1. Ntshinyi tshivua Yezu muambe bua biuma bia mu diulu?

BINTU bitu ne mushinga wa bungi menemene kabitu bimueneka to. Mu Muyuki wa pa mukuna, Yezu wakatela bintu bia mushinga bia mu diulu anyi biuma bidi bipite makuta kule ne kule. Kuluaye kuamba kabidi ne: “Muaba udi biuma biebe ke wikala muoyo webe kabidi.” (Mat. 6:19-21) Tshintu tshiotshi ne mushinga wa bungi kutudi, muoyo neutusake bua kutshipeta. Tudi tudibutshila “biuma mu diulu” patudi tupeta dîna dimpe anyi lumu luimpe ku mêsu kua Nzambi. Anu muvua Yezu muambe, biuma bia nunku kabiena mua kubutuka anyi kabena mua kubiiba nansha.

2. a) Bilondeshile 2 Kolinto 4:17, 18, ntshinyi tshidi Paulo utulomba bua kuenza? b) Ntshinyi tshituakuila mu tshiena-bualu etshi?

² Mupostolo Paulo udi utulomba bua ‘kutuishila mêsu etu pa bintu bidi kabiyi bimueneka.’ (Bala 2 Kolinto 4:17, 18.) Bintu ebi mbintu bia mushinga mukole. Mu biobi mudi masanka atuapeta mu bulongolodi bupiabupia. Mu tshiena-bualu etshi, netuakule bua bintu bia mushinga binayi bidi kabiyi bimueneka bitudi mua kupeta nansha mpindieu. Mbiobi ebi: bulunda ne Nzambi, dipa dia disambila, diambuluisha dia kudi nyuma muimpe, ne ditukuatshisha dia kudi bena mu diulu mu mudimu wa buambi. Netumone kabidi mutudi mua kuleja ne: tudi ne dianyisha bua bintu ebi.

3. Tshintu tshia mushinga tshidi katshiyi tshimueneka tshidi tshipite bikuabu ntshinyi? Ntshinyi tshidi tshienze bua tuikale natshi?

³ Tshintu tshia mushinga tshidi katshiyi tshimueneka tshidi tshipite bikuabu mbulunda ne Yehowa Nzambi. (Mis. 25:14) Mmunyi mudibi mua kuenzeka bua Nzambi kudia bulunda ne  bantu bena mibi eku ushala anu munsantu munda ne pambelu? Mmuenze nanku bualu mulambu wa Yezu udi upikulangana “udi umbusha mpekatu wa ba pa buloba.” (Yone 1:29) Yehowa ukavua mudianjile kumanya ne: bualu buvuaye mulongolole bua kufila Musungidi wa bukua bantu kabuvua ne bua kuya mu mâyi to. Ke bualu kayi Nzambi udi mua kudia bulunda ne bantu bavuaku kumpala kua Yezu kufua.​—Lomo 3:25.

4. Fila bilejilu bia bantu bavua balue balunda ba Nzambi kumpala Yezu kulua pa buloba?

⁴ Tuangate bilejilu bia bamue bantu bavuaku kumpala kua Yezu kulua pa buloba bavua badie bulunda ne Nzambi. Abalahama uvua muntu uvua muleje ditabuja dia dikema. Bidimu bipite pa 1 000 yeye mumane kufua, Yehowa wakamubikila ne: “mulunda wanyi.” (Yesh. 41:8) Nanku nansha lufu kaluena mua kukosa bulunda bua Yehowa ne balunda bende to. Mu meji a Yehowa, Abalahama utshidi ne muoyo. (Luka 20:37, 38) Tshilejilu tshikuabu ntshia Yobo. Mu tshisangilu kampanda tshia banjelu mu diulu, Yehowa wakakula ne dishindika dionso bua bualu bua Yobo. Wakamba ne: Yobo “mmuntu mululame wa muoyo mutoke, udi utshina Nzambi ne wepuka malu mabi.” (Yobo 1:6-8) Kadi Yehowa wakumvua bishi bua Danyele uvua mumuenzele mudimu ne lulamatu luonso mu buloba bua bampangano bidimu bitue ku 80? Banjelu bakajadikila mukulakaje au misangu isatu ne: uvua “muntu wa mushinga mukole.” (Dan. 9:23; 10:11, 19) Tudi batuishibue ne: Yehowa udi ne dijinga dikole dia kubisha balunda bende bananga aba ku lufu.​—Yobo 14:15.

5. Ntshinyi tshitudi ne bua kuenza bua kudia bulunda ne Yehowa?

⁵ Mbantu bapange bupuangane bungi kayi lelu badi badie bulunda ne Yehowa? Badi miliyo ne miliyo. Tudi tuamba nanku bualu bantu ba bungi (balume, bakaji, ne bana) pa buloba bujima badi baleja ku bikadilu biabu ne: mbasue kuikala balunda ba Nzambi. “Bulunda . . . bushême [ne Yehowa] budi kudi bena bululame.” (Nsu. 3:32) Bantu badi badia nende bulunda nunku bualu badi baleja ditabuja mu mulambu wa Yezu udi upikulangana. Mulambu eu ke udi wenza bua Yehowa atuitabile bua tudilambule kudiye ne tubatijibue. Patudi tuenza malu a mushinga aa, tudi tudisanga ne bena Kristo miliyo ne miliyo badi badilambule ne babatijibue bikale mu ‘bulunda bushême’ ne Muntu mutambe bunene mu diulu ne pa buloba!

6. Mmunyi mutudi mua kuleja ne: tudi ne dianyisha bua bulunda buetu ne Nzambi?

⁶ Mmunyi mutudi mua kuleja ne: tudi tuangata bulunda butudi badie ne Nzambi ne mushinga? Anu bu Abalahama ne Yobo bavua bashale balamate Nzambi bidimu bipite pa lukama, tudi ne bua kushala petu ne lulamatu nansha bituikala babange kuenzela Yehowa Nzambi mudimu kale anyi matuku abidi aa mu ndongoluelu ukadi utua ku tshibungubungu eu. Anu bu Danyele, tudi ne bua kuangata bulunda buetu ne Nzambi ne mushinga wa bungi kupita ne muoyo wetu. (Dan. 6:7, 10, 16, 22) Yehowa yeye mutuambuluishe, tudi mua kutantamena lutatu kayi luonso lutudi mua kupeta bua tushale anu balunda bende.​—Filip. 4:13.

7. a) Bilondeshile Nsumuinu 15:8, Yehowa utu umvua bishi bua masambila etu? b) Utu uandamuna mushindu kayi?

⁷ Tshintu tshikuabu tshitudi katuyi tumona ndisambila. Balunda ba pa muoyo batu bambilangana yabu ya munda ne mudibu badiumvua. Ke mudibi kabidi bua bulunda buetu ne Yehowa anyi? Eyowa! Yehowa utu wakuila netu mu Dîyi diende ne utulejilamu mutuye wela meji ne mutuye udiumvua. Tuetu petu tutu tuyikila nende mu disambila ne tudi  mua kumuambilamu yetu ya munda ne mutudi tudiumvua menemene. Patutu tusambila Yehowa, bitu bimusankisha bua kututeleja. (Bala Nsumuinu 15:8.) Bu mudi Yehowa Mulunda muimpe, katu anu uteleja masambila etu tshianana to, utu kabidi uandamuna. Imue misangu utu uandamuna pa lukasa. Misangu mikuabu bidi mua kutulomba bua tutungunuke ne kusambila bua bualu kampanda. Tshidibi tuikale bashindike ne: neatuandamune dîba didi dikengedibua ne mu mushindu mutambe buimpe. Tumanye ne: bidi mua kuenzeka bua Nzambi atuandamune mutuvua katuyi belele meji. Tshilejilu, pamutu pa yeye kutumbushila lutatu kampanda, udi mua kutupesha meji ne bukole bua “kunanukila.”​—1 Kol. 10:13.

8. Mmunyi mutudi mua kuleja ne: tudi ne dianyisha bua dipa dia disambila?

⁸ Mmunyi mutudi mua kuleja ne: tudi ne dianyisha bua dipa dia disambila didi kadiyi kuambangana nadi edi? Umue mushindu nkuteleja mubelu wa Yehowa wa ‘kusambila misangu yonso.’ (1 Tes. 5:17) Yehowa katu utuenzeja bua kusambila to. Utu unemeka budikadidi buetu bua kudisunguila malu ne utu utulomba bua ‘kusuminyina mu disambila.’ (Lomo 12:12) Nanku tudi mua kuleja mutudi ne dianyisha patudi tusambila misangu ya bungi dituku dionso. Bushuwa, mbimpe tuikale tutumbisha Yehowa ne tumuela tuasakidila patudi tumusambila.​—Mis. 145:2, 3.

9. Mmunyi mutu muanetu kampanda umvua bua disambila? Kadi wewe utu umvua bishi?

⁹ Patudi tuenda tuenzela Yehowa mudimu ne tumona mishindu idiye wandamuna masambila etu, mbimpe tumuleje petu dianyisha dia bungi bua disambila. Tuangate tshilejilu tshia muanetu Chris ukadi muenze bidimu 47 mu mudimu wa ku dîba ne ku dîba. Udi wamba ne: “Ntu musue kusambila Yehowa anu pa dindadinda. Bitu bingenza disanka bua kuyikila ne Yehowa patshidi nsese ya dîba ipatukilaku ne imatshisha lumuma lua mu dinda! Bitu binsaka bua kumuela tuasakidila bua bintu bionso bidiye mutupeshe, kusangisha ne diakalenga dia kumusambila. Pashishe butuku kumpala kua meme kuya kuela mpenzu mêsu, ntu nsambila, ndala ne kondo ka muoyo katoke.”

10. Bua tshinyi tudi ne bua kuangata nyuma wa Nzambi ne mushinga?

¹⁰ Bukole buenzeji bua Nzambi ntshintu tshikuabu tshidi katshiyi tshimueneka tshitudi ne bua kuangata ne mushinga. Yezu wakatulomba bua tutungunuke ne kusambila bua batupeshe nyuma muimpe. (Luka 11:9, 13) Yehowa utu utupesha bukole, too ne “bukole budi bupite bua pa tshibidilu” ku diambuluisha dia nyuma eu. (2 Kol. 4:7; Bien. 1:8) Nyuma wa Nzambi eu udi mua kutuambuluisha bua kunanukila mu lutatu luonso lutudi mua kupeta.

11. Mmunyi mudi nyuma muimpe mua kutuambuluisha?

¹¹ Nyuma muimpe udi mua kutuambuluisha bua kukumbaja midimu itudi tuenzela Nzambi. Nyuma eu udi mua kulengeja bipedi bietu anyi kukolesha mamanya atukadi nawu. Udi utuambuluisha bua kukumbaja midimu yetu ya buena Kristo. Patudi tupatula bipeta bimpe mu midimu eyi, katuena ne bua kudituta tshianza pa tshiadi to, kadi tumanye ne: nyuma wa Nzambi ke udi mutuambuluishe.

12. Bilondeshile Misambu 139:23, 24, tudi mua kusambila bua nyuma muimpe atuambuluishe bua kuenza tshinyi?

¹² Mmushindu kayi utudi mua kuleja ne: tudi tuangata nyuma wa Nzambi ne mushinga wa bungi? Umue mushindu nkusambila bua atuambuluishe bua tujingulule meji anyi majinga mabi atudi nawu munda muetu. (Bala Misambu 139:23, 24.) Patudi tuenza nanku, Yehowa udi mua kutuambuluisha ne nyuma wende bua tufike ku dimanya meji mabi au. Tuetu bafike ku dimanya meji anyi dijinga dibi ditudi nadi, tudi ne bua kusambila bua nyuma wa Nzambi atupeshe bukole bua kudikandamena. Dîba adi netuleje mutudi badisuike bua kubenga kuenza bualu budi mua kusaka Yehowa bua kulekela dituambuluisha ne nyuma wende.​—Ef. 4:30.

13. Mmunyi mutudi mua kufika ku dileja dianyisha dia bungi bua nyuma muimpe?

¹³ Tudi mua kufika ku dileja dianyisha dia bungi bua nyuma muimpe tuetu tuelangana meji a malu adi nyuma muimpe mukumbaje tshikondo tshietu etshi. Kumpala kua  Yezu kubanda mu diulu, wakambila bayidi bende ne: “Nenupete bukole panupuekela nyuma muimpe, ne nenuikale bantemu banyi . . . too ne ku miaba ya kule menemene ya pa buloba.” (Bien. 1:8) Mêyi aa adi enda akumbana mu mushindu wa dikema. Nyuma muimpe mmuambuluishe bua batendeledi ba Yehowa ba pa buloba bujima bapite pa miliyo 8 ne tshitupa basangishibue. Tudi kabidi mu Mparadizu wa mu nyuma bualu nyuma wa Nzambi mmutuambuluishe bua kupeta ngikadilu mimpe bu mudi dinanga, disanka, ditalala, lutulu, bulenga, buimpe, ditabuja, bupole, ne didikanda. Ngikadilu eyi ke idi yenza “dimuma dia nyuma.” (Gal. 5:22, 23) Bushuwa nyuma muimpe ndipa dia dikema!

14. Patudi tuyisha, ndiambuluisha kayi didi kadiyi dimueneka ditudi nadi?

¹⁴ ‘Kuenza mudimu pamue’ ne Yehowa ne tshitupa tshia mu diulu tshia bulongolodi buende ntshintu tshikuabu tshitudi natshi tshitudi katuyi tumona. (2 Kol. 6:1) Tudi tuenza nanku dîba dionso ditudi tuyisha. Paulo wakamba buende yeye ne bua badi benza pabu mudimu eu ne: “Tudi benzejanganyi ba mudimu ne Nzambi.” (1 Kol. 3:9) Patudi tuyisha, tudi kabidi benzejanganyi ba mudimu ne Yezu. Vuluka ne: yeye mumane kuambila bayidi bende ne: “Nuvuije bantu ba mu bisamba bionso bayidi,” wakamba kabidi ne: “Ndi nenu.” (Mat. 28:19, 20) Kadi bua banjelu? Tudi ne diakalenga dia dikema dia kulombodibua kudi banjelu patudi tumanyisha “lumu luimpe lua tshiendelele . . . [kudi] badi basombele pa buloba”!​—Buak. 14:6.

15. Fila tshilejilu tshia mu Bible tshidi tshileja mudimu munene udi Yehowa wenza mu buambi.

¹⁵ Bu mudi bena mu diulu batuambuluisha nunku, mmalu kayi adi enda enzeka? Patudi tumiamina ntete ya mukenji wa Bukalenge, kudi idi imata mu mioyo idi misue kuwitaba ne itoloka. (Mat. 13:18, 23) Nnganyi udi wenza bua ntete ya bulelela itoloke ne ikuame? Yezu wakaleja ne: muntu kena mua kulua muyidi wende padi ‘Tatuende kayi mumukoke’ nansha. (Yone 6:44) Mu Bible mudi tshilejilu tshisunguluke tshia bualu ebu. Vuluka dîba divua Paulo muyishe kasumbu ka bantu bakaji pambelu pa tshimenga tshia Filipoyi. Mona tshidi Bible wamba bua umue wa kudibu diende Ludia: “Yehowa wakunzulula muoyo wende bikole bua kuteyaye ntema ku malu avua Paulo wamba.” (Bien. 16:13-15) Anu bu Ludia, bantu bakuabu miliyo ne miliyo mbakokibue pabu kudi Yehowa.

16. Patudi tuyisha bantu baya kumpala, nnganyi utudi ne bua kututshila bikashi?

¹⁶ Patudi tuyisha bantu baya kumpala, nnganyi utudi ne bua kututshila bikashi? Paulo wakandamuna lukonko elu pakafundilaye tshisumbu tshia bena Kolinto mêyi aa: “Meme mvua mukune, Apolo uvua mumiamine mâyi, kadi Nzambi uvua wenda ubikolesha; nunku muntu udi ukuna anyi udi umiamina mâyi kena ne mushinga, kadi anu Nzambi udi ubikolesha.” (1 Kol. 3:6, 7) Anu bu Paulo, tudi ne bua kuikala tututshila Yehowa bikashi padi bantu batudi tuyisha baya kumpala.

17. Mmunyi mutudi mua kuleja ne: tudi ne dianyisha bua ‘kuenza mudimu pamue’ ne Nzambi ne Kristo ne banjelu?

¹⁷ Mmunyi mutudi mua kuleja ne: tudi ne dianyisha bua diakalenga ditudi nadi dia ‘kuenza mudimu pamue’ ne Nzambi ne Kristo ne banjelu? Tudi mua tuenza nanku patudi tuenza tshionso tshitudi mua kuenza bua kuambila bakuabu lumu luimpe. Kudi mishindu ya bungi itudi mua kuluamba, bu mudi kuyisha “miaba ya bantu ba bungi ne ku nzubu ne ku nzubu.” (Bien. 20:20) Ba bungi batu basue kabidi kuyisha padi mpunga umueneka. Padibu batuilangana ne muntu udibu kabayi bamanye, badi bamuela muoyo ne musangelu ne bateta  kuyukila nende. Muntu au yeye muitabe bua kuyukila, badi bamuambila mukenji wa Bukalenge mu mayele.

18-19. a) Ntshinyi tshitudi mua kuenza bua kumiamina ntete ya bulelela mâyi? b) Londa bualu budi buleja muvua Yehowa muambuluishe mulongi kampanda wa Bible.

¹⁸ Bu mutudi “benzejanganyi ba mudimu ne Nzambi,” katuena ne bua kukuna ntete ya bulelela tshianana to, tudi kabidi ne bua kuyimiamina mâyi. Padi muntu uleja ne: mmusue bitudi tumuambila, tudi tuenza muetu muonso bua kumupinganyina anyi kuenza bua muntu mukuabu amuyile bua kutuadija kulonga nende Bible. Padi dilonga adi dienda diya kumpala, tudi tusanka patudi tumona Yehowa wenda wambuluisha mulongi au bua kushintulula ngelelu wende wa meji ne mudiye udiumvua.

¹⁹ Tuangate tshilejilu tshia Raphalalani wa mu Afrique du Sud uvua nganga anyi tshilumbu. Uvua munange malu a mu Bible avuabu bamulongesha. Kadi biakamutatshisha bikole pakabalaye tshidi Dîyi dia Nzambi diamba bua diebeja bafue malu. (Dut. 18:10-12) Ku kakese ku kakese, wakitaba bua Nzambi ashintulule ngelelu wende wa meji. Pakapika matuku, wakalekela mudimu wende wa butshilumbu au, kadi pabi ke kuonso kuvuaye udiila. Lelu, Raphalalani udi ne bidimu 60 ne udi wamba ne: “Ndi ngela Bantemu ba Yehowa tuasakidila wa manza tente bua mudibu bangambuluishe mu mishindu ya bungi ne bampeteshe mudimu. Kadi undi ntamba kuela tuasakidila n’Yehowa bualu mmungambuluishe bua meme kushintulula nsombelu wanyi; mpindieu nkadi nyisha muikale Ntemu wende.”

20. Udi mudisuike bua kuenza tshinyi?

²⁰ Mu tshiena-bualu etshi, tudi bamone bintu bia mushinga binayi bitudi katuyi tumona. Tshidi tshibipite bionso ndiakalenga dia kuikala mu bulunda bua nsungansunga ne Yehowa. Bulunda ebu ke budi butufikisha ku bintu bikuabu bia mushinga bidi kabiyi bimueneka bitudi tufuma ku dimona ebi: kuyukila nende mu disambila, kumona mudiye utuambuluisha ne nyuma muimpe, ne diambuluisha dia kudi bena mu diulu mu mudimu wetu wa buambi. Tudisuikayi koku bua kuikala kuleja Yehowa dianyisha dia bungi bua bintu bia mushinga bidi kabiyi bimueneka ebi ne tuikalayi anu tumuela tuasakidila bua mudiye mulunda wetu wa katapula kateka.