1, 2. a) Mmunyi mudi Bantemu ba Yehowa badiumvua bua Bible? b) Mmukanda kayi wa mu Bible uutu munange bikole?

BU MUTUDI Bantemu ba Yehowa, tudi banange Bible. Bible udi utukolesha, utupesha ditekemena ne mibelu itudi mua kueyemena. (Lomo 15:4) Bible ki mmukanda udi ne ngenyi ya bantu to, kadi “ndîyi dia Nzambi.”​—1 Tesalonike 2:13.

² Pamuapa, yonso wa kutudi utu ne wende mukanda wa mu Bible utuye munange bikole. Bamue mbanange Evanjeliyo bualu idi ileja bumuntu buimpe bua Yehowa ku butuangaji bua Yezu. (Yone 14:9) Bakuabu mbanange mikanda idi ne mêyi a buprofete bu mudi wa Buakabuluibua udi utuleja “malu adi ne bua kuenzeka mu katupa kîpi emu.” (Buakabuluibua 1:1) Banga badi bakoleshibua padibu babala mukanda wa Misambu, ne bakuabu pabu mbanange kubala mibelu mimpe ya mu mukanda wa Nsumuinu. Nunku bidi bimueneka ne: Bible mmukanda wa bantu bonso.

3, 4. a) Mmunyi mutudi tudiumvua bua mikanda yetu? b) Mmikanda kayi itutu tupeta itu ipatuka bua bantu kampanda basunguluke?

³ Bu mutudi banange Bible, tudi kabidi banange mikanda  yetu bualu mmimanyine mu Dîyi dia Nzambi. Mikanda, broshire, bibejibeji ne bintu bikuabu bionso bitudi tupeta mbiakudia bidi Yehowa utupesha. Bidi bituambuluisha bua kushala pabuipi nende ne kulama ditabuja dietu dikole.​—Tito 2:2.

⁴ Mikanda yetu ya bungi mmifundila Bantemu ba Yehowa mu tshibungi. Kadi, kudi imue mikanda idibu bafunde bua bantu kampanda basunguluke bu mudi bansonga ne baledi. Biena-bualu bia bungi ne filme bidi mu site wetu mbilongolola nangananga bua bantu badi kabayi Bantemu ba Yehowa. Bintu bishilashilangana ebi bidi bileja ne: Yehowa udi ukumbaja mulayi wende wa kufila biakudia bia bungi bua bantu bonso.​—Yeshaya 25:6.

5. Tudi ne bua kuikala bajadike ne: Yehowa udi wanyisha tshinyi?

⁵ Ba bungi ba kutudi mbasue kuikala ne dîba dia bungi bua kubala Bible ne mikanda yetu. Nunku katuena misangu yonso mua kupitshisha dîba dia muomumue bua kulonga mukanda wonso utudi tupeta to. Tudi ne bua kuikala bajadike ne: Yehowa udi usanka patudi tuenza mudimu bimpe ne dîba dietu bua kubala ne kulonga Bible ne mikanda yetu. (Efeso 5:15, 16) Kadi kudi njiwu idi ilomba bua tuikale ne budimu bua kuyepuka. Nnjiwu kayi ayi?

6. Ntshinyi tshidi mua kutufikisha ku didipangisha malu mimpe adi mu bintu bidi Yehowa utupesha?

⁶ Tuetu katuyi badimuke, tudi mua kuela meji ne: imue mikanda ya mu Bible anyi imue mikanda yetu kayena itutangila to. Tshilejilu, ntshinyi tshitudi mua kuenza tuetu bamone ne: mukanda kampanda wa mu Bible anyi mukanda wetu kampanda udibu bapatule kawena ututangila? Tudiku mua kubala malu adi mu mukanda au lukasa lukasa anyi mene kubenga kuabala anyi? Biobi nanku, tudi mua kudipangisha malu a mushinga adi mua kutuambuluisha. Mmunyi mutudi mua kuepuka njiwu eyi? Tudi ne bua kuvuluka ne: malu onso atudi tupeta adi afumina kudi Yehowa. Tudi tubala mu Bible ne: “Meme ndi Yehowa Nzambi webe, udi ukuyisha bua wewe wikale ne diakalengele.” (Yeshaya 48:17) Mu tshiena-bualu etshi, netukonkonone ngenyi isatu yatuambuluisha bua kupeta malu mimpe adi mu bintu bidi Yehowa utupesha.

7. Bua tshinyi tudi ne bua kubala Bible ne ntema?

⁷ Bala ne ntema. Bulelela budi ne: bavua bafunde imue mikanda ya mu Bible bua muntu kampanda anyi bua tshisumbu kampanda tshia bantu. Kadi Bible udi wamba patoke ne: “Dîyi dionso didi mu Mifundu minsantu ndifundisha ku nyuma wa Nzambi, ne didi diambuluisha.” (2 Timote 3:16) Ke bualu kayi, tudi ne bua kuikala ne ntema patudi tubala Bible. Muanetu wa balume kampanda utu udienzeja bua kuvuluka ne: udi mua kupeta malongesha a bungi mu muyuki umue. Ebi bidi bimuambuluisha bua kumona malongesha adi kaayi amueneka bipepele. Nunku, kumpala kua tuetu kubala Bible, tudi ne bua kulomba Yehowa bua atuambuluishe bua kuikala ne ntema ne bua atupeshe meji bua kumvua malongesha adiye musue bua tumanye.​—Ezela 7:10; bala Yakobo 1:5.

8, 9. a) Patudi tubala Bible, nkonko kayi itudi mua kudiela? b) Malu adibu balombe bakulu bena Kristo adi atulongesha tshinyi bua Yehowa?

⁸ Ela nkonko. Paudi ubala Bible, imana ne udiela nkonko idi ilonda eyi: ‘Bualu ebu budi bundongesha tshinyi bua Yehowa? Mmunyi mundi mua kubutumikila mu nsombelu wanyi? Mmunyi mundi mua kuambuluisha nabu bantu bakuabu?’ Patudi tuelangana meji pa nkonko eyi, dibala dietu dia Bible nedituambuluishe bikole.  Tuangata tshilejilu. Bible udi uleja amue malu malomba bua bakulu bena Kristo. (Bala 1 Timote 3:2-7.) Kadi, ba bungi ba kutudi ki mbakulu to, nunku tudi mua kuela meji ne: malu aa kaena mua kutuambuluisha to. Kadi, tukonkonone nkonko isatu itudi bele kuulu eku bua kumona mudi malu malomba aa mua kutuambuluisha tuetu bonso.

⁹ “Bualu ebu budi bundongesha tshinyi bua Yehowa?” Yehowa mmutupeshe liste wa malu adibu balombe bakulu. Mmuele mikenji mitumbuke bua bana betu ba balume badi batabalela tshisumbu. Ebi bidi bileja ne: Yehowa udi wangata tshisumbu ne mushinga. Bible udi wamba ne: wakatshisumba “ku mashi a Muanende nkayende.” (Bienzedi 20:28) Nunku Yehowa mmutekemene bua bakulu bikale tshilejilu tshimpe, ne nebamubadile malu bua mushindu udibu benzela bena mu tshisumbu malu. Mmusue bua tudiumvue bakubibue kudibu. (Yeshaya 32:1, 2) Patudi tubala malu malomba aa, tudi tumvua mudi Yehowa ututabalela bikole.

10, 11. a) Patudi tubala malu adibu balombe bakulu, mmunyi mutudi mua kutumikila malu au mu nsombelu wetu? b) Mmunyi mutudi mua kuenza mudimu ne malu aa bua kuambuluisha bantu bakuabu?

¹⁰ “Mmunyi mundi mua kubutumikila mu nsombelu wanyi?” Biwikala mukulu, udi ne bua kukonkonona ku musangu ne ku musangu liste wa malu malomba ne kulongolola miaba idi ikengela. Biwikala “wipatshila mudimu wa butangidi,” udi ne bua kudienzeja bua  kukumbaja malu malomba aa. (1 Timote 3:1) Kadi bena Kristo bonso badi mua kupeta malongesha kampanda mu malu malomba aa. Tshilejilu, Yehowa mmusue bua yonso wa kutudi kikadi ne malu makole, ne bua ikale ne meji mimpe. (Filipoyi 4:5; 1 Petelo 4:7) Bakulu bobu bikale “tshilejilu kudi mikoko,” tudi mua kulongela malu kudibu ne ‘kuidikija ditabuja diabu.”​—1 Petelo 5:3; Ebelu 13:7.

¹¹ “Mmunyi mundi mua kuambuluisha nabu bantu bakuabu?” Tudi mua kuenza mudimu ne liste wa malu malomba bua bakulu bena Kristo bua kuambuluisha balongi ba Bible ne bantu badi basue kumanya malu a mu Bible bua kumvuabu mudi bakulu bashilangane ne bamfumu ba bitendelelu. Malu malomba aa adi mua kutuambuluisha kabidi bua kuvuluka mudimu mukole udi bakulu benza mu tshisumbu tshietu. Kuenza nunku nekutuambuluishe bua kunemeka bana betu ba balume aba. (1 Tesalonike 5:12) Patudi tubanemeka bikole, nebikale ne disanka dia bungi dia kuenza mudimu wabu.​—Ebelu 13:17.

12, 13. a) Ku diambuluisha dia bintu bitudi nabi, tudi mua kuenza makebulula a mushindu kayi? b) Fila tshilejilu tshia mudi kumanya malu a tshikondo kampanda mua kupatula malongesha adi kaayi amueneka bipepele.

¹² Enza makebulula. Patudi tulonga Bible, tudi mua kukeba mandamuna a nkonko idi ilonda eyi:

• Nnganyi uvua mufunde mukanda wa mu Bible eu?

• Ndîba kayi ne mmuaba kayi uvuabu bawufundile?

• Mmalu kayi a mushinga avua enzeka pavuabu bafunde mukanda eu?

Kumanya malu a nunku kudi mua kutuambuluisha bua kumona malongesha adi kaayi amueneka bipepele.

¹³ Tshilejilu, Yehezekele 14:13, 14 udi wamba ne: ‘Biangezelabu bibi kudi ba mu buloba bukuabu mu bupidia buabu bua mikenji yanyi, ne bingolola tshianza tshianyi kudibu bua kubakengesha, bingashipa tshintu tshidibu beyemena bua kuangata biakudia, bingatuma tshiole mu buloba ebu bua kubutulamu bantu ne nyama kabidi, Yehowa udi wamba ne: nansha bu bantu aba basatu, Noa, Danyele ne Yobo, bikalamu, bakadi kupandisha anu mioyo yabu nkayayi ku buakane buabu.’ Patudi tuenza makebulula, tudi tumona ne: Yehezekele uvua mufunde mêyi aa bu mu tshidimu tshia 612 kumpala kua Kristo. Noa ne Yobo bakavua bafue kukavua bidimu nkama ya bungi, kadi Yehowa utshivua uvuluka lulamatu luabu. Kadi Danyele utshivua ne muoyo. Uvua mua kuikala pamuapa ne bidimu bitue ku 20 pavua Yehowa muambe ne: uvua muntu muakane anu bu Noa ne Yobo. Tudi tudi tupeta dilongesha kayi? Yehowa udi umona batendeledi bende ba lulamatu bonso too ne bana, ne udi ubangata ne mushinga.​—Musambu 148:12-14.

14. a) Mmunyi mudi bintu bidibu bapatule bua bansonga mua kubambuluisha? b) Mmunyi mudibi mua kuambuluisha kabidi bantu bakuabu? (Tangila tshimfuanyi tshia ntuadijilu tshia tshiena-bualu.)

¹⁴ Mikanda ya bansonga. Tudi balonge ne:  mikanda yonso ya mu Bible idi mua kutuambuluisha. Bia muomumue, mikanda yetu yonso idi payi mua kutuambuluisha. Tukonkonone bilejilu bikese. Mu bidimu bishale ebi, Yehowa mmulongolole bintu bia bungi bua bansonga. ^[1] (Tangila note ku ndekelu.) Bintu ebi bidi bibambuluisha bua kutantamena malu adibu babasaka bua kuenza mu tulasa ne ntatu idibu bapeta mu dikola diabu. Kadi, mmunyi mudi dibala dietu dia biena-bualu ne mikanda eyi mua kutuambuluisha tuetu bonso? Patudi tubala bintu ebi, tudi tumanya ntatu itu bansonga bapeta ne netuikale bakumbane bua kubambuluisha ne kubakankamija.

15. Bua tshinyi bena Kristo bakadi bantu bakulumpe badi ne bua kubala malu adibu bapatule bua bansonga?

¹⁵ Bena Kristo bakadi bantu bakulumpe kabena ne bua kupepeja bintu bidibu bapatule bua bansonga to. Ntatu ya bungi idibu bakuile mu biena-bualu bidibu babapatuile idi itangila bena Kristo bonso. Tshilejilu, tuetu bonso tutu dijinga ne kubingisha malu a mu Bible atudi bitabuje, kutabalela mushindu utudi tudiumvua, kubenga kulonda malu adi balunda betu batusaka bua kuenza, ne kuepuka malunda mabi ne mishindu mibi ya dijikija dia lutetuku. Nunku, nansha mudibu bapatule mikanda eyi bua bansonga, malu adimu adi afumina mu Bible ne adi mua kuambuluisha bena Kristo bonso.

16. Mikanda yetu idi kabidi yambuluisha bansonga bua kuenza tshinyi?

¹⁶ Mikanda idibu bapatule bua bansonga idi kabidi ibambuluisha bua kukolesha bulunda buabu ne Yehowa. (Bala Muambi 12:1, 13.) Mikanda eyi idi mua kuambuluisha kabidi bantu bakulumpe. Tshilejilu, mu Réveillez-vous! wa ngondo 4 mu 2009 muvua tshiena-bualu tshia ne: “Mmunyi mudi dibala dianyi dia Bible mua kunsankisha?” (mu Mfualansa) Tshiena-bualu atshi tshivua ne ngenyi ya bungi mimpe ne tshivua ne kazubu kavuabu mua kukosa, kulama ne kuenza naku mudimu bua kudilongela. Tshiena-bualu atshi tshivuaku kabidi tshiambuluishe bantu bakulumpe anyi? Mamu wa dîku kampanda wakamba ne: kubala Bible kuvua misangu yonso kunkolele. Kadi wakatumikila ngenyi ya mu tshiena-bualu atshi ne udi mpindieu ne dijinga dikole dia kubala Bible. Udi wamba ne: utu musue kumona mudi mikanda ya mu Bible ipetangana ne mudi malu adimu alondangana bimpe. Udi usakidila wamba ne: “Tshivua muanji kupeta disanka bungi nunku dia kubala Bible to.”

17, 18. Mmunyi mudi kubala bintu bidibu bapatule bua bantu bonso mua kutuambuluisha? Fila tshilejilu.

¹⁷ Mikanda ya bantu bakuabu bonso. Kutuadijila mu 2008, tuakatuadija kupeta Tshibumba tshia Nsentedi tshia kulonga. Tshibumba tshia Nsentedi etshi ntshifundila nangananga Bantemu ba Yehowa, kadi tudi kabidi ne bibejibeji bidibu bapatula nangananga bua bantu bonso. Mmunyi mudi bibejibeji ebi mua kutuambuluisha pabi? Tuangata tshilejilu. Paudi ubikila muntu ku Nzubu wa Bukalenge ne muntu eu ulua, bitu bikusankisha. Padi ngamba-malu wenza muyuki wende, udi wela meji bua muntu uudi mubikile eu. Udi udiebeja  mudi muntu eu udiumvua bua malu adiye umvua ne mudiwu mua kushintulula nsombelu wende. Bu tshipeta, muyuki eu udi ulenga muoyo webe ne udi mene uleja dianyisha dia bungi bua tshiena-bualu tshiawu.

¹⁸ Bidi mua kuenzeka mushindu wa muomumue patudi tubala mikanda idibu bafundile bantu bonso. Tshilejilu, Tshibumba tshia Nsentedi tshia bantu bonso ne biena-bualu bia mu site wa jw.org bidi biumvuija Bible mu mêyi ne biambilu bidi bipepele mua kumvua. Patudi tubala malu aa, tudi tukolesha ngumvuilu wetu wa malu ne dinanga dietu dia bulelela bua mu Bible butukadi bamanye bimpe. Tudi kabidi mua kulonga mishindu mipiamipia ya kumvuija bantu mu buambi malu a mu Bible atudi tuitabuja. Mu mushindu wa muomumue, tshibejibeji tshia Réveillez-vous! tshidi tshikolesha ditabuja dietu dia ne: kudi Mufuki. Tshidi kabidi tshituambuluisha bua kumanya mua kubingisha malu atudi bitabuje.​—Bala 1 Petelo 3:15.

19. Mmunyi mutudi mua kuleja dianyisha dietu kudi Yehowa bua bintu bidiye mutupeshe?

¹⁹ Bidi bimueneka patoke ne: Yehowa mmutupeshe mibelu ya bungi ne malu a kulonda bua diakalenga dietu. (Matayi 5:3) Tutungunukayi ne kubala ne kuenza mudimu ne bintu bionso bidiye mutupeshe. Tuetu benze nanku, nebituambuluishe ne netuleje Yehowa ne: tudi ne dianyisha bua bionso bidiye mutupeshe.​—Yeshaya 48:17.