1-2. a) Bua tshinyi mbikolele ba bungi bua kueyemena bantu badi ne bukokeshi? b) Nnsombelu kayi ituakuila mu tshiena-bualu etshi?

LELU eu mbikolele ba bungi bua kueyemena bantu badi ne bukokeshi. Mbamone ne: bena ku tubadi ne bena malu a tshididi batu batamba kutua ku tshia babanji ne bantu banene, balengulula bapele. Bible udi wamba ne: ‘Muntu udi ukokesha muntu mukuabu bua kumukengesha.’ (Muam. 8:9) Bualu bukuabu, bamue bamfumu ba bitendelelu badi benza malu mabi, bifikisha too ne bamue bantu ku dibenga kueyemena Nzambi. Nunku tuetu tulonga Bible ne muntu, mbimpe tumuambuluishe bua amanye mua kueyemena Yehowa ne bantu badiye muteke bua kutulombola.

² Bushuwa ki mbalongi ba Bible nkayabu badi ne bua kulonga mua kueyemena Yehowa ne bulongolodi buende to. Nansha tuetu bakadi ne bidimu bia bungi mu bulelela tudi petu ne bua kuvuluka ne: mushindu utu Yehowa wenza malu utu anu mutambe buimpe. Misangu mikuabu tutu tutuilangana ne nsombelu idi mua kuteta dieyemena dietu kudi Yehowa. Mu tshiena-bualu etshi netuakule bua nsombelu isatu itudi mua kutuilangana nayi idi iteta ditabuja dietu eyi: 1) patudi tubala amue malu a mu Bible, 2) padibu batupesha buludiki kudi bana betu badi batulombola, ne 3) patuatuilangana ne malu makole kumpala eku.

3. Mmunyi mudi amue malu atudi tubala mu Bible mua kuteta dieyemena dietu kudi Yehowa?

 ³ Patudi tubala Dîyi dia Nzambi tudi mua kufika ku didiela nkonko bua mushindu uvua Yehowa muenzele bamue bantu malu ne bua mapangadika kampanda avuaye muangate. Tshilejilu mu mukanda wa Nomba mbaleje ne: Yehowa uvua muambe bua bashipe muena Isalele uvua wangula nkunyi dituku dia Nsabatu. Eku patudi tubala mu Samuele muibidi, tudi tusangana ne:  Yehowa uvua mufuile mukalenge Davidi luse nansha muvuaye muende masandi ne mushipangane. (Nom. 15:32, 35; 2 Sam. 12:9, 13) Nunku bidi mua kutufikisha ku didiebeja ne: ‘Bua tshinyi Yehowa uvua mufuile Davidi luse pende muende masandi ne mushipangane, kadi eku mutume dîyi bua bashipe muntu uvua muenze bubi buvua bumueneka bukese patupu?’ Tukonkononayi malu asatu atudi ne bua kuvuluka patudi tubala Bible bua kuandamuna lukonko elu.

4. Mmunyi mudi malu atudi tubala mu Genese 18:20, 21 ne mu Dutelonome 10:17 enza bua tueyemene mapangadika a Yehowa bikole?

⁴Misangu yonso patubu bakula bua bualu kampanda mu Bible kabatu babuakuila ne mu katoba to. Tshilejilu tudi bamanye ne: Davidi wakanyingalala ne muoyo mujima bua malu mabi avuaye muenze. (Mis. 51:2-4) Kadi muntu uvua mushipe mukenji wa Nsabatu au uvua muntu wa mushindu kayi? Uvuaku munyingalale bua bualu buvuaye muenze abu anyi? Ukavuaku mubenge kutumikila mikenji ya Yehowa kumpala anyi? Peshi uvuaku muteke tshitunu pavuabu bamudimuije anyi mene mubenge kuteleja anyi? Bible kena uleja bualu nansha bumue muaba eu to. Nansha nanku, tudi batuishibue ne: Yehowa ‘katu wenza bibi’ nansha. (Dut. 32:4) Utu utangila malu onso bimpe kumpala kua kuangataye mapangadika; katu wimanyina pa biambamba, peshi pa meji adibu badianjila kuelela muntu, peshi nansha pa bualu bukuabu butu butamba kufikisha bantu ku dimona malu mu mushindu udi kauyi muimpe to. (Bala Genese 18:20, 21; Dutelonome 10:17.) Tuetu tulonga malu a bungi a Yehowa ne mikenji yende, nebienze bua tueyemene kabidi bikole mapangadika adiye wangata. Nansha tuetu babale malu a mu Bible adi atufikisha ku didiela nkonko itudi katuyi bamanye mua kuandamuna mpindieu, tudi bamanye malu a bungi a Nzambi wetu adi atujadikila ne: “mmuakane mu njila yende yonso.”​—Mis. 145:17.

5. Ntshinyi tshidi tshileja ne: dipanga bupuangane ditu ditupangisha mua kumona malu mu buakane? (Tangila kabidi kazubu ka “ Dipanga bupuangane ditu ditupangisha bua kumona malu mudi Yehowa uamona.”)

⁵Bu mutudi bantu bapange bupuangane, misangu yonso katutu tumona malu mu buakane to. Nzambi mmutufuke mu tshimfuanyi tshiende, nunku tutu basue kumona benzela bantu malu mimpe. (Gen. 1:26) Kadi bu mutudi anu bantu bapange bupuangane, tudi mua kumona malu mu mushindu mubi nansha tuetu tuela meji ne: tudi ne bijadiki bionso. Tshilejilu, vuluka muvuabi kabiyi bisankishe Yona  pavua Yehowa muangate dipangadika dia kufuila bena mu Niniwe luse. (Yona 3:10–4:1) Kadi mona tshiakenzeka bua muvua Yehowa mubafuile luse. Mioyo ya bantu bapite pa 120 000 ba mu Niniwe bavua banyingalale bua mibi yabu yakapandishibua! Ndekelu wa bionso biakamueneka patoke ne: Yona ke uvua ne bua kuakaja mmuenenu wende, ki nYehowa to.

6. Bua tshinyi Yehowa ki mmuenzejibue bua kutuambila tshidiye wangatshila mapangadika?

⁶Yehowa ki mmuenzejibue bua kumvuija bantu tshidiye wangatshila mapangadika to. Bushuwa, Yehowa wakanyishila batendeledi bende ba pa kale bua baleje mmuenenu uvuabu nende bua mapangadika avuaye muangate anyi avuaye usua kuangata. (Gen. 18:25; Yona 4:2, 3) Imue misangu uvua umvuija tshivuaye wangatshila dipangadika kampanda. (Yona 4:10, 11) Nansha nanku, Yehowa kena anu muenzejibue bua kutuambila tshidiye wangatshila mapangadika to. Bu mudiye Mufuki wetu, kabiena bikengela ne: tumuanyishile bua yeye kuenza bualu, anyi ne: tubuitaba yeye mumane kubuenza to.​—Yesh. 40:13, 14; 55:9.

7. Ndutatu kayi lutudi mua kuikala nalu? Bua tshinyi?

⁷ Kakuyi mpata, tutu tuitaba ne muoyo mujima ne: Yehowa utu wenza malu makane misangu yonso. Kadi lutatu lutudi nalu ndua kueyemena bantu badiye muteke bua kutulombola. Tudi mua kuikala tudiebeja bikala bantu badiye mupeshe bukokeshi mu bulongolodi buende badi benza malu bilondeshile mikenji yende menemene anyi badi baenza mudibu bobu basue. Ke muvua mua kuikala bamue bantu ba mu bikondo bivuabu bafunda Bible bela meji. Tukonkonone bilejilu bidibu bafile mu  tshikoso 3. Mulela wa muntu uvua mushipe mukenji wa Nsabatu au uvua mua kuikala mudiebeje ni Mose uvua muebeje Yehowa kumpala kua kukoselabu muanabu tshibawu tshia lufu. Mulunda wa Uliya muena Hiti (muena mukaji uvua muende masandi ne Davidi) uvua mua kuikala muele meji ne: Davidi uvua mutume muanzu wende wa bumfumu kumpala, kudiapukaye ku dinyoka divuaye ne bua kupeta. Tshia kumanya ntshia ne: katuena mua kuamba mutudi tueyemena Yehowa tuetu katuyi tueyemena bantu badiye muteke bua kutulombola to, bualu yeye muine udi ubeyemena.

8. Ndipetangana kayi didi pankatshi pa tshidibu bambe mu Bienzedi 16:4, 5 ne mudi malu enzeka mu tshisumbu tshia bena Kristo lelu eu?

⁸ Lelu eu Yehowa udi ukuata mudimu ne “mupika wa lulamatu udi mudimuke” bua kulombola tshitupa tshia bulongolodi buende tshia pa buloba. (Mat. 24:45) Mupika eu udi ulombola bantu ba Nzambi pa buloba bujima, upesha bakulu ba mu bisumbu buludiki anu bu muvua kasumbu kaludiki ka mu bidimu lukama bia kumpala kenza. (Bala Bienzedi 16:4, 5.) Bakulu pabu badi benza bua balonde buludiki abu mu bisumbu. Nanku patudi tulonda buludiki budibu batupesha kudi bulongolodi buetu ne kudi bakulu, tudi tuleja mutudi tueyemena mushindu utu Yehowa wenza malu.

9. Ndîba kayi didibi mua kutukolela bua kutumikila dipangadika kampanda didi bakulu bangata? Bua tshinyi?

⁹ Imue misangu bidi mua kutukolela bua kutumikila mapangadika adi bakulu bangata. Tshilejilu, bidimu bishale ebi mbakajilule malu mu bisumbu bia bungi ne mu bijengu. Mu bimue bisumbu, bakulu bavua balombe bamanyishi bua baye mu bisumbu bikuabu bua kuvudija bungi bua badi babuela mu bisangilu mu Nzubu yetu ya Bukalenge. Bobu batuambile bua kuya mu tshisumbu tshikuabu, bidi mua kutukolela bua kushiyangana ne mêku etu anyi ne balunda betu. Nzambi ke utu utumina bakulu dîyi ubambila tshisumbu tshidibu ne bua kutuma mumanyishi yonso anyi? Tòo. Bualu abu budi mua kuenza ne: bitukolele bua kulonda buludiki budibu batupesha. Kadi Yehowa yeye udi weyemena bakulu padibu bangata mapangadika  a buena aa; mbimpe tuetu petu tubeyemene. *

10. Bua tshinyi mbimpe tueleshangane diboko ne bakulu? (Ebelu 13:17)

¹⁰ Bua tshinyi mbimpe tueleshangane diboko ne bakulu ne tutumikile mapangadika adibu bangata nansha wowu kaayi apetangana ne tshitudi tuetu mua kuikala basue? Bualu patudi tuenza nanku tudi tuambuluisha bua kulama buobumue munkatshi mua bantu ba Nzambi. (Ef. 4:2, 3) Padi bantu bonso badipuekesha batumikila mapangadika adi kasumbu ka bakulu kangata, bisumbu bidi bishindama. (Bala Ebelu 13:17.) Tshidi ne mushinga menemene, tudi tuleja mutudi tueyemena Yehowa patudi tueleshangana diboko ne bantu badiye weyemena badiye muteke bua kutulama.​—Bien. 20:28.

11. Ntshinyi tshidi mua kuenza bua tueyemene buludiki budibu batupesha bikole?

¹¹ Tuetu tuvuluka ne: bakulu batu basambila bua kulomba buludiki bua nyuma muimpe kumpala kua bobu kuangata mapangadika kampanda adi atangila tshisumbu, bidi mua kuenza bua tueyemene buludiki budibu batupesha bikole. Batu bakonkonona kabidi mêyi manene a mu Bible bimpe menemene ne buludiki budi bulongolodi bua Yehowa bufila. Batu basue kusankisha Yehowa ne muoyo mujima ne kulama bantu bende mu mushindu mutambe buimpe. Bantu ba lulamatu aba mbamanye ne: nebabadile Nzambi malu bua mushindu udibu benza mudimu ne bukokeshi budibu babapeshe. (1 Pet. 5:2, 3) Anji elabi meji, pa buloba bujima apa bantu mbatapuluke bua kansungansunga ka makoba, bua bitendelelu, ne bua malu a tshididi; kadi batendeledi ba Yehowa bobu badi mu buobumue, batendelela Nzambi umuepele mulelela. Bidi bienzeka nanku anu bualu Yehowa udi wambuluisha bulongolodi buende!

12. Mmalu kayi adi bakulu ne bua kukonkonona bimpe menemene padibu bakeba bua kumanya bikala muntu mmunyingalale bua mpekatu udiye muenze?

¹² Yehowa mmupeshe bakulu mudimu munene wa kulama tshisumbu tshikezuke. Muena Kristo kampanda yeye muenze mpekatu munene, Yehowa utu ulekela bua bakulu basungule bikala muntu au mua kushala mu bulongolodi anyi ni bidi bikengela kumuipata. Bidi bikengela kabidi bakebe bua kumanya ni mmunyingalale ne muoyo mujima bua mpekatu uvuaye muenze. Udi mua kuamba ne: mmunyingalale, kadi mmukine mukinyinamu bualu buvuaye muenze abu anyi? Mmudisuikaku bua kubenga kuenzulula mpekatu au anyi? Bikalabi ne: balunda babi ke bavua bamufikishe ku dienza mpekatu, udiku wenza malu adi aleja ne: mmusue kukosa nabu bulunda anyi? Bakulu batu basambila bikole, bakonkonona tshidi Bible wamba bua bualu abu, pashishe batangila bua kumanya mushindu udi muenji wa mpekatu umona yeye tshivuaye muenze atshi. Dîba adi badi mua kupangadija bua kumuipata mu bulongolodi anyi kubenga kumuipata. Misangu mikuabu, kutu malu atu enza ne: bamuipate anu kumuipata.​—1 Kol. 5:11-13.

13. Ndungenyi kayi ludi mua kutuluila bobu bipate mulunda wetu anyi mulela wetu mu bulongolodi?

¹³ Ntshinyi tshidi mua kuteka dieyemena dietu kudi bakulu mu diteta? Muntu udibu bipate au yeye kayi mulunda webe anyi mulela webe, bidi mua kuikala bipepele bua wewe kuitaba dipangadika didi bakulu bangate. Kadi fuanyikijabi yeye muikale mulunda webe wa pa muoyo. Bidi mua kukutonda ubanga kudiambila ne: pamuapa bakulu ki mbalondolola malu onso bimpe to, peshi udiebeja bua kumanya bikalabu bakose tshilumbu atshi bimpe muvua Yehowa mua kutshikosa. Ntshinyi tshidi mua kukuambuluisha bua kumona dipangadika adi mu buimpe?

14. Nntshinyi tshidi mua kutuambuluisha pikala dipangadika didi bakulu bangate bua muenji wa mpekatu ditutonde?

¹⁴ Mbimpe tuvuluke ne: kuipata muntu mu  bulongolodi mbualu budi Yehowa mulongolole budi buambuluisha tshisumbu ne muenji wa mpekatu. Bobu balekele muenji wa mpekatu udi kayi unyingalala mu tshisumbu, udi mua kunyanga bantu bakuabu. (Gal. 5:9) Kabidi kakumona ne: tshivuaye muenze atshi mmpekatu mubi mutambe, anyi ne: bidi bikengela ashintulule mmuenenu wende wa malu ne bienzedi biende bua Yehowa amuanyishe kabidi to. (Muam. 8:11) Tuikale bajadike ne: patu bakulu bangata dipangadika dia kuipata muntu mu bulongolodi, kabatu bamona mudimu wabu bu bualu bua bilele to. Mbamanye ne: padibu balumbuluisha ‘kabena balumbuluisha bua muntu kadi badi balumbuluisha bua Yehowa,’ anu bu muvua balumbuluishi ba mu Isalele wa kale benza.​—2 Kul. 19:6, 7.

15. Bua tshinyi bidi bikengela ne: kutuadijila ku mpindieu tueyemene mushindu utu Yehowa wenza malu?

¹⁵ Bu mukadi nshikidilu wa ndongoluelu wa malu eu musemene pabuipi, bidi bikengela tueyemene mushindu utu Yehowa wenza malu, tuenza nanku bikole kupita kuonso eku. Bua tshinyi? Bualu mu dikenga dinene badi mua kutupesha mikenji ya kulonda idi mua kumueneka mikole bua kuyumvua anyi kuyitumikila. Tuambe eku tuele eku, Yehowa kakudiluila nkayende bua kutuambila tshia kuenza to. Pamuapa neatuambilatshi kupitshila kudi bantu badiye muteke bua kutulombola. Adi kadiakuikala dîba dia kubanga kuelakana bua buludiki budibu batupesha peshi kubanga kuela mpata tudiebeja ne: ‘Bidi bana betu badi balombola batuambila ebi mbia mu mutu muabu anyi, peshi ke bidi Yehowa muambe?’ Neweyemenaku Yehowa ne bulongolodi buende mu tshikondo tshikole atshi anyi? Mushindu uudi umona buludiki budibu batupesha mpindieu kudi bana betu badi Yehowa muteke bua kutulombola ke waleja tshiwenza dîba adi. Wewe witaba buludiki budibu batupesha lelu eu ne ubulonda ne muoyo mujima, newenze kabidi bia muomumue mu dikenga dinene.​—Luka 16:10.

16. Mmunyi muikala dieyemena dietu dia mushindu utu Yehowa wenza malu mua kutetshibua matuku makese kumpala eku?

¹⁶ Mbimpe tuele kabidi meji bikole a tshituenza pikala Yehowa mua kunyoka bantu ku nshikidilu kua ndongoluelu wa malu eu. Lelu eu tudi batekemene ne: bantu badi kabayi batendelela Yehowa (kusangisha ne balela betu badi kabayi Bantemu) badi pabu mua kulua batendeledi bende kumpala kua nshikidilu kuluaye. Kadi Yehowa neambe dîyi dia ndekelu bua bualu buabu ku Armagedone, kupitshila kudi Yezu. (Mat. 25:31-33; 2 Tes. 1:7-9) Ki ntuetu basungula bantu bikala Yehowa mua kufuila luse ne bikalaye kayi mua kulufuila to. (Mat. 25:34, 41, 46) Netukokeshaku bua kueyemena tshikala Yehowa mupangadije anyi? Peshi netulekele  kumutendelela bualu katuena banyishe mapangadika adiye muangate? Bidi bimueneka patoke ne: bua tuetu kushala anu beyemene Yehowa ne muoyo mujima matuku adi alua kumpala mbimpe tuikale badianjile kumueyemena bikole ku mpindieu.

17. Mmalu mimpe kayi atuapeta ku nshikidilu kua ndongoluelu wa malu eu bua mapangadika atu Yehowa wangata?

¹⁷ Anji tetabi kudifuanyikijila tshituikala mua kumvua mu bulongolodi bupiabupia bua Nzambi patuamona malu ikale makumbane bua mapangadika atu Yehowa wangata. Bitendelelu bia dishima kabiakuikalaku kabidi to, nansha bangenda-mushinga ba lukuka, peshi makalenge adi makise bantu, mabamueneshe kasuba munkatshi mua bidimu bia bungi. Masama, bukulakaje, ne difuisha bantu batudi banange ki mmalu atuikala kabidi tumona to. Nebasuike Satana ne bademon bende bua bidimu tshinunu. Malu mabi onso avua buntomboji buabu bukebeshe kaakuikalaku kabidi to. (Buak. 20:2, 3) Tshikondo atshi netusanke bikole bua mutuvua beyemene mushindu utu Yehowa wenza malu!

18. Ntshinyi tshidi tshilejilu tshia bena Isalele tshitulongesha bilondeshile tshidibu balonde mu Nomba 11:4-6 ne 21:5?

¹⁸ Nsombelu utuikala nende mu bulongolodi bupiabupia bua Nzambi neatutuadile ntatu kampanda yateka dieyemena ditudi nadi mu mushindu utu Yehowa wenza malu mu diteta anyi? Tshilejilu, tangila tshivua tshienzeke katupa kakese pavua bena Isalele bumbuke mu bupika mu Ejipitu. Bamue ba kudibu bakatuadija kudiabakena bajinga biakudia bimpe bivuabu badia mu Ejipitu, ne bavua bapepeja mana avua Yehowa mubapeshe. (Bala Nomba 11:4-6; 21:5.) Ngenyi ya buena ayi idi mua kutuluila petu pajika dikenga dinene anyi? Katuena bamanye bungi bua mudimu utuikala nawu wa kusukula buloba ne kubuvuija mparadizu ku kakese ku kakese to. Bidi bimueneka ne: nekuikale mudimu wa bungi wa kuenza ne malu kaakuikala anu mapepele ku ntuadijilu to. Netuditue petu mu didilakana bua bikala Yehowa mua kutupesha dîba adi anyi? Tshia kumanya ntshia ne: Tuetu tuleja dianyisha dia bidi Yehowa utupesha lelu, netudileje kabidi bikole bua biatupeshaye dîba adi.

19. Tela malu manene atudi bamone mu tshiena-bualu etshi.

¹⁹ Mbimpe tuikale batuishibue ne: mushindu utu Yehowa wenza malu utu muakane misangu yonso. Bidi bikengela kabidi tueyemene bantu badi Yehowa muteke badi batuambuluisha bua kutumikila mikenji yende. Katupu muoyo nansha kakese mêyi avua Yehowa muakuile mukana mua muprofete Yeshaya aa: “Bukole buenu nebuikale mu dishala talalaa ne dikala ne dieyemena.”​—Yesh. 30:15.