TSHIENA-BUALU TSHIA KULONGA 17
“Ndi munubikile balunda”
“Ndi munubikile balunda, bualu ndi munumanyishe malu onso andi mumvue kudi Tatu wanyi.”—YONE 15:15.
MUSAMBU WA 13 Kristo udi tshilejilu kutudi
KADIOSHA *
1. Ntshinyi tshitutu tuenza bua kudia bulunda ne muntu?
PA TSHIBIDILU, wewe musue kudia bulunda ne muntu, bualu bua kumpala buutu wenza nkusomba nende. Panudi nuyukila, nuambilangana malu enu, nudi nulua balunda. Kadi bua kudia bulunda ne Yezu, kudi amue malu adi mua kutupangisha. Ngepi au?
2. Ndutatu kayi lua kumpala lutudi mua kupeta?
2 Lutatu lua kumpala ndua ne: katutu banji kumonangana ne Yezu mpala ne mpala to. Bena Kristo ba kumpala ba bungi bavua pabu ne lutatu elu. Nansha nanku, mupostolo Petelo wakaleja ne: “Nansha munudi kanuyi banji kumumona, nudi bamunange. Nansha munudi kanuyi numumona mpindieu, nudi nuleja ditabuja kudiye.” (1 Pet. 1:8) Nunku nansha muutu kuyi muanji kumona Yezu, kudi mushindu wa kudia nende bulunda.
3. Ndutatu kayi luibidi tudi mua kupeta?
3 Lutatu luibidi ndua ne: katuena mua kuyukila ne Yezu to. Patutu tusambila, Yehowa ke ututu tuambila malu etu. Bushuwa, tutu tusambila mu dîna dia Yezu, kadi katutu tumuambila yeye malu to. Yezu muine katu musue bua tumusambile to. Bua tshinyi? Bualu disambila ngumue mushindu wa kutendelela Yehowa, ne anu yeye ke utudi ne bua kutendelela. (Mat. 4:10) Nansha nanku, tudi anu mua kuleja ne: tudi banange Yezu.
4. Ndutatu kayi luisatu lutudi mua kupeta? Ntshinyi tshituamona mu tshiena-bualu etshi?
4 Lutatu luisatu ludi ne: Yezu udi mu diulu, nanku mbikole bua kusomba nende. Kadi tudi mua kumanya malu ende a bungi nansha katuyi ku tshibelu tshiende. Netumone malu anayi atudi mua kuenza bua kukolesha bulunda buetu nende. Kadi tuanji tumone bua tshinyi bidi ne mushinga bua kudia bulunda bushême ne Kristo.
BUA TSHINYI BIDI BIKENGELA TULUE BALUNDA BA YEZU?
5. Bua tshinyi tudi ne bua kuikala balunda ba Yezu? (Tangila kabidi kazubu ka “ Kudia bulunda ne Yezu kudi kutufikisha ku dilua balunda ba Yehowa” ne ka “ Mushindu muimpe wa kumona muaba udi nawu Yezu.”)
5 Tuetu basue kudia bulunda ne Yehowa, tudi ne bua kuikala balunda ba Yezu. Bua tshinyi bidi nanku? Tuangate malu abidi tshianana. Bua kumpala, Yezu wakambila bayidi bende ne: “Tatu muine mmununange bikole, bualu nudi bannange bikole.” (Yone 16:27) Wakamba kabidi ne: “Muntu kena mua kulua kudi Tatu kayi mupitshile kundi to.” (Yone 14:6) Kujinga bua kuikala mulunda wa Yehowa kuyi mudie bulunda bukole ne Yezu nkuenze anu bu kujinga bua kubuela mu nzubu kuyi ubuelela ku tshiibi to. Yezu wakafuanyikija bualu bua muomumue ebu pavuaye mudiambe ne: udi “tshiibi bua mikoko.” (Yone 10:7) Buibidi, Yezu uvua widikija ngikadilu ya Tatuende bimpe menemene. Wakambila bayidi bende ne: “Muntu yonso udi mummone mmumone kabidi Tatu.” (Yone 14:9) Nunku, mushindu muimpe utudi mua kufika ku dimanya Yehowa nkulonga nsombelu wa Yezu. Patudi tuenda tulonga malu a Yezu, tudi tulua kumunanga bikole. Padi bulunda buetu ne Yezu buende bukola, tudi tulua kunanga Tatuende bikole.
6. Mbualu kayi bukuabu butudi ne bua kudiila malanda ne Yezu? Umvuija.
6 Tudi ne bua kuikala mu malanda ne Yezu bua kushishabu kuandamuna masambila etu. Bualu ebu kabuena bulomba anu kujikija masambila etu ne tshiambilu tshia ne: “mu dîna dia Yezu” bu mukiya kampanda to. Kadi tudi ne bua kujingulula mudi Yehowa ukuata mudimu ne Yezu bua kuandamuna masambila etu. Yezu wakambila bapostolo ne: “Tshintu tshionso tshinudi nulomba mu dîna dianyi, nennuenzelatshi.” (Yone 14:13) Nansha mudibi ne: Yehowa ke utu uteleja masambila etu ne uandamuna, mmupeshe Yezu bukokeshi bua kukumbaja malu adiye upangadija. (Mat. 28:18) Bualu bukuabu, kumpala kua Nzambi kuandamuna masambila etu, udi umona ni tudi batumikile mubelu uvua Yezu wa mufile. Tshilejilu, Yezu wakamba ne: “Binuabuikidila bantu bilema biabu, Tatu wenu wa mu diulu neanubuikidile penu; kadi nuenu kanuyi babuikidile bantu bilema biabu, Tatu wenu kakunubuikidila penu bienu bilema to.” (Mat. 6:14, 15) Nunku, kuenzela bakuabu malu mushindu utudi basue bua Yehowa ne Yezu batuenzelawu kudi ne mushinga wa bungi!
7. Mbanganyi badi bapeta masanka a ku mulambu wa Yezu?
7 Anu bantu badi bashemeshe bulunda ne Yezu ke bapeta masanka a ku mulambu wa ku tshiakupikulangana natshi. Bua tshinyi tudi tuamba nanku? Yezu wakamba ne: uvua ne bua ‘kufila muoyo wende bua balunda bende.’ (Yone 15:13) Batendeledi ba Nzambi bavua ne muoyo kumpala kua Yezu kulua pa buloba nebalonge malu ende bua bafike ku dimunanga. Bobu abu, bu mudi Abalahama ne Sala ne Mose ne Lahaba nebabishibue; kadi nansha muvuabu bantu bakane, nebikale dijinga ne kudia bulunda ne Yezu bua kushishabu kupeta muoyo wa tshiendelele.—Yone 17:3; Bien. 24:15; Eb. 11:8-12, 24-26, 31.
8-9. Bilondeshile Yone 15:4, 5, kudia bulunda ne Yezu kudi mua kutufikisha ku tshinyi? Bua tshinyi mbimpe tushale mu buobumue ne Yezu?
8 Tudi ne disanka dia kuenza mudimu ne Yezu mu diyisha lumu luimpe lua Bukalenge ne dilulongesha. Pavua Yezu pa buloba, uvua mulongeshi. Bu mudiye mutu wa tshisumbu, katshia wapingana mu diulu mmutungunuke ne kulombola mudimu wa kuyisha ne kulongesha. Udi umona bionso biudi uditatshisha bua kuenza bua kuambuluisha bantu ba bungi bua bafike ku dimumanya yeye ne Tatuende ne udi ubianyisha. Mu bulelela, bua tuetu kukumbaja mudimu eu anu Yehowa ne Yezu batuambuluishe.—Bala Yone 15:4, 5.
9 Dîyi dia Nzambi didi ditulongesha patoke ne: tudi ne bua kushala banange Yezu bua kusankisha Yehowa. Nunku tumonayi malu anayi atudi mua kuenza bua kulua balunda ba Yezu.
MUA KUDIA BULUNDA NE YEZU
Udi mua kulua mulunda wa Yezu paudi 1) umumanya bimpe, 2) widikija mushindu uvuaye wela meji ne wenza malu, 3) ukuatshisha bana babu ne Kristo, ne 4) utua malu adi bulongolodi bulongolole mpanda (Tangila tshikoso 10-14) *
10. Mbualu kayi bua kumpala butudi ne bua kuenza bua kudia bulunda ne Yezu?
10 1) Manya Yezu. Tudi mua kumumanya patudi tubala mukanda wa Matayi, wa Mâko, wa Luka, ne wa Yone. Patudi tuelangana meji bua malu a nsombelu wa Yezu adi mu Bible, tudi tufika ku dinanga Yezu ne ku dimunemeka bua muvuaye wenzela bantu malu mimpe. Tshilejilu, nansha muvuaye Mfumu, kavua umona bayidi bende bu bapika to. Kadi uvua ubambila malu ende. (Yone 15:15) Yezu uvua ukenga nabu udila nabu. (Yone 11:32-36) Nansha baluishi bende bakitaba ne: uvua mulunda wa bantu bavua bitabe mukenji wende. (Mat. 11:19) Patudi tuidikija muvua Yezu wenzela bayidi bende malu, tudi tulengeja malanda etu ne bakuabu, tumvua disanka dia bungi, tumunanga ne tumunemeka kabidi bikole.
11. Mbualu kayi buibidi butudi ne bua kuenza bua kulua balunda ba Yezu? Bua tshinyi budi ne mushinga?
11 2) Ikala widikija mushindu uvua Yezu wela meji ne wenza malu. Patudi tuenda tumanya muvuaye wela meji ne tumuidikija, bulunda buetu nende budi bushêma. (1 Kol. 2:16) Mmunyi mutudi mua kuidikija Yezu? Tuangate tshilejilu tshimue patupu. Yezu uvua utamba kuela meji a mua kuambuluisha bakuabu pamutu pa kudisankisha yeye. (Mat. 20:28; Lomo 15:1-3) Bu muvuaye ne meji a mushindu eu, uvua udipangisha amue malu ne ufuilangana luse. Malu avua bantu bamuamba kaavua amufiikisha munda tshianana tshianana to. (Yone 1:46, 47) Kavua ushala umona bantu bibi bua bilema bivuabu benze kale to. (1 Tim. 1:12-14) Yezu wakamba ne: “Bantu bonso nebamanye ne: nudi bayidi banyi, binuikala ne dinanga munkatshi muenu.” (Yone 13:35) Mbimpe udiebeje ne: “Ntu ndienzeja ne muanyi muonso bua kulama ditalala ne bena Kristo nanyi bua kuidikija Yezu anyi?”
12. Mbualu kayi buisatu butudi ne bua kuenza bua kulua balunda ba Yezu? Mmushindu kayi utudi mua kubuenza?
12 3) Ikala ukuatshisha bana babu ne Kristo. Yezu udi umona malu atudi tuenzela bana babu bela manyi anu bu ne: tudi tumuenzela yeye. (Mat. 25:34-40) Mushindu munene utudi tukuatshisha bela manyi nkudifila ne muetu muonso mu mudimu uvua Yezu muambile bayidi bende bua kuenza. Mudimu au ngua kuyisha Bukalenge ne kuvuija bantu bayidi. (Mat. 28:19, 20; Bien. 10:42) Bua bana babu ne Kristo kukumbaja mudimu munene wa kuyisha udi wenzeka pa buloba bujima lelu, anu bobu babambuluisha kudi “mikoko mikuabu.” (Yone 10:16) Wewe muikale wa mu mikoko mikuabu, dîba dionso diudi mu mudimu eu, udi uleja ne: udi munange bela manyi, munange kabidi Yezu.
13. Mmushindu kayi utudi mua kutumikila mubelu wa Yezu udi mu Luka 16:9?
13 Tudi tudia kabidi bulunda ne Yehowa ne Yezu patudi tufila makuta etu bua kuambuluisha mudimu udibu balombola. (Bala Luka 16:9.) Tshilejilu, tudi mua kuambuluisha mudimu wa pa buloba bujima ne makuta etu; mu mudimu au mudi kukuatshisha mudimu wa kuyisha lumu luimpe miaba ya kule, kuibaka nzubu ya mudimu wa Nzambi ne kuyilama, ne kuambuluisha bantu badi bikumina bienzekele. Tudi kabidi mua kukuatshisha tshisumbu tshietu ne makuta ne kuambuluisha bantu batudi bamanye ne: badi bakenga. (Nsu. 19:17) Eyi mmishindu itudi mua kukuatshisha bana babu ne Kristo.
14. Bilondeshile Efeso 4:15, 16, mbualu kayi buinayi butudi ne bua kuenza bua kulua balunda ba Yezu?
14 4) Tuaku malu adi bulongolodi bulongolole mpanda. Tudi tukolesha malanda etu ne Yezu udi mutu wa tshisumbu patudi tueleshangana diboko ne bantu badibu bateke bua kutulombola. (Bala Efeso 4:15, 16.) Tshilejilu, tudi tuditatshisha bua kuenza bua Nzubu yetu ya Bukalenge yonso ikale ne bamanyishi ba bungi. Ke bualu kayi mbasambakaje bisumbu bikuabu ne bakajilule mikalu ya teritware yabi. Bualu ebu mbuenze bua tulobelele makuta etu atudi tufila. Kadi bualu ebu mbulombe bamue bamanyishi bua kuibidilangana ne nsombelu mipiamipia. Bana betu ba lulamatu aba bavua mua kuikala benze bidimu bia bungi mu tshisumbu ne pamuapa bashemeshe malanda ne bakuabu mu tshisumbu atshi. Kadi mpindieu mbabalombe bua kuya mu tshisumbu tshikuabu. Bidi bisankisha Yezu bikole padiye umona bayidi bende ba lulamatu bitaba bualu budibu balongolole ebu!
BALUNDA BA YEZU BUA KASHIDI
15. Mmushindu kayi wikala bulunda buetu ne Yezu mua kulengela kumpala eku?
15 Bela manyi badi ne ditekemena dia kuikala ne Yezu bua kashidi, bakokesha nende mu Bukalenge bua Nzambi. Bobu nebikale ne Kristo, tuambe ne: bamumona, bakula nende, ne basomba nende. (Yone 14:2, 3) Bua bantu badi ne ditekemena dia kupeta muoyo pa buloba, Yezu neabanange ne neabatabalele. Nansha muikalabu kabayi bamumona, malanda abu nende neashême bikole pikalabu ne muoyo udibu babalongoluele kudi Yehowa ne Yezu.—Yesh. 9:6, 7.
16. Mmasanka kayi atudi tupeta bua bulunda butudi badie ne Yezu?
16 Patudi tuitaba dibikila dia Yezu dia kulua balunda bende, tudi tupeta masanka a bungi. Tshilejilu, tudi tumona mudiye mutunange ne utukuatshisha patudi tuambangana apa. Tudi ne mpunga wa kupeta muoyo wa tshiendelele. Bualu bua mushinga mukole budi ne: bulunda buetu ne Yezu nebutufikishe ku bulunda budi bupite bulunda kayi buonso, tuambe ne: malanda a nsungansunga ne Yehowa Tatuende wa Yezu. Tudi ne diakalenga dia dikema dia kubikidibua balunda ba Yezu!
MUSAMBU WA 17 “Ndi musue”
^ tshik. 5 Bakulu babidi bakumbula muanetu wa bakaji au kuende ne bamuteleja ne ntema yonso. Bapostolo bakapitshisha ndambu wa bidimu ne Yezu bayukila nende ne benza nende mudimu, kuluabu balunda bende ba pa muoyo. Yezu mmusue kabidi bua tulue balunda bende, kadi kudi malu adi mua kutupangisha anyi kututatshisha bua kulua balunda bende avua bapostolo bobu kabayi nawu to. Tshiena-bualu etshi netshiakule bua malu au ne netshitupeshe ngenyi ya mua kudia bulunda bushême ne Yezu ne kubulama.
^ tshik. 55 DIUMVUIJA DIA TSHIMFUANYI: 1) Mu ntendelelu wa mu dîku, tudi mua kulonga nsombelu wa Yezu ne mudimu wende wa kuyisha. 2) Mu tshisumbu, tudi mua kuditatshisha bua kuikala mu ditalala ne bana betu. 3) Tudi mua kukuatshisha bana babu ne Kristo patudi tudifila bikole mu buambi. 4) Padibu basambakaja bisumbu, mbimpe tuitabe mapangadika a bakulu.
