Solomo, tatuende wa Lehabama, wakakokesha Isalele bidimu 40. (1 Bak. 11:42) Wakafua mu 997 kumpala kua Yezu. Pashishe Lehabama wakaya ku Shekeme ku nord kua Yelushalema bua kumuelabu manyi bua kulua mukalenge. (2 Kul. 10:1) Uvua mua kuikala mumvue buôwa bua kupingana Solomo uvua mukalenge wa meji a bungi mu nkuasa anyi? Lehabama ukavua pa kuleja ni uvua ne meji a mua kujikija bilumbu binene.

Lehabama uvua musangane bilumbu bia bungi mu Isalele pavuaye mudie bukalenge. Pakapita matuku, baleji mpala ba bena Isalele bakalua kudiye, kumulejabu dijinga diabu patoke bamba ne: “Tatuebe uvua muvuije mutshi wetu wa tshikokedi bujitu. Kadi wewe mutekeshe mudimu mukole wa tatuebe ne mupepeje mutshi wa tshikokedi wa bujitu uvuaye mututenteke, netukuenzele mudimu.”​—2 Kul. 10:3, 4.

Lehabama kuimanaye mukolo mule ne muîpi! Bu yeye muenze tshivua bantu balomba, yeye ne bena mu dîku diende ne bena mudimu bende bavua mua kudipangisha bimue bintu bia mushinga bivuabu bapeta ne kukepesha milambu ivua bantu ne bua kufila. Ku lukuabu luseke, bu yeye mubenge tshia bantu, bavua mua kumutombokela. Uvua mua kuenza tshinyi? Wakanji kulomba lungenyi kudi bakulumpe bavua bapesha Solomo mibelu. Pashishe kulombaye bansonga ba mulongo wende mibelu. Wakalonda mibelu yabu, kuangataye dipangadika dia kukengesha bena Isalele. Kubandamunaye ne: “Nemvuije mutshi wenu wa tshikokedi bujitu, ne nensakidilaku bujitu bukuabu. Tatuanyi uvua mununyoke ne mfimbu ya tshianana, kadi meme nennunyoke ne mfimbu ya tubulu tubulu.”​—2 Kul. 10:6-14.

Bualu ebu budi butulongesha tshinyi? Kakuyi mpata, kuteleja bakulumpe badi bakole mu nyuma kutu kupetesha muntu meji. Bu mukadibu bamonamone malu, badi mua kudianjila kumona kudi dipangadika kampanda mua kutufikisha, bobu kutupesha mibelu mimpe.​—Yobo 12:12.

Bu muvua bantu batombokele Lehabama, wakasangisha basalayi bende bua kuya kubela mvita. Kadi Yehowa wakamukanda ku diambuluisha dia muprofete Shemaya, wamba ne: “Kanuena ne bua kubanda bua kuluangana ne bana benu bena Isalele to. Yonso wa kunudi udi ne bua kupingana kuende, bualu meme ke udi muenze bua bualu ebu buenzeke nanku.”​—1 Bak. 12:21-24. *

Bivuaku bipepele bua Lehabama kuteleja Yehowa anyi? Bantu bavua mua kumumona bishi? Uvua mulaye bantu bua kubanyoka ne “mfimbu ya tubulu tubulu,” kadi padibu bamutombokela, upanga mua kuenza bualu nansha bumue! (Fuanyikija ne 2 Kulondolola 13:7.) Nansha nanku, mukalenge ne basalayi bende “bakatumikila dîyi dia Yehowa, bobu kupingana ku mabu anu muvua Yehowa mubambile.”

Bualu ebu budi butulongesha tshinyi? Mbimpe kutumikila Nzambi nansha bantu bakuabu mua kutuseka. Patudi tutumikila Nzambi, udi utuanyisha ne utubenesha.​—Dut. 28:2.

Nzambi wakabenesha Lehabama bua muvuaye mumutumikile anyi? Lehabama wakatumikila Nzambi, kubengaye kuela tshisamba tshipiatshipia atshi mvita, kadi wakaditua mu dibaka bimenga mu Yuda ne mu Benyamina muvuaye ukokesha. Wakakolesha bimenga bia bungi “bikole menemene.” (2 Kul. 11:5-12) Bualu bua mushinga budi ne: wakatumikila mikenji ya Yehowa bua tshikondo kampanda. Bu muvua bukalenge bua Isalele bua bisa 10 buvua ku bukokeshi bua Yalobama budine mu ditendelela dia mpingu, bantu ba bungi ‘bakatua Lehabama . . . nyama ku mikolo,’ baya mu Yelushalema bua kutendelela Nzambi mulelela. (2 Kul. 11:16, 17) Nunku, bukalenge bua Lehabama buakashindama bua ditumikila diende.

Kadi pakashindama bukalenge bua Lehabama, wakenza bualu bukuabu bua dikema. Wakalekela mikenji ya Yehowa, kutuadijaye kutendelela nzambi ya mafi! Bua tshinyi? Bavua mua kuikala bamusake kudi mamuende muena Amona anyi? (1 Bak. 14:21) Katuena bamanye to. Tshitudi bamanye ntshia se: tshisamba tshijima tshiakamuidikija. Ke Yehowa kulekela mukalenge Shishaka wa Ejipitu ukuata bimenga bia bungi bia mu Yudaya, nansha muvua Lehabama mubikoleshe!​—1 Bak. 14:22-24; 2 Kul. 12:1-4.

Malu akakola pakafika Shishaka ku Yelushalema, muaba uvua Lehabama ukokeshila. Ke muprofete Shemaya kumanyisha Lehabama ne bakokeshi bende mukenji wa kudi Nzambi wa ne: “Nudi bandekele, ke bualu kayi meme panyi ndi munulekele mu tshianza tshia Shishaka.” Lehabama wakenza tshinyi? Bible udi wamba ne: “Ke bakokeshi ba mu Isalele ne mukalenge kudipuekeshabu, kuambabu ne: ‘Yehowa mmuakane.’” Nunku, Yehowa wakasungila Lehabama ne Yelushalema ku kabutu.​—2 Kul. 12:5-7, 12.

Pashishe, Lehabama wakatungunuka ne kukokesha bukalenge bua ku sud. Kumpala kua lufu luende, wakabanyina bana bende bakuabu ba balume bintu ne tshianza tshilekelela, pamuapa bua kabalu kutombokela muanabu Abiya uvua ne bua kumupingana mu nkuasa. (2 Kul. 11:21-23) Mu bualu ebu, Lehabama wakenza malu ne meji kupita kumpala.

Nansha muvua Lehabama mudienzeje bua kuenza amue malu mimpe, Nzambi kakamuanyisha to. Bible udi wakula bua matuku onso avuaye mukalenge, wamba ne: “Yeye wakenza malu mabi.” Bua tshinyi? Bualu “kavua mudisuike mu muoyo wende bua kukeba Yehowa to.”​—2 Kul. 12:14.

Anji elabi meji, kuvua misangu ivua Lehabama mutumikile Nzambi. Wakenzela tshisamba tshia Yehowa amue malu mimpe. Kadi kavua mudie malanda makole ne Yehowa, ne kavua ne dijinga dikole dia kumusankisha to. Ke bua tshinyi wakaditua mu dienza malu mabi ne mu ditendelela mpingu. Udi mua kudiebeja ne: ‘Tshivua tshisake Lehabama bua kuitaba mubelu wa Nzambi ndinyingalala dia mu muoyo wende ne dijinga dia kusankisha Nzambi anyi bavua bamuenzeje kudi bantu bakuabu?’ (2 Kul. 11:3, 4; 12:6) Panyima pa matuku, wakatuadija kabidi kuenza malu mabi. Uvua bushuwa mushilangane ne kakuende, mukalenge Davidi! Eyowa, Davidi uvua muenze bilema, kadi uvua munange  Yehowa mu nsombelu wende mujima, mulamate ntendelelu mulelela, ne muleje dinyingalala dilelela bua mpekatu yende.​—1 Bak. 14:8; Mis. 51:1, 17; 63:1.

Bushuwa, tshilejilu tshia Lehabama tshidi ne bua kutulongesha. Padi bantu bapetesha bena mu mêku abu bidibu nabi dijinga ne benzela bantu bakuabu malu mimpe, badi benza bimpe. Kadi bua Nzambi kutuanyisha, tudi ne bua kuanji kutua ntendelelu mulelela mpanda ne kushala bamulamate.

Tudi mua kuenza nunku tuetu batungunuke ne kunanga Yehowa bikole. Anu mututu tuela nkunyi ku kapia bua kikale anu katema, tudi ne bua kulonga Dîyi dia Nzambi pa tshibidilu, kuelangana meji bua bitudi tubala, ne kunanukila mu disambila bua tutungunuke anu ne kunanga Nzambi. (Mis. 1:2; Lomo 12:12) Dinanga ditudi banange nadi Yehowa nedikoleshe dijinga dietu dia kumusankisha mu malu onso atudi tuenza. Nunku tuetu benze mpekatu, dinanga adi neditusake bua kunyingalala ne muoyo mujima. Dîba adi, katuakufuana Lehabama to, kadi netushale balamate ntendelelu mulelela.​—Yuda 20, 21.