Mu bulelela, ki ntshidi mvese wamba to. Kadi udi wakula bua muntu udi ukuluka, mmumue ne: utuilangana ne ntatu ne dikengeshibua misangu ne misangu kadi ujuka anyi ufika ku diyitantamena.

Tuanji tukonkonone mvese udi kuulu ne kuinshi kua mvese eu. “Kualaminyi pabuipi ne nzubu wa muntu muakane bu muenji wa malu mabi; kubutudi muaba wende wa kuikishila to. Bualu muntu muakane udi mua kukuluka misangu muanda mutekete, ne yeye neajuke kabidi, kadi bantu babi nebalenduke bua dikenga. Padi muena lukuna webe udishinda, kusanki to, ne padiye ulenduka, muoyo webe kawusanki to.”​—Nsu. 24:15-17.

Bamue bantu batu bela meji ne: mvese eu udi wakula bua muntu udi mua kuenza mpekatu kadi ulua kunyingalala pashishe, ne upetulula malanda mimpe ne Yehowa. Banene ba bitendelelu babidi ba mu Grande-Bretagne bakafunda ne: “Ke mutu bantu batu bayisha (kale ne lelu) bumvuija mvese eu.” Banene ba bitendelelu bakuabu mbambe pabu ne: kumvuija mvese eu mushindu eu kudi kuleja ne: “Muntu muimpe udi mua kukuluka mu mpekatu minene, kadi kakujimija dinanga didiye munange Nzambi nansha kakese, ne Nzambi udi umuanyisha bua mudiye unyingalala musangu wonso udiye wenza mpekatu.” Ngumvuilu wa mushindu eu udi mua kuafunya matshi a muntu udi muoyo kawuyi ukuata bua kuenza mpekatu. Udi mua kuela meji ne: nansha mudiye muenze mpekatu misangu ne misangu, Nzambi neatungunuke ne kumufuila luse.

Atshi ki ntshidi mvese wa 16 wamba to.

Muaku wa mu tshiena Ebelu udibu bakudimune ne: “kukuluka” mu mvese wa 16 udi mua kukudimunyibua mu mishindu mishilashilangane. Udi mua kumvuija dikuluka diena dîna; tshilejilu, mpunda udishinda mu njila, muntu ukuluka ku musaka wa nzubu, anyi kasoka kamata pa buloba. (Dut. 22:4, 8; Amo. 9:9) Muaku eu udi kabidi mua kuikala ne diumvuija dia mu tshimfuanyi, bu mudi didi mu mêyi aa: “Yehowa udi uludika bidia bia makasa a muntu padi njila wa muntu au umusankisha. Nansha yeye mua kudishinda, kabakumukuma panshi nansha, bualu Yehowa udi umukuata ku tshianza.”​—Mis. 37:23, 24; Nsu. 11:5; 13:17; 17:20.

Kadi teleja tshivua mulongeshi wa tshikunda Edward Plumptre muambe: “Muaku wa mu tshiena Ebelu udibu bakudimune ne: [“kukuluka”] kabena bawutela bua dikuluka mu mpekatu nansha kakese.” Ke padi mumanyi mukuabu wa malu a mu Bible umvuija mvese wa 16 mushindu eu: “Kukengesha bantu ba Nzambi nkudielela bua tshiomba musabu, bualu nebapanduke, kadi bantu babi kabakupanduka nansha!”

Nunku malu onso aa adi aleja ne: Nsumuinu 24:16 kena wakula bua dienza mpekatu to, kadi udi wakula bua ntatu idi ikuata muntu, pamuapa misangu ne misangu. Mu ndongoluelu wa malu mubi eu, muntu muakane udi mua kutuilangana ne ntatu ya masama anyi ne ntatu mikuabu. Badi mene mua kumukengesha bibi kudi mbulamatadi. Kadi mmutuishibue ne: Nzambi udi umukuatshisha ne neamuambuluishe bua kunanukila bua lutatu alu kalumupitshi bukole to. Kuenaku umona ne: misangu ya bungi malu atu enda bimpe bua batendeledi ba Nzambi anyi? Tudi batuishibue ne: “Yehowa udi ukuatshisha bonso badi badishinda ne udi ujalamija bonso badi biname.”​—Mis. 41:1-3; 145:14-19.

“Muntu muakane” kena usanka padi bakuabu batata to. Kadi udi usanka bua mudiye mumanye ne: “Malu neende bimpe bua badi batshina Nzambi mulelela, bualu bobu badi bamutshina.”​—Muam. 8:11-13; Yobo 31:3-6; Mis. 27:5, 6.