TSHIENA-BUALU TSHIA KULONGA 23
“Dîna diebe dijidibue”
“Yehowa wanyi, dîna diebe didi dishalaku kashidi.”—MIS. 135:13.
MUSAMBU WA 10 Tumbishayi Yehowa Nzambi wetu!
KADIOSHA *
1-2. Mmalu kayi atu akoka Bantemu ba Yehowa ntema?
LELU, tudi kumpala kua bilumbu binene, tshia bumfumu bua Yehowa ne tshia kubingisha kua dîna diende. Bu mutudi Bantemu bende, tutu basue kuakula bua malu aa bualu atu atukoka ntema. Bumfumu bua Nzambi ne dibingishibua dia dîna diende bidi bipetangana peshi mbishilangane? Bidi bipetangana.
2 Tuetu bonso tudi bafike ku dimona ne: badi ne bua kumbusha malu onso adibu babande nawu dîna dia Nzambi. Tudi balonge kabidi ne: bidi bikengela bua muntu yonso amone ne: bumfumu bua Yehowa anyi mushindu wende wa kukokesha mmuimpe kupita mikuabu yonso. Nanku malu onso abidi aa adi ne mushinga wa bungi.
3. Dîna dia Yehowa didi dikongoloja tshinyi?
3 Mu bulelela, dîna dia Yehowa didi dikongoloja bualu buonso budi butangila Nzambi, kusakidila ne mushindu wende wa kukokesha. Nanku tuetu tuamba ne: kumbusha malu onso adibu babanda nawu dîna dia Yehowa ntshilumbu tshitambe bunene, tudi tusua kuamba kabidi ne: mushindu udi Yehowa ukokesha udi ne bua kulejibua ne: wowu ke udi muimpe kupita mikuabu yonso. Dîna dia Yehowa ne mushindu wende wa kukokesha bua mudiye Mukalenge Mutambe Bunene wa bukole buonso bidi anu bu mukaba ne tshilamba.—Tangila kazubu ka “ Malu adi atangila tshilumbu tshinene.”
4. Ntshinyi tshidi Misambu 135:13 wamba bua dîna dia Nzambi? Nnkonko kayi ituandamuna mu tshiena-bualu etshi?
4 Dîna dia Yehowa didi wadi mushindu. (Bala Misambu 135:13.) Didi ne mushinga wa bungi. Tshidi tshidivuija ne mushinga nunku ntshinyi? Mmunyi muvuabu badishiminyine malu bua musangu wa kumpala? Nzambi udi udijidila mushindu kayi? Ntshinyi tshitudi mua kuenza petu bua dijidibue? Tuanji tuandamunayi nkonko eyi.
MUSHINGA UDI NAWU DÎNA
5. Ndukonko kayi ludi bamue mua kudiela padibu bumvua ne: dîna dia Nzambi didi ne bua kujidibua?
5 “Dîna diebe dijidibue.” (Mat. 6:9) Ke bualu bua kumpala bua ku malu manene avua Yezu muambe bua kutela mu disambila. Kadi Yezu uvua usua kuamba tshinyi? Kujidila tshintu kudi kumvuija kutshivuija tshinsantu, tshitoke, anyi tshikezuke. Kadi bamue badi mua kudiebeja ne: ‘Dîna dia Yehowa kaditu kuonso eku dinsantu, ditoke, ne dikesuke anyi?’ Bua kuandamuna, bidi bikengela tuele meji a malu atu dîna dietu edi dikongoloja.
6. Ntshinyi tshidi tshivuija dîna tshintu tshia mushinga?
6 Dîna kadiena anu nsangilu wa maleta adibu bafunde pa dibeji anyi bamba mukana to. Mona tshidi Bible wamba: “Mbimpe kusungula dîna dimpe pamutu pa bubanji bua bungi.” (Nsu. 22:1; Muam. 7:1) Bua tshinyi dîna didi ne mushinga nunku? Bualu didi dileja lumu lua muenadi anyi tshidi bakuabu bamona bua muenadi. Nanku tshidi ne bualu ki mmushindu udi dîna dimueneka pa dibeji anyi nansha mushindu udibu badiamba mukana to; tshidi ne bualu menemene ntshidi tshiluila bantu mu lungenyi padibu bamona dîna adi anyi badiumvua.
7. Mmunyi mudi bantu baluishe dîna dia Nzambi?
7 Padi bantu bashiminyina Yehowa malu, tshidibu baluisha ndumu luende. Padibu baluisha lumu luende, badi banyanga dîna diende. Bakabanga kuluisha dîna dia Nzambi anyi lumu luende bua musangu wa kumpala mu budimi bua Edene. Mona malu adi buluishi bua dîna diende ebu butulongesha.
MUAKASHIMINYINABU DÎNA MALU BUA MUSANGU WA KUMPALA
8. Ntshinyi tshivua Adama ne Eva bamanye? Nnkonko kayi idi ijuka?
8 Adama ne Eva bavua bamanye dîna dia Yehowa, bamanye kabidi malu a mushinga a bungi a muene dîna adi. Bavua bamanye ne: yeye ke uvua mubafuke, mubapeshe muoyo, mubapeshe Mparadizu muimpe wa kusombela, ne mupeshe yonso wa kudibu muene dibaka mupuangane. (Gen. 1:26-28; 2:18) Kadi bavuaku ne bua kushala benza mudimu ne meji abu mapuangane bua kuelangana meji bua bintu bionso bivua Yehowa mubenzele anyi? Bavuaku ne bua kutungunuka ne kunanga Yehowa bikole ne kumuleja dianyisha dia bungi anyi? Nkonko eyi yakapeta mandamuna pakabateta muluishi wa Nzambi.
9. Bilondeshile Genese 2:16, 17 ne 3:1-5, ntshinyi tshivua Nzambi muambile Adama ne Eva? Mmunyi muvua Satana mukonyangaje tshivuaye muambe?
9 Bala Genese 2:16, 17 ne 3:1-5. Pavua Satana muakuile mukana mua nyoka, wakebeja Eva ne: “Nzambi uvua muambe bulelela ne: kanuena ne bua kudia mitshi yonso idi mu budimi ebu anyi?” Lukonko alu luvua ne tubidi tua ndumbi bualu luakabanga kunyanga Eva lungenyi. Nzambi yeye uvua mubambile bua badie mitshi yonso, pa kumbusha anu umue. Adama ne Eva bavua ne mitshi mishilashilangane mipite bungi ivuabu mua kudia. (Gen. 2:9) Bulelela, Yehowa utu upeshangana bintu ne tshianza tshilekelela. Kadi Nzambi uvua mukandike Adama ne Eva bua kudia bimuma bia ku mutshi anu umue tshianana uvuaye mubambile. Nunku lukonko lua Satana luvua lukonyangaja tshivua Nzambi muambe. Satana uvua muenze bua bimueneke bu ne: Nzambi uvua ne minu mikole. Eva uvua mua kuikala mudiebeje ne: ‘Nzambi eu udi mua kuikala mutusokoke tshintu anyi?’
10. Mmunyi muvua Satana mushiminyine dîna dia Nzambi malu patoke? Ntshinyi tshiakalua kuenzeka?
10 Too ne dîba adi, Eva utshivua umona Yehowa bu Mukokeshi wende. Wakandamuna Satana wambulula bualu buvua Nzambi mumuambile mumutokeshile. Wakamba kabidi ne: kabavua mua kulenga nansha mutshi au to. Uvua mumanye tshivua Nzambi mubambile tshia ne: bobu babenge kutumikila, bavua ne bua kufua. Kadi Satana kumuandamuna ne: “Kanuena nufua bulelela to.” (Gen. 3:2-4) Satana katshivua kabidi ushiminyina Nzambi malu muinshimuinshi to. Ukavua mpindieu ushiminyina dîna dia Nzambi malu patoke, wambila Eva ne: Yehowa uvua muena dishima. Pakenza Satana nunku, wakalua Diabolo, anyi mushiminyinyanganyi. Eva wakadingibua bibi be! Wakitaba tshia Satana. (1 Tim. 2:14) Wakamueyemena yeye pamutu pa kueyemena Yehowa. Bualu abu buakangatshisha Eva dipangadika dibi menemene. Wakapangadija bua kubenga kutumikila Yehowa. Wakabanga kudia tshimuma tshivua Yehowa mukandike. Pashishe kuluaye kupesha Adama.—Gen. 3:6.
11. Ntshinyi tshivua baledi betu ba kumpala ne bua kuikala benze? Ntshinyi tshivuabu bapangile bua kuenza?
11 Anji elabi meji bua tshivua Eva ne bua kuikala muambile Satana. Fuanyikijabi ne: uvua mumuambile ne: “Wewe tshiena mukumanye to, kadi ndi mumanye Yehowa Tatu wanyi; ndi mumunange ne mmueyemena. Mmutupeshe ne Adama bintu bionso bitudi nabi. Wakupeshi muoyo mukole wa kumuamba bibi nanku nganyi? Ale, nkatukile apa!” Anji elabi meji disanka divua Yehowa mua kuikala nadi bu yeye mumvue mêyi a kudi muanende wa bakaji udi mumunange a mushindu eu adi aleja mudiye mumulamate! (Nsu. 27:11) Eva kavua munange Yehowa ne dinanga dia lulamatu to; nansha Adama pende kavua mulombodibue kudi ngikadilu au to. Bu muvua Adama ne Eva kabatshiyi ne dinanga edi, bakapangila bua kuakuila dîna diende kudi mushiminyinyanganyi au.
12. Mmunyi muvua Satana mukebeshe dielakana mu meji a Eva? Ntshinyi tshivua Adama ne Eva bapangile mua kuenza?
12 Anu mutudi bamone, Satana wakatuadija ne dikebesha dielakana mu meji a Eva. Wakamufikisha ku dipeta dielakana dia tshidi Nzambi muena dîna dia Yehowa. Pashishe Adama ne Eva bakapangila mua kuakuila dîna dia Yehowa ne lumu luende. Bakitaba lungenyi lua Satana lua kutombokela Tatuabu alu bipepele. Satana utshidi anu ne mayelele amue amue au too ne lelu. Udi ushiminyina dîna dia Yehowa malu bua kudiluisha. Bantu batu bitaba mashimi a Satana batu babenga bukokeshi buakane bua Yehowa bipepele.
YEHOWA UDI UJIDILA DÎNA DIENDE
13. Mmunyi mudi Yehezekele 36:23 uleja mukenji munene wa mu Bible?
13 Yehowa mmuitabe bua bamushiminyine malu mushindu eu kayi wenza bualu anyi? Tòo, ki mmuitabe to! Malu adibu bafunde mu Bible mujima adi aleja tshidi Yehowa muenze bua kubingisha dîna diende ku malu avuabu bamubande nawu mu Edene. (Gen. 3:15) Mu bulelela, tudi mua kubumbakaja mukenji munene wa mu Bible mushindu eu: Yehowa udi ujidila dîna diende ne upingajilula buakane ne ditalala pa buloba ku diambuluisha dia Bukalenge budibu balombola kudi Muanende. Mu Bible mudi malu adi atuambuluisha bua kumvua mudi Yehowa ukumbaja malu a dijidila dia dîna diende.—Bala Yehezekele 36:23.
14. Mmunyi mudi tshivua Yehowa muenze bua buntomboji bua mu Edene tshileje ne: mmujidile dîna diende?
14 Satana mmuenze tshionso tshidiye mua kuenza bua kupangisha Yehowa bua kukumbaja tshipatshila tshiende. Kadi mmupangile misangu ne misangu. Bible udi uleja tshidi Yehowa muenze, ne udi ujadika ne: kakuena muntu mukuabu bu Yehowa Nzambi to. Bushuwa, buntomboji bua Satana ne bonso badi ku luseke luende mbunyingalaje Yehowa bikole. (Mis. 78:40) Kadi yeye mmuenze malu ne meji ne lutulu ne buakane mu tshilumbu etshi. Mmuleje kabidi mudiye wa bukole buonso mu mishindu bungi kabuyi kubala. Kupita bionso, dinanga diende didi dimuenekela mu bionso bidiye wenza. (1 Yone 4:8) Yehowa mmuenze mudimu kayi utshioka bua kujidila dîna diende.
Satana wakambila Eva malu a dishima avua atangila Yehowa, ne mu kupita kua bidimu, mmutungunuke ne kushiminyina Nzambi malu (Tangila tshikoso 9-10, 15) *
15. Mmunyi mudi Satana ushiminyina dîna dia Nzambi malu lelu? Ntshinyi tshidi tshienzeka bua bualu abu?
15 Satana utshidi utungunuka ne kushiminyina dîna dia Nzambi malu too ne lelu. Udi ufikisha bantu ku diela mpata ne: Nzambi kena ne bukole, mmutu mubi, kena ne meji, ne kena ne dinanga to. Tshilejilu, udi usua kufikisha bantu ku ditaba ne: Yehowa ki mMufuki to. Padi bantu bitaba ne: Nzambi utuku, Satana udi wenza bua bamone ne: Nzambi mmuntu mubi muena malu makole, ne mikenji yende idi yelangana muonji mu nshingu ne mmibi. Mmulongeshe too ne bantu ne: Yehowa nNzambi wa muoyo mubi udi kayi luse bualu utu wosha bantu mu iferno wa kapia. Padibu bitaba mashimi aa, bidi bipepela bua bobu kuenza bualu bukuabu ebu: kubenga bukokeshi buakane bua Yehowa. Kumpala kua kubutulabu Satana, neatungunuke anu ne kampanye kende ka kushiminyina Nzambi malu, ne neakutete pebe bua kumulekela. Neakumbaje tshidiye ukeba anyi?
TSHIUDI MUA KUENZA PEBE MU TSHILUMBU TSHINENE ETSHI
16. Ntshinyi tshivua Adama ne Eva bapangile mua kuenza tshiudi wewe mua kuenza?
16 Yehowa mmuitabe bua bantu bapange bupuangane bajidile pabu dîna diende. Mu kuamba kuimpe, udi mua kuenza wewe tshivua Adama ne Eva bapangile mua kuenza. Nansha muudi mu bulongolodi budi buule ne bantu badi bashiminyina dîna dia Yehowa malu ne badipenda, udi ne diakalenga dia kuimanyina bulelela ne kubuakuila, uleja bantu ne: Yehowa ngua tshijila, mmuakane, mmuimpe, ne ngua dinanga. (Yesh. 29:23) Udi mua kutua bukokeshi buende mpanda. Bua kubutua mpanda, leja bantu ne: anu buobu ke bukokeshi budi buakane menemene, ne buobu ke buapetesha bifukibua bionso ditalala ne disanka.—Mis. 37:9, 37; 146:5, 6, 10.
17. Mmunyi muvua Yezu mumanyishe dîna dia Tatuende?
17 Patudi tubingisha dîna dia Yehowa, tudi tuidikija Yezu Kristo. (Yone 17:26) Yezu wakamanyisha dîna dia Tatuende pavuaye uditela ne uluila lumu lua Yehowa. Tshilejilu, Bafalese bavua bamba muvua Yehowa muntu mubi, muena malu makole, muikale kule ne bantu, ne kayi luse. Kadi Yezu yeye uvua ubenga bivuabu bamba abi, uleja bantu ne: Tatuende katu ne malu makole to, utu ne lutulu, ngua dinanga, ne utu ufuilangana luse. Uvua widikija ngikadilu ya Tatuende bimpe menemene mu nsombelu wende wa buatshia buila, biambuluisha kabidi bantu bua bamanye Tatuende.—Yone 14:9.
18. Mmunyi mutudi mua kutonkola malongesha a dishima ne malu adibu bashiminyina Yehowa?
18 Anu bu Yezu, tudi mua kuambila bakuabu malu a Yehowa. Dîba adi, nebamanye dîna dia tshijila dia Yehowa ne nebadinemeke. Tudi mua kubalongesha kabidi tubambila mudi Yehowa muikale Nzambi muimpe wa dinanga. Patudi tuenza nanku, tudi tutonkola malongesha a dishima adi atangila Yehowa ne malu adibu bamushiminyina. Tudi petu mua kuidikija Yehowa. Tudi mua kuenza nanku nansha mutudi bapange bupuangane. (Ef. 5:1, 2) Padi mêyi etu ne bienzedi bietu bileja bantu bakuabu tshidi Yehowa menemene, tudi tuenza petu bua dîna diende dijidibue. Tudi tubingisha dîna edi patudi tuambuluisha bantu bua balekele mmuenenu mubi udibu mua kuikala nende bua dîna edi. * Tudi tuleja kabidi ne: bantu bapange bupuangane badi mua kushala ne muoyo mutoke.—Yobo 27:5.
Tudi basue kuambuluisha balongi betu ba Bible bua bafike ku dimona ne: Yehowa nNzambi muimpe wa dinanga (Tangila tshikoso 18-19) *
19. Mmunyi mudi Yeshaya 63:7 utuambuluisha bua kumanya tshipatshila tshinene tshia dilongesha dietu?
19 Mona dilongesha dikuabu dia mushinga ditudi mua kutumikila. Patudi tulongesha bantu bulelela bua mu Bible, tutu tutamba kuimanyina pa bumfumu bua Nzambi, tubaleja ne: Yehowa udi ne bukenji bua kukokesha mu diulu ne pa buloba, ne bidi nanku menemene. Tuetu bambe nanku, tudi bambilamu. Kadi nansha mudibi ne mushinga bua kutamba kulongesha bakuabu mikenji ya Nzambi, tshipatshila tshietu tshinene ntshia kubambuluisha bua bafike ku dinanga Yehowa Tatu wetu ne ku dimulamata. Nunku bidi bikengela tuikale tuimanyina pa ngikadilu mimpe ya Yehowa, tutamba kuakula bua tshidiye yeye muena dîna dia Yehowa. (Bala Yeshaya 63:7.) Tuetu tulongesha mushindu eu, netuambuluishe bakuabu bua kunanga Yehowa ne kumutumikila bualu mbasue bua kumulamata.
20. Ntshinyi tshituakonkonona mu tshiena-bualu tshialonda?
20 Kadi mpindieu, ntshinyi tshitudi mua kuenza bua bikadilu bietu ne dilongesha dietu bileje bantu bimpe menemene ne: dîna dia Yehowa ndia tshijila ne bibakoke kudiye? Tshiena-bualu tshialonda netshiandamune lukonko elu.
MUSAMBU 2 Yehowa ke dîna diebe
^ tshik. 5 Bantu ne banjelu badi kumpala kua tshilumbu tshinene. Ntshilumbu kayi atshi? Ntshinyi tshidi tshivuija tshilumbu atshi tshinene nanku? Ntshinyi tshitudi petu mua kuenza bua bobu kutshikosa? Mandamuna a nkonko eyi ne a mikuabu ya buena eyi neakoleshe malanda etu ne Yehowa.
^ tshik. 18 Kudi misangu itukadi bambe mu mikanda yetu ne: dîna dia Yehowa kadiena ne bualu bua kubingishibua to, bualu kakuena muntu udi muele bukenji bua Nzambi bua kuikala ne dîna adi mpata to. Kadi bakatokesha bualu ebu bimpe mu tshisangilu tshia ku tshidimu tshia mu 2017. Mulombodi wakamba ne: “Mu mêyi makese, ki mbibi bua tuetu kuamba ne: tudi tusambila bua dîna dia Yehowa dibingishibue to, bualu mu bulelela bidi bikengela lumu luende lubingishibue.”—Tangila ndongamu wa ngondo wa 1/2018 mu jw.org® (mu Mfualansa). Buela mu BIBLIOTHÈQUE > JW TÉLÉDIFFUSION.
^ tshik. 62 DIUMVUIJA DIA TSHIMFUANYI: Diabolo ushiminyina Nzambi malu, wambila Eva mudi Nzambi muena dishima. Mu kupita kua bidimu, Satana mmuimanyine malongesha a dishima bu mudi dia ne: Nzambi udi ne tshikisu ne dia ne: kavua mufuke bantu to.
^ tshik. 64 DIUMVUIJA DIA TSHIMFUANYI: Muanetu kampanda ulombola dilonga dia Bible, utamba kuimanyina pa bumuntu bua Nzambi.
