umvua pebe nanku. Biobi nanku, enza mudimu ne bipedi biebe bua kutumbisha Nzambi ne kuambuluisha bakuabu. (Gal. 6:10) Difundila bipatshila bia mu nyuma ne lomba Yehowa bua akuambuluishe bua ubikumbaje. Utu musue kuandamuna masambila a nanku.​—1 Yone 3:22; 5:14, 15.

15. Mbipatshila kayi biudi mua kudifundila? (Tangila kazubu ka “ Bimue bipatshila biudi mua kudifundila.”)

¹⁵ Mbipatshila kayi biudi mua kudifundila? Bimue bia kudibi mbiobi ebi: kufila mandamuna mu bisangilu mu ebe mêyi, kulua mpanda-njila, anyi kuya ku Betele. Udi mua kulonga muakulu mukuabu bua kuya kuambuluisha muaba udibu bawakula. Barak, nsonga udi mu mudimu wa ku dîba ne ku dîba, udi wamba ne: “Kakuena mudimu udi mua kuenza bua ngumvue muntu ngumvua pantu mbika mu dinda dionso mumanye ne: ndi mpesha Yehowa bukole buanyi buonso to.”

16. Davidi uvua muambe tshinyi bua mikenji miakane ya Yehowa? Bua tshinyi?

¹⁶ Bala Misambu 16:2, 4. Anu mutuvua bamone mu tshiena-bualu tshishale, mikenji miakane ya Nzambi ne mêyi ende manene bidi bitupetesha budikadidi bualu bidi bituambuluisha bua kunanga  tshidi tshimpe ne kukina tshidi tshibi. (Amo. 5:15) Mufundi wa misambu Davidi wakitaba ne: Yehowa uvua ‘Mpokolo wende wa buimpe.’ Buimpe mbulengele bua mu bikadilu, anyi mbikadilu bimpe. Davidi uvua udienzeja bua kuidikija Nzambi wende, wenza bua buimpe bua Nzambi bushale buende. Uvua kabidi mukine malu avua Nzambi mukine. Mu malu au mudi ditendelela mpingu didi tshilele tshidi tshipuekeshisha bantu milongo ne tshibapangisha bua kupesha Yehowa butumbi buende.​—Yesh. 2:8, 9; Buak. 4:11.

17, 18. (a) Ntshinyi tshivua Davidi muambe bua bantu bavua mu ntendelelu wa dishima? (b) Lelu ntshinyi tshidi tshienza bua bantu ‘bavudije tunyinganyinga tuabu’?

¹⁷ Kale, bantu bavua mu ntendelelu wa dishima bavua benda masandi bikole. (Hosh. 4:13, 14) Mu bulelela, ntendelelu au uvua usankisha mubidi wa mpekatu. Kadi uvuaku ubapetesha disanka dia kashidi anyi? Nansha kakese! Davidi wakamba ne: ‘Bantu bavua balonde nzambi mikuabu bavua bavudije tunyinganyinga tuabu.’ Bavua bakebele kabidi bana babu bungi kabuyi kubala makenga bungi tshianana. (Yesh. 57:5) Yehowa uvua mukine tshikisu tshibi tshia nunku! (Yel. 7:31) Bu wewe muikalaku tshikondo atshi, uvua anu mua kuikala ne disanka dia bungi bu baledi bebe bobu ne ditabuja kudi Yehowa ne bamutumikila.

¹⁸ Nansha lelu, ntendelelu wa dishima utu utamba kubuikila mêsu pa masandi, nansha pa diselangana dia mulume ne mulume anyi dia mukaji ne mukaji. Kadi katshia ku kale, budikadidi bua ku dîna butubu basanka nabu abu butu anu bupatula bipeta bibi. (1 Kol. 6:18, 19) Pamuapa ukadi mudimuene mudi bantu “bavudija tunyinganyinga tuabu.” Bua bualu abu, bansonga wetu, telejayi koku Tatu wenu wa mu diulu. Ikalayi batuishibue ne muoyo mujima ne: nuenu numutumikila, nenupete diakalenga dia dikema! Nufunde nulame ne: malu mabi adi muntu wenza adi mua kumupetesha disanka dia tshitupa tshîpi, kadi dikenga didiye mua kulua kupeta ndibi ditambe. (Gal. 6:8) Joshua utukadi batele wakamba ne: “Tudi mua kuenza malu ne budikadidi buetu mutudi basue, kadi kuenza nabu malu bibi kakutu ne bua nsongo to.”

19, 20. Mmasanka kayi adi mindile bansonga badi ne ditabuja kudi Yehowa ne bamutumikila?

¹⁹ Yezu wakambila bayidi bende ne: “Nuenu bashale mu dîyi dianyi, nudi bushuwa bayidi banyi, ne nenumanye bulelela, ne bulelela nebunupeshe budikadidi.” (Yone 8:31, 32) Budikadidi abu mbua tupikudibue ku bitendelelu bia dishima, ku dipanga, ne ku bitabataba. Kadi ki nkujike to. Anu mutukadi bamone, kamana kamana nebutupeteshe kabidi “budikadidi bua butumbi bua bana ba Nzambi.” (Lomo 8:21) Wewe ‘mushale mu dîyi dia Kristo’ anyi mu malongesha ende, neulabule budikadidi abu nansha mpindieu. Dîba adi, newende ‘umanya bulelela,’ kuyi ubumanya anu bualu udi ubulonga to, kadi bualu udi ubutumikila.

²⁰ Bansonga wetu, nangayi budikadidi budi Nzambi munupeshe. Enzayi nabu malu bimpe bua nudienzele tshishimikidi tshimpe bua matuku atshilualua. Nsonga kampanda wakamba ne: “Wewe wenza malu bimpe ne budikadidi pautshidi nsonga nebilue kukuambuluisha bikole pawikala ukeba kuangata mapangadika manene bu mudi kukeba mudimu muimpe, anyi kusungula bua kubuela mu dibaka peshi kushala mujike bua tshikondo kampanda.”

21. Leja muudi mua kushala mu njila udi ufikisha ku “muoyo wa bushuwa.”

²¹ Mu bulongolodi bubi ebu, nsombelu udi bantu bamba ne: mmuimpe, ki mbamanye muikalaye to, ne yeye muine ngua tshitupa tshîpi. Katuena bamanye tshiatufikila malaba to. (Yak. 4:13, 14) Nunku, tshimpe tshia kuenza ntshia kushala mu njila udi ufikisha ku “muoyo wa bushuwa,” mmumue ne: muoyo wa tshiendelele. (1 Tim. 6:19) Bulelela, Nzambi katu utuenzeja bua kuendela mu njila au to. Tuetu ke badi ne malu mu bianza. Vuija Yehowa “tshitupa” tshiebe. Nanga “bintu bimpe” bia bungi bidiye mukupeshe. (Mis. 103:5) Bua kujikija, ikala mutuishibue ne: neakupeshe “disanka dipite bungi” ne “diakalenga bua kashidi.”​—Mis. 16:11.