Mu 1913 tatu, diende John Mills, wakapeta batismo mu tshimenga tshia New York ne bidimu 25. Muanetu Russell ke uvua muenze muyuki wa batismo. Katupa aka papa kuya ku Trinité, kuvuaye muselele mama, Constance Farmer, uvua Mulongi wa Bible wa tshisumi. Papa uvua wambuluisha mulunda wende William Brown bua kuleja “Foto-Drama wa bufuki.” Wakamuambuluisha nunku too ne pavuabu batume muanetu Brown ne mukajende mu Afrike wa ku ouest. Papa ne mama bakashala bobu anu mu Trinité. Bubidi buabu bavua ne ditekemena dia kuya mu diulu.

Baledi banyi bavua batulele tshitema, batanu ba balume ne banayi ba bakaji. Muanabute diende divua Rutherford; bavua binyike mulombodi wa société Watch Tower wa tshikondo atshi. Meme, muana muibidi, ngakaledibua mu dia 30/12/1922, kunginyikabu dîna dia muanetu Clayton Woodworth uvua utangila dipatuka dia tshibejibeji tshia L’Âge d’Or (lelu Tabulukayi!). Baledi betu bavua batulongeshishe tuetu bonso bimpe, kadi bavua batamba kutusaka bua kudifundila bipatshila bia mu nyuma. Mama uvua ne tshipedi tshia pa buatshi tshia kueleshishangana meji mu Bible ne kuitabijijangana. Papa yeye uvua musue kutulondela miyuki ya mu Bible, unyungisha mubidi ne bianza muenze bu bantu bena miyuki ayi bua kutuambuluisha bua kuyumvua bimpe.

Malu onso avuabu benze au kaavua maye mu mâyi to. Meme ne bana betu ba balume babidi tuvua baye mu kalasa ka Gilada. Bana betu basatu ba bakaji bakenza bumpanda-njila bidimu bia bungi mu Trinité ne Tobago. Baledi betu bavua batukune “mu nzubu wa Yehowa” ku diambuluisha dia dilongesha diabu ne tshilejilu tshiabu tshimpe. Dikankamija diabu diakatuambuluisha bua kushalamu ne kutanta “mu mbanza ya Nzambi wetu.”​—Mis. 92:13.

Kuetu ke kukavua bantu batuilangana bua kuya kuyisha. Bampanda-njila bavua batuilanganaku, ne bavua batamba kuakula bua muanetu George Young, misionere wa mu Canada wakakumbula bana betu ba mu Trinité. Baledi banyi  bavua pabu bakula bimpe bua muanetu Brown ne mukajende bavua benzejanganyi nabu ba mudimu ba kale bakavuabu batume mu Afrike wa ku ouest. Malu onso aa akansaka bua kutuadija kuyisha pamvua ne bidimu 10.

Tshikondo atshi, bibejibeji bietu bivua biamba malu anu muvuawu, biakula patoke bua bitendelelu bia dishima, bua bangenda-mushinga bena lukuka, ne bua malu mabi avua bena tshididi benza. Bua bualu abu, mu 1936 bamfumu ba bitendelelu bakasaka nguvena wa mu Trinité bua kukandika mikanda yonso ya Watch Tower. Tuakasokoka mikanda yetu, kadi tuvua anu tuyisha nayi too ne pavuayi mijike yonso. Tuvua tuenda mu njila anyi tuendesha makalu bavuale bintu bifunda mukenji wa kumanyisha bantu ne tuabanya trakte. Tuvua tuyisha too ne miaba ya kule menemene ya mu Trinité pamue ne kasumbu kavua ne mashinyi a tshikolokolo ka mu tshimenga tshia Tunapuna. Bivua bimpe be! Malu onso aa akenza bua mpete batismo wanyi ne bidimu 16.

Bumpianyi bua kudi baledi banyi ne mushindu uvua mudimu wa diyisha wenda wenzeka biakampesha dijinga dia kulua misionere. Mvua anu ne dijinga adi too ne pangakaya bua kuenza mudimu ne muanetu Edmund Cummings mu tshidiila tshia Aruba mu 1944. Tuvua ne disanka dia bungi dia kusangisha bantu 10 bua kuenza tshivulukilu mu 1945. Tshidimu tshiakalonda, tuakenza tshisumbu tshia kumpala mu tshidiila atshi.

Pashishe meme kubabidila mpunga wa kuyisha muena mudimu netu Oris Williams. Oris uvua wimanyina bikole malongesha a mu tshitendelelu tshiabu. Kadi pakalongaye Bible, wakamanya tshidi Dîyi dia Nzambi diamba menemene, yeye kupeta batismo mu dia 5/1/1947. Tuakalua kunangangana ne kuselangana. Wakatuadija bumpanda-njila mu ngondo wa 11 mu 1950. Diselangana ne Oris diakalengeja kabidi nsombelu wanyi mu mushindu mukuabu.

Mu 1955 tuakapeta diakalenga dia kutubikilabu mu kalasa ka 27 ka Gilada. Bua kudilongolola bua kuya, tuakalekela midimu yetu ya bianza, kupana nzubu wetu ne bintu bikuabu, ne tuetu kumbuka mu Aruba. Mu dia 29/7/1956, tuakajikija kalasa, bobu kututuma mu Nigéria.

Oris wakamba ne: “Nyuma wa Yehowa udi mua kuambuluisha muntu bua kuibidilangana ne ntatu ya mu mudimu wa bumisionere. Meme tshivua musue kulua misionere bu muvua bayanyi musue to. Mvua musue meme kuikala kuanyi kumbelu ne bana. Ngakashintulula meji anyi pakangamona ne: kuyisha lumu luimpe mmudimu wa kuenza ne lukasa. Patuakajika kalasa ka Gilada, nkavua mudiakaje bua kuenza mudimu wa bumisionere. Patuvua babuele mu mazuwa a Queen Mary, muanetu Worth Thornton uvua wenza mudimu mu biro bia muanetu Knorr wakatujingila luendu lulenga. Kutuambilaye ne: tuvua ne bua kuenza mudimu ku Betele. Meme kuteketa mu mikolo kudiambila ne: ‘Ku Betele!’ Kadi ngakalua kuibidilangana ne Betele, meme kumunanga. Ngakenzaku midimu mishilashilangane. Mudimu umvua mutambe kunanga bikole uvua wa kuakidila bantu. Ntu munange bantu, ne mudimu au uvua ungambuluisha bua kutuilangana ne bana betu ba bungi ba mu Nigéria. Ba bungi ba kudibu bavua bafika ku Betele ne lupuishi pambidi, batshioke, ne nyota ya mâyi, ne nzala. Mvua ne disanka dia kubapesha biakudia ne kubambuluisha bua bapetulule makanda. Midimu yonso eyi ivua midimu ya tshijila imvua ngenzela Yehowa, ne ivua impetesha disanka dia bungi.” Bushuwa, mudimu wonso utuvua tuenza uvua utuambuluisha bua kutanta.

Dimue edi, patuvua basombe ne dîku dietu dijima mu Trinité mu 1961, muanetu Brown wakatulondela malu a disanka a mu Afrike. Ngakalonda panyi muvua mudimu utanta mu Nigéria. Muanetu Brown wakangela diapa ne dinanga dionso wambila papa ne: “Johnny, kutu muanji kuya mu Afrike to, kadi Woodworth yeye mmufikamu!” Ke papa kungambila ne: “Worth wanyi, tungunuka anu nanku! Kutshioki to, muananyi!” Mêyi a dinkankamija nawu a batendeledi ba Nzambi ba tshisumi ba matuku a bungi aba akakolesha dijinga dianyi dia kuyisha ne muoyo mujima.

Mu 1962 ngakapeta kabidi diakalenga dia kuya mu kalasa ka 37 ka Gilada kavua kenza ngondo dikumi. Muanetu Wilfred Gooch uvua mutangidi wa Betele wa mu Nigéria tshikondo atshi wakaya yeye mu kalasa ka 38, bobu kumutuma mu Angleterre. Meme ke wakalua mutangidi wa Betele wa Nigéria. Anu bu muvua muanetu Brown wenza, ngakenda bikole mu ditunga dijima, meme kufika ku dimanya bana betu ba bungi ba mu Nigéria ne kubananga bikole. Kabavua  ne bintu bia bungi bia ku mubidi bitu nabi bantu ba mu matunga mabanji to. Nansha nanku, disanka diabu ne dianyisha diabu bua bintu bikese bivuabu nabi bivua bileja patoke ne: kabiena bikengela kuikala ne makuta anyi bintu bia bungi bia ku mubidi bua kuikala ne disanka to. Bivua bienza disanka bua kubamona ne mankenda, ne tshimuenekelu tshimpe mu bisangilu nansha muvuabu ne nsombelu mikole. Pavuabu balua mu mpungilu, ba bungi ba kudibu bavua babuela mu tuminyo ne mu bise ya bisasa mienza anu mu ditunga adi idibu babikila ne: bolekaja. * Bavua batamba kufunda pa bise eyi biambilu bivua bikoka ntema. Tshimue tshia kudibi tshivua tshipetangana ne lusumuinu lua ne: “Kamue kamue wa badikumi.”

Lusumuinu elu nduambilamu! Bualu buonso budi muntu wenza, nansha buobu bukese, budi anu ne mushinga; tuvua petu benze tshietu tshitupa. Mu 1974, ditunga dia Nigéria diakalua ditunga dibidi diakafika ku dipeta bamanyishi binunu 100 panyima pa ditunga dia États-Unis. Mudimu uvua mutante menemene!

Pavua mudimu wenda utanta, ditunga dia Nigéria diakabuela mu mvita kutuadijila mu 1967 too ne mu 1970. Bana betu bavua luseke lua Biafra dia muamua dia musulu wa Niger kabavua ne mushindu wa kuyukila ne Betele munkatshi mua ngondo ya bungi to. Nunku tuvua ne bua kubatuadila mikanda ne kubapesha buludiki. Anu munkavua muleje ku mbangilu, tuakasabuka musulu wa Niger misangu mipite bungi, tusambila Yehowa, bamueyemene.

Ntshidi mvuluka ngendu ituvua tuenza pa musulu wa Niger bikale mu njiwu ya kutuasabu kudi basalayi, ya masama, ne mpukampuka mikuabu. Bivua bikole bua kupitshila miaba ivua basalayi ba mbulamatadi, kadi bivua bienza buôwa bua bungi bua kupitshila miaba ivua basalayi bantomboji dia muamua dia musulu. Umue musangu, ngakasabuka musulu wa Niger butuku mu buatu ngumbukila mu tshimenga tshia Asaba mutangile ku tshia Onitsha, meme kutungunuka ne luendu kuya kukankamija bakulu ba mu tshimenga tshia Enugu. Ngakenza luendu lukuabu bua kukolesha bakulu ba mu tshimenga tshia Aba tshikondo tshivuabu benzeja bantu bua kushala mu mîdima butuku bua baluishi kababamonyi. Mu tshimenga tshia Port Harcourt, tuakimanyika tshisangilu tshietu ne disambila ne lukasa luonso pavua basalayi ba mbulamatadi bapite ku bukole miaba ivua basalayi bena Biafra balame, babuele mu tshimenga.

Bisangilu abi bivua ne mushinga wa bungi bualu bivua bijadikila bana betu muvua Yehowa mubanange ne ubatabalela. Bivua kabidi biambuluisha bua bapete mibelu ivuabu nayi dijinga menemene bua kubenga kubuelakana mu malu a tshididi ne kushala mu buobumue. Bana betu ba mu Nigéria bakatantamena ntatu mikole ayi. Dinanga divuabu banangangane divua dikole kupita nkinu ya bisa, ne bakashala anu mu buobumue. Mvua ne diakalenga dia dikema dia kuikala ku luseke luabu mu tshikondo tshikole atshi!

Mu 1969, muanetu Milton Henschel uvua mulombodi wa mpungilu wa bantu bafume mu matunga a bungi wa “Paix sur la terre” (“Ditalala pa buloba”) uvua muenzekele mu Yankee Stadium, mu New York. Bu mumvua mumuambuluishi, ngakalonga malu a bungi. Biakangambuluisha bikole bualu mu 1970, tuakenza petu mpungilu wa bantu bafume mu matunga a bungi wa “Hommes de bonne volonté” (“Bantu badi Nzambi muanyishe”) mu tshimenga tshia Lagos, mu Nigéria. Mpungilu uvua muenzeke mvita itshifuma ku dijika au wakapita bimpe anu ku diambuluisha dia Yehowa. Uvua mpungilu wa pa buende bualu bavua bamukudimune mu miakulu 17, ne bantu 121 128 bakabuelamu. Muanetu Knorr ne muanetu Henschel pamue ne bana betu bavua bafumine mu États-Unis ne mu Angleterre bakamona bayidi bapiabapia 3 775 bapeta batismo. Tshivua tshimue tshia ku bikondo bivua bantu bungi nunku bapete batismo katshia ku pentekoste! Tshikondo tshimvua ngambuluisha bua kulongolola mpungilu au ke tshikondo tshimvua ne malu a bungi a kuenza kupita tshikondo kayi tshionso mu nsombelu wanyi mujima. Bungi bua bamanyishi buakavula ne lukasa lua bungi kupita mu matunga makuabu!

Mu bidimu bipite pa 30 bituvua benze mu Nigéria, mvua ne disanka dia kuambuluisha imue misangu bu mutangidi muena ngendu ne mutangidi wa zone mu Afrike wa ku ouest. Bamisionere bavua banyisha bikole mutuvua tubatabalela ne tubakankamija. Bivua bienza disanka bua kubajadikila ne: kabavua babapue muoyo to. Mudimu eu mmundongeshe ne: kutabalela bana betu  ke mushindu muimpe wa kubambuluisha bua batante ne benze bua bulongolodi bua Yehowa buikale anu ne bukole ne bushale mu buobumue.

Yehowa ke uvua mutuambuluishe bua kutantamena ntatu ivua mvita mikebeshe mu ditunga, ne masama kabidi. Tuvua anu tumona muvuaye utubenesha. Oris wakamba ne:

“Tuvua tusama malaria bikole. Umue musangu, Worth wakafua tshipuka, tuetu kuya nende ku lupitadi mu Lagos. Bakangambila ne: uvua mua kufua, kadi diakalenga kakafua to! Pakatabalaye, wakayisha munganga uvua umulama lumu luimpe lua Bukalenge. Diende divua Nwambiwe. Tuakalua kuya kumumona ne Worth bua kukolesha dijinga diende dia kumanya malu a mu Bible. Wakitaba bulelela, ne wakalua kulua mukulu mu Aba. Mvua panyi muambuluishe bantu ba bungi, nansha ba Mizilman ba katshia, bua kulua bena mudimu ba Yehowa ba tshisumi. Tuvua ne disanka dia bungi bua mutuvua tuenda tumanya ne tunanga bena mu Nigéria, bilele biabu, bibidilu biabu, ne muakulu wabu.”

Bualu bukuabu butudi balonge mbua ne: Bua kutanta mu mudimu udibu batupesha ku babende, tudi ne bua kulonga bua kunanga bana betu nansha bobu ne bibidilu bishilangane ne bietu.

Tuetu bamane kuenza mudimu ku Betele wa mu Nigéria, bakatutuma bu bamisionere mu tshidiila tshimpe tshitambe tshia Sainte-Lucie mu bidiila bia Caraïbes mu 1987. Uvua mudimu muimpe mutambe, kadi tuakapeta ntatu mikuabu. Mu Afrike bantu balume bavua basela bakaji ba bungi, kadi ba mu Sainte-Lucie bobu bavua basomba ne bakaji kabayi baselangane bilondeshile mikenji to. Bantu ba bungi batuvua tulonga nabu Bible bakalekela tshilele atshi ku diambuluisha dia Dîyi dia Nzambi didi ne bukole.

Mu 2005, bu mukavua makanda etu ashikila bua bukulakaja, Kasumbu kaludiki kakatuleja dinanga, kututumaku ku biro bietu bidi bilombola mudimu wa pa buloba bujima, ku Brooklyn mu New York, mu États-Unis. Ntu anu ngela Yehowa tuasakidila dituku dionso bua Oris wanyi. Muena lukuna wetu lufu wakamutshimuna mu 2015, ne ndi mupange mua kumvuija mundi ngumvua bua lufu luende. Uvua muena dianyi wa dikema, mukaji wa ngikadilu mimpe uvua munnange. Mvua mumunange bikole menemene bidimu 68 bionso bituvua basombe nende. Tuvua bamone ne: bua kuikala ne disanka mu dibaka ne mu tshisumbu mbimpe kunemeka bukokeshi, kufuilangana luse ne muoyo mujima, kuikala ne budipuekeshi, ne kuikala ne dimuma dia nyuma muimpe.

Patuvua tupeta malu avua atutekesha mu mikolo, tuvua tulomba Yehowa bua atuambuluishe bua kutungunuka ne kumuenzela mudimu. Pavuabu batuambuluisha bua kupingana mu njila, tuvua tumona ne: malu avua aya bimpe misangu yonso. Kadi malu matambe buimpe ngatudi bindile kumpala eku!​—Yesh. 60:17; 2 Kol. 13:11.

Mu Trinité ne Tobago, Yehowa uvua mubeneshe mudimu wa baledi banyi ne wa bantu bakuabu. Bilondeshile luapolo lua ndekelu lutudi bapete, bantu 9 892 mbabuele mu ntendelelu mulelela. Mu Aruba, bana betu ba bungi mbenze mudimu wa bungi bua kukolesha tshisumbu tshia ntuadijilu tshimvua atshi. Tshiidila atshi tshikadi mpindieu ne bisumbu 14 bidi bitanta. Mu Nigéria bamanyishi mbavule balue musumba munene wa bantu 381 398. Mu tshiidila tshia Sainte-Lucie muomu mukadi bamanyishi 783 badi bakuatshisha Bukalenge bua Yehowa.

Nkadi mpindieu ne bidimu 90 ne bia mu njila. Misambu 92:14 udi wamba bua bantu badi bakunyibue mu nzubu wa Yehowa ne: “Nansha ku bukulakaja nebikale anu benda basampila, nebikale anu ne makanda ne mubidi mufumfule.” Ndi ne dianyisha dia bungi bua malu onso andi muenze mu mudimu wa Yehowa. Bumpianyi buimpe bua kudi baledi bena Kristo mbungambuluishe bua kuenzela Yehowa mudimu ne muanyi muonso. Bu mudi Yehowa ne dinanga dia lulamatu, mmunganyishile bua ‘kutumpuka mu mbanza ya Nzambi wanyi.’​—Mis. 92:13.