1, 2. Mmunyi muvua Bible mudianjile kumanyisha bua divulangana dia bantu ba Yehowa?

PA BULOBA bujima, kudi bulongolodi budi buenza ne bantu badi banange Yehowa ne basue kumuenzela mudimu. Bantu abu ke Bantemu ba Yehowa. Nansha mudibu bena bilema ne batupakana, Yehowa udi ubalombola ne nyuma wende muimpe. Tumonayi imue mishindu idiye mubabeneshe.

² Mu 1914, bantu bakese menemene ke bavua batendelela Yehowa. Kadi Yehowa mmubeneshe mudimu wa kuyisha. Bu tshipeta, bantu miliyo ya bungi mbalonge bulelela bua mu Bible ne balue Bantemu bende. Yehowa uvua muakule bua divulangana didi dikemesha edi pakambaye ne: ‘Muntu udi utamba kupuekela nealue tshisamba, udi mutambe bukese nealue tshisamba tshipite bukole. Meme Yehowa nengendeshe muanda eu mu tshikondo tshiawu.’ (Yeshaya 60:22) Lelu tudi tumona patoke ne: mulayi wa buprofete eu mmukumbane. Bantu ba Yehowa badi bu tshisamba tshinene. Tudi tuamba nanku bualu kudi bisamba bia  bungi pa buloba bujima bidi ne bantu bakese menemene kupita bungi busanga bua bantu ba Yehowa.

3. Mmunyi mudi batendeledi ba Nzambi baleje mudibu ne dinanga?

³ Mu matuku a ku nshikidilu aa, Yehowa mmuambuluishe bantu bende bua kunanganganabu bikole. “Nzambi udi dinanga,” ne badi bamuidikija. (1 Yone 4:8) Yezu wakambila bayidi bende bua ‘kunangangana.’ Wakabambila kabidi ne: “Bua bualu ebu bantu bonso nebamanye ne: nudi bayidi banyi, binuikala ne dinanga munkatshi muenu.” (Yone 13:34, 35) Mu bidimu bishale ebi, batendeledi ba Yehowa mbaleje mudibu banangangane nansha pavua bantu ba mu bisamba baluangana mvita. Tshilejilu, mu Mvita mibidi ya buloba bujima, bavua bashipe bantu miliyo mitue ku 55. Kadi bantu ba Yehowa kabavua bashipe muntu nansha umue mu mvita ayi to. (Bala Mika 4:1, 3.) Bualu ebu mbubambuluishe bua kubenga kuikala ne “dibanza dia mashi a muntu nansha umue.”​—Bienzedi 20:26.

4. Bua tshinyi divulangana dia bantu ba Yehowa didi dikemesha?

⁴ Bantu ba Nzambi badi batungunuka ne kuvula nansha mudibu babaluisha kudi Satana, muluishi wa bukole. Udi “nzambi wa ndongoluelu wa malu eu.” (2 Kolinto 4:4) Satana udi ulombola malongolodi a tshididi a pa buloba, ne kabidi ngumu idibu bafila mu bikandakanda ne ku tudiomba. Udi wenza mudimu ne bintu ebi bua kuimanyika mudimu wa kuyisha lumu luimpe. Kadi kena mua kuimanyika mudimu eu to. Satana mmumanye ne: nkumushadile tshikondo tshîpi, nunku udi utungunuka ne kuenza bua kutupangisha bua kutendelela Yehowa.​—Buakabuluibua 12:12.

5. Bua tshinyi bantu bakuabu badi imue misangu mua kuenza malu adi mua kutunyingalaja? (Tangila tshimfuanyi tshia ntuadijilu tshia tshiena-bualu.)

⁵ Bantu ba Nzambi mbamanye ne: bidi ne mushinga wa bungi bua kunanga Nzambi ne bantu nabu. Yezu wakamba ne: “‘Udi ne bua kunanga Yehowa Nzambi webe ne muoyo webe wonso ne anyima webe yonso ne lungenyi luebe luonso.’ Eu ke mukenji munene ne wa kumpala. Muibidi udi mufuanangane nawu udi ne: ‘Udi ne bua kunanga muntu nebe bu muudi mudinange.’” (Matayi 22:35-39) Nansha nanku, Bible udi uleja ne: bantu bonso mbaledibue bena mibi bua mpekatu wa Adama. (Bala Lomo 5:12, 19.) Ke bualu kayi, imue misangu bamue bana betu mu tshisumbu badi mua kuamba anyi kuenza bualu kampanda budi mua kutunyingalaja. Padi malu a nunku enzeka, ntshinyi tshituenza? Netushalaku banange Yehowa bikole anyi? Netushalaku ne lulamatu kudiye ne kudi bantu bende anyi? Bible udi wakula bua bamue batendeledi ba Nzambi bavua bambe anyi benze malu kampanda avua manyingalaje bakuabu. Tumonayi mudi malu avua mabafikile mua kutuambuluisha.

6. Mmu mushindu kayi muvua Eli mupangile bua kunyoka bana bende ba balume?

⁶ Tshilejilu, Eli uvua muakuidi munene mu Isalele, kadi bana bende ba balume babidi kabavua batumikila mikenji ya Yehowa to. Bible udi wamba ne: “Bana balume ba Eli bakadi bantu babi, kabakamanya Yehowa.” (1 Samuele 2:12) Eli uvua mumanye ne: bana bende ba balume babidi bavua benza malu mabi menemene. Nansha nanku, kavua mubapeshe dinyoka divua dikumbane to. Pakapita matuku, Yehowa wakanyoka Eli ne bana bende ba balume babidi. Pashishe, kakanyishila ndelanganyi  ya Eli bua kuenzayi mudimu bu bakuidi banene to. (1 Samuele 3:10-14) Bu wewe muikalaku mu tshikondo tshia Eli ne mmumanye ne: uvua mulekele bana bende ba balume benza malu mabi menemene, uvuaku mua kulenduka anyi? Malu aa avuaku mua kutekesha ditabuja diebe kudi Yehowa, ne kukufikisha ku dilekela kumuenzela mudimu anyi?

7. a) Mpekatu kayi minene ivua Davidi muenze? b) Ntshinyi tshivua Nzambi muenze bua mpekatu eyi?

⁷ Tshilejilu tshibidi, Davidi uvua ne ngikadilu mimpe, ke bualu kayi Yehowa uvua mumunange bikole. (1 Samuele 13:13, 14; Bienzedi 13:22) Nansha nanku, wakenza bualu kampanda bubi menemene. Pavua Uliya ku mvita, Davidi wakenda masandi ne Beta-sheba, mukaji wa Uliya, yeye kuimita. Davidi kavua musue bua muntu amanye bualu buvuaye muenze to. Nunku wakatuma dîyi bua Uliya alue kumonangana nende, ne wakamulomba bua aye ku nzubu kuende. Davidi uvua wela meji ne: Uliya uvua ne bua kulala ne Beta-sheba bua bantu bele meji ne: muana uvua wa Uliya. Kadi Uliya wakabenga bua kuya kuende. Nunku Davidi wakenza bua bashipe Uliya mu mvita. Davidi ne bena mu dîku diende bakakenga bikole bua mpekatu minene eyi. (2 Samuele 12:9-12) Kadi Yehowa wakamumvuila ne kumufuila luse. Uvua mumanye ne: Davidi uvua musue kuenza malu mimpe. (1 Bakelenge 9:4) Bu wewe muikalaku tshikondo atshi, mmunyi muuvua mua kudiumvua bua tshivua Davidi muenze? Uvuaku mua kulekela kuenzela Yehowa mudimu anyi?

8. a) Mmunyi muvua mupostolo Petelo mupange kukumbaja mêyi ende? b) Petelo mumane kuenza tshilema, bua tshinyi Yehowa wakatungunuka ne kuenza nende mudimu?

⁸ Tshilejilu tshisatu ntshia mupostolo Petelo. Yezu uvua mumusungule bua kuikalaye  mupostolo. Nansha nanku, Petelo uvua imue misangu muambe anyi muenze malu avua kaayi mimpe. Tshilejilu, Petelo wakamba ne: kavua mua kulekela Yezu to, nansha bakuabu bonso bobu bamulekele. (Mâko 14:27-31, 50) Kadi pakakuatabu Yezu, bapostolo bonso bakamulekela, too ne Petelo. Pashishe, Petelo wakavila Yezu misangu isatu. (Mâko 14:53, 54, 66-72) Kadi, Petelo wakanyingalala bikole bua tshivuaye muenze. Nunku Yehowa wakamufuila luse ne wakatungunuka ne kuenza nende mudimu. Bu wewe muikale muyidi wa Yezu tshikondo atshi ne mumanye tshivua Petelo muenze, uvuaku mua kutungunuka ne kueyemena Yehowa anyi?

9. Bua tshinyi udi witaba ne: Nzambi utu wenza malu makane misangu yonso?

⁹ Bilejilu ebi bidi bituambuluisha bua kumona ne: bamue batendeledi ba Yehowa bavua benze malu mabi ne banyingalaje bantu bakuabu bikole menemene. Malu a nunku wowu menzeke lelu, newenze tshinyi? Neulekelaku kubuela mu bisangilu anyi kuangata dipangadika dia kumbuka kudi Yehowa ne kudi bantu bende bua kashidi anyi? Peshi neumone ne: Yehowa udi ne luse ne udi mua kuikala windila bua muenji wa bubi anyingalale? Kadi bidi mua kuenzeka imue misangu ne: muntu udi muenze mpekatu minene abenge kunyingalala bua malu adiye muenze. Newikalaku ne dieyemena dia ne: Yehowa mmumanye bualu abu ne neenze tshidi tshikengela mu tshikondo tshiakanyine anyi? Udi mene mua kumbusha muenji wa bubi au mu tshisumbu biobi bikengela. Udiku witaba ne: Yehowa neenze misangu yonso tshidi tshimpe ne tshidi tshiakane anyi?

10. Ntshinyi tshivua Yezu mujingulule bua bilema bia Yudasa Isakaliote ne Petelo?

¹⁰ Bible udi wakula bua bantu ba bungi bavua bashale ne lulamatu kudi Yehowa ne kudi bantu bende nansha muvua bantu bavua babanyunguluke benza malu mabi menemene. Yezu udi tshilejilu tshitambe buimpe mu bualu ebu. Yeye mumane kusambila butuku bujima ulomba Tatuende diambuluisha, wakasungula bapostolo 12. Kadi umue wa kudibu Yudasa Isakaliote wakalua kumutungila. Mupostolo Petelo wakavila pende Yezu. (Luka 6:12-16; 22:2-6, 31, 32) Yezu kavua muele Yehowa anyi bayidi bakuabu tshilumbu pa mbidi pavua bamue ba kudibu bamuele mâyi ku makasa to. Kadi, wakashala mulamate Tatuende ne wakatungunuka ne kumuenzela mudimu ne lulamatu. Bu tshipeta, Yehowa wakamufuta pa kumubisha ku lufu ne pashishe kumuteka Mukalenge wa Bukalenge bua mu diulu.​—Matayi 28:7, 18-20.

11. Bible uvua mudianjile kuamba tshinyi bua batendeledi ba Yehowa ba tshikondo tshietu etshi?

¹¹ Tshilejilu tshia Yezu tshidi tshitulongesha bua kuikala ne lulamatu kudi Yehowa ne kudi bantu bende. Kudi malu mimpe adi atusaka bua kuenza nanku. Tudi tumona ne: Yehowa udi ulombola bantu bende mu tshikondo tshia ku nshikidilu etshi. Udi ubambuluisha bua kuyisha bulelela pa buloba bujima, ne anu bobu nkayabu ke badi benza mudimu eu. Malu adi Yehowa ubalongesha adi kabidi abambuluisha bua kuikala mu buobumue ne kuikala  ne disanka. Yehowa wakaleja bualu ebu pakambaye ne: ‘Tangilayi, bantu banyi nebimbe misambu bua disanka dia mu mitshima yabu.’​—Yeshaya 65:14.

12. Mmunyi mutudi mua kumona bilema bia bakuabu?

¹² Tudi ne disanka dia bungi bualu Yehowa udi utulombola ne utuambuluisha bua kuenza malu mimpe a bungi. Kadi, bantu ba mu bulongolodi bua Satana kabena ne disanka ne ditekemena dilelela bua matuku atshilualua to. Tuetu bumbuke kudi Yehowa ne kudi bantu bende anu bualu muntu kampanda mu tshisumbu mmuenze anyi mmuambe bualu kampanda budi kabuyi buimpe, tudi tuleja mutudi katuyi ne meji ne tudi tuenza bibi. Kadi tudi ne bua kushala ne lulamatu kudi Yehowa ne kulonda buludiki buende. Tudi kabidi ne bua kukeba bua kumanya mutudi mua kumona bilema bia bakuabu ne tshitudi mua kuenza bua bilema ebi.

13, 14. a) Bua tshinyi tudi ne bua kuikala ne lutulu kudi bana betu? b) Mmulayi kayi utudi ne bua kuvuluka?

¹³ Ntshinyi tshiudi ne bua kuenza bikala muena Kristo nebe muambe anyi muenze bualu kampanda budi bukunyingalaje? Bible udi utubela ne: ‘Kukuatshi tshiji mu mutshima webe lukasa bualu bua tshiji tshidi tshilala mu tshiadi tshia bapote.’ (Muambi 7:9) Tuetu bonso tudi bapange bupuangane ne tutu tuenza bilema. Nunku katuena mua kutekemena bua bana betu bikala bamba ne benza malu mimpe misangu yonso to. Ki mbimpe bua tuetu kutungunuka ne kuela meji bua bilema biabu to. Tuetu benze nanku, katuakuikala kabidi ne disanka patudi tuenzela Yehowa mudimu to. Bualu bubi menemene budi ne: ditabuja dietu kudi Yehowa neditekete ne tudi mua kumbuka mu bulongolodi buende. Pashishe, katuakuenzela Yehowa mudimu anyi kutekemena bua kubuela mu bulongolodi buende bupiabupia to.

¹⁴ Nunku, ntshinyi tshiakuambuluisha bua kushala ne disanka paudi wenzela Yehowa mudimu nansha padi bantu bakuabu benza malu adi akunyingalaja? Vuluka misangu yonso mulayi udi ukolesha eu: ‘Monayi, ndi mfuka diulu dipiadipia ne buloba bupiabupia; malu a diambedi kaena avulukibua, ne malu aa kaena abuela mu mitshima kabidi.’ (Yeshaya 65:17; 2 Petelo 3:13) Yehowa neakupeteshe mabenesha aa wewe mushale ne lulamatu kudiye.

15. Ntshinyi tshivua Yezu muambe bua tuetu kuenza padi bantu bakuabu batunyingalaja?

¹⁵ Bushuwa, katuena banji kubuela mu bulongolodi bupiabupia to. Nunku, muntu yeye mutunyingalaje, tudi ne bua kuelangana meji bua malu adi Yehowa musue bua tuetu kuenza. Tshilejilu, Yezu wakamba ne: “Binuikala nufuila bantu luse bua bilema biabu, Tatu wenu wa mu diulu neanufuile penu luse; kadi binuikala kanuyi nufuila bantu luse bua bilema biabu, Tatu wenu kakunufuila penu luse bua bienu bilema to.” Pavua Petelo muebeje Yezu bua kumanya ni tudi mua kufuila muntu  luse “too ne ku misangu muanda mutekete,” Yezu wakamuambila ne: “Ndi nkuambila ne: ki nganu misangu muanda mutekete to, kadi mmisangu makumi muanda mutekete ne muanda mutekete.” Yezu mmutulongeshe ne: tudi ne bua kuitaba bua kufuilangana luse misangu yonso.​—Matayi 6:14, 15; 18:21, 22.

16. Ntshilejilu kayi tshimpe tshidi Jozefe mutushile?

¹⁶ Tshilejilu tshia Jozefe tshidi tshituleja tshitudi mua kuenza padi bantu batuela mâyi ku makasa. Yakoba uvua mulele ne Lakela anu bana babidi, Jozefe ne muakunyende wa balume. Yakoba uvua ne bana bakuabu ba balume dikumi, kadi uvua munange Jozefe bikole kupita bana bende bakuabu. Bualu ebu buakasaka bana bende aba bua kukina Jozefe bikole. Bu muvuabu bamukine bikole, bakafika too ne ku dimupanyisha bu mupika, kuyabu nende mu Ejipitu. Panyima pa bidimu bia bungi, mukalenge wa Ejipitu wakavuija Jozefe tshindondi tshiende ne muntu uvua ne dîyi mu ditunga bualu uvua wanyisha bikole muvua Jozefe wenza mudimu. Pashishe, bana babu ne Jozefe bakalua mu Ejipitu bua kusumba biakudia bu muvuaku tshiole tshia nzala. Pakamonabu Jozefe, kabakamumanya to, kadi yeye uvua mubamanye. Nansha muvuabu bamuenzele malu mabi, kakabanyoka to. Kadi wakabateta bua kumanya ni bavua bulelela bashintuluke. Pavua Jozefe mujingulule ne: bavua bashintuluke, wakabaleja ne: uvua muanabu. Pashishe kubakolesha ne kubambilaye ne: “Kanutshinyi; nennudishe ne bana benu bakese.”​—Genese 50:21.

17. Ntshinyi tshiudi ne bua kuenza padi muntu ukunyingalaja?

¹⁷ Vuluka ne: bu mutudi tuetu bonso tuenza bilema, udi pebe mua kuenzela bakuabu malu mabi. Nunku, wewe mujingulule ne: udi munyingalaje muntu, tumikila mibelu ya mu Bible. Umulombe bua akufuile luse ne udienzeje bua kukeba nende ditalala. (Bala Matayi 5:23, 24.) Tutu tusanka patu bakuabu batufuila luse. Nunku tudi ne bua kubenzela bia muomumue. Kolosayi 3:13 udi utuambila ne: “Nutungunuke ne kulejangana lutulu, nufuilangana luse ne muoyo mujima nansha muntu yeye muikale tshilumbu ne mukuabu. Anu bu mudi Yehowa munufuile luse ne muoyo mujima, nudi ne bua kuenza penu nanku.” Tuetu banange bushuwa bana betu, katuakutungunuka ne kubafikila munda bua bualu kampanda buvuabu benze to. (1 Kolinto 13:5) Tuetu bafuile bakuabu luse, Yehowa neatufuile petu luse. Nunku padi bantu bakuabu benza bilema, tudi mua kubafuila luse anu mudi Tatu wetu Yehowa utufuila luse.​—Bala Musambu wa 103:12-14.