1-2. Ntshinyi tshivua mufundi kampanda muambe? Ntshinyi tshituakonkonona mu tshiena-bualu etshi?

LELU eu bantu ba bungi badi bamba mudibu bitabuja Yezu, kadi kabayi batumikila malu avuaye mulongeshe to. (2 Tim. 4:3, 4) Mufundi kampanda uvua muambe ne: “Matuku etu aa Yezu mukuabu yeye mupatuke munkatshi muetu, wamba malu muvua Yezu wa kumpala muambe . . . , netumubenge anu muvuabu babenge Yezu kukadi bidimu binunu bibidi anyi? . . . Diandamuna didi ne: Eyowa, netumubenge.”

² Bantu ba bungi ba mu bidimu lukama bia kumpala bakateleja malu avua Yezu ulongesha, kumonabu ne bishima bivuaye muenze, kadi bakabenga kumuitabuja. Bua tshinyi? Mu tshiena-bualu tshishale, tuvua bakonkonone malu anayi avua menze bua bivua Yezu wamba ne wenza bilenduishe bantu. Tukonkononayi mpindieu malu makuabu anayi. Patudi tuakonkonona, netumone bua tshinyi lelu bantu badi babenga kuteleja bayidi ba Yezu ne mutudi mua kuepuka bua tshintu nansha tshimue katshitulenduishi to.

3. Ntshinyi tshivua Yezu wenza tshivua tshifikishe bantu bakuabu ku dilenduka?

³ Pavua Yezu pa buloba, uvua usomba ne bantu ba mishindu yonso. Uvua udia ne bena kantu ku bianza, udia kabidi ne bantu bavua ne bukokeshi, kadi uvua kabidi upitshisha dîba divule ne bapele ne bantu bavuabu bakengesha. Pa kumbusha abu, uvua uditeka pa muaba wa bavuabu bangata bu “benji ba mpekatu.” Bantu bakuabu bavua badimona bakane bavua balenduka bua malu avua Yezu wenza. Bakakonka bayidi ba Yezu ne: “Nudi nudia ne nunua ne balambuishi ba bitadi ne benji ba mpekatu bua tshinyi?” Yezu kubandamuna ne: “Bantu badi ne makanda a mubidi kabatu dijinga ne munganga to, kadi badi basama ke batu nende dijinga. Tshiena mulue bua kubikila  bantu bakane, kadi mbua kubikila benji ba mpekatu bua banyingalale bua mpekatu yabu.”​—Luka 5:29-32.

4. Bilondeshile muprofete Yeshaya, ntshinyi tshivua bena Yuda ne bua kuikala bamanye bua Masiya?

⁴ Tshidi Mifundu yamba. Kale kumpala kua Masiya kuluaye, muprofete Yeshaya wakamba bua bualu buende ne: bena panu kabavua ne bua kumuitaba to. Wakafunda mêyi a buprofete wamba ne: “Bavua bamupetule ne bamuepuke kudi bantu . . . Bivua anu bu ne: bavua batusokoke mpala wende. Bavua bamupetule, ne tuetu katuakamutua mushinga.” (Yesh. 53:3) Bavua ne bua kuepuka Masiya “kudi bantu.” Nunku bena Yuda ba mu bidimu lukama bia kumpala bavua ne bua kuikala bamanye ne: bantu bavua ne bua kubenga Yezu.

5. Mmunyi mutu bantu ba bungi bangata bayidi ba Yezu lelu eu?

⁵ Ke mudibi bienzeka kabidi lelu anyi? Eyowa. Bamfumu ba bitendelelu ba bungi batu bazakeela anu bantu banene, bena kantu ku bianza, ne bantu badibu bangata bu bena meji mu bulongolodi ebu bua kubuelabu mu bitanda biabu. Batu bazakeela bena kuitabuja bapiabapia abu nansha bobu bikale ne nsombelu anyi bikadilu bidi bibengangana ne mikenji ya Nzambi. Kadi anu bamfumu ba bitendelelu bamue bamue abu batu bapetula basadidi ba Yehowa ba bikadilu bikezuke badi bamutendelela ne tshisumi. Batu babapetula anu bualu bena panu kabatu babangata bu bantu banene to. Anu muakamba Paulo, Nzambi mmusungule bantu badibu “bapetula.” (1 Kol. 1:26-29) Nansha nanku, ku mêsu kua Yehowa basadidi bende ba lulamatu bonso badi ne mushinga.

6. Anu mudibu baleje mu Matayi 11:25, 26, mmunyi mutudi mua kuidikija lungenyi lua Yezu?

⁶ Tshitudi mua kuenza bua katulenduki. (Bala Matayi 11:25, 26.) Katuikadi tumona bantu ba Nzambi mudi bena panu babamona to. Manya ne: bantu bena budipuekeshi ke batu Yehowa usungula bua kuenzabu disua diende. (Mis. 138:6) Ela kabidi meji bua bionso bidiye mukumbaje ne bantu badibu bangata kudi bena panu bu badi kabayi bena meji anyi kabayi bamanyi ba mukanda.

7. Bua tshinyi Yezu uvua ubikila Bafalese ne: bena lubombo? Bafalese bakenza tshinyi?

⁷ Yezu wakela bamfumu ba bitendelelu ba mu tshikondo tshiende patoke ne dikima dionso bua bienzedi biabu bia lubombo. Tshilejilu, wakela Bafalese patoke bua muvuabu batamba kutabalela anu mushindu wa kuowa mâyi ku bianza kupita mua kutabalela baledi babu. (Mat. 15:1-11) Bivua mua kuikala bikemeshe bayidi ba Yezu pavuabu bumvue mêyi ende. Bakamuebeja ne: “Udi mumanye ne: Bafalese bavua balenduke pavuabu bumvue tshiuvua muambe anyi?” Yeye kubandamuna ne: “Mutshi wonso uvua Tatu wanyi udi mu diulu kayi mukune, nebawujule. Balekelayi. Mbalombodi bampofu. Nunku, bikala mpofu ulombola mpofu mukuabu, bonso babidi nebakuluke mu tshina.” (Mat. 15:12-14) Nansha muvua bamfumu ba bitendelelu kabayi banyisha bivua Yezu wamba, kabiakamupangisha bua kumanyisha bulelela to.

8. Ntshinyi tshivua Yezu muambe bua kuleja ne: malu adi bantu bitabuja mu bitendelelu ki mmanyishibue onso kudi Nzambi to?

⁸ Yezu wakela kabidi malongesha a dishima patoke. Kakamba ne: malu adi bantu bitabuja mu bitendelelu mmanyishibue onso kudi Nzambi to. Kadi wakamba ne: kudi bantu ba bungi badi mu njila mualabale udi ufikisha ku kabutu, ne bakese patupu badi mu njila mubumbakane. (Mat. 7:13, 14) Wakamba kayi udia tshibanga ne: bamue bantu nebambe mudibu benzela Nzambi mudimu, kadi pabu kabayi bamuenzelawu to. Wakadimuija bantu wamba ne: “Nudimukile baprofete ba dishima badi balua kunudi bavuale biseba bia mikoko, kadi munda badi mbua ya ditu idi ne lumpukusu. Nenubamanyine ku mamuma abu.”​—Mat. 7:15-20.

9. Ngamue malongesha kayi a dishima a bitendelelu avua Yezu muele patoke?

 ⁹ Tshidi Mifundu yamba. Mêyi a buprofete akavua maleje ne: tshisumi bua nzubu wa Yehowa tshivua ne bua kudia Masiya. (Mis. 69:9; Yone 2:14-17) Tshisumi atshi tshiakasaka Yezu bua kuela malongesha a dishima a bitendelelu ne bienzedi biabi patoke. Tshilejilu, Bafalese bavua bitabuja ne: anyima katu ufua to; Yezu yeye wakalongesha ne: muntu mufue mmulale. (Yone 11:11) Basadoke kabavua bitaba ne: muntu udi mua kubika ku lufu to; kadi Yezu wakabisha mulunda wende Lazalo ku lufu. (Yone 11:43, 44; Bien. 23:8) Bafalese bavua bamba ne: bualu buonso buvua buenzeka mbumana kulongolola kudi Nzambi anyi kudi bukole kampanda budi kabuyi bumueneka; Yezu wakalongesha yeye ne: bantu badi mua kusungula bikalabu basue kuenzela Nzambi mudimu peshi kubenga kumuenzelawu.​—Mat. 11:28.

10. Bua tshinyi bantu ba bungi kabatu banange kututeleja bua malu atudi tulongesha?

¹⁰ Ke mudibi bienzeka kabidi lelu anyi? Eyowa. Bantu ba bungi ki mbanange kututeleja to, bualu malu a mu Bible atudi tulongesha adi ela ngenyi ya dishima ya bitendelelu patoke. Bamfumu ba bitendelelu badi balongesha bena kuitabuja babu ne: Nzambi utu unyoka bantu babi mu ngena. Badi benda ne dilongesha dia dishima edi bua bantu bashale ku bukokeshi buabu. Tuetu batendeledi ba Yehowa Nzambi wa dinanga tudi tuela dilongesha dia dishima edi patoke. Bamfumu ba bitendelelu badi balongesha kabidi bantu ne: anyima katu ufua to. Dilongesha edi ki ndia mu Bible to, ne tutu tuleja bantu kudidi difumine. Bu diodi dilelela, dibishibua ku lufu kadivua dilua kabidi ne mushinga to. Mu bitendelelu bia bungi badi balongesha ne: malu onso adi atuenzekela mmamana kulongolola kudi Nzambi peshi kudi bukole kampanda budi kabuyi bumueneka. Kadi tuetu tudi tulongesha ne: muntu udi ne budikadidi bua kudisunguila malu ne kusungula bikalaye musue kutendelela Nzambi. Ntshinyi tshitu bamfumu ba bitendelelu benza padibu bumvua nanku? Misangu ya bungi bitu bibafikisha munda bikole.

11. Bilondeshile mêyi a Yezu a mu Yone 8:45-47, Nzambi udi ulomba bantu bende tshinyi?

¹¹ Tshitudi mua kuenza bua katulenduki. Tuetu banange bulelela, tudi ne bua kuitaba mêyi a Nzambi  ne kuatumikila. (Bala Yone 8:45-47.) Katuena tuenza bu Satana Diabolo to, tuetu tudi balamate ku bulelela balamatshilamu. Katuena mua kuenza bualu budi bubengangana ne malu atudi tuitabuja nansha kakese. (Yone 8:44) Nzambi udi ulomba bantu bende wamba ne: “Nukine malu mabi ne muoyo umue” ne “nulamate malu mimpe,” anu bu muakenza Yezu.​—Lomo 12:9; Eb. 1:9.

12. Bua tshinyi mushindu uvua Yezu mufue uvua mulenduishe bena Yuda ba bungi?

¹² Mbualu kayi bukuabu buvua bulenduishe bena Yuda mu tshikondo tshia Yezu? Paulo uvua muambe ne: “Tuetu tudi tuyisha Kristo uvuabu bashipele ku mutshi, udi tshilenduishi kudi bena Yuda.” (1 Kol. 1:23) Bua tshinyi mushindu uvua Yezu mufue uvua mulenduishe bena Yuda ba bungi? Buabu bobu, bu muvua Yezu mufuile ku mutshi, bivua bileja ne: uvua muena tshibawu ne muenji wa mpekatu; kavua Masiya to.​—Dut. 21:22, 23.

13. Ntshinyi tshivua bantu bavua balenduke bua malu avua menzekele Yezu babenge bua kuitaba?

¹³ Bena Yuda bavua balenduke bua malu avua menzekele Yezu abu bakabenga bua kuitaba ne: Yezu kavua ne bualu bubi buvuaye muenze, anyi ne: bavua bamushiminyine malu, peshi kabidi ne: bavua bamuenzele malu mabi. Bantu bavua balumbuluisha Yezu kabakalumbuluisha mu buakane to. Bena ku tshilumbuluidi tshinene tshia bena Yuda bavua balongolole tshisangilu tshia lukasa lukasa bua kumulumbuluisha, kabayi nansha balonde tshivua mikenji ya mua kulumbuluishangana yamba to. (Luka 22:54; Yone 18:24) Balumbuluishi abu bavua ne bua kuanji kuteleja malu avuabu babanda nawu Yezu ne bijadiki bivua bileja ne: uvua muenze malu mabi bua kuleja muvuabu kabayi ne kansungansunga. Kadi bobu bavua bakeba “tshijadiki tshia dishima tshia kupisha natshi Yezu bua kumona mua kumushipa.” Bu muvuabu batshipangile, muakuidi munene wakateta kusaka Yezu bua ambe bualu buvua mua kumufikisha ku dipiila. Ngenzelu wa malu au uvua ubengangana bikole ne mikenji ya ku tubadi. (Mat. 26:59; Mâko 14:55-64) Pakavua Yezu mubishibue ku lufu, balumbuluishi babi abu bakapesha basalayi ba bena Lomo bavua balama lukita luende “bitupa bia arjan bipite bungi” bua batangalaje lumu lua dishima bua kumvuija bua tshinyi lukita luvua munda mutupu.​—Mat. 28:11-15.

14. Ntshinyi tshivua Mifundu midianjile kumanyisha bua lufu lua Masiya?

 ¹⁴ Tshidi Mifundu yamba. Nansha muvua bena Yuda ba bungi ba mu tshikondo tshia Yezu kabayi bele meji ne: bivua bikengela Masiya afue, mona tshivua mêyi a buprofete madianjile kumanyisha mu Mifundu: “Yeye wakupumuna muoyo wende too ne ku lufu ne wakabadibua munkatshi mua bashipi ba mikenji; wakambula mpekatu wa bantu ba bungi, ne wakakuila bashipi ba mikenji.” (Yesh. 53:12) Nanku bena Yuda kabavua ne bualu bua kulendukila bua muvua Yezu mushipibue bu muenji wa mpekatu to.

15. Mmalu kayi adibu bafunda nawu Bantemu ba Yehowa adi alenduisha bantu bakuabu?

¹⁵ Ke mudibi bienzeka kabidi lelu anyi? Menemene! Bavua bafunde Yezu ne malu a dishima ne bakose tshilumbu tshiende bibi. Ke mutubu kabidi benzela Bantemu ba Yehowa malu. Mona bimue bilejilu. Mu bidimu bia 1930 too ne 1950 mu États-Unis, kuvua bilumbu bia bungi ku tubadi bivua bitangila budikadidi buetu bua kutendelela Nzambi. Kuvua balumbuluishi bavua batuluisha bimueneke patoke. Mu tshimenga tshia Québec, mu Canada, bena mbulamatadi ne bena bitendelelu bavua beleshangana diboko bua kuluisha mudimu wetu. Bakela bamanyishi ba bungi mu buloko anu bualu bavua bayukila ne bena mutumba nabu bua Bukalenge bua Nzambi. Mu Allemagne, mbulamatadi wa bena Nazi bavua kabayi batshina Nzambi uvua mushipe bansongalume ba bungi ba lulamatu. Mu bidimu bishale ebi kabidi, mbapishe bana betu ba bungi ba mu Russie ku tubadi ne babele mu buloko bualu bavua bayukila ne bantu malu a mu Bible. Mbulamatadi wa mu ditunga adi mmuteke mudimu wetu mu mulongo wa malu adi aluisha bukalenge buabu. Mbakandike too ne Bible wa Nkudimuinu wa bulongolodi bupiabupia mu tshiena Russie, bamuteke pende mu mulongo wa mikanda idi ne malu adi aluisha mbulamatadi bualu mudi dîna dia Yehowa.

16. Anu mudibu baleje mu 1 Yone 4:1, bua tshinyi katuena ne bua kulekela malu a dishima adibu bashiminyina bantu ba Yehowa atupambuisha?

¹⁶ Tshitudi mua kuenza bua katulenduki. Keba bua kumanya malu mudiwu. Mu Muyuki wa pa Mukuna, Yezu wakadimuija bavua bamuteleja ubambila ne: bamue bantu ‘nebabashiminyine malu mabi a mishindu yonso.’ (Mat. 5:11) Satana ke udi ukebesha malu a dishima aa. Udi usaka baluishi betu bua kutangalajilabu bantu badi banange bulelela malu mabi a dishima. (Buak. 12:9, 10) Tudi ne bua kubenga malu a dishima adibu balonda kudi baluishi betu. Katulekedi malu a dishima a nunku atukuatshisha buôwa anyi atekesha ditabuja dietu nansha kakese.​—Bala 1 Yone 4:1.

17. Mmunyi muvua malu avua menzeke kumpala kua Yezu kufuaye mua kuikala malenduishe bamue bantu?

¹⁷ Katupa kakese kumpala kua lufu lua Yezu, umue wa ku bapostolo bende 12 uvua mumutungile. Mupostolo mukuabu uvua mumuvile misangu isatu, ne bapostolo bende bakuabu bonso bavua bamushiye banyeme dilolo dia muladilu wa lufu luende adi. (Mat. 26:14-16, 47, 56, 75) Kabivua bikemeshe Yezu to. Yeye muine wakadianjila kumanyisha ne: bivua ne bua kuenzeka nanku. (Yone 6:64; 13:21, 26, 38; 16:32) Pavua malu au menzeke, bivua mua kuikala bilenduishe bakuabu, badiambila munda munda ne: ‘Bikala bapostolo ba Yezu benza malu mushindu eu, nanku meme tshiena mua kuitaba bua kulua mupostolo wende to!’

18. Mmêyi kayi a buprofete avua makumbane mu malu avua menzeke kumpala kua Yezu kufuaye?

¹⁸ Tshidi Mifundu yamba. Bidimu nkama ya bungi kumpala kua Yezu kuluaye pa buloba, Yehowa ukavua mumanyishe mu Dîyi diende ne: bavua ne bua kutungila Masiya ku bitupa bia arjan 30. (Zek. 11:12, 13) Mumutungidi uvua ne bua kuikala umue wa ku balunda bende. (Mis. 41:9) Muprofete Zekâya wakafunda pende ne:  “Kuma mulami wa mikoko, ne tshisumbu tshia mikoko tshitangalake.” (Zek. 13:7) Bantu badi basue malu makane kabavua mua kulekela malu aa abalenduisha to, kadi bivua mua kukolesha ditabuja diabu pavuabu bamona mêyi a buprofete aa akumbanyina Yezu.

19. Ntshinyi tshidi bantu badi basue malu makane bamanye?

¹⁹ Ke mudibi bienzeka kabidi lelu anyi? Eyowa. Mu bikondo bietu ebi, kudi bamue Bantemu bamanyike bimpe badi balekele bulelela balue batontolodi, bakeba mpindieu bua kupambuisha bakuabu. Badi bamuangalajila Bantemu ba Yehowa ngumu mibi mu bibejibeji, ku tudiomba, ku TV, ne ku Enternete, babashiminyina malu ne balonda makuabu kabayi bamba bulelela buonso to. Nansha nanku kabiena bilenduisha bantu badi basue malu makane to. Bobu mbamanye ne: Bible ukavua mudianjile kumanyisha ne: malu a nunku avua ne bua kuenzeka.​—Mat. 24:24; 2 Pet. 2:18-22.

20. Ntshinyi tshitudi mua kuenza bua kabatupambuishi kudi bantu badi balekele bulelela? (2 Timote 4:4, 5)

²⁰ Tshitudi mua kuenza bua katulenduki. Bua tuetu kukolesha ditabuja dietu, bidi bikengela tuikale tudilongela pa tshibidilu, tusambila misangu ne misangu, ne tudifila mu mudimu udi Yehowa mutupeshe bua kuenza. (Bala 2 Timote 4:4, 5.) Tuetu ne ditabuja katuakumvua buôwa patudi tumvua ngumu mibi idibu batangalajila Bantemu to. (Yesh. 28:16) Dinanga ditudi banange Yehowa, Dîyi diende, ne bena Kristo netu nebituambuluishe bua kabatupambuishi kudi bantu badi balekele bulelela.

21. Nansha mudi bantu ba bungi lelu eu babenga kuteleja mukenji utudi tuyisha, tudi batuishibue bua bualu kayi?

²¹ Mu bidimu lukama bia kumpala, bantu ba bungi bavua balenduke, kubengabu Yezu. Kadi kuvua bakuabu ba bungi bavua bamuitabe. Mu bobu abu muvua muena ku Tshilumbuluidi Tshinene tshia bena Yuda umue ne “musumba munene wa bakuidi” kabidi. (Bien. 6:7; Mat. 27:57-60; Mâko 15:43) Bia muomumue lelu eu, bantu miliyo ne miliyo ki mbalenduke to. Bua tshinyi? Bualu mbamanye bulelela bua mu Bible ne mbabunange. Dîyi dia Nzambi didi diamba ne: “Ditalala divule didi kudi bantu badi banange mikenji yebe; kakuena tshintu nansha tshimue tshidi mua kubalenduisha.”​—Mis. 119:165.