1. Mmubelu kayi uvua mupostolo Petelo mupeshe bena Kristo nende? Bua tshinyi mubelu wende udi mua kumueneka mukole bua kuutumikila?

TUETU bakonkonone mibelu ivua mupostolo Petelo mupeshe bena Kristo bela manyi ba mu bidimu lukama bia kumpala, nebituambuluishe nansha tuetu ne ditekemena dia kuya mu diulu anyi dia kushala pa buloba. Wakafunda ne: “Bu Wa Tshijila uvua munubikile, nuenu bine nulue ba tshijila mu bikadilu bienu bionso, bualu mbafunde ne: ‘Nudi ne bua kuikala ba tshijila, bualu meme ndi wa tshijila.’” (1 Pet. 1:15, 16) Mêyi aa adi aleja ne: tudi petu mua kuidikija Yehowa udi tshilejilu tshitambe buimpe tshia dikala wa tshijila. Tudi ne bua kuikala ba tshijila mu bikadilu bietu ne kudi mushindu wa kukokesha bualu ebu. Bidi mua kumueneka bikole bualu tudi bantu bapange bupuangane. Petelo muine uvua pende muenze bilema bia bungi; kadi tshilejilu tshiende tshidi tshileja ne: tudi mua ‘kulua ba tshijila.’

2. Nkonko kayi ituandamuna mu tshiena-bualu etshi?

² Mu tshiena-bualu etshi, netuandamune nkonko eyi: Kuikala wa tshijila kudi kumvuija tshinyi? Ntshinyi tshidi Bible utulongesha bua dikala dia Yehowa wa tshijila? Ntshinyi tshitudi mua kuenza bua kulua ba tshijila mu bikadilu bietu? Dikala ba tshijila ne bulunda butudi badie ne Yehowa bidi bipetangana ku tshinyi?

3. Ndungenyi kayi lutu nalu ba bungi padibu bakula bua kuikala wa tshijila? Nkuepi kutudi mua kupetela diumvuija dijalame?

³ Patu bantu ba bungi bakula bua muntu wa tshijila batu bamona bobu muntu udi muvuale muzabi wa bamfumu ba bitendelelu, utu kayi ufukisha mimuemue ne kayi nansha useka ne bantu to. Kadi muntu wa tshijila katu nanku to. Bible udi wamba ne: Yehowa ngwa tshijila ne ‘nNzambi wa disanka.’ (1 Tim. 1:11) Ubikila kabidi bonso badi bamutendelela ne: “ba diakalenga.” (Mis. 144:15) Yezu pende wakapisha bantu bavua bavuala bilamba bia pa buabi  ne benza malu mimpe anu bua kudileja kudi bantu. (Mat. 6:1; Mâko 12:38) Bena Kristo balelela mbamanye tshidi kuikala ba tshijila kumvuija bualu mbamanye tshidi Bible wamba. Tudi batuishibue ne: Nzambi wetu wa tshijila udi mutunange kena mua kutuelela mikenji itudi katuyi mua kukokesha bua kutumikila to. Nunku padi Yehowa utuambila ne: “Nudi ne bua kuikala ba tshijila,” tudi bajadike ne: tudi mua kukokesha bualu ebu. Bushuwa, kumpala kua tuetu kulua ba tshijila mu bikadilu bietu, mbimpe tuikale bamanye tshidi kuikala wa tshijila kumvuija.

4. Muaku “wa tshijila” udi umvuija tshinyi?

⁴ Kuikala wa tshijila kudi kumvuija tshinyi? Mu Bible, muaku “wa tshijila” udi uleja nangananga bukezuke bua mu bikadilu ne bua mu malu a ntendelelu. Muaku eu udi mua kuikala kabidi ne lungenyi lua ditekibua ku luseke bua kuenzela Nzambi mudimu. Tudi mua kuamba kabidi ne: tudi ba tshijila patudi bakezuke mu bikadilu, tutendelela Yehowa mu mushindu udiye wanyisha, ne badie nende bulunda bushême. Yehowa ngwa tshijila mu malu onso. Nunku patudi tuela meji bua mudiye muitabe bua kudia netu bulunda bushême nansha mutudi bantu bapange bupuangane, bidi bitupitshila mutu.

5. Ntshinyi tshidi banjelu ba lulamatu batulongesha bua bualu bua Yehowa?

⁵ Yehowa mmukezuke mu malu onso. Mêyi avua baselafima bambe ke adi atujadikila bualu ebu. Baselafima mbanjelu batu pabuipi ne nkuasa wa butumbi wa Yehowa. Bamue ba kudibu bakamanyisha ne: “Wa tshijila, wa tshijila, wa tshijila udi Yehowa wa biluilu.” (Yesh. 6:3) Mu kuamba kuimpe, bua banjelu kuikalabu mu malanda a pa buawu ne Nzambi wa tshijila bivua bikengela bikale pabu ba tshijila. Bobu bine mba tshijila. Ke bualu kayi patu muanjelu wa Yehowa ufika muaba kampanda pa buloba apa, muaba au utu ulua wa tshijila. Ke tshivua tshienzeke pavua Mose muye muaba uvua kamutshi ka mêba kavua kalakuka kapia.​—Ekes. 3:2-5; Yosh. 5:15.

6-7. a) Bilondeshile Ekesode 15:1, 11, mmushindu kayi uvua Mose muleje patoke ne: Nzambi ngwa tshijila? b) Ntshinyi tshivua tshiambuluisha bena Isalele bua kuvuluka ne: Nzambi ngwa tshijila? (Tangila tshimfuanyi tshia pa tshizubu.)

⁶ Mose ne bena Isalele bamane kusabuka Mbuu Mukunze, Mose wakabambila ne: Yehowa Nzambi wabu ngwa tshijila. (Bala Ekesode 15:1, 11.) Bena Ejipitu bavua batendelela nzambi ya dishima kabavua ba tshijila to. Nansha bena Kanana bavua batendelela pabu nzambi ya dishima kabavua ba tshijila to. Bavua balambula bana mu ntendelelu wabu ne badifila mu tshiendenda tshia masandi. (Lew. 18:3, 4, 21-24; Dut. 18:9, 10) Yehowa yeye kavua mua kulomba batendeledi bende bua kuenza malu a bukoya au nansha. Ngwa tshijila mu malu onso. Mêyi avuabu bafunde pa tshitata tshia or tshivuabu balamike ku tshilamba tshia kujingila ku mutu tshia muakuidi munene avua avuluija bena Isalele bualu abu. Bavua bafunde pa tshitata atshi ne: “Bunsantu mbua Yehowa.”​—Ekes. 28:36-38.

⁷ Mêyi avua pa tshitata atshi avua ajadikila muntu yonso uvua uamona ne: Yehowa ngwa tshijila bushuwa. Kadi netuambe tshinyi bua muena Isalele uvua kayi ne mushindu wa kumona mêyi au bua muvuaye kayi mua kusemena pabuipi ne muakuidi munene? Uvuaku ne mushindu wa kumanya ne: Yehowa ngwa tshijila anyi? Eyowa! Bena Isalele bonso, balume, bakaji, ne bana bavua bateleja pavuabu bababadila mikenji. (Dut. 31:9-12) Bu wewe muikalaku pebe tshikondo atshi uvua mua kuikala muteleje pavuabu babala mêyi a ne: “Ndi Yehowa Nzambi wenu; nudi ne bua . . . kulua ba tshijila bualu meme ndi wa tshijila.” “Nudi ne bua kuikala ba tshijila kundi, bualu meme, Yehowa, ndi wa tshijila.”​—Lew. 11:44, 45; 20:7, 26.

8. Ntshinyi tshidi malu adi mu Lewitiki 19:2 ne mu 1 Petelo 1:14-16 atulongesha?

⁸ Tuanji tuimanyinayi pa dîyi kampanda didi  mu Lewitiki 19:2 divua Yehowa muambe bua babadile bena Isalele bonso. Yehowa wakambila Mose ne: “Akula ne tshisumbu tshijima tshia bena Isalele, ubambile ne: ‘Nudi ne bua kuikala ba tshijila, bualu meme Yehowa Nzambi wenu ndi wa tshijila.’” Bidi bimueneka ne: Petelo uvua mutele dîyi adi dîba divuaye ukankamija bena Kristo bua ‘balue ba tshijila.’ (Bala 1 Petelo 1:14-16.) Lelu eu, katuena muinshi mua Mikenji ya Mose to. Nansha nanku tshivua Petelo mufunde atshi tshidi tshijadika bualu budibu bakuile mu Lewitiki 19:2 bua ne: Yehowa ngwa tshijila ne bonso badi bamunange badi pabu ne bua kudienzeja bua kuikala ba tshijila. Bualu ebu budi butangila bantu bonso, badi ne ditekemena dia kuya mu diulu, ne badi ne dia kusomba mu mparadizu pa buloba.​—1 Pet. 1:4; 2 Pet. 3:13.

9. Mmushindu kayi udibi mua kutuambuluisha tuetu bakonkonone Lewitiki nshapita wa 19?

⁹ Bu mutudi basue kusankisha Nzambi wetu wa tshijila, tudi tujinga ne muoyo mujima bua kumanya tshia kuenza bua kulua ba tshijila. Yehowa udi utupesha imue mibelu mimpe idi ituambuluisha bua kumanya tshia kuenza. Tudi mua kupeta mibelu ayi mu Lewitiki nshapita wa 19. Marcus Kalisch mumanyi wa malu a mu Bible muena Ebelu uvua mufunde ne: “Bidi bimueneka ne: Lewitiki nshapita wa 19 udi ne malu a mushinga wa bungi kupita nshapita mikuabu mu mukanda eu, pamuapa kupita too ne mikuabu yonso ya mu mikanda itanu ya ntuadijilu mu Bible.” Tuikalayi bavuluke ne: lua ku ntuadijilu kua Lewitiki nshapita wa 19 kudi mêyi a ne: “Nudi ne bua kuikala ba tshijila.” Tukonkononayi mpindieu imue mvese ya mu nshapita eu idi ne malongesha a mushinga adi mua kutuambuluisha bua kuikala ba tshijila mu nsombelu wetu wa dituku dionso.

10-11. Ntshinyi tshitudi ne bua kuenza bilondeshile Lewitiki 19:3? Bua tshinyi kuenza nanku kudi ne mushinga?

¹⁰ Yehowa mumane kuambila bena Isalele bua balue ba tshijila, wakasakidila ne: “Muntu yonso wa kunudi udi ne bua kunemeka mamuende ne tatuende . . . Meme ndi Yehowa Nzambi wenu.”​—Lew. 19:2, 3.

¹¹ Bidi bimueneka patoke ne: mbimpe tutumikile mubelu wa Nzambi eu wa kunemeka baledi betu. Tuvulukayi ne: musangu mukuabu muntu kampanda wakebeja Yezu ne: “Mbualu kayi buimpe bundi mua kuenza bua kupeta muoyo wa tshiendelele?” Pavua Yezu muandamune muntu  au wakamuambila bua kunemeka tatuende ne mamuende. (Mat. 19:16-19) Yezu wakapisha Bafalese ne bafundi bua muvuabu benza tshionso tshivuabu mua kuenza bua kubenga kutumikila mubelu wa ditabalela baledi. Pavuabu benza nanku bavua ‘bavuija dîyi dia Nzambi tshianana.’ (Mat. 15:3-6) Mu “dîyi dia Nzambi” amu muvua mukenji muitanu wa ku Mikenji dikumi, muvua kabidi dîyi didibu bambe mu Lewitiki 19:3. (Ekes. 20:12) Tumanyayi kabidi muaba eu ne: mukenji udi mu Lewitiki 19:3 wa kunemeka baledi mmulonde tshiambilu tshia ne: “Nudi ne bua kuikala ba tshijila, bualu meme Yehowa Nzambi wenu ndi wa tshijila.”

12. Ntshinyi tshitudi mua kuenza bua kuleja ne: tudi tutumikila mukenji udi mu Lewitiki 19:3?

¹² Tuetu bele meji a dîyi didi Yehowa mutume dia kutua baledi mushinga, pamuapa tudi mua kudiebeja ne: ‘Ntshinyi tshintu meme ngenza bua kuleja ne: ndi ntumikila dîyi edi?’ Wewe wela meji ne: bivua mua kuikala bimpe bu wewe mubenzele malu a bungi mu bidimu bikadi bipite, udi anu mua kupangadija bua kuakaja malu mpindieu. Kuena mua kushintulula malu akadi mapite to, kadi udi mua kudisuika mpindieu bua kuenzela baledi bebe malu a bungi. Pamuapa udi mua kulongolola bua kuvudija misangu ya diya kubasombesha. Anyi udi mua kuikala ubakuatshisha ne bintu bidibu nabi dijinga, ne ubambuluisha mu malu a mu nyuma. Peshi udi mua kuikala ubasamba ne ubakankamija. Wewe wenza nanku, neuleje muudi utumikila mukenji udi mu Lewitiki 19:3.

13. a) Mbualu kayi bukuabu budi mu Lewitiki 19:3? b) Bilondeshile Luka 4:16-18, mmunyi mutudi mua kulonda tshilejilu tshia Yezu lelu eu?

¹³ Mêyi a mu Lewitiki 19:3 adi atulongesha bualu bukuabu budi butangila dikala ba tshijila. Badi bakulamu bua Nsabatu. Bena Kristo kabena muinshi mua Mikenji to, ke bua tshinyi kabiena ne mushinga bua kunemekela dituku dia Nsabatu dia ku lumingu to. Nansha nanku kudi malu a bungi atudi mua kumanyina ku mushindu uvua bena Isalele banemekela dituku dia Nsabatu ne muvua dienza nanku dibambuluishe. Nsabatu ntshikondo tshivua bantu bikisha kabayi benza midimu yabu ya pa tshibidilu to, badifila mu ditendelela Nzambi. * Ke bua tshinyi dituku dia Nsabatu ke divua Yezu uya ku nsunagoga wa kuabu kuvuaye mukolele bua kubala Dîyi dia Nzambi. (Ekes. 31:12-15; bala Luka 4:16-18.) Dîyi didi Nzambi mutume didi mu Lewitiki 19:3 dia “kunemekela nsabatu [yende]” didi ne bua kutusaka bua kudisumbila tshikondo mu midimu yetu ya ku dituku ne ku dituku bua kudifila mu malu a mu nyuma. Udiku mumone ne: bidi bikengela wakaje malu mu bualu ebu anyi? Wewe ne tshibidilu tshia kudilamina tshikondo tshia kudifila mu malu a mu nyuma, neushemeje malanda ebe ne Yehowa. Ebu mbualu bua mushinga buudi ne bua kuenza bua wewe kulua wa tshijila.

14. Mbualu kayi bua mushinga budibu batele misangu ne misangu mu Lewitiki nshapita wa 19?

¹⁴ Mu Lewitiki 19 mbatelamu misangu ne misangu malu a mushinga adi mua kutuambuluisha bua kuikala ba tshijila. Ku ndekelu kua mvese 4 kudi mêyi a ne: “Meme ndi Yehowa Nzambi wenu.” Tshiambilu tshidi tshipetangana ne etshi tshidi kabidi mu nshapita eu misangu 16. Bidi bituvuluija mukenji wa kumpala wa ne: “Meme ndi Yehowa Nzambi webe . . . Kuena ne bua kuikala ne nzambi mikuabu pa kumbusha meme to.” (Ekes. 20:2, 3) Muena Kristo yonso udi musue kuikala wa tshijila udi ne bua kuenza muende muonso bua ne: muntu nansha umue peshi tshintu kampanda katshikadi ne mushinga kupita malanda ende ne Nzambi to. Bu mutudi Bantemu ba Yehowa, tudi badisuike bua kubenga kuenza malu adi mua kupendeshisha muena dîna dia tshijila edi.​—Lew. 19:12; Yesh. 57:15.

15. Mvese idi yakula bua milambu idi mu Lewitiki 19 idi ne bua kutusaka bua kuenza tshinyi?

 ¹⁵ Pavua bena Isalele batumikila mikenji bavua baleja ne: bavua basue bua Yehowa ikale Nzambi wabu. Mu Lewitiki 18:4 badi bamba ne: “Nenutumikile mapangadika anyi, ne nenulame mikenji yanyi mifunda ne nenuyilonde. Meme ndi Yehowa Nzambi wenu.” Mu nshapita wa 19 mudi imue ‘mikenji mifunda’ bua bena Isalele. Tshilejilu, badi bakula bua difila milambu ya nyama mu mvese 5-8, wa 21, ne wa 22. Bena Isalele bavua ne bua kufila milambu ayi mu mushindu uvua kawuyi ‘unyanga tshintu tshia tshijila tshia Yehowa.’ Kubala mvese eyi kudi ne bua kutusaka bua kusankisha Yehowa ne kumulambula milambu idiye wanyisha, anu mudibu batulomba bua kuenza mu Ebelu 13:15.

16. Ndîyi dinene kayi didi mu Lewitiki 19 didi dituvuluija dishilangana didi pankatshi pa bantu badi batendelela Nzambi ne badi kabayi bamutendelela?

¹⁶ Bua tuetu kulua ba tshijila bidi bikengela tuditapulule ne bantu badi kabayi batendelela Nzambi. Bidi mua kuikala bikole bua kuenza nanku. Imue misangu badi mua kuikala batusaka bua kuenza malu adi kaayi apetangana ne disua dia Nzambi kudi balongi betu, bena mudimu netu, balela betu badi kabayi Bantemu, ne bantu bakuabu. Padibu benza nanku, bidi bitulomba bua kuangata dipangadika dinene. Ntshinyi tshidi mua kutuambuluisha bua kuangata dipangadika dimpe? Mu Lewitiki 19:19 mudi dîyi dinene kampanda dia mushinga edi: “Kanuena ne bua kuvuala tshilamba tshienza ne manda a mishindu ibidi masambakane.” Mukenji eu uvua wambuluisha bua kutapulula bena Isalele ne bantu ba mu bisamba bivua bibanyunguluke. Lelu eu ki mbibi bua kuvuala bilamba bienza ne manda a mishindu ibidi masambakane, bu mudi bidi bienza ne ndanda ne miosa ya mikoko to. Kadi mbibi tuetu bafuane bantu badi benza malu adi kaayi apetangana ne tshidi Bible ulongesha, nansha bobu bikale balongi betu, bena mudimu netu, anyi balela betu. Mu bulelela, tudi banange balela betu, banange kabidi bantu bakuabu. Kadi malu atudi tuenza adi ne bua kuleja ne: tudi badiakaje bua kutumikila Yehowa nansha biobi bienza ne: tuikale bashilangane ne bantu bakuabu. Kuenza nanku kudi ne mushinga wa bungi, bualu tuetu basue kulua ba tshijila bidi bikengela tuikale batekibue ku luseke bua kuenzela Nzambi mudimu.​—2 Kol. 6:14-16; 1 Pet. 4:3, 4.

17-18. Ndilongesha kayi dia mushinga didi mu Lewitiki 19:23-25?

¹⁷ Tshiambilu tshia ne: “Meme ndi Yehowa Nzambi wenu” tshivua ne bua kuikala tshiambuluishe bena Isalele bua kuteka bulunda buabu ne Yehowa pa muaba wa kumpala. Mmunyi muvuabu mua kuenza bualu ebu? Badi baleja tshivuabu mua kuenza mu Lewitiki 19:23-25. (Bala.) Mona muvua bena Isalele mua kutumikila mêyi aa pavuabu babuela mu Buloba Bulaya. Muntu  yeye mukune mitshi ya bimuma, kavua ne bua kudia bimuma bivua bikuamaku munkatshi mua bidimu bisatu to. Bimuma bionso bivua bikuama mu tshidimu tshinayi bavua ne bua kubifila muaba munsantu wa Nzambi. Muena mitshi uvua utuadija kudia bimuma biayi anu mu tshidimu tshitanu. Mukenji eu uvua ne bua kuikala muambuluishe bena Isalele bua kumona ne: kabavua ne bua kuteka majinga abu kumpala to. Yehowa uvua musue bua bamueyemene bajadike ne: neabatabalele, ne bua bateke ntendelelu wende pa muaba wa kumpala. Uvua ne bua kuenza bua bapete biakudia bikumbane. Uvua kabidi ubambila bua bikale bafila bintu ne tshianza tshilekelela muaba munsantu uvuabu bamutendelela.

¹⁸ Mukenji udi mu Lewitiki 19:23-25 udi utuvuluija mêyi avua Yezu muambe mu Muyuki wa pa Mukuna. Wakamba ne: “Lekelayi kuditatshisha bua . . . tshinuikala mua kudia anyi bua tshinuikala mua kunua.” Kutungunukaye wamba ne: “Tatu wenu udi mu diulu mmumanye ne: nudi dijinga ne bintu bionso ebi.” Nzambi neatupeshe bitudi nabi dijinga, anu mutuye wenzela nyunyi. (Mat. 6:25, 26, 32) Nunku tudi bajadike ne: Yehowa neatutabalele. Tutu petu tufila “bintu bia luse” bua kuambuluisha badi batata katuyi tuela mbila to. Tutu kabidi ne disanka dia kufila tshietu tshitudi bakokeshe bua basumbe bidi tshisumbu nabi dijinga. Yehowa utu umona bionso bitudi tuenza bua kukuatshisha ntendelelu wende ne muoyo mujima. Neatufute bua malu au. (Mat. 6:2-4) Patudi tupeshangana bintu tudi tuleja ne: tudi bumvue bimpe malongesha adi mu Lewitiki 19:23-25.

19. Mmushindu kayi udi malu atudi bakonkonone a mu mukanda wa Lewitiki aa makuambuluishe?

¹⁹ Tudi bakonkonone anu malu makese a mu Lewitiki nshapita wa 19. Tudi bamonamu malu mashilashilangane atudi mua kuenza bua tulue ba tshijila anu bu Nzambi wetu. Patudi tumuidikija, bidi bileja ne: tudi tudienzeja bua ‘kulua ba tshijila mu bikadilu bietu bionso.’ (1 Pet. 1:15) Bantu ba bungi badi kabayi batendelela Yehowa badi badimuena ne abu abidi mudi batendeledi bende bikale ne bikadilu bimpe. Bualu ebu mbusake bamue ba kudibu bua kutumbisha Yehowa. (1 Pet. 2:12) Kadi Lewitiki nshapita wa 19 udi ne malu makuabu a bungi atudi mua kulonga. Tshiena-bualu tshidi tshilonda netshiakule bua mvese mikuabu. Netshituambuluishe kabidi bua kujingulula malu makuabu atudi mua kuenza bua ‘kulua ba tshijila’ anu muvua Petelo mutukankamije.