Padibi bienzeka nanku, bena mu tshisumbu badi ne bua kumona dibaka dia kumpala adi ne: ndifue dîba didi mulume muselulule mukaji mukuabu, ne kumona dibaka dia mpindieu ne: ke didi dimanyike. Bua kumvua tshitudi tuambidila nanku, tukonkononayi tshivua Yezu muambe bua bualu bua kushipa ne kubuelulula kua mu dibaka.

Mu Matayi 19:9, Yezu uvua muleje bualu anu bumuepele budi Mifundu yanyishila muntu bua kushipa dibaka. Wakamba ne: “Muntu yonso udi ushipa dibaka ne mukajende kabuyi bua bualu bua masandi, ne usela mukaji mukuabu udi wenda masandi.” Mêyi a Yezu aa adi atulongesha ne: 1) masandi ke bualu bumuepele budi Mifundu yanyishila muntu bua kushipa dibaka, ne 2) mulume udi ushipa dibaka ne mukajende kabiyi bua bualu budi Mifundu yamba abu ne usela mukaji mukuabu, udi wenda masandi. a

Mêyi a Yezu aa adiku umvuija ne: Mifundu idi yanyishila mulume udi muende masandi ne mushipe dibaka ne mukajende bua kuselulula mukaji mukuabu anyi? Kabiena anu nanku to. Bikala mulume muende masandi, mukaji muena dibaka nende udi kayi ne bualu udi mua kusungula bua kumufuila luse peshi kumubenga. Yeye mumubenge ne bafike ku dishipa dibaka kua mbulamatadi, bonso babidi badi bapeta budikadidi bua kubuelulula mu dibaka dikuabu pikalabu ndekelu wa bionso bapete mukanda wa dishipa dia dibaka.

Anyi muena dibaka udi kayi ne bualu au udi mua kuikala ujinga menemene bua kulama dibaka diabu, wambila bayende ne: mmusue kumufuila luse. Kadi netuambe tshinyi bikala mulume mubenge luse ludibu basua kumufuila alu, mudiyile nkayende kua mbulamatadi ne bamupeshe mukanda wa difua dia dibaka? Bu mudi mukaji muleje dijinga dia kumufuila luse ne kulama dibaka diabu, Mifundu kayena yanyishila mulume bua kuselulula mukaji mukuabu to. Yeye musuminyine ne bualu budi Bible kayi wanyisha abu, musele mukaji mukuabu nansha mudi Bible kayi umupesha budikadidi abu, mmuende masandi tshiakabidi. Nunku, bakulu nebamulumbuluishilabu kabidi.​—1 Kol. 5:1, 2; 6:9, 10.

Padi mulume udi Bible kayi wanyishila bua kuselulula uselulula, mmushindu kayi udi bena mu tshisumbu ne bua kumona dibaka diende dia kumpala adi ne dia mpindieu? Bilondeshile tshidi Bible wamba, dibaka diende dia kumpala adi ditshidi anuku dimanyike anyi? Mukajende udi kayi ne bualu au utshidi anu ne mushindu wa kusungula bua kumufuila luse anyi kumubenga anyi? Mbikumbane bua kumona dibaka diende dia mpindieu edi bu dibaka dia masandi anyi?

Ku kale, bena mu tshisumbu bavua bangata dibaka dia nanku bu dibaka dia masandi matuku onso atshidi mukaji uvua kayi muenze bualu bubi ne muoyo, kayi musedibue tshiakabidi, anyi kayi muende masandi. Kadi pakakula Yezu bua dishipa dia dibaka ne dibuelulula mu dibaka, kavua mutele muena dibaka udi kayi ne bualu nansha. Uvua muambe yeye ne: mulume udi ushipa dibaka ne mukajende bua bualu budi Mifundu kayiyi imuanyishila ne usela mukaji mukuabu, udi wenda masandi. Padi malu enzeka nanku, kushipa kua dibaka ne kubuelulula mu dibaka dikuabu kuvua Yezu mubikile ne: nkuenda  masandi aku kudi kutuisha dibaka dia kumpala ku ndekelu kuadi.

Padi dibaka difua bua mulume udi muye kudishipa kua mbulamatadi ne muselulule mukaji mukuabu, kakuena kabidi mushindu wa mukajende udi kayi muenze bualu au kumufuilaye luse anyi kumubengaye nansha. Nunku, mukaji au ki mmuenzejibue bua kusungula ni mbua kumufuila luse anyi bua kubengangana nende to. Bualu bukuabu kabidi, mushindu udi bena mu tshisumbu ne bua kumona dibaka dipiadipia adi kawena ne bua kuimanyina pa difua dia mukaji uvua kayi muenze bualu bubi, disedibua diende tshiakabidi, peshi pa bubi bua dienda dia masandi to. b

Mu tshilejilu tshidi kuulu etshi, mulume uvua muende masandi adi mafikishe ku dishipa dia dibaka. Kadi biobi ne: mulume kavua muende masandi pende muye kushipa dibaka kua mbulamatadi ne mubuele mu dibaka dikuabu? Anyi bikalaye kavua muende masandi kumpala kua dishipa dia dibaka, kadi mulue kuenda masandi panyima pa dishipa dia dibaka ne pashise mubuele mu dibaka dikuabu nansha muvua mukajende ne dijinga dia kumufuila luse? Mu ebi bilejilu ebi bionso, dishipa dia dibaka ne diselulula mukaji mukuabu didi kuenda kua masandi divua mua kutuisha dibaka dia kumpala adi ku ndekelu. Dibaka dipiadipia diodi ndidi dishala dimanyike ku mikenji ya mbulamatadi. Mbumvuije bualu abu mu Tshibumba tshia Nsentedi tshia dia 15/2/1980, dibeji 32 (mu Mfualansa), bamba ne: ‘Mpindieu ukadi mulume mubuele mu dibaka dikuabu kayi mua kudishipa kabidi tshianana bua kupingana kudi mukajende wa kumpala, kushipa kuende kua dibaka dia kumpala, kuenda kuende kua masandi, ne kuselulula kua mukaji mukuabu aku nkutuishe dibaka dia kumpala adi ku ndekelu.’

Padibu bakajulule ngumvuilu wa bualu ebu, kabiena bivuija dibaka bu tshintu tshidi katshiyi tshia tshijila, anyi mpekatu mubi wa masandi bu bualu bua kulengulula to. Mulume udi ushipa dibaka bua bualu budi Mifundu kayiyi imuanyishila, ulua kusela mukaji mukuabu nansha Bible kayi umupesha budikadidi bua kuenza nanku, mmukumbanyine kumulumbuluishabu bua mpekatu wa masandi. (Mukaji udiye musele au yeye muikale muena Kristo, mmukumbanyine pende kumulumbuluishabu bua mpekatu wa masandi.) Nansha mudibu kabayi ne bua kumona dibaka dipiadipia adi bu dibaka dia masandi, kudi ne bua kupita bidimu bia bungi kumpala kua mulume au kukumbana bua kuenza midimu ya pa buayi mu tshisumbu, ne kakukumbana kumpala kua bantu kupuabu bubi buende buonso buvua bumanyike abu muoyo anyi kulekelabu dimuangata bibi bua bubi abu nansha. Bualu ebu budi bumvuija kabidi ne: bakulu nebanji kukonkonona nsombelu wa mukajende wa kumpala uvuaye mua kuikala mudinge mumuele mâyi ku makasa au ne wa bana bende bapuekele badi mulume au mua kuikala mulekelele.​—Mal. 2:14-16.

Pa kumona ntatu mikole idi ifumina ku dishipa dia dibaka bua malu adi Bible kayi wanyishila bena Kristo ne ku dibuelulula mu dibaka didi Bible kayi wanyisha, bena Kristo ba meji badi banemeka mudi Yehowa umona malu ne bangata dibaka bu tshintu tshia tshijila.​—Muam. 5:4, 5; Eb. 13:4.