1-2. Nnganyi udi mua kuambuluisha mulongi wa Bible bua aye too ne ku batismo?

MUANETU kampanda wa mu Fidji diende Amy udi wamba ne: “Mvua munange malu a mu Bible avuabu bandongesha. Mvua mumanye ne: tshimvua ndonga tshivua bulelela. Kadi ngakafika ku diakaja malu avua akengedibua meme kufika too ne ku batismo anu pangakabanga kusomba ne Bantemu ba Yehowa.” Tshidi Amy muambe etshi tshidi tshitulongesha bualu bua mushinga ebu: Mulongi wa Bible udi mua kufika ku batismo bipepele padi bena mu tshisumbu bakuabu bamuambuluisha pabu.

² Mumanyishi yonso udi ne tshiende tshidiye mua kuenza bua tshisumbu tshidiunde. (Ef. 4:16) Muanetu Leilani udi mpanda-njila ne musombele mu Vanuatu udi wamba ne: “Batu bamba ne: dikolesha muana mbualu bua musoko mujima. Ndi ngela meji ne: ke mudibi kabidi bua divuija bantu bayidi; pa tshibidilu bitu bilomba bua bena mu tshisumbu bonso bambuluishe muntu bua kufikaye too ne ku batismo.” Bena mu dîku, balunda, ne balongeshi ba mu tulasa batu bambuluisha muana bua kuluaye muntu mukole. Batu bakankamija muana ne bamulongesha malu a mushinga bua kushishaye kukola. Bia muomumue, bamanyishi badi mua kupesha balongi ba Bible mibelu, kubakankamija, ne kubapesha tshilejilu tshimpe bua baye too ne ku batismo.​—Nsu. 15:22.

3. Malu adi Ana ne Dorin ne Leilani bambe adi akulongesha tshinyi?

³ Wewe ulonga ne muntu, bua tshinyi mbimpe wikale usanka padi bamanyishi bakuabu bambuluisha mulongi webe au? Mona tshidi muanetu Ana udi mpanda-njila wa pa buende mu Moldavie  wamba: “Mbikole menemene bua muntu umue patupu kukumbajaye majinga onso adi nawu mulongi wa Bible padiye utuadija kuya kumpala.” Muanetu Dorin udi pende mpanda-njila wa pa buende mu ditunga dimue dimue adi udi wamba ne: “Misangu ya bungi, bamanyishi bakuabu batu bamba bualu butu bulenga mulongi wa Bible ku muoyo, buntu nansha tshiyi muelele meji to.” Muanetu Leilani udi uleja bualu bukuabu wamba ne: “Dinanga ne musangelu udibu baleja mulongi bidi mua kumuambuluisha bua kujadikaye ne: tuetu ke bantu ba Yehowa.”​—Yone 13:35.

4. Ntshinyi tshituakonkonona mu tshiena-bualu etshi?

⁴ Kadi udi mua kudiebeja ne: ‘Ntshinyi tshindi meme mua kuenza bua kuambuluisha mulongi wa Bible bua kuya kumpala pende kayi wanyi?’ Tumonayi tshitudi mua kuenza patudi tuya kufila muntu bua kulonga ne mulongi wende ne tshitudi mua kuenza padi mulongi wende au utuadija kubuela mu bisangilu. Netumone kabidi tshidi bakulu mua kuenza bua balongi ba Bible baye too ne ku batismo.

5. Padi muntu ukulomba bua uye kumufila bua alongeshe muntu Bible, wewe udi ne mudimu kayi?

⁵ Padi muntu ulonga ne mulongi wende, yeye ke udi ne mudimu wa kuenza bua umvue Dîyi dia Nzambi. Yeye mukulombe bua uye kumufila, umanye ne: wewe mudimu webe ngua kuambuluisha mulongeshi. Udi umuelesha diboko. (Muam. 4:9, 10) Kadi ntshinyi tshiudi mua kuenza menemene bua kuambuluisha mulongi wende au?

6. Paudi uya kufila muntu bua alonge ne mulongi wende, mmunyi muudi mua kutumikila dîyi dinene didi mu Nsumuinu 20:18?

⁶ Dilongolola bua dilonga dia Bible adi. Tshia kumpala, lomba mulongeshi akuambile malu a mulongi wende au nansha makese. (Bala Nsumuinu 20:18.) Udi mua kumuebeja ne: Mmalu kayi a mulongi webe eu audi mua kungambila? Lelu nenulonge tshiena-bualu kayi? Udi musue bua akuate tshinyi mu dilonga dia lelu? Kudi bualu bundi mua kuenza anyi kubenga kuenza, peshi bundi mua kuamba anyi kubenga kuamba anyi? Ntshinyi tshindi mua kuamba bua kumukankamija bua aye kumpala? Tumanye ne: mulongeshi kena ne bua kuamba malu a mulongi wende adi bantu bakuabu kabayi ne bua kumanya to. Kadi tshidiye mua kuambila muinende tshidi mua kumuambuluisha. Ke mutu muanetu kampanda udi misionere diende Joy wenza patubu baya kumufila bua kulongesha bantu Bible. Udi wamba ne: “Malu andi ngambila utudi tuya nende mu buambi atu amuambuluisha bua kutabalela mulongi ne kumanya tshia kuamba patudi tulonga.”

7. Bua tshinyi mbimpe ulongolole malu adi muntu uudi uya kufila uya kulongesha mulongi wende?

⁷ Paudi uya kufila muntu bua alongeshe mulongi wende Bible, bidi mua kuikala bimpe wewe mulongolole malu adiye uya  kumulongesha. (Eze. 7:10) Muanetu Dorin utukadi batele udi wamba ne: “Bitu binsankisha padi muanetu utudi tuya nende mu buambi ulongolola malu andi nya kulongesha muntu. Padiye wenza nanku udi mua kuamba malu adi mua kuambuluisha mulongi.” Dîba adi mulongi udi umona kabidi ne: nuenu bonso nudi badilongolole bimpe, ne nenumushile tshilejilu tshimpe tshia kulonda. Nansha wewe kuyi mukumbane bua kulongolola malu onso ayaye kulongesha, kebaku dîba nansha dikese dia kumanya malu manene a mu dilonga adi.

8. Ntshinyi tshiudi mua kuenza bua paudi wenza disambila wambe malu masunguluke?

⁸ Disambila ntshitupa tshinene tshia mu dilonga dia Bible, nanku mbimpe udianjile kuela meji a tshiwamba bobu bakulombe bua kusambila. Dîba adi newambe malu masunguluke. (Mis. 141:2) Muanetu Hanae wa mu Japon utshidi muvuluke masambila avuabu benza kudi muanetu kampanda uvua ulua ne mulongeshi wende wa Bible. Udi wamba ne: “Avua andeja ne: uvua mudie bulunda bukole ne Yehowa, ne mvua musue kumuidikija. Avua andeja kabidi muvuaye munnange bualu uvua utela dîna dianyi mu masambila avuaye wenza.”

9. Bilondeshile Yakobo 1:19, ntshinyi tshiudi mua kuenza bua kuambuluisha muinebe padiye ulongesha muntu Bible?

⁹ Elesha mulongeshi diboko padiye ulombola dilonga. Mpanda-njila kampanda wa pa buende wa mu Nigeria diende Omamuyovbi udi wamba ne: “Muntu udi ufila muinende mu buambi yeye umuteleja ne ntema padiye ulombola dilonga, bidi mua kuambuluisha bikole. Udi umvuija malu bimpe kayi wakula bia bungi to, bualu mmumanye ne: mulongeshi ke udi ulombola dilonga.” Mmunyi muudi mua kumanya dîba diudi mua kuakula ne tshiudi mua kuamba? (Nsu. 25:11) Padi mulongeshi ne mulongi wende wa Bible bayukila, bateleja bimpe. (Bala Yakobo 1:19.) Dîba adi neushishe kumanya tshia kuamba ne dîba dia kutshiamba. Kadi mbimpe wikale ne busunguluji. Tshilejilu, ki mbimpe ubange kutua mu nsampu kutua mu kaleji, ukadi ujimija too ne lungenyi luvua nalu mulongeshi, anyi ubanga kumvuija tshiena-bualu tshikuabu to. Kadi umvuija malu mu mêyi makese, anyi fila tshilejilu, peshi ela lukonko bua kutokesha bualu budiye ulongesha. Imue misangu udi mua kumona ne: kuena anu ne tshia nsongo tshia kuamba to. Nansha nanku, wewe wela mulongi kalumbandi ne umutabalela, bidi mua kumuambuluisha bikole bua kuyaye kumpala.

10. Wewe mulondele mulongi malu akadi makuenzekele, bidi mua kumuambuluisha mushindu kayi?

¹⁰ Mulondela malu akadi makuenzekele. Biobi bikumbana, udi mua kumulondela mu mêyi makese muwakalonga bulelela, muwakatantamena lutatu kampanda, anyi muudi mumone tshianza tshia Yehowa mu nsombelu webe. (Mis. 78:4, 7) Pamuapa tshiwambila mulongi atshi ke tshidiye mene mua kuikala natshi  dijinga. Bidi mua kukolesha ditabuja diende anyi kumukankamija bua kuya too ne ku batismo. Bidi kabidi mua kumuleja mua kutantamena lutatu kampanda ludiye nalu. (1 Pet. 5:9) Muanetu Gabriel udi mpanda-njila mu Brésil udi uvuluka muvua dilonga dia Bible dimuambuluishe wamba ne: “Pamvua ngumvua malu avua bana betu bandondela, ngakamanya ne: Yehowa utu umona ntatu itudi nayi. Bu muvuabu bakokeshe mua kuyitantamena, meme panyi mvua mua kuyitantamena.”

11-12. Bua tshinyi bidi bikengela tuikale tuakidila balongi ba Bible badi balua mu bisangilu ne disanka?

¹¹ Bua mulongi wa Bible kuyaye too ne ku batismo, bidi bikengela ikale ubuela mu bisangilu pa tshibidilu bua bimuambuluishe. (Eb. 10:24, 25) Pamuapa bua dilua diende dia kumpala mulongeshi wende ke wamuambila. Padiye ulua, tuetu bonso tudi mua kumukankamija bua atungunuke ne kulua ku Nzubu wa Bukalenge. Ntshinyi tshitudi mua kuenza menemene bua kumukankamija?

¹² Tumuakidilayi ne disanka. (Lomo 15:7) Mulongi yeye mumone ne: tudi bamuakidile mu bisangilu ne disanka, nebikale bipepele bua kupetaye muoyo wa kuikala kulua ku Nzubu wa Bukalenge. Tumuele muoyo ne disanka ne tumuleje kudi bakuabu, tshibi katumuenzedi bia bimuenza kabundu to. Katumulekedi nkayende to; bualu mulongeshi wende udi mua kuikala kayi muanji kufika anyi udi mua kuikala wenza midimu mikuabu ku Nzubu wa Bukalenge aku. Londa bidiye wamba ne ntema yonso ne umutabalele. Ntshinyi tshidi mua kuenzeka wewe mumuakidile ne disanka? Mona tshivua tshienzekele muanetu Dmitrii. Muanetu eu mmubatijibue kutshidi bidimu bikese, ne mpindieu mmusadidi mu tshisumbu. Udi uvuluka musangu wa kumpala uvuaye mubuele mu bisangilu wamba ne: “Muanetu kampanda uvua mumone mumvua muimane pambelu pa Nzubu wa Bukalenge tshiyi mumanye tshia kuenza wakambueja munda. Bantu ba bungi bakalua kungela muoyo. Biakampitshila. Biakansankisha bikole, meme kujinga nansha bua bisangilu bikale bienzeka dituku dionso. Tshivua muanji kumona bia nunku muaba nansha umue to.”

13. Bikadilu biebe bidi mua kuenzela mulongi wa Bible tshinyi?

¹³ Tuikale tshilejilu tshimpe. Bikadilu biebe bimpe bidi mua kujadikila mulongi wa Bible ne: mmupete bulelela. (Mat. 5:16) Muanetu Vitalii udi mpindieu mpanda-njila mu Moldavie udi wamba ne: “Ngakafika ku dimanya nsombelu uvua nende bena mu tshisumbu, muvuabu bela meji, ne muvuabu benza malu. Biakanjadikila ne: Bantemu ba Yehowa ke badi benda ne Nzambi bulelela.”

14. Leja mudi tshilejilu tshiebe mua kuambuluisha muntu bua kuya kumpala.

¹⁴ Bua mulongi wa Bible kukumbanaye bua kubatijibua, udi ne bua kutumikila malu adiye  ulonga. Kabitu anu bipepele to. Kadi padiye umona ne: bidi bikuambuluisha paudi utumikila mêyi manene a mu Bible, muoyo udi mua kumusaka bua kukuidikija. (1 Kol. 11:1) Tuangate tshilejilu tshia Hanae utukadi batele. Udi wamba ne: “Bena Kristo nanyi bakavua batumikila malu amvua ndonga. Ngakamona mumvua panyi mua kuikala nkankamijangana, mfuilangana luse, ne mumvua mua kunanga bakuabu. Bavua batamba kuamba anu malu mimpe a bakuabu. Mvua musue kubafuana.”

15. Bilondeshile Nsumuinu 27:17, bua tshinyi mbimpe kudia bulunda ne mulongi wa Bible utu ubuela mu bisangilu?

¹⁵ Tudie bulunda ne mulongi wa Bible. Padi mulongi utungunuka ne kubuela mu bisangilu, tuikale tumutabalela bikole. (Filip. 2:4) Mbimpe kuikala kuyukila nende. Udi mua kumuela kalumbandi bua mushindu udiye wenda uya kumpala ne kumuebeja bua dilonga diende dia Bible, bua bena mu dîku diabu, anyi bua mudimu wende. Kadi wadimuka bua kumuedi nkonko idi mua kumutonda. Miyuki ya nunku idi mua kunuvuija balunda. Paudi udia bulunda ne mulongi, udi umuambuluisha bua aye too ne ku batismo. (Bala Nsumuinu 27:17.) Hanae ukadi mpindieu mpanda-njila wa pa tshibidilu. Udi uvuluka dîba divuaye mutuadije kubuela mu bisangilu wamba ne: “Bu munkavua mupete balunda mu tshisumbu, bisangilu bikavua binsamina muoyo bikole, mvua mbibuela nansha meme mutshioke. Mvua musue kuikala ku luseke lua balunda banyi bapiabapia abu; biakangambuluisha bua kukosa malanda ne bavua kabayi batendelela Yehowa. Mvua musue kusemena pabuipi menemene ne Yehowa ne bantu bende. Nunku ngakangata dipangadika dia kubatijibua.”

16. Ntshinyi tshikuabu tshiudi mua kuenza bua mulongi wa Bible ikale ne disanka dia kuikala mu tshisumbu?

¹⁶ Padi mulongi wenda uya kumpala ne wenda ushintuluka, enza bua amone ne: udi pende ne muaba mu tshisumbu. Udi mua kuenza nanku wewe umubikila kuebe. (Eb. 13:2) Muanetu Denis udi mu Moldavie udi uvuluka tshikondo tshivuaye ulonga Bible wamba ne: “Bena Kristo netu bavua batubikila meme ne mukajanyi ku mabu misangu ne misangu bua kubasombesha. Bivua bitukankamija. Disomba nabu adi diakatupesha muoyo wa kuenzela Yehowa mudimu ne kutujadikiladi ne: tuetu bamuenzelawu netupete nsombelu muimpe.” Padibu anu banyishila mulongi wa Bible bua kubanga kuyisha, udi mua kumulomba bua akufile mu buambi. Muanetu Diego wa mu Brésil udi wamba ne: “Bena Kristo nanyi bavua bandomba bua kuya nabu mu buambi. Bivua bingambuluishe bua kubamanya bimpe menemene. Pamvua nyisha nabu ngakamanya malu a bungi; meme kudiumvua pabuipi menemene ne Yehowa ne Yezu.”

17. Ntshinyi tshidi bakulu mua kuenza bua kuambuluisha balongi ba Bible?

¹⁷ Kebelayi balongi ba Bible dîba. Bakulu wetu, nuenu nutabalela balongi ba Bible ne  muoyo mujima, badi mua kuya too ne ku batismo. Ikalayi nuyukila nabu padibu balua mu bisangilu. Nebamone ne: nudi nubatabalela nuenu nuvuluka mêna abu nangananga padibu babanga kuela bianza muulu bua kuandamuna. Udiku mua kuikala wakaja programe webe ku musangu ne ku musangu bua wikale ufila bamanyishi padibu baya kulonga ne bantu Bible anyi? Wewe wenza nanku udi mua kuambuluisha mulongi mushindu uudi kuyi muele meji to. Muanetu Jackie udi mpanda-njila mu Nigeria udi wamba ne: “Balongi ba bungi batu bakema patubu bamanya ne: muanetu utuvua balue nende bua kubalongesha Bible mmukulu. Mulongi mukuabu wa Bible wakamba ne: ‘Wetu pastere katu mua kuenza nanku nansha kakese. Utu uya kutangila anu babanji padiye mumanye ne: nebamufute bua diya kubatangila adi!’” Mulongi au ukadi ubuela mu bisangilu.

18. Ntshinyi tshidi bakulu mua kuenza bua kukumbaja mudimu udibu babapeshe mu Bienzedi 20:28?

¹⁸ Longeshayi balongeshi ba Bible, nubakankamije. Bakulu wetu, nudi ne mudimu munene wa kuambuluisha bamanyishi bua bamanye mua kuyisha ne kulongesha bantu Bible bimpe. (Bala Bienzedi 20:28.) Muntu yeye umvua buôwa bua kulombola dilonga dia Bible panudi nende, mulomba bua udilombole wewe. Jackie utukadi batele udi wamba ne: “Bakulu batu bangebeja bua kumanya mudi balongi banyi ba Bible. Pantu mpeta lutatu lua mua kulombola malonga au, batu bampesha ngenyi itu ingambuluisha.” Bakulu badi mua kukankamija balongeshi ba Bible bikole ne kubasaka bua kunanukila. (1 Tes. 5:11) Jackie udi wamba kabidi ne: “Bitu binsankisha patu bakulu bankankamija ne bangambila ne: badi banyisha mudimu mukole undi ngenza. Mêyi au atu anu bu dikopo dia mâyi matalale manua dîba dia munya wa kafiondola mbua makoba. Patubu bangela kalumbandi bitu bindeja ne: ntu ndombola malonga a Bible bimpe ne bitu bimvudijila disanka dintu ngumvua bua mudimu eu.”​—Nsu. 25:25.

19. Ndisanka kayi didi yonso wa kutudi mua kumvua?

¹⁹ Nansha katuyi ne muntu utudi tulongesha Bible mpindieu, tudi anu mua kuambuluisha muntu bua kuyaye too ne ku batismo. Tudi mua kuelesha mulongeshi diboko bimpe padiye ulonga ne muntu Bible tuetu badilongolole bimpe kumpala kua kuakula, kadi katuyi tutua mu nsampu tutua mu kaleji to. Mbimpe tudie bulunda ne balongi padibu balua ku Nzubu wa Bukalenge, ne tuikale tshilejilu tshimpe kudibu. Bakulu pabu badi mua kukebela balongi dîba bua kubakankamija, kulongesha balongeshi ne kubela kalumbandi bua kubakankamija pabu. Tuanji kuamba, kudiku disanka dipite ditudi tumvua patudi tumanya ne: tudi benze petu tshituvua mua kuenza bua kuambuluisha muntu bua afike ku dinanga Yehowa Tatu wetu, ne ku dimuenzela mudimu anyi?