BAVUA babikila mikanda ayi ne: kasumbu ka muanza nkongolo. Bimfuanyi bivuamu biakakoka ntema yanyi bikole. Ke bualu kayi, katshia ku buana buanyi, ngakapeta dijinga dikole dia malu a mu Bible a buena avua mu mikanda ayi.

Pavua eku Mvita mibidi ya buloba bujima yamba kukuata ditunga dia Inde, nsombelu wanyi wakatuadija kunyanguka. Baledi banyi bakabulukangana, pashishe kushipabu dibaka. Tshivua mumvue bua tshinyi baledi banyi bamvua munange bavua mua kulekelangana to. Ngakadiumvua mulekelela, malu onso mantonde. Bu muvuabu bandele nkayanyi kuetu, ngakadimona tshiyi ne muntu wa kunsamba ne kunkolesha, malu amvua njinga bikole tshikondo atshi.

Meme ne maman tuakasombela mu tshimenga tshia Karachi. Dimue dituku, Fred Hardaker, doktere ukavua mukulakaje ne muikale Ntemu wa Yehowa, wakalua kutuyisha. Uvua wa mu tshitendelelu tshimue ne misionere uvua mutupeshe mikanda itukadi bakuile. Wakalomba maman bua kulonga nende Bible. Maman kubenga, kadi kumuambilaye ne: bivua mua kunsankisha meme. Meme kutuadija kulonga ne muanetu Hardaker lumingu luakalonda.

 Panyima pa mbingu mikese, ngakatuadija kubuela mu bisangilu bivua bienzekela mu lupitadi lua muanetu Hardaker. Bantemu bakulakaje batue ku 12 bavua benzelamu bisangilu. Bakankolesha, kuntabalelabu anu bu muanabu mulela. Ndi mvuluka muvuabu bangenzela malu amvua njinga tshikondo atshi, bavua basomba nanyi, bapuekelela bua kuyukila nanyi anu bu balunda ba pa muoyo.

Abidi mmale asatu mmîpi, muanetu Hardaker kundombaye bua mmufile mu buambi. Wakandongesha mua kutemesha tshisanji tshia fono bua tuikale tuelela bantu matadi a miyuki mîpi ya malu a mu Bible. Imue miyuki ivua itonda bamue bantu bualu kabavua banange tshivuayi yamba to. Kadi mvua ne disanka dia bungi dia kuyisha bantu. Mvua munange bulelela bua mu Bible bikole, ne mvua musue kubuyisha bantu bakuabu.

Bu muvua basalayi bena Japon benda basemena pabuipi ne ditunga dia Inde, bakokeshi bena Angleterre bakatatshisha Bantemu ba Yehowa bikole. Ndekelu wa bionso, mu ngondo wa 7/1943, ngakapeta panyi lutatu alu. Mutangidi wa tulasa tuetu uvua mulombodi wa tshitendelelu tshia Anglikane wakangipata mu kalasa bualu uvua ungangata bu tshilejilu tshibi. Wakambila maman ne: mvua nyanga balongi bakuabu bualu mvua ndisangisha ne Bantemu ba Yehowa. Biakatonda maman bikole, yeye kunkandika bua kudisangisha ne Bantemu. Panyima pa matuku, wakantuma kudi papa mu tshimenga tshia Peshawar tshivua mu kilometre 1 370 lua ku nord. Malanda anyi ne Yehowa akateketa bualu tshivua mpeta biakudia bia mu nyuma ne mbuela mu bisangilu to.

Mu 1947, ngakapingana mu tshimenga tshia Karachi bua kukeba mudimu. Ngakaya kutangila doktere Hardaker ku lupitadi luende. Wakangakidila ne disanka dia bungi.

Bu muvuaye wela meji ne: mvua nsama, wakangebeja ne: “Tshidi tshikutatshisha ntshinyi?”

Meme kumuambila ne: “Tshiena ne disama dia ku mubidi to, ndi ne disama dia mu nyuma, ndi musue kulonga Bible.”

Yeye kungebeja ne: “Udi musue tutuadije kulonga dîba kayi?”

Ke meme ne: “Nansha mpindieu kuoku mushindu.”

Tuakapitshisha tshikondo tshimpe dilolo adi, tulonga Bible. Ngakadiumvua bimpe bualu mvua kabidi mupetulule bantu ba Yehowa. Maman wakenza muende muonso bua kunkandika bua kutantshilangana ne Bantemu; kadi musangu eu, mvua mudisuike bua kuenzela Yehowa mudimu. Mu dia 31/8/1947, ngakabatijibua mu mâyi bua kuleja mumvua mudilambule kudi Yehowa. Matuku makese pashishe, pamvua ne bidimu 17, ngakangata bumpanda-njila bua pa tshibidilu.

Mu tshidimu tshianyi tshia kumpala tshia bumpanda-njila, bakantuma mu Quetta, tshitudilu tshia kale tshia basalayi bena Angleterre. Mu 1947, bakakosolola ditunga dia Inde, kuenzabu Inde ne Pakistan. * Bualu ebu buakafikisha ku mvita pankatshi pa bitendelelu, kukebeshabi tshimue tshia ku bimuangi binene bikadi bienzeke pa buloba. Bantu batue ku miliyo 14 bakamuangala. Bamizilma ba mu Inde bakaya mu Pakistan, bena Hindu ne Basikh kuyabu mu Inde. Mu ndululu amu, ngakabanda kawulu kapate ne bantu mu Karachi, meme kulembelela ku mulonda wa pambelu bibi bia dikema tshitupa tshinene tshia njila too ne ku Quetta.

Mu Quetta, ngakapetangana ne George Singh, mpanda-njila wa pa buende uvua ne bidimu 20 ne bia mu njila. Yeye kumpesha dikalu dia kale bua ngikale mbanda (anyi mpusa) mu teritware wa mikuna ya bungi au. Misangu ya bungi, mvua nyisha nkayanyi. Mu ngondo isambombo, mvua mupete balongi ba Bible 17, bamue bakalua Bantemu. Umue wa kudibu, diende Sadiq Masih, uvua mfumu wa basalayi, wakatuambuluisha ne George bua kukudimuna imue mikanda yetu mu tshiena Urdu, muakulu munene wa mu Pakistan. Ndekelu wa bionso, Sadiq wakalua muambi wa lumu luimpe wa tshisumi.

Pakapita matuku, ngakapingana ku Karachi, meme kuenza mudimu pamue ne Henry Finch ne Harry Forrest, bamisionere batshivua bafuminaku mu Kalasa ka Gilada. Bakandongesha mudimu wa Nzambi bimpe be! Umue musangu, tuakenza luendu ne muanetu Finch bua kuyisha ku nord kua Pakistan. Patuakafika kuinshi kua mikuna mile, tuakapeta bena musoko bavua bakula tshiena Urdu bavua basue kumanya bulelela bua mu Bible. Pakapita bidimu bibidi, ngakabuela mu Kalasa ka Gilada. Ngakapingana mu Pakistan mumvua ngenza mudimu wa  butangidi bua tshijengu bimue bikondo. Mvua musombele ku nzubu wa bamisionere mu tshimenga tshia Lahore ne bamisionere bakuabu ba balume basatu.

Bia dibungama, mu 1954, bamisionere bavua mu Lahore kabatshivua bapetangana bimpe to, ke biro bietu kubashintulula. Bu mumvua tshiyi muenze malu ne meji, mudibueje mu matandu abu, bakampesha mibelu mikole. Ngakadiumvua bibi bia dikema, meme kuela meji ne: mvua mupangile kukumbaja mudimu wanyi. Meme kupingana ku Karachi, pashishe meme kuya mu Londres mu Angleterre, ne meji a kuangatulula luendu lupialupia mu mudimu wa Nzambi.

Tshisumbu tshituvua tubuela tshivua ne bena mu dîku dia Betele wa mu Londres ba bungi. Muanetu Pryce Hughes uvua musadidi wa biro bia filiale wakangela mu diboko. Dimue dituku, wakandondela muvuabu bamupeshe mibelu mikole kudi Joseph Rutherford uvua ulombola mudimu wa diyisha pa buloba bujima. Pavua muanetu Hughes ujinga kudibingisha, muanetu Rutherford wakamutandisha bikole. Pavua muanetu Hughes useka bua bualu abu, biakankemesha bikole. Wakamba ne: ku ntuadijilu bualu abu buvua bumutonde. Kadi pakapita matuku, wakamona ne: bivua bikengela bamupeshe mibelu mikole ayi, kumonaye kabidi ne: mibelu ayi ivua ileja muvua Yehowa mumunange. (Eb. 12:6) Mêyi ende akandenga bikole, kungambuluishawu bua ngenzele kabidi Yehowa mudimu ne disanka.

Bu mu tshikondo atshi, maman wakalua mu Londres, kuitabaye bua kulonga Bible ne muanetu John Barr wakalua muena mu Kasumbu kaludiki. Maman wakaya kumpala ne lukasa, kubatijibuaye mu 1957. Panyima pa matuku, bakangambila ne: papa ukavua pende ulonga ne Bantemu ba Yehowa kumpala kua yeye kufua.

Mu 1958, ngakasela Lene, muanetu wa bakaji wa mu Danemark uvua mulue kusombela mu Londres. Tshidimu tshiakalonda, tuakalela muanetu wa bakaji wa kumpala, diende Jane; pashishe tuakalela bana bakuabu banayi. Ngakapeta kabidi midimu mu tshisumbu tshia Fulham. Kadi mu kupita kua matuku, Lene wakasama, kutulombabi bua tumuangale tuye muaba wa luya. Nunku mu 1967, tuakaya kusombela mu Adélaïde mu Australie.

Mu tshisumbu tshietu tshia mu Adélaïde muvua bena Kristo bela manyi 12. Bavua bayisha ne tshisumi. Mu matuku makese, tuakalongolola programe muimpe wa malu a mu nyuma.

Mu 1979, tuakalela Daniel, muanetu muitanu. Uvua muledibue ne disama dibi dia trisomie, * dia lungenyi  lushadile; kakuvua ditekemena dia ne: uvua mua kushala ne muoyo matuku a bungi to. Too ne mpindieu, ndi ndienzeja bua kumvuija kanyinganyinga katuvua naku. Tuvua tutamba kumutabalela yeye bikole, kadi katuvua tulengulula bana betu bakuabu banayi to. Kuvua misangu ivua mubidi wa Daniel ulua wa dikala dia ble bua dipangila oksijene mu mubidi wende dikebesha kudi masoso abidi avua mu dimuma diende dia muoyo, nunku tuvua benzejibue bua kuya nende lukasa ku lupitadi. Nansha muvuaye usama, uvua ne meji a bungi ne uvua munange bantu. Uvua kabidi munange Yehowa bikole. Patuvua tusambila dîku dijima bua kudia, uvua uvunga tubianza tuende, winyika mutu, ne wamba ne muoyo mujima ne: “Amen!” Kavua mua kudia kabayi basambile to.

Pakakumbaja Daniel bidimu 4, wakapeta kansere ka mu mashi. Meme ne Lene tuakatshioka ku mubidi ne mu lungenyi. Ngakadiumvua bu nkavua mpeta disama dia mutu. Kadi dimue dituku patuvua batekete bikole mu mikolo, muanetu Neville Bromwich uvua mutangidi wetu wa tshijengu wakalua kuetu. Butuku abu, wakatuela mu tshitupa ne binsonji kuîsu, tuetu bonso kudila. Mêyi mimpe a luse akatuambilaye akatukolesha mu mushindu wa dikema. Wakatushiya bu munda nkulu. Katantshi aka, Daniel wetu kufua. Lufu luende luvua bualu buakatamba kututonda bikole mu nsombelu wetu. Nansha nanku, tuakatantamena kanyinganyinga aku batuishibue ne: kakuena tshintu, nansha lufu, tshidi mua kupandulula Daniel ku dinanga dia Yehowa to. (Lomo 8:38, 39) Tudi ne dijinga dikole dia kumumona kabidi dîba diamubishabu mu bulongolodi bupiabupia bua Nzambi!​—Yone 5:28, 29.

Lelu, ndi anu mukulu mu tshisumbu nansha mundi mupete njiwu ya ditayika ne dipatakana dia tujilu tua mu bongo misangu ibidi. Malu onso adi mamfikile aa mmangambuluishe bua kuditeka pa muaba wa bakuabu ne kubumvuila luse, nangananga padibu batata. Ntu ndienzeja bua kubenga kubamona bibi. Pamutu pa kuenza nanku, ntu ndiebeja ne: ‘Bua nsombelu idi mibafikile eyi, mmunyi mudibu badiumvua ne bela meji? Mmunyi mundi mua kubaleja ne: bidi panyi bintonda? Mmunyi mundi mua kubakankamija bua benze disua dia Yehowa?’ Ntu bushuwa munange kuenza makumbula a bulami mu tshisumbu tshietu! Mu bulelela, pantu nsamba bana betu ne mbakankamija ne Dîyi dia Nzambi, ntu ngumvua anu bu ne: ndi ndisamba ne ndikankamija meme muine.

Ndi ndiumvua anu bu mufundi wa misambu wakamba ne: ‘Pavua tunyinganyinga tumpite bukole, [Yehowa] wakansamba, kumpeshaye ditalala.’ (Mis. 94:19) Wakankuatshisha pavua dîku dianyi dituilangana ne ntatu, pavuabu banduisha bua bulelela, pamvua mutekeshibue mu mikolo, ne pamvua ne tunyinganyinga. Bushuwa, Yehowa utu anu Tatu wanyi mulelela.