Miaku ya mu tshiena Ebelu idi mu mvese eyi idi mua kumvuija malu a bungi. Bu mudibi nanku, malu adi alonda aa adi atuambuluisha bua kumvua lungenyi lulelela:

1. Tangila mvese mikuabu ya mu musambu eu. Muaku “nunku” udi mu mvese wa 12 udi umvuija ne: bantu bakane, mmumue ne: bantu badi balomba bua ‘babasungile ne babapandishe’ kudi bantu babi, ke bapeta masanka adibu batela mu mvese wa 12-14. Lungenyi elu ndudi kabidi mu mvese wa 15 mudibu batela muaku “diakalenga” miaba ibidi bua kuleja ne: bantu bakane bamue bamue abu, mmumue ne: “badi Yehowa muikale Nzambi wabu,” ke bapeta diakalenga adi!

2. Ngumvuilu eu udi upetangana ne mvese mikuabu ya mu Bible idi ileja masanka adi Nzambi mulaye bantu bende ba lulamatu. Musambu eu udi uleja muvua Davidi ne ditekemena dilelela dia ne: pavua Nzambi usungila tshisamba tshia Isalele kudi baluishi babu, uvua ne bua kubapetesha disanka ne kubambuluisha bua batante. (Lew. 26:9, 10; Dut. 7:13; Mis. 128:1-6) Tshilejilu, Dutelonome 28:4 udi wamba ne: “Bana bebe ne bintu bia mu budimi buebe ne bana ba bimuna biebe, bana ba ngombe yebe ne ba mikoko yebe nebibeneshibue.” Bushuwa, mu bukalenge bua Solomo muana wa Davidi, bena Isalele bavua ne ditalala ne bavua batante bikole mu mushindu uvuabu katshia kabayi banji kumona. Bualu bukuabu budi ne: malu a mu bukalenge bua Solomo avua kadiosha ka muikala bukokeshi bua Masiya.​—1 Bak. 4:20, 21; Mis. 72:1-20.

Bua kujikija, ngumvuilu wa Misambu 144 udi ufikisha musambu mujima eu ku dipatula lungenyi lutoke bimpe lua tshidi batendeledi ba Yehowa batekemene ne muoyo mujima kukadi bidimu bia bungi, tshia ne: Nzambi neabutule bantu babi ne neapeteshe bantu bakane ditalala ne ditanta bua kashidi.​—Mis. 37:10, 11.