1-2. (a) Mbualu kayi budi buleja ne: bantu bonso mbaledibue ne dijinga dia kusambibua ne batu bakumbane bua kusamba bakuabu? (b) Mmushindu kayi utu bamue bana batapika bibi menemene?

BANTU bonso mbaledibue ne dijinga dia kusambibua ne batu bakumbane bua kusamba bakuabu mu mushindu muimpe. Tshilejilu, padi muana ukuluka mu manaya ne utapika mu tshinu, udi mua kunyemena kudi mama wende anyi papa wende wenda udila. Baledi kabena mua kumisha mputa au to, kadi badi mua kusamba muana. Badi mua kumuambula, kumuebeja tshivua tshienzeke, bamukupula bisonji benda bamuambila tumêyi tuimpe, bamuela mupuya pa mputa, ne pamuapa bamuelamu buanga anyi bamujingilapu tshilamba. Katantshi aka, muana udi ulekela muadi ne udi mene mua kutuadijilula kunaya. Mputa au nealue anu kuma.

² Kadi imue misangu, kudi mishindu idi bana mua kutapika bibi menemene, bu mudi padibu babanyanga ne malu a masandi. Badi mua kunyanga muana musangu umue patupu, anyi misangu ya bungi munkatshi mua bidimu bia bungi. Nansha biobi bienzeke musangu umue anyi ya bungi, dimunyanga adi didi mua kumushiya ne mputa mibi ku muoyo. Kudi misangu idibu mua kukuata munyangi wa muana, kumunyoka. Misangu mikuabu bidi mua kumueneka bu ne: kabakumunyoka to. Kadi nansha bobu bamunyoke diakamue, muana udiye munyange udi mua kushala utata too ne ku buntu bukulumpe.

3. Anu mudibi bileja mu 2 Kolinto 1:3, 4, ntshinyi tshidi Yehowa musue? Nnkonko kayi ituandamuna?

³ Bikala muena Kristo uvuabu banyange ku buana utungunuka ne kutata ne tunyinganyinga bua bualu abu, ntshinyi tshidi mua kumuambuluisha? (Bala 2 Kolinto 1:3, 4.) Bidi bimueneka patoke ne: Yehowa mmusue bua benzele batendeledi bende malu ne dinanga ne babasambe mu ntatu. Nunku tuandamunayi nkonko isatu eyi: 1) Bua tshinyi bidi bikengela kusamba bantu bavuabu banyange ku buana? 2) Nnganyi udi mua kubasamba? 3) Mmushindu kayi utudi mua kubasamba?

4-5. (a) Bua tshinyi bidi ne mushinga bua kumanya ne: bana mbashilangane ne bantu bakole? (b) Bobu banyange muana, bidi mua kumupangisha bua kuenza tshinyi?

⁴ Bamue bantu bavuabu banyange ku buana buabu batshidi dijinga ne busambi nansha mukadi bidimu bia bungi bipite. Bua tshinyi? Bua kumvua bualu abu bimpe, tudi ne bua kuanji kumanya ne: bana mbashilangane bikole ne bantu bakole. Pa tshibidilu, kukengesha muana kudi mua kumuenzela bibi menemene kupita mudiku mua kuenzela muntu mukole. Tukonkonone malu kampanda adi aleja bua tshinyi bidi nanku.

⁵ Mbimpe bana balamate bantu badi babakolesha ne babalama, ne babeyemene. Biobi nanku bana nebadiumvue mu bukubi ne nebalonge mua kueyemena bantu bakuabu badi babanange. (Mis. 22:9) Bualu budi bubungamija mbua ne: batu batamba kunyangila bana mu nzubu muabu, nangananga kudi bena mu mêku abu ne kudi bantu badi bamanyike bimpe kuabu. Padibu banyanga muana kudi muntu udiye weyemena, bidi mua kumupangisha bua kueyemena bantu bakuabu, nansha bidimu bia bungi bimane kupita.

6. Bua tshinyi dinyanga muana ne malu a masandi mbualu bubi menemene bua dipanga luse?

⁶ Bana kabena mua kudikuba to. Nunku dinyanga muana ne malu a masandi mbualu bubi menemene bua dipanga luse. Kuenzeja bana malu a masandi bidimu bia bungi kumpala kua bobu kukumbana bua kubuela mu dibaka ne kumanya tshidi disangila dia mulume ne mukaji diumvuija kudi mua kubenzela bibi menemene. Kudi mua kunyanga lungenyi lua bana mu tshilumbu tshia disangila, kubafikisha ku didimona kabayi ne mushinga, ne ku dibenga kueyemena bantu.

7. (a) Bua tshinyi banyangi ba bana batu babashimakaja bipepele? Badi mua kubashima bishi? (b) Mashimi au adi mua kufikisha bana ku tshinyi?

⁷ Bana kabatu bamanye mua kunana lungenyi bikole, mua kuangata mapangadika bimpe, anyi mua kujingulula njiwu ne kuyepuka to. (1 Kol. 13:11) Nunku mbipepele menemene bua banyangi ba bana kubashimakaja. Batu babashima bibi, babambila malu bu mudi: ‘Tshilema ntshiebe; kuambidi muntu mukuabu bualu ebu to; wewe mubuambe, muntu kakukuitaba to; padi muntu mukole ne muana benzelangana malu a masandi bidi bileja mudibu banangangane bikole.’ Nebiangate bidimu bia bungi bua muana kulua kumvua ne: malu onso au avua a dishima. Muana wa nunku udi mua kukola wela meji ne: ki mmuana muimpe to, mmuana mubi udibu kabayi mua kunanga anyi kusamba.

8. Ntshinyi tshidi tshitujadikila ne: Yehowa udi mua kusamba bantu bavuabu benzele bibi?

⁸ Malu aa adi atuambuluisha bua kumvua bua tshinyi bantu bavuabu banyange ku buana badi mua kushala batata munkatshi mua bidimu bia bungi. Dinyanga bana mbualu bubi butambe! Bua mudidi ditue ntanga tshibua lelu, bidi bileja patoke ne: tudi mu matuku a ku nshikidilu, matuku adi bantu ba bungi “kabayi banange bana babu” ne adi “bantu babi ne badingianganyi [batungunuka] ne kunyanguka bibi menemene.” (2 Tim. 3:1-5, 13) Mayele a Satana mmabi menemene, ne bidi bitonda bikole padi bantu ba bungi benza malu adi amusankisha. Kadi Yehowa udi ne bukole bua bungi kupita Satana ne bantu bende. Udi umona bionso bidi Satana wenza. Tuikale bashindike ne: Yehowa mmumanye ntatu yetu yonso, ne udi mua kutusamba mudibi bikengela. Tudi ne diakalenga dia kutendelela “Nzambi wa busambi buonso . . . udi utusamba mu mateta etu onso bua tumone mua kusamba bakuabu mu mateta a mishindu yonso ne busambi butudi tupetela kudi Nzambi.” (2 Kol. 1:3, 4) Kadi Yehowa utu usambangana ku diambuluisha dia nganyi?

9. Bilondeshile mêyi a mukalenge Davidi adi mu Misambu 27:10, ntshinyi tshikala Yehowa ne bua kuenzela bana badi baledi babu kabayi batabalela?

⁹ Bantu bavua baledi babu kabayi batabalele bikole anyi bavuabu banyange kudi bantu bavuabu bibidilangane nabu ke badi nangananga mua kuikala bakengela busambi. Mukalenge Davidi uvua mumanye ne: Yehowa ke utudi ne bua kueyemena bikole bualu neikale anu utusamba. (Bala Misambu 27:10.) Uvua witabuja ne: Yehowa utu wakidila bantu badibu balekelele kudi bena mu mêku abu. Mmunyi mutu Yehowa wakidilangana? Utu wenza nanku ku diambuluisha dia batendeledi bende ba lulamatu. Bena Kristo netu badi anu bu bena mu dîku dietu. Tshilejilu, Yezu wakamba bua bantu bavua badisange kudiye bua kutendelela Yehowa ne: bavua bana babu ba balume, bana babu ba bakaji, ne mamuende.​—Mat. 12:48-50.

10. Mmushindu kayi uvua mupostolo Paulo muakule bua mudimu wende wa bukulu?

¹⁰ Tuangate tshilejilu tshia malanda a buena a mu dîku adi mu tshisumbu tshia bena Kristo. Mupostolo Paulo uvua mukulu wa lulamatu uvua wenza mudimu mukole. Mmushiye tshilejilu tshimpe, ne nyuma muimpe wakamusaka bua kuambila bantu bakuabu bua kumuidikija bu muvuaye pende muidikije Kristo. (1 Kol. 11:1) Musangu mukuabu Paulo wakakula bua mudimu wende wa bukulu wamba ne: “Tuakalua bena bulenga munkatshi muenu, anu bu mudi mamu udi wamusha utabalela bana bende ne dinanga dionso.” (1 Tes. 2:7) Lelu bakulu badi ne dinanga ne badi batabalelangana batu pabu basamba bantu badi dijinga ne diambuluisha, babasamba ne mêyi mimpe mangatshila mu Bible adi aleja mudibu babanange.

11. Anu bakulu ke badi mua kusamba bantu bakuabu anyi? Umvuija.

¹¹ Anu bakulu ke badi mua kusamba bantu bavuabu banyange anyi? Tòo. Tuetu bonso tudi ne bua ‘kutungunuka ne kusambangana.’ (1 Tes. 4:18) Bana betu ba bakaji badi bakole mu nyuma badi mua kuambuluisha bikole bana betu ba  bakaji badi bakengela busambi. Mbikumbane bua muvua Yehowa Nzambi mudifuanyikije ne mamu udi usamba muanende. (Yesh. 66:13) Bible udi wakula bua bantu bakaji bavua basambe bantu bavua mu dikenga. (Yobo 42:11) Lelu Yehowa udi usanka bikole padiye umona bana betu ba bakaji basamba bana betu ba bakaji bakuabu badi batata ne tunyinganyinga. Kudi misangu idi mukulu umue anyi babidi mua kuyukila ne muanetu wa bakaji udi mukole mu nyuma pa nkayende, bamulomba bua kuambuluisha muanetu wa bakaji udi utata ne tunyinganyinga, bikalaye ne mushindu. *

12. Ntshinyi tshitudi katuyi ne bua kuenza?

¹² Patudi tuambuluisha muena Kristo netu, tuamanya, katukebi bua kumanya malu adiye kayi musue kuambila bantu to. (1 Tes. 4:11) Kadi tshitudi mua kuenza menemene ntshinyi? Kudi malu atanu a kuenza atudi tulonga mu Bible.

13. Bilondeshile 1 Bakalenge 19:5-8, ntshinyi tshivua muanjelu wa Yehowa muenzele Eliya? Mmunyi mutudi mua kuidikija muanjelu au?

¹³ Enza bualu kampanda bua kuambuluisha muntu. Pavua muprofete Eliya unyema bua kudisungila, uvua mutekete mu mikolo, kujingaye too ne lufu. Yehowa wakamutumina muanjelu wa bukole. Muanjelu wakambuluisha Eliya ne tshivuaye ukengela dîba adi. Wakamupesha tshiakudia tshia luya, kumulombaye ne dîyi dimpe bua kutshidia. (Bala 1 Bakalenge 19:5-8.) Tshivua tshienzeke atshi tshidi tshitulongesha bualu bua mushinga ebu: Misangu mikuabu, kabualu kimpe katudi mua kuenzela muntu kadi mua kumuambuluisha bikole. Pamuapa tuetu bapeshe muanetu udi ne kanyinganyinga tshiakudia anyi katshintu kimpe kadi kamusankisha, peshi bamufundile ka mesage, bidi mua kumuleja ne: tudi bamunange ne tudi tuditatshisha bua bualu buende. Tuetu tumvua bibi bua kuyukila ne muntu malu adi amusama ku muoyo, tudi pamuapa mua kuenza anu bualu kampanda budi mua kumuambuluisha.

14. Bualu buvua buenzekele Eliya budi butulongesha tshinyi?

¹⁴ Enza bua muntu udi ne tunyinganyinga adiumvue mu bukubi, ikale mudilekelele. Tshivua tshifikile Eliya tshidi tshitulongesha bualu bukuabu. Yehowa wakambuluisha Eliya mu tshishima bua kuenda kilometre ya bungi menemene bua kufika ku mukuna wa Holeba. Ku mukuna aku ke kuvua Yehowa mudie tshipungidi ne bantu bende bidimu nkama ya bungi kumpala. Pamuapa Eliya wakadiumvua mu bukubi muaba uvua kule menemene au. Nunku uvua mua kuikala mushindike ne: bua ku mukuna aku, bantu bavua bajinga kumushipa kabavua mua kumupeta to. Bidi bitulongesha tshinyi? Tuetu bajinge kusamba muntu uvuabu banyange, tudi mua kuanji kumuambuluisha bua adiumvue mu bukubi. Tshilejilu, mbimpe bakulu bamanye ne: muanetu wa bakaji uvuabu banyange udi mua kudiumvua mu bukubi ne mudilekelele padiye kumbelu kupita padiye ku Nzubu wa Bukalenge. Mukuabu yeye udi mua kudiumvua bimpe padiye ku Nzubu wa Bukalenge.

15-16. Mmushindu kayi uudi mua kuleja ne: udi uteleja bakuebe bimpe?

¹⁵ Ikala uteleja bimpe. Bible udi utubela patoke ne: “Muntu yonso udi ne bua kuikala ne lukasa ku diteleja, ne lujoko ku diakula.” (Yak. 1:19) Utu uteleja bakuebe bimpe anyi? Udi mua kuela meji ne: kuteleja muntu bimpe nkushala muteye matshi patupu, mumutangile kuyi wamba tshintu. Kadi ki mmuomu to. Tshilejilu, Eliya wakafika ku diambila Yehowa yende yonso ivua mimutonde, ne Yehowa wakamuteleja bimpe. Yehowa wakajingulula ne: Eliya uvua ne buôwa, udimona nkaya, ne wela meji ne: uvua muenze mudimu wa tshidimudimu. Yehowa wakamuambuluisha ne dinanga dionso bua katungunuki ne kumvua nanku to. Wakaleja  ne: uvua muteleje Eliya bimpe menemene.​—1 Bak. 19:9-11, 15-18.

¹⁶ Paudi uteleja muanenu, mmunyi muudi mua kuditeka pa muaba wende ne kumumvuila luse bua kuleja ne: udi mumunange? Misangu mikuabu, mêyi mimpe adi kaayi atapangana ku muoyo adi mua kuleja muudi umvua. Udi mua kumuambila ne: “Bualu buebe budi bunsama ku muoyo bibi be! Ki mbimpe kuenzela bana malu a nunku to!” Udi mua kumuela lukonko lumue anyi ibidi bua kujadika ni udi mumvue bimpe tshidiye wamba. Udi mua kumuebeja ne: “Mukuetu, ngumvuija bimpe, udi musue kuamba tshinyi?” Anyi ne: “Meme mukumvue bimpe, udi muambe ne: . . . Mmuomu anyi?” Kuakula ne dinanga nunku kudi mua kujadikila muanenu ne: udi umuteleja bimpe, uditatshisha bua kumvua bidiye wamba.​—1 Kol. 13:4, 7.

17. Bua tshinyi mbimpe tuikale ne lutulu ne “lujoko ku diakula”?

¹⁷ Kadi wamanya ne: mbimpe kuikala “ne lujoko ku diakula.” Kukoshi muntu ku dîyi bua kumubela anyi bua kumupingaja mu njila to. Ikala kabidi ne lutulu! Pavua Eliya muambile Yehowa yende yonso ivua mimutonde, wakapatula mêyi avua aleja muvuaye ne kanyinganyinga kakole. Yehowa mumane kukolesha ditabuja dia Eliya, Eliya wakalua kuambulula anu mêyi amue amue akavuaye muambe au. (1 Bak. 19:9, 10, 13, 14) Bidi bitulongesha tshinyi? Kutu misangu itu muntu udi ne tunyinganyinga ujinga kuambulula misangu ya bungi malu adi mamutonde. Anu bu Yehowa, mbimpe tumuteleje ne lutulu. Pamutu pa kukeba bua kumuambila tshia kuenza, mbimpe tuditeke pa muaba wende ne tumumvuile luse.​—1 Pet. 3:8.

18. Ndisambila dia mushindu kayi didi kukolesha muntu udi ne tunyinganyinga? Umvuija.

¹⁸ Sambila ne muntu au ne muoyo mujima. Bidi mua kukolela bantu badi ne tunyinganyinga tukole bua kusambila. Muntu udi mua kudimona kayi mukumbane bua kusambila Yehowa. Umue mushindu utudi mua kusamba muntu wa nunku nkusambila nende, tutela dîna diende. Tudi mua kuambila Yehowa mutudi tuetu ne bena mu tshisumbu bonso banange mukuetu eu. Tudi mua  kumulomba bua asambe mutendeledi wende eu ne amupeshe ditalala dia mu muoyo. Masambila a nunku adi mua kukolesha muntu bikole.​—Yak. 5:16.

19. Ntshinyi tshitudi mua kuenza kumpala kua kusamba muntu?

¹⁹ Keba mêyi adi akolesha muntu, ajikija kanyinganyinga kende. Ela meji kumpala kua kuakula bua kusambangana. Mêyi adi kaayi melela meji adi mua kutapa muntu ku muoyo. Mêyi mimpe adi luondapu. (Nsu. 12:18) Nunku lomba Yehowa diambuluisha bua upete mêyi mimpe adi akoleshangana ne adi atukijija mioyo. Ikala mumanye ne: kakuena mêyi adi ne bukole bu mêyi a Yehowa adi mu Bible to.​—Eb. 4:12.

20. Bana betu bakuabu bavuabu banyange ku buana batu badimona bishi? Tudi ne bua kubavuluija tshinyi?

²⁰ Bana betu bakuabu bavuabu banyange ku buana batu bamona ne: mbantu babi, kabena ne mushinga, kakuena udi mubanange, ne kakuena muntu udi mua kubananga to. Kabiena nanku to, nansha kakese! Nunku babadila mêyi a mu Bible bua kubavuluija ne: Yehowa udi ubangata ne mushinga. (Tangila kazubu ka “ Busambi budi Bible ufila.”) Vuluka muvua muanjelu kampanda mukoleshe muprofete Danyele ne bulenga buonso pavuaye muzengele ne tunyinganyinga. Yehowa uvua musue bua muprofete wende amanye ne: uvua ne mushinga wa bungi ku mêsu kuende. (Dan. 10:2, 11, 19) Bia muomumue, bana betu badi ne tunyinganyinga badi ne mushinga wa bungi ku mêsu kua Yehowa!

21. Ntshinyi tshienzelabu bantu bonso badi kabayi banyingalala? Tuetu bonso tudi ne bua kudisuika bua kuenza tshinyi lelu?

²¹ Patudi tusamba bantu bakuabu, tudi tubavuluija mudi Yehowa mubanange. Tudi ne bua kuvuluka misangu yonso ne: Yehowa udi kabidi Nzambi wa buakane. Mmumanye muntu yonso udibu banyange ne malu a masandi. Yehowa udi umona malu onso, ne neanyoke banyangi ba bana badi kabayi banyingalala. (Nom. 14:18) Nunku tuenzayi tuetu tshitudi mua kuenza lelu bua bantu bavuabu banyange bamone ne: tudi babanange. Bualu bukuabu, patudi tumanya ne: Yehowa neajikije tunyinganyinga tua bantu bonso bavuabu banyange kudi Satana ne bantu bende, utujikija bua kashidi, bidi bitusamba bikole be! Kumpala eku, tunyinganyinga etu katuakubaluila kabidi mu lungenyi anyi kubabanda kabidi ku muoyo to.​—Yesh. 65:17.