Yezu wakalonga ngikadilu ivua milue kumuambuluisha pashishe bua kulua tshilejilu tshimpe tshitambe tshia muntu uvua mumanye kuenza mudimu ne bakuende pakaluaye pa buloba. Tshilejilu tshia Yezu etshi tshidi mua kutulongesha tshinyi? Patudi tutshikonkonona, tudi mua kupetamu mêyi manene asatu adi mua kutuambuluisha bua kumanya mua kuenza mudimu bimpe ne bakuabu. Mêyi manene au neatuambuluishe bua kukolesha lungenyi lua kuenza malu mu buobumue ne bena Kristo netu.

Muenji wa mudimu wa malu mimpe utu udipuekesha upesha bakuabu bunême, kayi udileja to. Yezu wakalongela didipuekesha dia nanku kudi Tatuende. Nansha mudi anu Yehowa nkayende mukumbane bua kubikidibua Mufuki, uvua musue bua bakuabu bamanye mudimu wa mushinga uvua Muanende muenze. Bidi bimuenekela mu mêyi avua Nzambi muambe aa: “Tuenze muntu mu tshimfuanyi tshietu.” (Gen. 1:26) Yezu wakamona ne: Yehowa uvua ne budipuekeshi bua bungi bua muvuaye muambe mêyi au.​—Mis. 18:35.

Pakalua Yezu pa buloba wakadileja pende muena budipuekeshi. Pavua bantu bamutumbisha bua bivuaye wenza, uvua yeye ufila butumbi buonso kudi Nzambi. (Mâko 10:17, 18; Yone 7:15, 16) Yezu wakenza muende muonso bua kulama ditalala ne bayidi bende, ubenzela malu  bu balunda bende kayi ubamona bu bapika to. (Yone 15:15) Bua kubalongesha mua kuikala ne budipuekeshi, wakabowesha too ne mâyi ku makasa. (Yone 13:5, 12-14) Nansha tuetu petu anu bu Yezu, netuleje mutudi tutua bana betu mushinga patudi tuteka majinga abu kumpala kua etu. Tuetu ‘tupeshangana bunême’ ne katuyi tukeba bua batutumbishe, malu adi mua kuenda bimpe menemene.​—Lomo 12:10.

Muntu muena budipuekeshi mmumanye kabidi ne: ‘malu atu enda bimpe mu bungi bua bafidi ba ngenyi.’ (Nsu. 15:22) Nansha tuetu ne mamanya a mushindu kayi, tudi ne bua kuikala bamanye ne: kakuena muntu utu mumanye yeye bionso to. Too ne Yezu pende wakamba ne: kuvua malu avuaye kayi mumanye to. (Mat. 24:36) Uvua kabidi ujinga kumanya lungenyi luvua nalu bayidi bende mu malu kampanda, nansha muvuabu bapange bupuangane. (Mat. 16:13-16) Ke bua tshinyi benzejanganyi nende ba mudimu aba bavua badiumvua badilekelele pavuabu nende. Bia muomumue, tuetu tudipuekesha tuvuluka ne: katuena bamanye malu onso, netulame ditalala ne bena Kristo netu, ne buonso buetu netuenze bua ‘malu ende bimpe.’

Bidi ne mushinga nangananga bua bakulu kuidikijabu budipuekeshi buvua nabu Yezu padibu benza mudimu pamue. Mbimpe bamanye ne: nyuma muimpe udi mua kusaka mukulu kayi yonso wa kudibu bua kufila lungenyi lukumbanyine bua bamone mua kuangata dipangadika dimpe. Nunku patu bakulu benza bisangilu biabu, batu badienzeja bua kulama ditalala bua muntu yonso amone mua kuakula mudilekelele. Dîba adi bobu bonso pamue badi bangata mapangadika ambuluisha bantu bonso mu tshisumbu.

Muenji wa mudimu wa malu mimpe katu ne malu makole padiye wenza mudimu ne bakuende to. Utu umvuilangana. Yezu uvua ne mpunga mivule ya kumona muvua Tatuende kayi ne malu makole. Tshilejilu, Yehowa wakamutuma bua kupikula bukua bantu ku tshibawu tshia lufu.​—Yone 3:16.

Yezu uvua umvuilangana pavuabi bikengela kuenza nanku. Vulukayi muvuaye muambuluishe mukaji muena Foinike, nansha muvuabu bamutume kudi ba mu nzubu wa Isalele. (Mat. 15:22-28) Bualu bukuabu, kavua ukoleshila bayidi bende malu to. Pavua Petelo mulunda wende wa pa muoyo mumuvile munkatshi mua bantu, Yezu kakelekana bua kumufuila luse to. Panyima pa matuku Yezu wakapesha Petelo midimu minene. (Luka 22:32; Yone 21:17; Bien. 2:14; 8:14-17; 10:44, 45) Tshilejilu tshia Yezu tshidi tshituleja patoke ne: mbimpe tuikale tumvuilangana “bua bantu bonso bamanye [mutudi katuyi] bena malu makole.”​—Filip. 4:5.

 Kubenga kuikala bena malu makole nekuenze kabidi bua tuikale badiakaje bua kuenza mudimu mu ditalala ne bantu ba mishindu yonso. Yezu uvua wenzela bantu bavuaye utuilangana nabu malu mimpe a bungi. Biobi kusaka baluishi bende bavua ne mukawu bua kumuamba muvuaye “mulunda wa balambuishi ba bitadi ne benji ba mpekatu,” pabu bantu aba bitabe mukenji uvuaye uyisha. (Mat. 11:19) Katuenaku petu mua kuenza mudimu bimpe ne bantu bakuabu badi bashilangane netu, anu bu Yezu anyi? Muanetu mukuabu diende Louis (udi muenze mudimu ne bantu ba miaba mishilashilangane pavuaye mutangidi wa tshijengu ne ku Betele) udi wamba ne: “Kuenza mudimu pamue ne bantu bapange bupuangane kudi anu bu kuasa tshimanu ne mabue a bunene bushilangane. Wewe mumbushe mabue makuabu muaba uvuawu ne mualonge muaba udi muakumbanyine, udi mua kufika ku dibaka tshimanu tshiololoke. Meme panyi ndi mudienzeje kabidi bua kuakajulula malu anyi bua ne: tshimanu tshietu tshipatuke tshiololoke.” Atshi ntshikadilu tshimpe be!

Mmpunga kayi itudi nayi ya kuleja bena mu tshisumbu tshietu mutudi katuyi ne malu makole? Tudi mua kuenza nanku patudi tuyisha ne bena mu kasumbu ketu ka mudimu wa buambi. Tudi mua kuyisha ne bantu bashilashilangane ba mu mêku anyi ba bidimu bishilashilangane. Tudi mua kudienzeja bua kupepeja malu patudi nabu mu mudimu wa buambi peshi kuya nabu mu mushindu wa diyisha utubu banange bua bibavudijile disanka dia kuyisha.

Muenji wa mudimu wa malu mimpe ‘mmudiakaje bua kuabanyangana bintu ne bakuabu.’ (1 Tim. 6:18) Pavua Yezu wenza mudimu ku luseke lua Tatuende uvua ne bua kuikala mumone ne: Yehowa kavua umusokoka malu to. Pavua Yehowa “mulongolole diulu,” Yezu ‘uvuaku’ ne uvua mua kumanyina malu a bungi kudiye. (Nsu. 8:27) Pashishe, Yezu muine wakalua kulongesha bayidi bende ne disanka dionso “malu [avuaye] mumvue” kudi Tatuende. (Yone 15:15) Tudi petu mua kuikala tuambila bena Kristo netu malu atudi tulonga bua kuidikija tshilejilu tshia Yehowa. Muenji wa mudimu wa malu mimpe katu usokoka bakuabu bidi bikengela ne: bamanye anyi bidi mua kubambuluisha, anu bua bikale bamuebeja yeye malu onso to. Kadi utu wambila bakuende malu onso mimpe adiye mumanye ne disanka.

Tudi kabidi mua kuikala tukankamija batudi tuenza nabu mudimu. Tuamba eku tuela eku, padi muntu kampanda umona mutudi tudifila bua kuenza mudimu ne utuela kalumbandi, kabituku bituenza disanka anyi? Yezu uvua ne tshibidilu tshia kuambila bavuaye wenza nabu mudimu malu mimpe avuaye umona kudibu. (Fuanyikija ne Matayi 25:19-23; Luka 10:17-20.) Wakafika too ne ku dibambila ne: ‘nebenze malu manene kupita’ avuaye yeye muine muenze. (Yone 14:12) Butuku bua muladilu wa lufu luende, wakela bapostolo bende ba lulamatu kalumbandi ubambila ne: “Nuenu ke badi bashale nanyi mu makenga anyi.” (Luka 22:28) Anji fuanyikijabi muvua mêyi ende aa mua kuikala mabakankamije ne mabasake bua kuenza mudimu! Tuetu bikale ne tshibidilu tshia kuela batudi tuenza nabu mudimu kalumbandi, nebibenze disanka dia bungi ne pamuapa nebibasake kabidi bua kuenza mudimu bikole.

Muanetu kampanda diende Kayode udi wamba ne: “Bua muntu kuikala muenji wa mudimu wa malu mimpe kabiena bikengela anu ikale mupuangane to, kadi mbimpe ikale muntu wa disanka ne udi wenza bua mudimu kawunemenyi bakuende to.” Ke muutu pebe nanku pautu wenza mudimu ne bakuebe anyi? Pamuapa udi mua kuebeja bena Kristo nebe bakuabu bua bakuambile mutubu bakumona panutu nuenza nabu mudimu. Bobu badiumvua badilekelele anu bu muvua bayidi ba Yezu badiumvua pabu pavuabu benza nende mudimu, dîba adi udi mua kuamba pebe anu bu mupostolo Paulo ne: “Tudi benzejanganyi nenu ba mudimu bua disanka dienu.”​—2 Kol. 1:24.